ኀበ ሰብአ ቆሮንቶስ 1 9

ምዕራፍ 9

በእንተ ርእሱ ወበእንተ በርናባስ

1 # 15፥8፤ ግብረ ሐዋ. 9፥3-18። ኢኮንኩኑ አግዓዜ ወኢኮንኩኑ ሐዋርያ አኮኑ እግዚእነ ኢየሱስ ክርስቶስ ዘርኢኩ ወኢኮንክሙኑ አንትሙ ግብርየ በእግዚእነ። 2#2ቆሮ. 3፥2-3። ወእመኒ ለባዕዳን ኢኮንኩ ሐዋርያሆሙ ለክሙሰ አነ ሐዋርያክሙ እስመ ማኅተማ ለመጽሐፍየ አንትሙ ውእቱ በእግዚእነ። 3ወከመዝ ቅስትየ ለእለ ይትዋቀሡኒ። 4#ሉቃ. 10፥8። ቦኑ ኢይከውነነ ንብላዕሂ ወንስተይሂ። 5#ዮሐ. 1፥42። ወትትልወነ እኅትነ እምአንስት ከመ ኵሉ ሐዋርያት ወከመ አኀዊሁ ለእግዚእነ ወከመ ኬፋ። 6ሊተኑ ዳእሙ ወለበርናባስ አሕረሙ ለነ ስራሐ። 7ወዘኒ ይፀመድ ከመ ይርከብ ሲሳዮ መኑ ዘይተክል ወይነ ወኢይበልዕ ቀምሖ ወመኑ ዘይርዒ መርዔቶ ወኢይሰቲ ሐሊቦ። 8ቦኑ ለአድልዎ ለሰብእ እብል አኮኑ ኦሪትኒ ይቤ ከመዝ። 9#ዘዳ. 25፥4፤ 1ጢሞ. 5፥18። መጽሐፈ ሙሴ «ኢትፍፅሞ አፉሁ ለላሕም ሶበ ታከይድ እክለከ።» ላሕምኑ እንከ አጽሐቆ ለእግዚአብሔር ዘዘንተ ይጽሕፍ። 10አላ አርአየ ከመ በእንቲኣነ ይቤ ወበእንቲኣነ ጸሐፈ እስመ ርቱዕ ዘኒ የሐርስ እንዘ ይሴፎ ምርካቦ የሐርስ ወዘኒ ያከይድ እክለ እንዘ ይሴፎ ምርካቦ ያከይድ። 11#ሮሜ 15፥27። ወእመሰ ንሕነ ዘራዕነ ለክሙ ዘመንፈስ ቅዱስ ዐቢይኑ ውእቱ ሶበ ንሕነ ነአርር ለክሙ ዘሥጋ ሰብእ። 12#ግብረ ሐዋ. 20፥33፤ 2ቆሮ. 11፥9። ወእመሰ ባዕድ ይቀድመነ በሢመተ ዚኣነ ለሊክሙ ተአምሩ ዘይኄይሰክሙ ወአንሰ ለዝኒ ኢፈቀድክዎ ወባሕቱ በኵሉ እትዔገሥ ከመ ኢያዕቅፍ ትምህርቶ ለክርስቶስ።

