ኀበ ሰብአ ሮሜ 2

ምዕራፍ 2

በእንተ ዘይግዕዝ ቢጾ

1 # ማቴ. 7፥2፤ ዮሐ. 8፥7። ዕጓለ እመሕያው በምንትኑ ዘትትዋሥኦ ለመኰንነ ጽድቅ ሶበ አንተ ዝኰ ዘትግዕዝ በላዕለ ባዕድ ሶበ ለሊከ ትገብር ዝኰ ዘትጸልእ በላዕለ ቢጽከ አኮኑ ርእሰከ ትግዕዝ እስመ ለሊከ ትገብሮ። 2ነአምር ከመ ጽድቅ ኵነኔሁ ለእግዚአብሔር ዘያመጽእ መቅሠፍተ ላዕለ እለ ይገብሩ ዘንተ ከመዝ። 3ኀልዮ እስኩ ዕጓለ እመሕያው ለዝንቱ ለእመ ብከ ኀበ ታመሥጥ እምኵነኔሁ ለእግዚአብሔር ሶበ ለሊከ ትገብሮ ለዝኩ ዘትግዕዝ በላዕለ ባዕድ ወዘትጸልእ። 4#1ጴጥ. 3፥15። ትትሔዘብኑ ታስተዐብዶ ለእግዚአብሔር በብዝኀ ምሕረቱ ወበትዕግሥቱ ወበኦሆ ብሂሎቱ ላዕሌከ ኢተአምርኑ ከመ ምሕረቱ ለእግዚአብሔር ኪያከ ያገርር ኀበ ንስሓ። 5ወባሕቱ በአምጣነ ታጸንዕ ልበከ ወኢትኔስሕ ትዘግብ ለከ መቅሠፍተ ለአመ ይበጽሐከ ኵነኔሁ ለእግዚአብሔር። 6#ኢሳ. 40፥10፤ ኤር. 17፥10። እስመ ውእቱ ይፈድዮ ለኵሉ በከመ ምግባሩ በኵነኔ ጽድቁ።

በእንተ ተዐጋሥያን ወከሓድያን

7ወለእለሰ ተዐገሡ በምግባር ሠናይ ወየኀሥሡ ክብረ ወስብሐተ ውእቱኒ ይሁቦሙ ሕይወተ ዘለዓለም። 8#2ተሰ. 1፥8-10። ወለእለሰ ከሓድያን ወዓላውያነ ጽድቅ ወመፍቀርያነ ዐመፃ ፍዳሆሙ መቅሠፍት ወመንሱት። 9#1፥16፤ 3፥9። ወቍጥዓ ወገዓር ወምንዳቤ ለነፍሰ ኵሉ ሰብእ ዘእኩይ ምግባሩ እመኒ አይሁዳዊ ወእመኒ አረማዊ። 10#1ተሰ. 1፥6። ክብር ወስብሐት ወሰላም ለኵሉ ዘሠናይ ምግባሩ እመኒ አይሁዳዊ ወእመኒ አረማዊ። 11#ግብረ ሐዋ. 10፥34፤ 1ጴጥ. 1፥17። እስመ ኢያደሉ እግዚአብሔር ለገጸ ሰብእ። 12እስመ ኵሎሙ እለ ፈድፈደ እምሕግ አበሳሆሙ ፈድፈደ እምሕግ ኵነኔሆሙ ወኵሎሙ እለ ዘእንበለ ሕግ አበሳሆሙ ዘእንበለ ሕግ ኵነኔሆሙ።

