ኀበ ሰብአ ቆሮንቶስ 2 4

ምዕራፍ 4

በእንተ መልክእት ሐዋርያዊት

1 # 3፥6። ወበእንተ ዝንቱ እስመ ብነ ዝንቱ መልእክት በከመ ምሕረቱ ዘጸገወነ ኢንትሀከይ ወኢንትቈጣዕ። 2#1ተሰ. 2፥4። አላ ንኅድጎ ለምግባረ ኀፍረት ዘኅቡእ ወኢንሑር በትምይንት ወኢንትመየኖ ለቃለ እግዚአብሔር ወናቅም ርእሰነ በጽድቅ ገሃደ እንበይነ ግዕዘ ኵሉ ሰብእ በቅድመ እግዚአብሔር። 3#1ቆሮ. 1፥18። ወእመኒ ክዱን ትምህርትነ ክዱን ውእቱ ለሕርቱማን ወለኑፉቃን በዝንቱ ዓለም። 4#ዕብ. 1፥3። እስመ ጸለሎሙ ልቦሙ እግዚአብሔር አምላክ ዘለዓለም ከመ ኢይርአዩ ብርሃነ ትምህርተ ሰብሐተ ክርስቶስ ዘውእቱ አርኣያሁ ለእግዚአብሔር። 5#1፥24። ወአኮ ለርእስነ ዘንሰብክ ዘእንበለ ለእግዚአብሔር በእንተ ኢየሱስ ክርስቶስ እግዚእነ ወለክሙሰ አቅነይነ ርእሰነ በእንተ ኢየሱስ ክርስቶስ። 6#ዘፍ. 1፥3፤ ዮሐ. 1፥18፤ 14፥8-9። እስመ እግዚአብሔር ዘይቤ ይሥርቅ ብርሃን ውስተ ጽልመት ውእቱ አብርሀ ውስተ ልብነ ብርሃነ አእምሮ ስብሐቲሁ በገጹ ለኢየሱስ ክርስቶስ።

በእንተ መዝገብ ዘውስተ ንዋየ ልሕኵት

7 # 5፥1፤ 1ቆሮ. 2፥5። ወብነ ዝንቱ መዝገብ ውስተ ንዋየ ልሕኵት ከመ ይኩን ዕበየ ኀይል ዘእምኀበ እግዚአብሔር ወአኮ ዘእምኀቤነ። 8#1፥8፤ 7፥5። እንዘ በኵሉ ነሐምም ኢንትመነደብ ንትሜነንሂ ወኢነኀሥር። 9#መዝ. 36፥24-25። ንሰድደሂ ወኢንትገደፍ ንጼዐርሂ ወኢንትኀጐል። 10#ሮሜ 8፥17። ወዘልፈ ንጸውር ሞቶ ለክርስቶስ በሥጋነ ከመ ይትዐወቅ ሕይወቱ ለክርስቶስ በላዕለ ዝንቱ ነፍስትነ መዋቲ። 11#መዝ. 43፥22፤ ሮሜ 8፥36። እስመ ንሕነ ዘነሐዩ ወትረ ንትሜጦ ለሞት በእንተ ኢየሱስ ክርስቶስ ከመ ሕይወቱኒ ለኢየሱስ ይትዐወቅ በላዕለ ነፍስትነ መዋቲ። 12#1ቆሮ. 4፥9። ወይእዜሰ ጸንዐ በላዕሌነ ሞት እንዘ ሕይወት ኀቤነ። 13#መዝ. 115፥1። ወብነ አሐዱ መንፈስ ዘሃይማኖት በከመ ይቤ መጽሐፍ «አመንኩ በዘነብኩ» ወንሕነኒ አመነ በዘነበብነ። 14#ግብረ ሐዋ. 3፥15። ወነአምር ከመ ዘአንሥኦ ለኢየሱስ ክርስቶስ እግዚእነ ያነሥአነ ኪያነሂ ምስሌሁ ወያቀውመነ ምስሌክሙ ኀቤሁ። 15#ዮሐ. 14፥12፤ ሮሜ 5፥15። እስመ ኵሉ በእንቲኣክሙ ከመ ትፈድፍድ ጸጋሁ በላዕለ ብዙኃን ወይብዛኅ አኰቴቱ ለስብሐተ እግዚአብሔር።

በእንተ ብእሲ ዘአፍኣ ወዘውስጥ

16 # 1ጴጥ. 4፥1፤ ኤፌ. 3፥16። ወበእንተዝ ኢንትቈጣዕ ወኢንትሀከይ እስመ ዘእንተ አፍኣነ ብእሲ በላዪ ወዘእንተ ውስጥነሰ ይትሔደስ ኵሎ አሚረ። 17#ሮሜ 8፥18። እስመ ሕማምነ ዘለሰዓት ቀሊል ክብረ ወስብሐተ አፈድፊዶ ይገብር ለነ። 18#ሮሜ 8፥24-25። እስመ ኢንሴፎ ዘያስተርኢ አላ ዘኢያስተርኢ እስመ ዘያስተርኢ ዓለም ኀላፊ ውእቱ ወዘሰ ኢያስተርኢ ቀዋሚ እስከ ለዓለም ውእቱ።

Currently Selected:

ኀበ ሰብአ ቆሮንቶስ 2 4: ሐኪግ

Highlight

Copy