1ቈረንተውስት እቂዝ 16

ፈወነ 16

እየሩሳልየምትቍ ምመናኒዝ ኣኽቭሸው እርዳተ

1ቅዱሳኒዝ ኣቐው ጊንዝቭ ፊሰነዊዙ ዊገይዝቍዝ፣ ገላትየትቍ ምከንጣኒዝ ይወው ትዛዚዝጘ ክትንም ጘጝት ፃቭጥን።#ረው. 15፡25-26። 2ጊንዝቭ ፊሰነውድ ያን ተጣንድ ኣቓየጘ ክታጊስ ኣውማውድቅ ጝኣቅሚዝጘ ሸወጪዙ በወትረ ግርየይዝ ፊሳ እቝርነ። 3ያን ተጣንድ ክትን ማርፅርነቍ እቂዝ ስቭዘነ ደብዳቢ ይው ክታይውትድየንት እየሩሳልየም ችጝዝጛንስ ማጥን እፃጭር። 4ያን ጛጅቅ ፊረነው በንዘው ተክ ይጭስ እትልሽም ይጅቅ ላብጠ ፊርጥቍ።

ባውሎስት እቅድድ

5ያን መቀደውንየቱ ፃቭ ዲቈነው እዳቐቅ ኣቓንስቅ፤ መቀደውንየ ችጘት ግረ ክታጐ ተጭር።#ኻወ. 19፡21። 6ኣውማው ፊጠው ስፍረይዝጐቅ ይጒደነዝ በንዘውድየንት ከቭርናንስ ማጥን ክታግል ፈዊጝቀ እዳቐቅም፤ ምናልቫችም ጫረድየንት ክታጅቅ ዲቍስጭር ኣጠት። 7ነን እግርምጝገደዝ ዲቋንድ ዋቕርጨ በነቅም፤ ኣደረ ፊቅድሽ ንቕፀቍ ኰር ክታጅቅ ሳብጨ ቲስፈ ፃቨኵን። 8ዊገድ ግን በኣለኻምሳይል#16፡8 ባለኻምሰ፦ ግሪኪዝ በንጠቈስጥየ ይሽታንድ፣ ኣይዅዳኒዙ ፈዝየ በልድ ዲቈው ኣኵርጝንትረ ግርየይዝ ኪብረው በል የጝ። ኣጢስ እፊሰውን ሳብጥጭር።#ዘሊ. 23፡15-21፤ ዘዳ. 16፡9-11። 9ምላሰንድም ኽየው ሰቭዙ ሚረ ይጭስ ቢትኩ፤ ንቕፀቍ ተቃውምሸቍም እኵ።#ኻወ. 19፡8-10።

10ጢመቲወስ ክታጐ ተርሽ ሰጋቒጝቀ ክታጅቅ ላብጠ ጐይጠ ፃቭጥን፤ ጘጝም ይጘ ኣደረት ሰቭድየንት ሰራሸው የጝ።#1ቈረ. 4፡17። 11ኣውማውቅ ጝት ነቂነ፤ ዲግተዝ ይጐ ዋጥራንስ ከቭጥን፤ ያንም ጝዋጥርንድየንት ይናፅኒጅቅ ኣርውጣ የጝ።

12ይናዝን ኣብሉስት ይናፅኒጅ ኣቕ ክታጐ ተራንስ ቐናዝ ጨው ዊኑን፤ ጘጝ ግን ነን ተርጠ በኒየውም፤ ጝጭስ ሚቸው ግርየይዝ ግን ተርጡ።

13ነቃጥን፤ እምንትዝ ፀናጥን፤ በርታጥን፤ ጣጝክርጥንም። 14እጝቅ ፃቭርነውድየንትቅ ፍቅርዝ ፃቭጥን።

15ይፅንወ! እስጢፋነውስት በተሰቭድ ኣካየስ በውጥ ክርስትያናን ኣጘጘ ቅዱሳንድዛት ኣግልግልጥጘ ጝታቕምት ይውጘጘ ኣርቕርነኵ።#1ቈረ. 1፡16። 16ጛት ተከቊዝ ጛጅቅም ኣግልግለውትዝ ዝላቐቊዝቅ ኣዚትርናንስ ማጥን ኪው ሸር ጨወኵን። 17እስጢፋነውስ፣ ፈርዱናጠስ፣ ኣካይቈስታይ ይጐ ተርጛንስቅ ዲስ የርኩን፤ ምላሰንድም ክትን እንል ይጅቅ እጅርነቅ ኣቕርናስቅ ይጭስ ጒድለውድየንት ጛይ እቻዝጝኵ። 18ይመንፈሲዝመ ክታመንፈሲዝም ፈውስጝኵ፤ እንዝ ማጥን እነየቍ እቅድ ኣርቕሽትጥጘ ጥውሸኵ።

ኻትሸነዙ ዲግተ

19እስየ ፅበቍ ምከንጣንድ ክታጭስ ዲግተ ኣልስጘኵ፤ ኣቂለስመ ብርስቅለስ ጝታጝኒል ፅብረይ ምከንሸንም ኪብረው ዲግተ ኣደረት ሽⶔዝ ኣልሰች።#ኻወ. 18፡2። 20እንል ፅበቍ ይናፅንድ እጝቅቅ ክታጭስ ዲግተ ኣልስጘኵ፤ ቀድስሽተው እምቝሽተነውዝ ክታስ ክታይ ዲምቅጭጥን።

21እኒን ዲግተድየንት በገዘ ይናኒዝ ፃፈርድ ያን ባውሎስ የጝ። 22ኣደረት ቀናው ፅብሽ እፂተው ኣነ፤ ኣደረወ! ለው። 23ኣደረ እየሱስት ፃገድ ክታጅቅ ኣነ። 24ይፍቅርድ ክርስቶስ እየሱስት ኣመካይነትዝ ክታእጝቅ ጅቅ ኣነ፤ ኣሚን።

Currently Selected:

1ቈረንተውስት እቂዝ 16: ኽምጣኣኪ

Highlight

Copy