ኀበ ሰብአ ሮሜ 14

ምዕራፍ 14

በእንተ ዘድኩም ሃይማኖቱ

1 # ኢሳ. 35፥3-4፤ 15፥1፤ 1ቆሮ. 8፥9። ወለዘኒ ድኩም ሃይማኖቱ ጹርዎ ወአጽንዕዎ ወኢትግበሩ ለአድልዎ። 2#ዘፍ. 1፥29፤ 1ቆሮ. 10፥25። ዘሰ የአምን ከመ ኵሉ ብዉሕ ሎቱ ኵሎ ለይብላዕ ወዘሰ ይናፍቅ ሐምለ ለይሴሰይ። 3#ቈላ. 2፥16፤ ዮሐ. 10፥14፤ 2ጢሞ. 2፥19። ወዘኒ ይበልዕ ኢይመንኖ ለዘኢይበልዕ ወዘኒ ኢይበልዕ ኢይግዐዞ ለዘይበልዕ እስመ ለኵሎሙ እግዚአብሔር አእመሮሙ። 4#ማቴ. 7፥1፤ ያዕ. 4፥11-12። ምንትኑ አንተ ዘትግዕዝ ነባሬ ባዕድ እንዘ ለእግዚኡ ይቀውም እመኒ ወድቀ ለእግዚኡ ይቀውም ወይክል እግዚአብሔር አቅሞቶ። 5እስመ ቦ ዘይትሔረም እምዕለት ዕለተ ወቦ ዘይትሔረም በኵሉ መዋዕል ወባሕቱ ለኵሉ በከመ አዘዞ ልቡ። 6#1ቆሮ. 10፥30-32። ዘሂ ተሐረመ በበዕለቱ ለእግዚአብሔር ተሐረመ ወዘሂ ተሐረመ በኵሉ መዋዕል ለእግዚአብሔር ተሐረመ ወዘሂ በልዐ ለእግዚአብሔር በልዐ ወየአኵቶ ለእግዚአብሔር ወዘኒ ኢበልዐ ለእግዚአብሔር ኢበልዐ ወየአኵቶ ለእግዚአብሔር።

በእንተ ሐዪው ለእግዚአብሔር

7ወአልቦ እምውስቴትነ ዘለርእሱ የሐዩ ወዘለርእሱ ይመውት። 8#1ተሰ. 5፥10። ወእመኒ ሐየውነ ለእግዚአብሔር ነሐዩ ወእመኒ ሞትነ ለእግዚአብሔር ንመውት እመኒ ሐየውነ ወእመኒ ሞትነ ለእግዚአብሔር ንሕነ። 9#ግብረ ሐዋ. 10፥42። ወበእንተዝ ሞተ ክርስቶስ ወሐይወ ከመ ይኰንን ሕያዋነ ወሙታነ። 10#ግብረ ሐዋ. 17፥31፤ ማቴ. 25፥31-32። ምንትኑ አንተ እንከ ዘትግዕዝ ቢጸከ ወምንትኑ አንተ ዘትሜንን ቢጸከ እስመ ሀለወነ ኵልነ ንብጻሕ ቅድመ መንግበረ ምኵናኑ ለክርስቶስ። 11#ኢሳ. 45፥23፤ ፊልጵ. 2፥10። እስመ ከመዝ ይቤ እግዚአብሔር «ሕያው አነ እስመ ሊተ ይሰግድ ኵሉ ብርክ ወሊተ ይገኒ ኵሉ ልሳን።» 12#ገላ. 6፥5፤ ማቴ. 12፥36። ናሁ ተዐውቀ ከመ ሀለወነ ኵልነ ንትሐተት በኀበ እግዚአብሔር። 13#ማቴ. 18፥6። ወኢንግዐዝ እንከ ቢጸነ ወዘንተ ዳእሙ ነኀሊ በዘኢንግዕዝ ቢጸነ። 14#ግብረ ሐዋ. 10፥15፤ ቲቶ 1፥15። ወአአምር፥ ወእትአመን በእግዚእነ ኢየሱስ ከመ አልቦ ዘይማስን በእንቲኣሁ ለሙሱን ዳእሙ ኵሉ ይማስን። 15#1ቆሮ. 8፥11-13። ወእመሰ እንበይነ መብልዕ ተሐይሶ ለቢጽከ አልብከኬ ተፋቅሮ ቦኑ እንበይነ መብልዕ ይትኀጐል ዝኩ ዘበእንቲኣሁ ሞተ ክርስቶስ። 16#ዘፍ. 1፥31። ኢትፅርፉ እንከ ላዕለ ሠናይ ዘጸገወነ እግዚእነ። 17#ሉቃ. 17፥1፤ 1ቆሮ. 8፥8። እስመ ኢኮነ መንግሥተ እግዚአብሔር መብልዐ ወመስቴ ዘእንበለ ጽድቅ ወሰላም ወፍሥሓ በመንፈስ ቅዱስ። 18ወዘሰ ከመዝ ይትቀነይ ለክርስቶስ ሥሙር በኀበ እግዚአብሔር ወኅሩይ በኀበ ሰብእ። 19#12፥18፤ 15፥2፤ መዝ. 34፥14። ወይእዜኒ ንትልዋ ለሰላም በዘይትሐነጽ ቢጽነ። 20ወኢንስዐር ግብረ እግዚአብሔር እንበይነ መብልዕ ወባሕቱ ኵሉ ንጹሕ ለንጹሓን ወእኩይሰ ለሰብእ በኑፋቄ በሊዕ። 21#1ቆሮ. 8፥13፤ 14፥20፤ ግብረ ሐዋ. 10፥15። ይኄይስ ኢበሊዐ ሥጋ ወኢሰትየ ወይን እምአዕቅፎ ቢጽ። 22#1ዮሐ. 3፥21። ወእመኒ ብከ ሃይማኖት አጽንዕ ርእሰከ በተአምኖትከ ቅድመ እግዚአብሔር ወብፁዕ ዘይዘልፍ ርእሶ በዘረከበ አእምሮ። 23#ቲቶ 1፥15፤ ዕብ. 11፥6። ወዘሰ ይናፍቅ ለእመ በልዐ ይትኴነን እስመ ኢኮነ በአሚን ወኵሉ ዘይከውን ዘእንበለ አሚን ኀጢአት ወጌጋይ ውእቱ።

Currently Selected:

ኀበ ሰብአ ሮሜ 14: ሐኪግ

Highlight

Copy