ግብረ ሐዋርያት 15

ምዕራፍ 15

በእንተ ቢጽ ሐሳውያን

1 # ገላ. 5፥2፤ ዘሌ. 12፥3። ወቦ እለ ወረዱ እምብሔረ ይሁዳ ወመሀርዎሙ ለሕዝብ ወይቤልዎሙ እምከመ ኢተገዘርክሙ በሕገ ሙሴ ኢትክሉ ሐዪወ። 2#11፥30፤ ገላ. 2፥1። ወተሀውኩ ሕዝብ ፈድፋደ ወተዋቀሥዎሙ ለጳውሎስ ወለበርናባስ ወመከሩ ከመ ይፈንውዎሙ ለጳውሎስ ወለበርናባስ ወለቢጾሙኒ ኀበ ሐዋርያት ወቀሲሳን እለ በኢየሩሳሌም በእንተዝ ነገር። 3ወተፈኒዎሙ እምቤተ ክርስቲያን በጽሑ ፊንቄ ወሰማርያ ወነገርዎሙ ዘከመ ተመይጡ አሕዛብ ወገብሩ ዐቢየ ፍሥሓ ምስለ ኵሎሙ ቢጾሙ።

በእንተ ብጽሐቶሙ ኢየሩሳሌም

4 # 14፥27። ወበጺሖሙ ኢየሩሳሌም ተቀበልዎሙ ቤተ ክርስቲያን ወሐዋርያት ወቀሲሳን ወዜነውዎሙ ኵሎ ዘከመ ገብረ ሎሙ እግዚአብሔር በውስተ አሕዛብ። 5ወቦ እለ ተንሥኡ እምሕዝበ ፈሪሳውያን ቢጽ እለ አምኑ ወይቤልዎሙ ርቱዕ ይትገዘሩ ወነአዝዞሙ ይዕቀቡ ሕገ ሙሴ።

ጉባኤ ሐዋርያት ቀዳሚት

6ወአንገለጉ ሐዋርያት ወቀሲሳን ከመ ይርአዩ ዘይገብሩ በእንተዝ ነገር። 7ወእምድኅረ ተዋቀሥዎሙ በዐቢይ ጋዕዝ ተንሥአ ጴጥሮስ ወይቤሎሙ ስምዑ አኀዊነ ለሊክሙ ተአምሩ ከመ እምትካት ኀረየኒ እግዚአብሔር ከመ አስምዖሙ ቃለ አፉየ ለአሕዛብ ወትምህርተ ወንጌሉ ወይእመኑ። 8#11፥15። ወእግዚአብሔር ማእምረ ልብ ሰማዕተ ኮኖሙ ወወሀቦሙ መንፈሰ ቅዱሰ ከማነ። 9#10፥34። ወኢፈለጦሙ እምኔነ አንጺሖ ልቦሙ በሃይማኖት። 10#ገላ. 3፥10፤ 5፥1፤ ሉቃ. 11፥46። ወይእዜኒ ኢታመክርዎ ለእግዚአብሔር ወኢታስክምዎሙ አርዑተ ዲበ ክሣውዲሆሙ ለአሕዛብ ዘኢክህልነ ጸዊሮቶ ኢንሕነ ወኢአበዊነ። 11#ገላ. 2፥16፤ ኤፌ. 2፥4-10። ዳእሙ ከመ ንሕየው በጸጋ እግዚእነ ኢየሱስ ክርስቶስ ንትአመን ወከማሁ እሙንቱሂ። 12ወሶቤሃ አርመሙ ኵሉ ሕዝብ ወአጽምዕዎሙ ለጳውሎስ ወለበርናባስ እንዘ ይነግሩ ኵሎ ዘገብረ ሎሙ እግዚአብሔር ተአምረ ወመንክረ በውስተ አሕዛብ።

በእንተ ተሰጥዎተ ያዕቆብ

13 # 21፥18። ወእምድኅረ አርመሙ ተሰጥወ ያዕቆብ ወይቤ ስምዑ አኀዊነ። 14#11፥4-18። ስምዖንሂ ነገረ ዘከመ አቅደመ ተሣሀሎ እግዚአብሔር ለአሕዛብ ወነሥአ ሕዝበ እምውስቴቶሙ ለስሙ። 15ወየኀብሩ ቃለ ነቢያት በዝንቱ በከመ ይብል መጽሐፍ። 16#አሞ. 9፥11-12። «ወእምድኅረዝ አገብኣ ወአሐንጻ ለቤተ ዳዊት ዘወድቀት ወእነድቅ መዝበራ። 17ከመ ይኅሥሥዎ ለእግዚአብሔር እለ ተርፉ ዕጓለ እመሕያው ወኵሎሙ አሕዛብ እለ ተሰምየ ዲቤሆሙ ስምየ ይቤ እግዚአብሔር ዘገብረ ዘንተ።» 18#ሮሜ 1፥8። ወይትዐወቅ ለእግዚአብሔር ዘእምፍጥረተ ዓለም። 19ወይእዜኒ እብለክሙ ኢታክብዱ ላዕለ አሕዛብ እለ ተመይጡ ኀበ እግዚአብሔር። 20#ዘፍ. 9፥4፤ ዘሌ. 3፥17። ዳእሙ አዝዝዎሙ ይርሐቁ እምዘ ይዘብሑ ለአማልክት ወእማውታ ወደም ወእምዝሙት ወዘይጸልኡ ለርእሶሙ ኢይግበሩ ዲበ ቢጾሙ። 21#13፥15። ወሙሴሂ ቦ እምቀዲሙ ዘይሰብክ ሎሙ በበአህጉር ወያነብብዎ በመኳርብት በኵሉ ሰናብት።

