1ቈረንተውስት እቂዝ 11

ፈወነ 11

1ያን ክርስቶስት ተከድየንት ቲክናንትጘ ክትንም ይተከድየንት ቲክንጥን።#1ቈረ. 4፡16፤ ፍልብ. 3፡17።

ኣምልከነዊዙ ስረት

2እጝቅ ዊገይዝቅ ይጭስ ኻስቭርነቅ ኣቕርናንስቅ ይጊስ ለምትርነው ክንድጝድየንትም ቐናዝርን ፃይርናንስቅ ሚዝየንዘኵን። 3ዊገድ ግን እጝቅ ግልወይዝቅ ኣውርድ ክርስቶስ፣ እውነት ኣውርድም ግልወ፣ ክርስቶስት ኣውርድም እደረ ኣቐነውድ ኣርቕትርነ በነኵን። 4ጝኣውርድ ቍውር ፃልየው ዊንም ትንቪት ዊግተው ኣውማው ግልወድቅ፣ ጝኣውር ኣቐው ክርስቶስት ኣዋርዘኵ። 5ጝርኣውርድ ቍውሪጝቀ ፃልይረይ ዊንም ትንቪት ዊግትረይ እውነቅ፣ ጝርኣውር ኣቐው ጝርጕርየት ኣዋርዘች፤ ጝርኣውርድም ላይትረይ ኣቕር እጊተች። 6እውነ ጝርኣውድ ቍውራይ ኣረውዝየ ጝርፅቭቀድ ቀቭሽትርነ፤ ጝርፅቭቀድ ቀቨሽተነው ዊንም ላይተነው ኒውር ተክ ጝርጭስ እትልሽ ግን ጝርኣውርድ ቍውትርነ። 7ግልወ እደረት ሚልኪዝመ ክቭሪዝ ቓሊሰው ኣቓንስቅ ጝኣውርድ ቍውርጠ ጥውሻውም፤ እውነ ግን ግልወዙ ክቭርድ ቓሊስረይ ጚ።#ዘፍ. 1፡26-27። 8እውነ ግልወይስ ችጝሽችጚ ግልወ እውነቲስ ችጝሺየውም። 9ቈሽም እውነ ግልወዝ ፋጥርሽችጚ ግልወ እውነስ ፋጥርሺየውም።#ዘፍ. 2፡18-23። 10እንዝ ምላሰንዝ፣ መላካኒዝ ምላሰንዝም፣ እውነ ስልጣንዝ ስርል ኣረጘ ቓሊሰው ምልክት ጝርኣውሪል ፃቭርነ። 11ኣደረ ጅቅ ፃይነው ኽቭሪዝ ግን እውነ ግልወ እጀው፣ ግልወም እውነት እጀው ኣቓውም። 12እውነ ግልወይስ ችጝሽረጘ ግልወም እውነቲስ እዅርሸኵ፤ ዊገድ ግን እጝቅት ችጝሸነድ እደረ የጝ።

13እስቲ ክታቕም ፊርድጥን፤ እውነ ጝርኣውርድ ቍውሪጝቀ እደረ ትጐ ፃልይተ ጥውሸኵመ? 14-15ግልወ ጝፅቭቀድ ሊጊሰነው ኒውር ኣቐጘ፣ እውነ ግን ጝርፅቭቀድ ሊጊሰነው ክቭር ኣቐጘ ተፈጥረውድ እኳ ክንሰኵ ኣየውቀ፤ እውነ ግን ጝርፅቭቀድ ጝርቕምት ሺፊንዳንስ ማጥን ጝርጭስ ይውሽትኩ። 16ነስየ እን ዊገይዝቍዝ ኣውማውቅ ተከራክርሽጠ በንሽ ይንም ኣነ እደረት ምከንጣንድ እኒስ ቲተው ልምድ እጅነቅም።

ቅዱስ ቍርቫኒዙ ስረት

(ማቲ. 26፡26-29፤ ማር. 14፡22-25፤ ሉቃ. 22፡14-20)

