1ቈረንተውስት እቂዝ 6
6
ፈወነ 6
ምመናን ጛስ ጛይ ኪሰሰኪስሽትጥጘ ጥውሻው ኣቐጘ
1ክታማኽሊስ ላውድ ጝፃምረይጅቅ ፃየው ጨቅን ዊናን ቅዱሳኒዝ በዊል ኣልሰነው በር ውር ቃጥ የጝ ዲፍር ኣምናቍ እቂዝ ተፋርድሽጠ ፊረውድ? 2ቅዱሳን ኣልሚል ፊርደቍ ኣጘጘ ኣርቓይርነቅመ? ኣልሚል ፊርድርነቅ ኣነውዝየ እደስለ ቀለው ዊገይል ፊርደነውዝ በቃቓይርነቅመ? 3እኳን ኣልሚዙ ገቨዳ መላካኒል እኳ ፊርድነቅ ኣነጘ ኣርቓይርነቅመ? 4ኣይነስየ እነየቍ ገቪዝቍዝ ተፋርድሽትርነ በንርናንድ ምእመናኒዝ ነቅሸቍ እቅድዛት ደጝጥ ፃቭርን ጐይስጥናይ! 5እኒንት የውድም ክታት ኣይቭስጨ የር የጝ፤ ስሪስቅ ክታማኽሊስ ክርስትያናንድዛት ኣርቅሰነው ቸለው ኣስክሰው እጅር እጀውመ? 6እደስለ ክርስትያንድ ጝዝንድየንት ኪስጠ ፍርድ ጝንል ፊርጠ ጥውሸውመ? ያውም ቃል ኣምናቊ እቂዝ በዊል የጝ።
7ነስየ ክታማኽሊል ኪሰኪስሽተነው ፅበውዝየ ውርጘ ተዋርድሽርነጘ ቓሊሰኵ፤ ቢድልሽርናንመ ቺዛወ? ኻጝሽትርናንስመ ቺዛወ? 8ክትን ግን ክታቕም ቢድልድርነኵ፤ ኻጝስርነኵም፤ ያውም ቃል ክታፅንድዛት የጝ። 9ጭቕ እቅ እደረት ምጝግስትድ ዊርሳቍ ኣጘጘ ኣርቓይርነቅመ? እን ዊገይዝ ኻጝሽትትርነ፤ ሰሰኝጥ፣ ጣወት ኣምልከቍ፣ ሸርሙጣን፣ ግቭረ ሰደውማን፣ 10ዊንም ቓፅጝ፣ ሰገቭጋቫን፣ እራቐጥ፣ ዛሸጥ፣ ቀመኝጥም እደረት ምጝስትድየንት ዊርሳቍም። 11ክታጊስ ላው ላውድ እነይርነቅ ዊንድርኑ፤ ነን ግን ኣደረ እየሱስ ክርስቶስት ሽⶔዝመ ይናኣምላክት መንፈስዝ ዊር ይርንኵርኑ፤ ቀድስሽትርንኵርኑ፤ ፃድቅርንምኵርኑ።
ሰውነትድ እደረስ ቀድሰነው
12«እጝቅ ዊገድቅ ይጭስ ፊቅድሽኩ፤» ኣነጚ እጝቅቅ ጣቅማውም፦ «እጝቅቅ ይጭስ ፊቅድሽኩ፤» ኣነጚ ውረውረቅ ይግል ሳልጥናውም።#1ቈረ. 10፡23። 13ቈሽም፦ «ዅረ ጊዝውዝ በንዘው የጝ፤ ጊዝውም ዅረ በነው የጝ» እደረ ግን ጝታቪልትቅ ድስጡ፤ ሰውነት ኣደረስ የጝጚ ሽርሙጥነዝም ኣየው፤ ኣደረም ሰውነትዝ የጝ። 14እደረ ኣደረት፣ ክርጘይስ ጒሰጘ ይናትም ቈሽ ጝኻይሊዝ ክርጘስ ጒስጡ።
15ክታሰውነትድ ክርስቶስት ሰውነቲዙ ኣካል ኣቐጘ ኣርቓይርነቅመ? እደስለ ክርስቶስት ሰውነትዙ ኣካል ክፍልድየንትመ ፊስ ሸርሙጣነ ሰውነቲጅቅ ላው ፃቭጫ? እረ ጥውሻውማ! 16ዊንስ ሸርሙጠ ጅቅ ኽርየው እጅር ጝርጅቅ ላው ስየ ኣቐጘ ኣርቓይርነቅመ? ምላሰንድም፦ «ጝታቪልም ላው ስየ ኣጘኵ» ይሽትኩ።#ዘፍ. 2፡24። 17ዊገድ ግን ኣደረ ጅቅ ተቫቭርሸው እጅር ጝጅቅ ላው መንፈስ ኣቐኵ።
18ሽርሙጥነይስ እክልጥን፤ እጅር ላየ ኽጥያትድየንትቅ ሰራሸውድ ጝሰውነቲዝም ኣየው፤ ሻርሙጠው እጅር ግን በገዘ ጝሰውነቲል ኽጥያት ሰራሸኵ። 19ኣየውጚ ክታሰውነትድ ክታኣቒል ፅበው መንፈስ ቅዱስት መቅደስ ጝን ኣቐጘ ኣርቓይርነቅመ? እን መንፈስድም እደረቲስ ለምትርነውድ የጝ፤ ክትንም ክታቕምስ ኣይርነቅም።#1ቈረ. 3፡16፤ 2ቈረ. 6፡16። 20ወየዝ ጅቭሽርንኵርኑ፤ እንዝ ማጥን ክታሰወነቲዝ እደረት ኪብርዝጥን።
Currently Selected:
1ቈረንተውስት እቂዝ 6: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