በእንተ ሥዩማነ ቤተ እግዚአብሔር

13 # ዘኍ. 18፥8-32፤ ዘዳ. 18፥1-3። ኢተአምሩኑ ከመ ገነውተ አማልክት ይሴሰዩ መባኦሙ ለአማልክት ወእለኒ ይፀመዱ ምሥዋዐ ይትካፈሉ መሥዋዕተ ወለሥዩማነ ቤተ እግዚአብሔር መባአ ቤተ እግዚአብሔር ምርካቦሙ። 14#ሉቃ. 10፥7። ወእግዚእነሂ ከማሁ አዘዘ ለእለ ይሜህሩ ትምህርተ ወንጌል በውእቱ ምህሮ ወንጌል ይኩኖሙ ምርካቦሙ ለሕይወቶሙ። 15#ፊልጵ. 4፥11-18። ወአንሰ ለዝኒ ኢፈቀድክዎ ወአኮ ዘንተ ብሂልየ እርከብ ዘጸሐፍኩ ዘንተ ወሊተሰ ይኄይሰኒ መዊት እምይትበሐነነኒ ምዝጋናየ። 16#ማቴ. 25፥24-30። ወእመኒ መሀርኩ ኢይከውነኒ ምዝጋና እስመ በትእዛዝ ገበርኩ ወእመኒ ኢመሀርኩ አሌ ሊተ። 17#4፥1። ወእመሰ ዘእምፈቃድየ ገበርክዎ ለዝንቱ እምረከብኩ ዐስብየ ወእመሰ ዘበግብር ምግበ በዘአመገቡኒ ተልእኩ። 18ምንት እንከ ዕሴትየ ለእመ መሀርኩ እሬሲ ከመ እምሀር ዘእንበለ ዐስብ ዘአልብየ ምርካብ በውስተ ሢመትየ።

በእንተ ረብኀ ብዙኃን

19 # ማቴ. 20፥26-29። እስመ እንዘ አግዓዚ አነ እምኵሉ አቅነይኩ ርእስየ ለኵሉ ከመ አስተጋብኦሙ ለብዙኃን ኀበ ሃይማኖት። 20#ግብረ ሐዋ. 16፥3፤ 21፥26። ወኮንክዎሙ ለአይሁድ ከመ አይሁዳዊ ከመ አስተጋብኦሙ ለአይሁድ ወኮንክዎሙ ለእለ ውስተ ሕገ ኦሪት ከመ ዘውስተ ሕገ ኦሪት ከመ አስተጋብኦሙ ለእለ ውስተ ሕገ ኦሪት። 21#ገላ. 2፥3። ወኮንክዎሙ ለእለ አልቦሙ ሕግ ከመ ዘአልቦ ሕግ እንዘ ኢኮንኩ ራስዐ ውስተ ሕገ እግዚአብሔር ዳእሙ ውስተ ሕገ ክርስቶስ ሀሎኩ ከመ እርብሖሙ ለእለ አልቦሙ ሕግ። 22#2ቆሮ. 11፥29፤ ሮሜ 11፥14። ወኮንክዎሙ ለድኩማን ከመ ድኩም ከመ እርብሖሙ ለድኩማን ለኵሉ በግዕዘ ኵሉ ተለውኩ ወገበርኩ ከመ አስተጋብኦሙ ለኵሎሙ መንገሌየ ወአድኅኖሙ ዘእንበለ ዕቅፍት። 23ወኵሎ እገብር በእንተ ትምህርተ ወንጌል ከመ እኩን ሱታፎ ለክርስቶስ።

በእንተ እለ ይትባደሩ በውስተ ጸብእ

24 # 2ጢሞ. 2፥4-5፤ ዕብ. 12፥1-2። ኢተአምሩኑ ከመ እለ ይትባደሩ በውስተ ጸብእ ኵሎሙ ይረውጹ ወቦ ዘይከውኖ ምዝጋና ለዘበደረ ከማሁኬ ሩጹ ወብድሩ ከመ ትርከቡ። 25ወኵሉ ዘይትጋደል ይትዔገሥ ወእሉሰ ይጸንዑ ከመ ይንሥኡ አክሊለ ዕሴተ ምዝጋናሆሙ ኀላፌ ዘይማስን ወንሕነሰ ንትዔገሥ ወንጸንዕ ከመ ንንሣእ አክሊለ ዘኢየኀልፍ። 26#1ጴጥ. 5፥4፤ ያዕ. 1፥12። አንሰኬ ከመዝ እትጋደል ወእትባደር። 27#ሮሜ 8፥13። ወአጠውቃ ለነፍስየ ወአገርሮ ለሥጋየ ወእትዐቀብ ለርእስየ ከመ አነ ምኑነ ኢይኩን ዘለባዕድ እሜህር።

Currently Selected:

ኀበ ሰብአ ቆሮንቶስ 1 9: ሐኪግ

Highlight

Copy