ኀበ ሰብአ ገላትያ 4

ምዕራፍ 4

በእንተ ትርሲተ ውሉድ

1ወባሕቱ እብል አምጣነሰ ሕፃን ውእቱ ወራሲ አልቦ ዘይኄይስ እምነባሪ እንዘ እግዚእ ውእቱ ለኵሉ። 2ወባሕቱ ላዕለ እምሔው ወላዕለ መገብት ይትዐቀብ እስከ ይበጽሕ ዕድሜ ዘዐደሞ አቡሁ። 3#3፥23፤ ቈላ. 2፥20-23። ከማሁ ንሕነኒ አመ ሕፃናት ንሕነ ተቀነይነ ለስሒተ ዝንቱ ዓለም። 4#ኤፌ. 1፥10። ወአመ በጽሐ ዕድሜሁ ፈነወ እግዚአብሔር ወልዶ ወተወልደ እምብእሲት ወገብረ በሕገ ኦሪት። 5#3፥13። ከመ ይሣየጦሙ ለእለ ውስተ ኦሪት ከመ ንርከብ ትርሲተ ውሉድ። 6#ሮሜ 8፥15-17። ወከመሰ ውሉድ አንትሙ ናሁ ፈነወ እግዚአብሔር መንፈሰ ወልዱ ውስተ ልብክሙ ውእቱ ዘትጼውዑ ወትብሉ አባ ወአቡየ። 7እንከሰኬ ውሉድ አንትሙ ወኢኮንክሙ አግብርተ ወእመሰኬ ውሉድ አንትሙ ወራስያኒሁኬ ለእግዚአብሔር አንትሙ በኢየሱስ ክርስቶስ።

በእንተ ርኂቅ እምአማልክት

8ወባሕቱ ትካትሰ በኢያምሮትክሙ ተቀነይክሙ ለእለ ኢኮኑ አማልክተ። 9ወይእዜሰ አእመርክምዎ ለእግዚአብሔር ወፈድፋደ ውእቱ አእመረክሙ እፎ ካዕበ ኀበ ዝኩ ድኩም ወጽኑስ ጣዖተ ዝ ዓለም ትፈቅዱ ፈጠራ ትትቀነዩ ሎሙ። 10#ቈላ. 2፥16-23። ወትትዐቀቡ ዕለተ ወወርኀ ወጊዜ ወዓመታተ። 11እፈርሀክሙ እንዳዒ ለእመ ለከንቱ ጻመውኩ በእንቲኣክሙ ኩኑ ከማየ እስመ አነሂ ከማክሙ ኮንኩ።

በእንተ አብፅዖተ ውሉድ

12አኀዊነ አስተበቍዐክሙ እስመ ኢገፋዕክሙኒ። 13#1ቆሮ. 2፥3። ተአምሩ ከመ በአምጣነ ድካመ ኀይልየ መሀርኩክሙ ቀዲሙ። 14ወእንዘሂ አሐምም ኢተቈጣዕክሙኒ ወኢመነንክሙኒ በሥጋየ ወተወከፍክሙኒ ከመ መልአከ እግዚአብሔር ወከመ ክርስቶስ ኢየሱስ። 15አይቴኑ አብፅዖትክሙ ይእዜ አነ ሰማዕትክሙ ከመ ሶበ ይትከሀለክሙ አዕይንቲክሙ መሊሐክሙ እምወሀብክሙኒ። 16#አሞ. 5፥10። ጸላኤኑ ኮንኩክሙ ሶበ መሀርኩክሙ ጽድቀ። 17#1፥7። ወእሉሰ ይቀንኡ ላዕሌክሙ ወአኮ ለሠናይ ዳእሙ ይዝግሑክሙ ይፈቅዱ ከመ ትቅንኡ ላዕሌሆሙ። 18ሠናይኬ ከመ ትቅንኡ ለገቢረ ሠናይ ኵሎ ጊዜ ወአኮ ዳእሙ በሀልዎ ዚኣየ ኀቤክሙ። 19#1ቆሮ. 4፥15። ደቂቅየ እለ ዳግመ አሐምም ብክሙ እስከ አመ ያስተርኢ ክርስቶስ ውስተ ልብክሙ። 20ወእፈቅድ አሀሉ ኀቤክሙ ይእዜ ወእዌልጥ ቃልየ እስመ አኀጥእ ዘእብል በእንቲኣክሙ። 21#3፥23። ትብሉኑ በሕገ ኦሪት ነሀሉ ወኢትሰምዕዋኑ ለኦሪት። 22#ዘፍ. 16፥15፤ 21፥2። እስመ ጽሑፍ ውስቴታ ከመ አብርሃም ክልኤተ ደቂቀ ወለደ አሐደ እምዕቅብቱ ወአሐደ እምአግዓዚት። 23#ሮሜ 9፥7-9። ወባሕቱ ካልእ ልደቱ ለዘእምዕቅብቱ ሕገ ሰብእ ተወልደ ወዘሰ እምአግዓዚት በዘአሰፈዎ። 24#5፥1፤ ሮሜ 8፥15። ወዝ ውእቱ አምሳለ ክልኤቱ ሥርዓት ወአሐቲሰ እምደብረ ሲና ተወልደት ለቅኔ ወይእቲሰ አጋር። 25ወሲናሰ ደብር ውእቱ በብሔረ ዐረብ ወትትናጸር ምስለ ኢየሩሳሌም እንተ በታሕቱ ምድራዊት ወትትቀነይ ምስለ ደቂቃ። 26#ዕብ. 12፥22። ወኢየሩሳሌምሰ እንተ ላዕሉ አግዓዚት ይእቲ ወይእቲ እምነ። 27#ኢሳ. 54፥1። ጽሑፍ «ትትፌሣሕ መካን እንተ ኢትወልድ ወትትሐሠይ ወትኬልሕ እንተ ኢተአምር ማሕምመ እስመ ብዙኅ ውሉዳ ለመዓስብ እምእንተ ባቲ ምት።» 28#ሮሜ 9፥7። ወንሕነሰ አኀዊነ ውሉደ ተስፋ አምሳለ ይስሐቅ። 29ወበከመ ዘበሕገ ሥጋ ተወልደ ሰደዶ ለዘበመንፈስ ተወልደ ከማሁ ይእዜኒ። 30#ዘፍ. 21፥10-12። ወባሕቱ ምንተ ይቤ መጽሐፍ «ስድዳ ለአመት ምስለ ወልዳ እስመ ኢይወርስ ወልደ አመት ምስለ ወልደ አግዓዚት።» 31#3፥29። ወንሕነሰ ይእዜ አኀዊነ ኢኮነ ውሉደ አመት ዘእንበለ ዘአግዓዚት እስመ ክርስቶስ አግዐዘነ።

Currently Selected:

ኀበ ሰብአ ገላትያ 4: ሐኪግ

Highlight

Copy