ኀበ ሰብአ ተሰሎንቄ 1 5

ምዕራፍ 5

በእንተ ነገረ ምጽአት

1 # ማቴ. 24፥34። ወበእንተሰ ዕድሜሁ ወዕለቱ ወጊዜሁ አኀዊነ ኢትፈቅዱ ንጽሐፍ ለክሙ። 2#ማቴ. 24፥42-44፤ 2ጴጥ. 3፥10፤ ራእ. 3፥3፤ 16፥15። ለሊክሙ ተአምሩ ጥዩቀ ከመ ዕለተ እግዚእነ ትመጽእ ከመ ምጽአተ ሰራቂ ሌሊተ ከማሁ ይከውን ምጽአቱ። 3#ኤር. 6፥14፤ 8፥11፤ ሉቃ. 21፥34-35። አመ ይብሉ እለ ይክሕዱ ኪያሁ ከመ ውስተ ዳኅን ወሰላም እሙንቱ ወህየ ግብተ ይመጽኦሙ ተሠርዎ ከመ ፅንስት እንተ ይመጽኣ ማሕምም ወኢይክሉ አምስጦ። 4#ኤፌ. 4፥8። ወአንትሙሰ አኀዊነ ኢሀለውክሙ ውስተ ጽልመት ከመ ይርከብክሙ ውእቱ ዕለት ከመ ሰራቂ። 5#ሮሜ 13፥11-13፤ ኤፌ. 5፥9። እስመ ኵልክሙ ውሉደ ብርሃን አንትሙ ወውሉደ መዓልት ወኢኮንክሙ ውሉደ ሌሊት ወኢውሉደ ጽልመት። 6ወኢንኑም እንከ ከመ እልኩ አላ ንንቃህ በኅሊናነ ወንትጋህ ወንጥበብ። 7እስመ እለ ይነውሙ ሌሊተ ይነውሙ ወእለሂ ይሰክሩ ሌሊተ ይሰክሩ። 8#ኢሳ. 59፥17፤ ኤፌ. 6፥14-17። ወንሕነሰ እንዘ ውሉደ መዓልት ንሕነ ንንቃሕ ወንልበስ ልብሰ ኀጺን ዘሃይማኖት ወዘተፋቅሮ ወንትቀጸል ጌራ ተስፋ መድኀኒት። 9#2ተሰ. 2፥14። እስመ ኢረሰየነ እግዚአብሔር ለመንሱት ዘእንበለ ለሕይወት ወለመድኀኒት በእግዚእነ ኢየሱስ ክርስቶስ፤ 10#ሮሜ 14፥8-9፤ 4፥14። ዘሞተ ለነ ቤዛነ እመኒ ንቁሃን ንሕነ ወእመኒ ንዉማን ምስሌሁ ነሐዩ ኵልነ።

በእንተ ፍጻሜ ሰላም ወናዝዞ

11 # ዕብ. 10፥24-25። ወይእዜኒ አስተፍሥሑ ቢጸክሙ በእንተዝ ወይሕንጽ አሐዱ አሐዱ ካልኦ ዘከመ ትገብሩ ዓዲ። 12#1ቆሮ. 16፥15፤ 1ጢሞ. 5፥17፤ ዕብ. 13፥7-17። ወናስተበቍዐክሙ አኀዊነ ዑቅዎሙ ለእለ ይጻምዉ በውስቴትክሙ ወለእለ ይቀውሙ ለክሙ በእንተ እግዚእነ ወይሜህሩክሙ። 13አክብርዎሙ ፈድፋደ ወአፍቅርዎሙ በእንተ ምግባሮሙ ወተአምኅዎሙ። 14#2ተሰ. 3፥11-15። ወናስተቍዐክሙ አኀዊነ ገሥጽዎሙ ለዝሉፋን ናዝዝዎሙ ለኅዙናን ጹርዎሙ ለድኩማን ወተዐገሡ ላዕለ ኵሉ። 15#ምሳ. 20፥22፤ ሮሜ 12፥9-17፤ 1ጴጥ. 3፥9። ዑቁ ኢትግበሩ እኩየ ህየንተ እኪት አላ ተባደሩ ዘልፈ ለሠናይ በበይናቲክሙ ወለኵሉሂ። 16#ፊልጵ. 4፥4፤ ሉቃ. 10፥20። ተፈሥሑ በኵሉ ጊዜ ወጸልዩ ወትረ። 17#ሉቃ. 18፥1፤ ቈላ. 4፥2። አእኵትዎ ለእግዚአብሔር አብ በእንተ ኵሉ ግብር። 18#ኤፌ. 5፥20፤ ቈላ. 2፥7፤ 3፥15። እስመ ዝ ውእቱ ፈቃዱ ለእግዚአብሔር እምውስቴትክሙ በኢየሱስ ክርስቶስ። 19መንፈሰ ኢታጥፍኡ። 20#1ቆሮ. 14፥1። ወተነብዮ ኢትመንኑ። 21#ሮሜ 2፥18፤ ኤፌ. 5፥10፤ 1ዮሐ. 4፥1። ወኵሎ አመክሩ ወዘሠናይ አጽንዑ። 22ወተገኀሡ እምኵሉ ምግባር እኩይ። 23#ሮሜ 15፥33። ወእግዚአብሔር አምላከ ሰላም ይቀድስክሙ ፍጹመ ወያጥዒክሙ ነፍሰክሙ ወመንፈሰክሙ ወሥጋክሙ በንጽሕ እስከ ምጽአተ እግዚእነ ኢየሱስ ክርስቶስ። 24#1ቆሮ. 1፥9፤ 10፥13፤ 2ተሰ. 3፥3፤ 2ጢሞ. 2፥13። ወዘጸውዐክሙ ጻድቅ ውእቱ ይግበር ለክሙ ዘንተ። 25#ቈላ. 4፥3። ኦ አኀዊነ ጸልዩ ለነ። 26#ሮሜ 16፥16፤ 2ቆሮ. 13፥12። አምኁ ኵሎ አኀዊነ በአምኃ ቅድሳት ወተአምኁ በበይናቲክሙ። 27አምሕለክሙ በእግዚእነ ታንብብዋ ለዛቲ መጽሐፍ ላዕለ ኵሎሙ አኀዊነ ቅዱሳን። 28#ሮሜ 16፥20-24፤ ፊልጵ. 4፥23። ጸጋሁ ለእግዚእነ ኢየሱስ ክርስቶስ ምስሌክሙ፤ አሜን።

ተፈጸመ መልእክት ቀዳማዊ ኀበ ሰብአ ተሰሎንቄ ወተጽሕፈ በአቴና ወተፈነወ ምስለ ጢሞቴዎስ ወስልዋኖስ።

ወስብሐት ለእግዚአብሔር አሜን።

Currently Selected:

ኀበ ሰብአ ተሰሎንቄ 1 5: ሐኪግ

Highlight

Copy