YouVersion Logo
Search Icon

ኻወርየታኒዙ ሰቭ 27

27
ፈወነ 27
ባውሎስት ረውምየ ፊስጘጘ
1ጣልየን ትጐ ሚርክቭዝ ፊርነ ማጥን ዊስንሻንድ፤ ባውሎስስመ ላጥ እፁሸጢዝ ዩልየስ የነው ቂሳር ኣውግጠውስቱ ላዝ ኻልቀይዝ ኣስርክቭዝ። 2እስየት ባኽሪዝ ደርቸይዝቍ ወደቫኒል ፊረው ኣድራማጢስት ሚርክቪዝ ተሳፍርሽን ፊርኑን፤ ተሰለቅየ ፅበው ዊነው መቀደውንየቱ ኣርስጥረኰስም ይናጅቅ ዊኑ። 3ጛምርሲዝም ሲዱነ ችጝኑን፤ ዩልየስም ባውሎስስ ቸርነት ፃቭ ጝወደጃኒል ፊር ጝታእርዳተድየንት ለምርጠ ማጥን ፊቅዱ። 4ጝጊስም ጕን ፊግየድ በውዝ በው ጣዛ ዊናንስቅ ቈብረውስት ደስየትድየንት ማኽትን ዲቍኑን። 5ኪልቅየስመ ብንፍልየስት ጋቢዙ ባኽርድ ከርነት ግረ ሉቅየት ኻግሪዙ፦ «ሙረ» የነው ኻትመይል ችጝኑን። 6ላዝ ኻልቀድም ጝጊስ ጣልየን ፊረው እስክንድርየት ሚርክቭ ችጛንስቅ ይናት ጝግል ድዉው። 7ንቕፀቍ ግርቅም ዘገም ይና ፃጝን ጭጝቅዝ ቀኒደስ ችጝኑን፤ ፊግየድም በውዝ በው ፊራይነጘ ኪልክላንስቅ ስልምናት ጋቢዝ ፃቭን ቀርጢስት ማኽትን ፊርኑን። 8ጭጝቅዝም ጥግ ጥጊዝ ፃቭን ላስየት ኻትመይዝ ጋቢዝወ፦ «ቀስረይ ወደቭ» ይሽትረይ ስፍረየትል ችጝኑን።
9እክሰው ግርየም ጊነዝ ኣቢታንስቅ ፃሚዝ ግርየድ ዲቍ ዊኑ፤ እን ግርየይዝ ባኽርዝ ፃጘነው ቈሽ ኻደገ ዊናንስቅ ባውሎስ እቂዝ እንት የው ጣጝቅቅሱ። 10«እፈ እቅ ክታትርነ! ይጭሳ እን ጒደነድ ጭቓ ኻደገ ኣቐጘ እትለኵ፤ ኻደገድም፣ ሚርክቭዝመ ጝፃንሸቍ ጐዚል ጭቝ እዳቐው ኣይጝቀ፣ ይናርዅየይልቅ ችጘው የጝ» ዩ። 11ላዝ ኻልቀድ ግን ባውሎስት ምኽሪስ ሽ ሚርክቪዝ ኣዘተይዝመ ሚርክቪዝ ወነይዝ ዊግትጘውድየንት ኣምና ዊኑ። 12ጘጝ ወደቭድ ጫረዝ ሚቻው ኣቓንስቅ ንቕፀቍ እቅ ጝጊስ ጕጝ ሰምየን ምራቪዝመ ደቩቭ ምራቪዝ ትይዩ ችጝሸው ፊንቅየ የነው ወደቪል ችጝጝ ጫረድ ጝግል ዲቍስጥጘ በን።
ባኽሪል ማቨል ጐጘ
