እቭራውያኒዝ 2
2
ፈወነ 2
ወሽኑ ቃልድየንት ጥጝቅቀዝ ፃየነው
1እንዝ ማጥን ወሽነው ዊገይስ ቀርን ሊቫይነጘ እን ወሽነው ዊገድየንት ቐናዝን ጣጝቅቅሽነ ጥውሸኵ። 2ምላሰንድም መላካኒዝ ኣመካይነትዝ ድቍሽተው ቃልድየን ፀናቐው ኣቐውዝየ፣ ኣውማው ጝት ሸረው፣ ኣዚጠቅም የው እጅርድም ጥውሸው ቕፃር ለምረው ኣቐውዝየ፣ 3ይንስ እነየው ኽየው ቓድትድየንት ቸለል ይነውዝየ ኣወይን ኣምልጥንቅ? እኒን ቓድትድየንት በውገ ድቈውድ ኣደረ ጝቕም የጝ፤ ጝጊስ ወሸቍድም ይናጭስ ደደደድስ። 4እደረም ቈሽ ምልክታንዝ፣ ዲንቅሰቍ ዊቅዝመ ጝሉ ጝሉ ታምር ፃቨነውዝ፣ እኒዝጘም ጝፍቃዲዝጘ ኣድልድልሸው መንፈስ ቅዱስት ይውቲዝ ኣመካይነትዝ እን ዊገይዝቍዝ ሚዝርድኩ።
እየሱስ ጝፅንድ ተከው ኣቐጘ
5እደረ እኒን ነን ዊግትነው ተረው ኣልምድየንት መላካኒዝ ቅምሲየውም። 6ዊገድ ግን ላውድ ላየ ስፍረይስ፦
«ጝት ኻስቭተ እጅር ወረጘ የጝ?
ጝጭስ ጣጝቅቅሽተስ እጅር ዅር ወረጘ የጝ?
7መላካኒስ ዊቱዝ#2፡7 ዊንም ዊቱ ግርየዝ። እጥንዝሩ፤
ክቭርዝመ ሚዝየነዙ ዘውድዝ ጝኣውሪል ደፋሩ።
8እጝቅትቅም ጝልኰ ሳይል ቅምስሩ»
የው ሚዝርድኩ፤#መዝ. 8፡4-6። እደረ እጝቅትቅ ጝልኰ ሳይል ፃቭ ቅምሳንድ ጝጭስ ቅምሺየው ውረውረም እጀው፤ ኣነጚ ነንቱ ዚምኒዝ ቓልናንድ እጝቅቅ ጝጭስ ቅምሸጘ ቓልነለም። 9ዊገድ ግን መላካኒስ ዊቱዝ እጥንድ ዊነው እየሱስት ክርጘዙ ሚከረ ለምራንስቅ ነን ክቭርዝመ ሚዝየነዙ ዘውድዝ ጝኣውሪል ደፋሽ ቓልነኵን፤ ጘጝ እደረት ፃገዝ እጝቅ እቂዝቅ ማጥን ክርጘ ጣምኩ። 10እጝቅ ዊገድቅ ጝዝ፣ ጝጭስ፣ ፋጥርሸው ዘላልም ፅበው እደረ፣ ንቕፀቍ ዅል ክቭርል ነሳንስ ማጥን ጝታቓደነይዙ ሚስረተድየንት ሚከረዝ ፍፅም ፃቭጠ ጥውሸው ዊገ ኣቑ።
11እቅድ ቀድሰዊዝመ ቀድስሽተቍ እቂዝ ላው በተሰቪስ ችጝሸቍ ጛይ፤ ኣቓንስቅም እየሱስ ጛት ይፅን የው ጭጝጠ ኣይቭታውም። 12እንዝ ማጥንም ጘጝ፦
«ክሽድ ይፅንስ ድቍጭር፤
ኣኸቨ ማኽሊልም ክት ዚመዝ ሚዝየንዝጭር»#መዝ. 22፡22።
13ቈሽም፦
«ያን ጝዝ ተማምንጨኵን»#እሳ. 8፡17-18።
የኵ፤ እኒዝጘም፦
«እንወ ይስመ እደረ ይጭስ ነየቍ ዅልዝ» የኵ።
14ዅልድ ስየዝመ ብርዝ ፃየቍ እቅ ኣጛንስቅ እየሱስም ጝታጘ ስየዝመ ብርዝ ፃየው እጅር ኣቑ፤ እንም ክርጘይል ስልጣን ፃየው ዳቪለውስት ጝክርጘይዝ ዲምስሳንስ የጝ። 15እኒዝጘም ክርጘ ጐውተነውዝ ጝታእድሚድቅ ምሉዝ በርነይዝ እፁሽጝ ዊነቍድዛት ኻርነይ ፊስጠ የጝ። 16ጘጝ ተረውድ መላካንድዛት ከቭጠ ኣዪጝቀ ኣቭርኻምት ዚረድ ከቭጠ የጝ። 17ኣቓንስቅም እጝቅ ዊገይዝቅ ጝፅንድዛት ተክጠ ጥውሸው ኣቑ፤ እኒንት ፃቨውድም ሳቝረው፣ ኣምንሸው ካኽነጣነ ኻልቀ ኣቕ እደረት ኣግልግላንስመ እቂዝም ጝታኽጥያቲስ ስቝርት ችጝሳንስ ማጥን የጝ። 18ጘጝ ጝቕም ፊትንሻንድ ሚከረ ለምራንስቅ ፊትንሸቍድዛት ከቨነው ቸልጡ።
Currently Selected:
እቭራውያኒዝ 2: ኽምጣኣኪ
Highlight
Share
Copy
Want to have your highlights saved across all your devices? Sign up or sign in