በእንተ እለ ይፈቅዱ ይጽደቁ በአጽምዖ መጻሕፍት

13 # ማቴ. 7፥21፤ 1ዮሐ. 3፥7። ቦኑ በአጽምዖ መጻሕፍት ይጸድቁ በቅድመ እግዚአብሔር አኮኑ ዳእሙ በገቢሮቱ ይጸድቁ። 14#ግብረ ሐዋ. 10፥35። አሕዛብኒ እለ አልቦሙ ሕግ ይሠርዑ ሎሙ ሕገ ወየሐግጉ ሎሙ ለሊሆሙ ወይገብሩ ዘበሕጎሙ። 15ወያሬእዩ ገቢረ ሕግ እንዘ ጽሑፍ ውእቱ ውስተ ልቦሙ ወይትዐወቅ እምግባሮሙ ወያርሰሐስሖሙ ልቦሙ ወይቀልዮሙ። 16#መክ. 12፥14፤ ማቴ. 25፥31። ወየአምሩ ከመ አልቦ ዘይብሉ ወዘይወቅሱ አመ የሐትቶሙ እግዚአብሔር ለዕጓለ እመሕያው ዘየኀብኡ ወዘይከብቱ ውስተ ልቦሙ በከመ መሀርኩ በእንተ ኢየሱስ ክርስቶስ።

በእንተ ዘለባዕድ ይሜህር ወለሊሁ ኢይገብር

17ወሶበ አንተ አይሁዳዊ ዘተዐርፍ በኦሪትከ ወትትሜካሕ በእግዚአብሔር። 18ወተአምር ፈቃዶ ወትፈልጥ ዘይኄይስ ወምሁር አንተ ኦሪተ። 19#ማቴ. 15፥14። ወትትአመን በርእስከ ከመ አንተ መርሖሙ ለዕዉራን ወብርሃኖሙ ለእለ ውስተ ጽልመት። 20ወመጥብቢሆሙ ለአብዳን ወመምህሮሙ ለሕፃናት ወትትሜሰል ጻድቀ ወተአምር ሕገ ኦሪት በዘትጸድቅ። 21ወእፎኑ እንከ ዘኢትሜህር ርእሰከ ዘለባዕድ ትሜህር ኢትስርቁ ትብል ወለሊከ ትሰርቅ። 22#መዝ. 49፥16-23፤ ማቴ. 23፥3-4። ኢትዘምዉ ትብል ወለሊከ ትዜሙ ወተሐውር ኀበ ብእሲተ ብእሲ ወታስቈርር ጣዖተ ወለሊከ ትሰርቅ ቤተ መቅደስ። 23ወትትሜካሕ በኦሪት ወለሊከ ዐላዊሃ ለኦሪት ወታስተሐቅሮ ለእግዚአብሔር።

በእንተ እለ ይፀርፉ ላዕለ ስመ እግዚአብሔር

24 # ኢሳ. 52፥5፤ ሕዝ. 36፥20-23፤ 1ጢሞ. 6፥1። ወናሁ «በእንቲኣክሙ ይፀርፉ አሕዛብ ላዕለ ስመ እግዚአብሔር» በከመ ጽሑፍ። 25#ኤር. 4፥4፤ 9፥25-26። ግዝረትሰ ትበቍዐከ ለእመ ገበርከ ሕገገ ኦሪት ወእመሰ ኢገበርከ ሕገገ ኦሪት ግዝረትከ ቍልፈተ ትከውነከ። 26#ገላ. 5፥6። ወለእመሰ እንዘ ቈላፍ አንተ ወዐቀብከ ሕገገ ኦሪት ቍልፈትከ ግዝረተ ትከውነከ። 27ወይኄይሰከ ትንበር ቍልፈትከ እንተ ተፈጥረት ምስሌከ እምትትገዘር ወትዕሉ ሕገ ኦሪት ወይኄይስ እምኔከ እምግዙር ዘተዐሉ ሕገ ኦሪት ዝኩ ቈላፍ ዘይገብር ሕገ ኦሪት። 28ቦኑ ለዐይነ ሰብእ ይትየሀዱ ወቦኑ ለአድልዎ ይትገዘሩ አኮኑ በክዱን ይትየሀዱ። 29#ዘዳ. 30፥6፤ ቈላ. 2፥11። ወግዝረትሰ ግዝረተ ጽላሌ ልብ በመንፈስ ወአኮ በትምህርተ መጽሐፍ ከመ ትትአኰት በኀበ እግዚአብሔር እምትትአኰት በኀበ ዕጓለ እመሕያው።

Currently Selected:

ኀበ ሰብአ ሮሜ 2: ሐኪግ

Highlight

Copy