13ዊቱ ደቩቪዙ ፊግየ ጣዛንድም ጛይ ኻሊጘጘ ኣቐው ተኩዝ ወደቪስ ጕጝ ቀርጢስት ጋቢዝ ፃቭጝ ጥግ ጥጊዝ ዲቍ። 14ዊገድ ግን ጭቕጘም ዊኒጝቀ፦ «ኣውራቂስ» የነው ኣውለንፋስ ደስየትሸንቲስ ቍልቍለ ጊም ተሩ። 15ሚርክቭድም ማቨሊዝ ፃይሽ በውዝ በው ፊረነ ባንስቅ ዝም ይን ፊግየዝ ሸምሽን ፊርኑን። 16«ቂደ» የነይ ደስየትሸንስ ማኽትን ፃጝናንድ ሚርክቪዙ ታኰድየንት ዋቐ ልቕረዝ ቲርፍዝኑን። 17ሚርክቭኝጥድም ጀልቨድ ንየ ዊትርጝ ሚርክቪል ፊስጝ በርጝ ሚርክቭድ ፋይራየጘ ቀቭረዝ ጣጥምጝ እፅቍ፤ «ስርቲስ» የነው ሽነ ዝቨይል ሊቫየጘ ጐውትጛንስቅም ሚርክቪዙ ሸረድየንት ጊምዝጝ ፊግየይዝ ሸምሽጛ ፊር። 18ኣውለንፋስድም በርታቓ ፊራንስቅ ጛምርሲዝ ሚርክቪል ፃንሸው ጐዘድ ጊምዝጛ ማል። 19ሸወትረ ግርየይዝም ሚርክቪዙ ሸረድየንት ጊምዘናንስመ ክቢሰናንስ ኣግልግለቍ ጐዝድዛት በገዘ ጝታቕም ኒቅልጛ ባኽሪል ማል። 20ንቕፀቍ ግርቅም ኰረዝመ ፅግልውጥዝ ቓሊጝቀ ሳብጥናስቅ ፊግየድም በርታቓ ፊራንስቅ ነስየ ርዅየዝ ቲርፍንቅ የነው ቲስፈድ ሚኑኑን።
21እቅድም ውርቅ ኣረ ጣሚጝቀ ንቕፀቍ ግርቅ ሳብጥ፤ እንዝ ማጥን ባውሎስ ጕ ችብር፦ «እፈ እቅ ክታትርነ! ያን ድቈውድ ወሽርን ቀርጢስስ ጒርነቅ ኣቕርናን፣ እን ሚከረድቅ ችጝጠም ዊኒየው። 22ነንም ኣሽ ሚርክቭድ ጭቝ ቘይሽጡጚ ክታጊስ ላው እጅርም ድዛው ኣይዝዀጥን የር ማኽረኵን። 23እኒን ዲቈው ኻሪዝ ያን ጙ ኣቕ ኣምልከው እደረ እፃቐው መላክድ ይጋቢል ችብር፦ 24‹ባውሎስወ! ጐውተ! ቂሳርት በዊል ችብትረር የጝ፤ ክጅቅ ፃጘቍ እቅድዛትም እደረ ክማጥን የው ቲርፍዝኩን› ዩ። 25ኣቓንስቅም ነስየ ኣይዝዀጥን! እደረ እኒን ይጭስ ዊግተውድየንት ፋፅምጠጘድ ኣምነኵን። 26ኣነጚ ፊግየድ ላይ ደስየትል ፊስ ማልጠ የጝ» ዩ።
27ፅጭ ሲዘትረ ኻሪዝም ኣድርየት ባኽሪዝ እንጐስመ እድጐስ ገልታሽና ፃጝና ኻረ ግቨሪዝ ሚርክቭኝጥድዛይ ዝቨል ችጘው ተክ። 28እንዝ ማጥን ባኽሪዝ ጥልቀትድ ሊክየነው ቀቭረድየንት ሳ በርስጝ ቓልጛንድ ጥልቀትድ ኣርቨ ሚትር ኣጠ ኣቑ፤ ዊቱ ዊንጝ በርጝ እንደ ገነ ሊኪጛንድ ቈሽ ሰውርጝን ሚትር ኣጠ ኣቑ። 29ሚርክቭድም ቕርጘ ጅቅ ገጫሻየጘ ጐውትጝ ሚርክቪዝ እግረገይል ሲዘ መልኽቃን#27፡29 መልኽቅ፦ ሚርክቭ ኒንቅሻየጘ ባኽር ኣቒል ኣቕ ችኻሊዝጘ ጊትር ፃየው ብረት የጝ። ሳ ባኽሪል በርስ፤ ኻርድ ዲቍ ቅሸነ ተራንስም ፃልየነው ኪርም። 