ግብረ ሐዋርያት 24

ምዕራፍ 24

ዘከመ አስተዋደይዎ ለጳውሎስ በቅድመ ፊልክስ

1 # 14፥6። ወአመ ኀሙስ ዕለት ወረደ ሐናንያ ሊቀ ካህናት ምስለ ረበናት ወአሐዱ ዐቃቤ ነቢብ ዘስሙ ጠርጠሉስ ወአስተዋደይዎ ለጳውሎስ ኀበ መልአክ። 2ወአቅረበ ሎሙ ወአኀዘ ይንግር ጠርጠሉስ ወይቤ። 3ብዙኀ ሰላመ አድማዕነ በመዋዕሊከ ወሠናየ ኮነ ንብረቶሙ ለሕዝብ በጥበብከ በኵሉ ወበኵለሄ ወረከብነ ሥርዐተከ እንዘ ትትአኰት በኀበ ኵሉ ኦ ፊልክስ ክቡር። 4ወባሕቱ ከመ ኢያጽሕብከ ፈድፋደ አጽምዐኒ ወብቍዐኒ ኅጹረ ነገረ እንግርከ። 5ረከብናሁ ለዝ ብእሲ ይነብብ ፅርፈተ ወይገብር ማዕሌተ ወየሀውክ ኵሎ አይሁደ በኵሉ በሐውርት ወይሜህር ካሕደ ዘሕዝበ ናዝራውያን። 6#21፥28። ወአርኰሰ ቤተ መቅደስ ወአኀዝናሁ ወፈቀድነ ኰንኖቶ በከመ ሕግነ። 7ወመጽአ ሉስዮስ መልአክ ወአድኀኖ እምእደዊነ በብዙኅ ግብር ወፈነዎ ኀቤከ። 8ወአዘዞሙ ለእለ ይትዋቀሥዎ ይምጽኡ ኀቤከ ወዘኒ አስተዋደይናሁ ኵሎ ሀለወከ ታእምር እምኀቤሁ ሐቲተከ ከመ አማን ውእቱ። 9ወተሰጥዉ አይሁድ ወይቤሉ አማን ከመዝ ውእቱ።

በእንተ አውሥኦተ ጳውሎስ

10ወቀጸቦ መልአክ ለጳውሎስ ከመ ይትናገር ወይቤ ጳውሎስ አነ አአምር ከመ እምብዙኅ ዓመታት መኰንኖሙ አንተ ለዝ ሕዝብ ወተአምር ግዕዞሙ ወተኃሥሦቶሙ። 11ወይእዜኒ እነግረከ ተፈሢሒየ ቅስትየ ዘሀለወከ ታእምር ከመ ኢየአክል ዐሡረ ወሰኑየ ዕለተ እምዘዐረጉ ኢየሩሳሌም እስግድ። 12ወኢረከቡኒ እንዘ እትዋቀሥ ኢበምኵራብ ወኢምስለ መኑሂ ወኢእንዘ አሀውክ ሕዝበ ኢ በምኵራብ ወበቤተ መቅደስ ወኢ በሀገር። 13ወኢይክሉ አብጽሖተ በኵሉ ዘያስተዋድዩኒ በቅድሜከ።

በእንተ ሃይማኖት ወትንሣኤ ሙታን

14ወባሕቱ አአምነከ እንበይነ ዘይብሉኒ ይሜህር ካሕደ አንሰ አመልኮ ለእግዚአብሔር እንዘ እትአመን በኵሉ ግብር ዘጽሑፍ ውስተ ኦሪት ወነቢያት። 15#ዳን. 12፥2፤ ዮሐ. 5፥28-29። ወእሴፈዎ ለእግዚአብሔር ከመ እሙንቱ ይትአመኑ ከመ ሀለዎሙ ይትነሥኡ ምዉታን ጻድቃን ወኃጥኣን። 16#23፥1። ከማሁ አነሂ እትአመኖ ለእግዚአብሔር በጥቡዕ ልብ በቅድመ እግዚአብሔር ወበቅድመ ሰብእ በኵሉ ጊዜ።