በእንተ መልእክተ ሐዋርያት

22ወእምዝ ኀብሩ ሐዋርያት ወቀሲሳን ወኵሉ ሕዝብ ከመ ይኅረዩ እምውስቴቶሙ ዕደወ ዘይፌንዉ አንጾኪያ ምስለ ጳውሎስ ወበርናባስ ወኀረዩ ይሁዳሃ ዘተሰምየ በርስያን ወሲላስሃ ዕደወ ሊቃውንተ በውስተ ቢጾሙ። 23ወጸሐፉ በእደዊሆሙ መልእክተ እንተ ትብል ከመዝ እምልኡካን ወቀሲሳን ለአኀው ለእለ በአንጾኪያ ወሶርያ ወቂልቅያ አኀዊነ እለ አምኑ እምውስተ አሕዛብ ሰላም ለክሙ ወትፍሥሕት። 24#ገላ. 2፥4። እስመ ሰማዕነ ከመ ቦ እለ ወፅኡ እምኔነ ወሆክዋ ለነፍስክሙ በነገር እንዘ ይብሉ ተገዘሩ ወዕቀቡ ሕገ ኦሪት ዕደው እለ ኢአዘዝናሆሙ ወኢበአሐቲኒ እምዝንቱ ነገር ዘይቤሉክሙ። 25ወርኢነ እምድኅረ ተጋባእነ ኵልነ በአሐዱ ምክር ወኀቢረነ ኀረይነ ዕደወ ዘንፌኑ ኀቤክሙ ምስለ አኀዊነ በርናባስ፥ ወጳውሎስ። 26ዕደው እለ መጠዉ ነፍሶሙ በእንተ ስሙ ለእግዚእነ ኢየሱስ ክርስቶስ። 27ወፈነውነ ይሁዳሃ ወሲላስሃ ወእሙንቱ ያጤይቁክሙ በቃሎሙ ዘንተ። 28እስመ ኀብረ መንፈስ ቅዱስ ምስሌነ ከመ ኢናክብድ ወኢንወስክ ባዕደ ዘእንበለ ዳእሙ ንኤዝዘክሙ ዘንተ ትኅድጉ በግብር። 29ወኢትብልዑ ዝቡሐ ለአማልክት ማውታ ወደመ ወትርኀቁ እምዝሙት ወዘትጸልኡ ለርእስክሙ ኢትግበሩ ዲበ ቢጽክሙ ወለእመ ዐቀብክሙ ነፍሰክሙ እምእሉ ምግባራት ትሄልዉ በሰላም ዳኅነ ሀልዉ።

በእንተ እለ ተፈንዉ እምኀበ ሐዋርያት

30ወተፈኒዎሙ እሙንቱ ወረዱ አንጾኪያ ወአስተጋብኡ ሕዝበ ወመጠውዎሙ መጽሐፈ መልእክት። 31#13፥48። ወአንቢቦሙ ተፈሥሑ ዐቢየ ፍሥሓ ወተናዘዙ። 32#11፥27፤ 13፥1። ወአጽንዑ አኀወ በነገር ዘተርፈ በቃሎሙ ወመሀርዎሙ ይሁዳ ወሲላስ እስመ ነቢያት እሙንቱ ወአጽንዕዎሙ ለቢጾሙ በቃሎሙ። 33ወጐንድዮሙ ፈነውዎሙ በሰላም ቢጾሙ ኀበ ልኡካን። 34ወአጥብዐ ሲላስ ይንበር ህየ። 35ወጳውሎስ ወበርናባስ ጐንደዩ አንጾኪያ ወመሀሩ ወሰበኩ ቃለ እግዚአብሔር ምስለ ባዕዳን ብዙኃን።

በእንተ ሐውጾተ አኀው

36ወእምድኅረ ኅዳጥ መዋዕል ይቤሎ ጳውሎስ ለበርናባስ ንሠወጥ እንከሰ ወነሐውጾሙ ለኵሎሙ ቢጽነ በኵሉ አህጉር እለ መሀርኖሙ ቃለ እግዚአብሔር ወናእምር ዘከመ እፎ ሀለዉ። 37#12፥12-25። ወፈቀደ በርናባስ ይንሥኦ ለዮሐንስ ዘተሰምየ ማርቆስ። 38#13፥13። ወኢፈቀደ ጳውሎስ ይንሥኦ ምስሌሆሙ እስመ ኀደጎሙ እንዘ እሙንቱ በጵንፍልያ ወሖረ ወኢመጽአ ምስሌሆሙ ውስተ ግብር። 39ወበእንተዝ ተማዕዑ ወተፋለጡ ዘዘዚኣሆሙ በርናባስ ነሥኦ ለማርቆስ ወነገደ ቆጵሮስ። 40ወጳውሎስ ኀረዮ ለሲላስ ወሖረ ወአማሕፀንዎ ቢጹ በጸጋ እግዚአብሔር። 41ወዖደ ሶርያ ወቂልቅያ ወአጽንዐ አብያተ ክርስቲያናት።

Currently Selected:

ግብረ ሐዋርያት 15: ሐኪግ

Highlight

Copy