ኀበ ሰብአ ገላትያ 2

ምዕራፍ 2

በእንተ ካልእት ዕርገቱ ውስተ ኢየሩሳሌም

1ወእምድኅረ ዐሠርቱ ወአርባዕቱ ዓመት ዐረጉ ካዕበ ኢየሩሳሌም ምስለ በርናባስ ወነሣእክዎ ለቲቶ። 2ወዐረጉ በዘአስተርአየኒ ወነገርክዎሙ ዘከመ መሀርኩ ወሰበኩ ለአሕዛብ ባሕቲትየ ለእለ ይትሔዘቡኒ ከመ ለከንቱ እረውጽ ወእትባደር። 3ወቲቶሰ ዘምስሌየ እንዘ አረማዊ ውእቱ ኢያገበርክዎ ይትገዘር። 4#ግብረ ሐዋ. 15፥24። በእንተ ቢጽ ሐሳውያን እለ ተባውኡነ ከመ ያስተሐይጽዋ ለግዕዛንነ ዘረከብነ በኢየሱስ ክርስቶስ ከመ ይቅንዩነ። 5#3፥1። እለ ኢነሐስቦሙ ወኢከመ ምንትኒ ኢተቀነይነ ሎሙ አሐተሂ ሰዓተ ከመ ይጽናዕ በኀቤክሙ ጽድቀ ትምህርት። 6#ግብረ ሐዋ. 10፥34። ወእለሰ ይብሉ መኑ ከማነ እፎ ኮኑ እሙንቱ ትካት ኢያጽሕቀኒ እንግር እስመ እግዚአብሔር ኢያደሉ ለገጸ ሰብእ ወእሉሰ በርእሶሙ አልቦ ዘወሰኩኒ ምንተኒ። 7#ግብረ ሐዋ. 13፥46። ዘእንበለ ዳእሙ አእሚሮሙ ከመ ተአመነኒ ትምህርትየ በኀበ አሕዛብ እለ ኢተገዝሩ በከመ ትምህርቱ ለጴጥሮስ በኀበ አይሁድ እለ ተገዝሩ። 8ወውእቱ ዘአርድኦ ለጴጥሮስ በመልእክቱ ዘመንገለ ግዝረተ አይሁድ አርድአኒ ሊተኒ ውስተ ቍልፈተ አሕዛብ። 9#ዮሐ. 1፥42-43። ወአእሚሮሙ ጸጋሁ ዘወሀበኒ ያዕቆብ ወኬፋ ወዮሐንስ እለ ይብልዎሙ አዕማድ እሙንቱ የማኖሙ መጠዉኒ ምስለ በርናባስ ከመ ንሳተፍ ምህሮ አሕዛብ ወእሙንቱ ይሑሩ ኀበ አይሁድ ወንሕነኒ ኀበ አረሚ። 10#ግብረ ሐዋ. 11፥29-30፤ 12፥25። ዳእሙ ከመ ንዘከሮሙ ለነዳያን ወበእንተዝ ጽሕቁ እግበሮ ለዝንቱ።

በእንተ ተቃውሞቱ ኬፋሃ

11ወአመ መጽአ ኬፋ አንጾኪያ ተቃወምክዎ ቅድመ ገጹ እስመ ግእዝዎ። 12#ግብረ ሐዋ. 11፥3። እስመ ዘእንበለ ይምጽኡ ዕደው እምኀበ ያዕቆብ በልዐ ምስለ አረሚ ወአመ መጽኡ ተግኅሦሙ እስመ ፈርሆሙ ለእለ እምአይሁድ። 13ወበዝኁ እለ ገብኡ ኀበ ዝንቱ ግብር እምአይሁድ ወበርናባስኒ ኀብረ ምስሌሆሙ ወአድለወ ሎሙ። 14ወሶበ ርኢኩ ከመ ኢያርትዑ እግሮሙ ኀበ ጽድቀ ትምህርት እቤሎ ለኬፋ በቅድመ ኵሎሙ ሶበ አንተ እንዘ አይሁዳዊ አንተ በሕገ አረሚ ትነብር ወአኮ በሕገ አይሁድ እፎ እንከ ታጌብሮሙ ለአረሚ ይትየሀዱ። 15ወእንዘ ንሕነ እለ እምፍጥረትነ አይሁድ ወአኮ እምአሕዛብ ኃጥኣን። 16#ግብረ ሐዋ. 15፥10-11፤ ሮሜ 3፥4-25፤ ኤፌ. 2፥8። እስመ ነአምር ከመ ኢይጸድቅ ሰብእ በገቢረ ሕገገ ኦሪት ዘእንበለ ዳእሙ በአሚን በኢየሱስ ክርስቶስ ወንሕነኒ አመነ በኢየሱስ ክርስቶስ ወበሃይማኖትነ ቦቱ ንጸድቅ ወአኮ በገቢረ ሕገገ ኦሪት እስመ በገቢረ ሕገገ ኦሪት ኢይጸድቅ ኵሉ ዘነፍስ። 17ወእመሰ እለ ንፈቅድ ንጽደቅ በክርስቶስ ኮነ ከመ ኃጥኣን ክርስቶስ እንከ ላእከ ኀጢአትኑ እንጋ ሐሰ። 18ወእመሰኬ ዝኰ ዘነሠትኩ ኪያሁ ክመ አሐንጽ ዐላዌ ረሰይኩ ርእስየ። 19#ሮሜ 6፥7። አንሰኬ እምሕግ ዘቀዳሚ ሞትኩ ከመ እሕየው በካልእ ሕግ ለእግዚአብሔር። 20#1፥4፤ ዮሐ. 14፥19-20። ወተሰቀልኩ ምስለ ክርስቶስ ሕይወትየሰ ኀልቀት ወበሕይወተ ክርስቶስ ሀለውኩ ወዘኒ ዘአሐዩ ይእዜ በሥጋየ በአሚን በወልደ እግዚአብሔር አሐዩ ዘአፍቀረኒ ወመጠወ ርእሶ በእንቲኣየ። 21ወኢይክሕድ ጸጋ እግዚአብሔር እመሰኬ በገቢረ ሕገገ ኦሪት ይጸድቁ ለከንቱኬ ሞተ ክርስቶስ።

Currently Selected:

ኀበ ሰብአ ገላትያ 2: ሐኪግ

Highlight

Copy