17ዊገድ ግን ኣኽቭሽርናንድ ጭቓዝጚ ጣቅመውዝ ኣየው ኣቓንስቅ እኒስ ቲክነው ትዛዝድ ነቃንድ ክታት ሚዝየንዛም ኣየው። 18እጝቂስቅ በውገ ምመናኒጅቅ ኣኽቭሽርናንድ ክታማኽሊል ቲተቲትን ፀበጘ ወጭኩን፤ እንም ኣጠጘ ዊትውዝ ኣምነኵን። 19ክታማኽሊስ ትክክል ኣቐው ክንድጝድየንት ቲክነቍድዛይ ኣርቕሽትጛንስ ማጥን እኒን ቲትንድ ክታማኽሊል ፅብጠጘ ግድ የጝ። 20ላው ኣቕርን ኣኽቭሽርናንድ ዅርነውድ ኣደረት ድረይም ኣየው። 21ምላሰንድም ላውድ ላየድየንት ሊሚዲጝቀ ጝሚድየንት ዀኵ፤ ላውድ ግድርዳ ላየድ እራቐኵ። 22ኣየውጚ ውረ ዀነቍ ዝየነቍ ጝንጥመ እጅርነቀ? ዊንስ እደረት ምመናንድ ነቀነውዝመ ውረውረ እጀቍ ድኽድዛት ኣይቭስርና? ነስየ ወረጘ ይጫ? እኒን ዊገይዝቍዝ ክታት ሚዝየንዝጨመ? ስሪስቅ ሚዝየንዘቅም።

23ያን ኣደረቲስ ለምጠውድየንት ክታጭስ ዲቍስ ነቅኩን፤ ኣደረ እየሱስ ዲቍሽት ይውሽተይ ኻርሸንስ ሚድየንት ጕይ፣ 24በርከት ግረ ቈርስ፦ «እኒን ክታቺ ኣቐው ይስየድ የጝ፤ እኒንት ይት ኻልየነዝ ፃቭጥን» ዩ። 25እኒዝጘም ድረይዝ ግረ ፅወድየንት ጕይ፦ «እኒን ፅወድ ይብሪዝ ኣቐው ኣይር ኪዳን የጝ፤ እንዝ ማጥን ፅወይስ ዝይርናንድ እኒንት ይት ኻልየነዝ ፃቭጥን» ዩ።#ዘፀ. 24፡6-8፤ የር. 31፡31-34። 26እኒን ሚድየንት ዅርናንድ እኒን ፅወድየንትም ዝይርናድቅ ኣደረ ተርጢስቅ ጝክርጘድየንት ዊግትርነኵ።

27ነስየ ኣውማው እጅር ጥውሻው ኣቕ ፅባ እኒን ሚድ ዅሽ፣ ዊንም ኣደረት ፅወድ ዝይሽ፣ ኣደረት ስየይዝመ ብሪዝ ቀልዛንስቅ ጝዝ ዋቕርሽጡ። 28እንዝ ማጥን ኣውማው እጅር እኒን ሚስ ዀነዊስ፣ እኒን ፅወይስም ዝየነዊስ በዊል ጝቕምት ሚርምርነ። 29ኣውማው እጅር ኣደረት ስየድየንት ወረጘ ኣቐጘ ኣርቒጝቀ ዅሽ፣ ፅወድየትም ዝይሽ፣ ጝቕምት ፊርድሰውድየንት ዀኵ፤ ዝየኵ። 30ክታማኽሊስ ላው ላውድ ዝላጘውድ፣ ፅዊትጘውድም፣ ላው ላውድ ቈሽ ክርጘውድ እንዝ ምላሰንዝ የጝ። 31ይናቕምት ሚርምርናን ግን ይናግል ፊርድሻውም ዊኑ። 32ዊገድ ግን ኣደረ ይናት ፊርዳንድ ኣልሚጅቅ ኲንንሻይነጘ፣ ነን ይናት ጋስፀኵ።

33እንዝ ማጥን ይፅንወ! ዅትርነ ኣኽቭሽርናንድ ክታስ ክታይ ሊመሊምድሽትጥን። 34ኣኽቭሽርናንድ ፍርድዝ ኣቓየጘ ኣውማው ግድርደው እጅር ፅብሽ ጝጝኒስ ዅነ፤ እዳቐው ዊገድየንት ቈሽ ተጣንድ ዲጝግግጭር።

Currently Selected:

1ቈረንተውስት እቂዝ 11: ኽምጣኣኪ

Highlight

Copy