1ቈረንተውስት እቂዝ 13
13
ፈወነ 13
እጝቂስቅ ዲቈው ይውትድ ፍቅር ኣቐጘ
1እቅዙ ቋቈዝመ መላካንዙ ቋቈዝ ዊግጣን፣ ፍቅር ግን እጀር ኣቐውዝየ ቓፀው ብረት፣ ዊንም ዀጭዀጭ የው ፀናፅሊዝጘ ኣቕኩን። 2ትንቪትዙ ይውት ፃቀር ኣቓን፣ ምስጢርድቅ፣ ኣርቕትድቅ፣ እጝቅትቅ ኣርቐር ኣቓን፣ ኣብቕድዛትም ኒቅል ማለው እምንት ፃቀር ኣቓን፣ ፍቅር ግን እጀር ኣቐውዝየ ጊነ የጝ።#ማቲ. 17፡20፤ 21፡21፤ ማር. 11፡23። 3እጝቅ ፃቀውድየንትቅ ድኽዝ ይዋን፤ ይሰውነትድየንትም ልየዝ ቃጥልሻንስ ማጥን ዲቍስ ይዋን፤ ፍቅር ግን እጀር ኣቐውዝየ ይጭስ ውርም ጣቅማው።
4ፍቅር ፃየው እጅር ታግሽተኵ፤ ቸርነትም ፃቨኵ፤ ፍቅር ፃየው እጅር ቀንያውም፤ ፍቅር ፃየው እጅር ማክኽሻውም፤ ኲራውምም። 5ፍቅር ፃየው እጅር ጥውሻው ዊገ ፃቫውም፤ ፍቅር ፃየው እጅር ይቕምስ ጭቝ ያውም፤ ፍቅር ፃየው እጅር ቈጣሻውም፤ ፍቅር ፃየው እጅር በደል እግዛውም። 6ፍቅር ፃየው እጅር እማን ጅቅ ዲስ የኵጚ ኣመፅዝ ዲስ ያውም። 7ፍቅር ፃየው እጅር እጝቅትቅ ቸለኵ፤ ዊትርቅ ኣምነኵ፤ ዊትርቅ ቲስፈ ፃቨኵ፤ እጝቅ ዊገይዝቅ ፀናቐኵ።
8ፍቅር ስሪስቅ ድዛውም፤ ትንቪት ኣቕሽ ሸርሽጡ፤ ጝሉ ጝሉ ቋቈዝ ዊግተነው ይውትም ኣቕሽ ሸርሽጡ፤ ኣርቕትም ኣቕሽ ሸርሽጡ። 9ኣርቕቲስ ኣርቕነውድ ግቨርድየንት የጝ፤ ትንቪቲስ ዊግትነውድም ግቨርድየንት የጝ። 10ዊገድ ግን ፍፅም ኣቐውድ ተራንድ ፍፅም ኣየውድየን ሸርሽጡ። 11ያን እፈርሲጝቀ እፈረይዝጘ ዊግጣ ዊኑን፤ እፈረይዝጘም ኻስቫ ዊኑን፤ እፈረይዝጘም ተመራምርጫ ዊኑን፤ ኽይቀር ኣቐት ግረ ግን እፈርሲጝቀቱ ዊገድየንት እርግፍ ሸር በጥኩን። 12ነን ቓልነውድ መስታዊትዝ ቓሊሽታንትጘ ድጝግዝግዘዝ የጝ፤ ኣይንድ ግን በውዝ በው ቓልንቅ፤ ያን ነን ኣርቐውድ ግቨርዝ የጝ፤ ኣይንድ ግን እደረ ይት ኣርቐዊዝ ቝጠ ኣርቕጭር።
13ነስየ እምንት፣ ቲስፈ፣ ፍቅር፣ እንዛይ ሻቘድ ፀናቕጝ ፅብጘኵ፤ ዊገድ ግን እንዛጊስቅ ዲቈውድ ፍቅር የጝ።
Currently Selected:
1ቈረንተውስት እቂዝ 13: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