በእንተ ፈጽሞተ ሕግ

17 # 11፥29፤ ገላ. 2፥10። ወእምድኅረ ብዙኅ መዋዕል ወዓመታት መጻእኩ ለኀበ ሕዝብየ ከመ እግበር ምጽዋተ ወከመ አዕርግ መሥዋዕተ። 18#21፥27። ወረከቡኒ እሙንቱ በምኵራብ እንዘ አነጽሕ ርእስየ ወኢረከቡኒ እንዘ እትጋዐዝ ወእትላኰይ ወአልቦ ዘሆኩ ሕዝበ።

በእንተ ስምዐ አይሁድ

19ወሀለዉ አይሁድ እለ መጽኡ እምእስያ ወይእዜኒ ግበር ይምጽኡ ኀቤከ ከመ ያስተዋድዩኒ። 20ወእመ አኮ ነዮሙ እሉሂ ይንግሩ ጽድቀ እመቦ ዘሰምዑ ዘአበስኩ አነ ወእመኒ ቦ ዘርእዩ ዘገፋዕኩ በዘአምጽኡኒ ኀበ ምኵናን ዘኀቤከ። 21#23፥6። ወአልቦ እኩይ ዘእንበለ አሐቲ ትምህርት ዘመሀርኩ ቀዊምየ በማእከሎሙ በብሂለ የሐይዉ ምዉታን ዘረከበኒ ዝ ተኰንኖ በኀቤከ ዮም።

በእንተ አውሥኦተ ፊልክስ

22 # 23፥26። ወፊልክስሰ የአምር ከመ እምትካት ይትቃረኑ አይሁድ ምስለ ሕግ ወትምህርት ዘሕዝበ ክርስቲያን ወከመ አይሁድ መጻርርቲሃ ለሃይማኖት ወበእንተዝ የውሆሙ ወይቤሎሙ እንከሰኬ ወሪዶ ሉስዮስ መኰንን ነሐትት ከመ ናእምር ወንጠይቅ ነገረክሙ። 23#27፥3። ወአዘዞ ለሐቤ ቤተ ሞቅሕ ከመ ኢያጽንዖ ለጳውሎስ ወያንብሮ ውስተ መርሕብ ወኢያጽብብ ላዕሌሁ ወኢይክልኦ ለአሐዱሂ እምእለ የአምርዎ ሶበ ይመጽኡ ይትለአክዎ።

በእንተ ዘጸውዖ ለጳውሎስ ዳግመ

24ወእምድኅረ ኅዳጥ መዋዕል ነበረ ፊልክስ ምስለ ዱርሳሌም ብእሲቱ አይሁዳዊት ወለአከ ወጸውዖ ለጳውሎስ ወሰምዕዎ ቃላተ ወትምህርታተ በእንተ አሚን በኢየሱስ ክርስቶስ። 25ወሶበ ነገሮሙ በእንተ ጽድቅ ወሕይወት ወበእንተ ኵነኔ ዘለዓለም ወደይን ወፍትሕ ወርትዕ ዘይከውን በዕለተ ኵነኔ ፈርሀ ፊልክስ እምዝንቱ ወይቤሎ ለጳውሎስ ይእዜሰኬ ሑር ወሶበ ብሕትኩ እልእክ ዘይጼውዐከ።

በእንተ ዘኀለየ ፊልክስ

26ወመሰሎ ለፊልክስ ከመ ይሁቦ ጳውሎስ ወይሔልዮ ንዋየ ይኅድጎ ወበእንተዝ ወትረ ይጼውዖ ወይትናገሮ። 27#25፥14፤ 25፥9። ወሶበ ኀለፈ ክልኤቱ ዓመት ተስዕረ ፊልክስ ወመጽአ መካነ ሢመቱ ካልእ መኰንን ዘስሙ ፊስጦስ ወፈቀደ ፊልክስ ያድሉ ለአይሁድ ገሃደ ወበእንተዝ ኀደጎ ለጳውሎስ ውስተ ቤተ ሞቅሕ።

Currently Selected:

ግብረ ሐዋርያት 24: ሐኪግ

Highlight

Copy