30ሚርክቭኝጥድም ሚርክቪስ ፍጝ ሰይጥጘ በንጝ ዊንጛንስቅ ሚርክቪዝ በዊዝጐቱ መልኽቃን ጊምዘቍ ተክጝ ሚርክቪል ዊነው ጀልቨድየንት ሳ ጊምዝ። 31ባውሎስ ግን፦ «እንዛይ ሚርክቭኝጥድ ሚርክቪል ዊኒጘውዝየ ክትን ቲርፋይርነቅም» የው ላዝ ኻልቀይዝመ ዊተድሪዝ ድቁ። 32እንዝ ማጥን ዊተድርድ ጀልቨየን እፁሽር ዊንደው ቀቭረድየንት ቅዝጝ ባኽሪል ሲፍራ እዳተ ማጥን በር።
33ቅሽጠ ጓንድም ባውሎስ ዅረ ዅጥጘ ማጥን እጝቅትቅ እንት ያ ጨዉ፦ «ፅጭ ሲዘ ግርቅ ምሉ ነንስ ነን ይርና ሊሚድርና ፃም ሳብጥርንኵርኑ። 34እንዝ ማጥን ኣለቀይጥን ኣረ ጣምጥን! ዅርነውዝየ ብርታት ችጝትርንቅ፤ ነስየ ክታግል ተረው ውረውረ ኻደገም እጀው።» 35እኒንት የው በር እጝቂዝቅ በዊል ሚድ ጒ እደረት ሚዝየንዙ፤ ኪልም ዀነው ኪርሙ። 36ኣይንድም እጝቅቅ በርታቕጝ ዀነው ኪርም። 37ሚርክቪል ዊነቅድም ጥቅለዝ ሊጘ ላዝ ላጝጥርጝን ዋልጠ እቅ ዊኑን። 38እጝቅቅ ዅጝ እቭትጘት ግረ ሚርክቭድ ፃንሽ ዊነው ዚርወድየንት ባኽሪል ማልጛ መውርድየንት ቀልዝ።
ሚርክቭድ ኪልድሸጘ
39ቅሻንድም ችጘው ብጣድየን ኣውል ኣቐጘ ኣርቒየቍም፤ ዊገድ ግን ደይ ደይድ ሽነዝ እቻቐው ሸውጣጥ ባኽር ቓልጝ ቸልሸው ኣቕሽ ሚርክቭድ ጝጐ ትክቭጝ ኣልስጥጘ በን። 40መልኽቃንድዛትም እክስጝ ባኽሪል ማል፤ ኣይንድም ቂዝፈነይዙ እፅወነ ቀቭረድ እክስ፤ በዊዙ ሸረድየንትም ፊግየይዝጐ ንየስ ሽጝ ባኽሪዝ ደርቸይዝጐ ፊር። 41ዊገድ ግን ሚርክቭድየን ቊልልሸው ሽነል ኣጝርሻንስቅ ቍልቍለ ደፋሹ፤ ሚርክቪዝ በዊዙ ኣካልድም ሽነይል ቂርቅርሽ ኒንቅጨቅ ዩ፤ እግርገይዙ ኣካልድ ግን ማቨልድ ጭቕጘ ጣዛ ዊናንስቅ ኪልድሸነው ኪርሙ። 42ኣይንድም ዊተድርድ እፁሸጢስ ላው እኳ በብ ፍ ኣምልጣየጘ ቁጥጘ ማኽርሽ። 43ላዝ ኻልቀድ ግን ባውሎስት ቓዝጠ በናንስቅ ጝታምኽርድ ለምርየውም፤ ኽሽስ በበነው ቸለቍድቅ ባኽሪስ ጊምጝ በብጛ ዝቨይል ከርጥጘ ማጥን ኣዙ። 44በበነው ቸላቍድ ቈሽ ሳጝቅጢዝመ ሚርክቪስ ክልድሸቍ ጣውልጢዝ ፃቭጝ ከርጥጘ ማጥን ኣዙ። እነይጝም እጝቅቅ ዳኽነዝ ዝቨይል ከር።

Highlight

Share

Copy

None

Want to have your highlights saved across all your devices? Sign up or sign in