ሮሜ 16
16
ሳሪቲ
1ኪንኪ̇ራ ካታማ ጋርታ ዎ ዎ̈ሳ ኬ̈ን ጋርታ̇ ጾ̈ሳ̇̇̈ብ ኦ̈ዝ ኑ ሚሺን ፌ̈ቤና ኮሽ ኣስ ማ̈ቂ̇ኖን ዪንቲ̇ ኤራምፔ̈ን ቴ ኮያ̈ሬ። 2ኢዛ ታና̈ኬ ሜላር ዎይሊን ኣስ ማ̈ዲ̇ኖኮታ̇ቦ ኣማ̇ኒዝ ኣስ ዛቃ ሞኪ̇ ኤካ̇ዚንዲፌ̈ኒ ዪንታ̇̇ሬ ኢዞ ዪና̇ ኢዝፌ̈ን ጾ̈ሳ̇̇ ሱምባራ ሞካ̇ምፔ̈ንኬ ኢዝቦ ኮሺ̇ዝ ባዝ ዎይባራ ማ̈ዳ̇ምፔ̈ን ቴ ዪንታ̇̇ቦ ዓዳራ ጋ̈ሬ።
3ታባር ዎልኣ ዬሱ̈ስ ክርስቶ̈ሳ ኦ̈ሲን ኦ̈ዛን ጲርስቂ̈ላኬ ኣቂ̈ላክ ሳሮ ጌብቴ። 4ኢንቲ̇ ዚቃንታ̇ ቴ ጊሽ̇ ዓይቂ̈̇ርካር ካ ጊ̈ጊንቲ̇ኖ ኣሴ፤ ዪ̈ኮታ̇ቦ ቴ ኢንታ̇ ኣንጃ̈ሬ፤ ቴ ሙታ̇ ጊዳካ̇ይዶን ክሪስታ̈ና ማ̈ቂ̇ኖ ኣይሁድ ዜርስ ባዮ̇ ኣሳን ዎይ ኢንታ ኣንጂ̈ሬ።
5ኢንታ̇ ኣ̈ል ዎ̈ሳቦ ሺ̈ቂዝ ኣማ̇ኒኖ ኣሳን ታ̈ብ ሳሮ ጌብቴ̇።
ኢ̈ሳ ጋዳ̇ ዎይፖ ቲ̈ን ዬሱ̈ሳ ኣማ̇ኒኖ ቴ ካዛ ጴንጦ̈ሳ ሳሮ ጌብቴ̇።
6ዪንታ̇̇ብ ዎይሊን ዋያ ዳ̈ቡሪኖን ማ̈ራሞ ሳሮ ጌብቴ̇።
7ታባር ቃቺ̇ንቲ ዋ̈ዪኖንብኬ ሃዋራ̈ታን ጊዳ̇ ኤሪንቲ̇ኖ ኣይሁድ ዜር ማ̈ቂ̇ኖ ታ ዳባ̇ን፥ ኣንዲርና̈ቆሳኬ ዩ̈ናሳ ሳሮ ጌብቴ̇፤ ኢንቲ̇ ክርስቶ̈ሳ ታ̈ፖ ቲ̈ን ኣማ̇ኒኖ ኣሴ።
8ጎዳባር ቴ ኢያ ካዛ ኣምጲላጦ̈ሳ ሳሮ ጌብቴ̇።
9ክርስቶ̈ሳ ኦ̈ሲን ኑባር ዎልኣ ኦ̈ዛ ኡርባ̈ኖ̈ሳ̈ኬ ቴ ካዛ ኢስጣኩ̈ሳ ሳሮ ጌብቴ̇።
10ክርስቶ̈ሳባር ኢ̈ብ ዎ ኣማ̇ኒንዳ̇ ፋታ̇ኒንታ̇ራ ሚ̈ን ማ̈ቂ̇ኖን ኤሪንቲ̇ኖ ኣጳሊ̈ሳ ሳሮ ጌብቴ̇፤
ኣሪጣቡ̈ላ̈ሳ ኣ̈ሎ ኣሳን ሳሮ ጌብቴ̇።
11ቴ ዳባ̇ ሄሮዳ̈ና ሳሮ ጌብቴ̇።
ናርሲሳ ኣ̈ሎ ኣሳን ጋርታ̇ፖ ጎዳ ኣማ̇ኒኖ ሳሮ ጌብቴ̇።
12ጎዳ ኦ̈ሳ ኦ̈ ዳ̈ቡሪኖን ቱርፋ̈ናኬ ቱርፎ̈ሳ ሳሮ ጌብቴ̇።
ጎዳ ኦ̈ሳ ኦ̈ ዎይሊን ዳ̈ቡሪኖን ጎዳ ሱምባራ ቴ ኢዞ ካዝ ቴ ሚሺን ፓርሲሶ ሳሮ ጌብቴ̇።
13ጎዳ̈ ኦ̈ሳብ ማራ̇ጺንቲ̇ኖ ሩ̈ፎሳ ሳሮ ጌብቴ። ማ ታ̈ና ፌ ናእፌን ካዝ ኢ ኢንዲ̇ን ሳሮ ጌብቴ̇።
14ኣሳንክሪቶ̈ሳ፣ ፊላጎ̈ና፣ ሄርማ̈ሳ፣ ፓትሮ̈ባ፣ ሄርማ̈ሳኬ ኢንታ̇ባር ዎ ኣማ̇ኒዝ ኣሳን ሳሮ ጌብቴ̇።
15ፊላላ̈ጎ̈ሳ፣ ዩ̈ላ፣ ኔ̈ራኬ ኢ ሚ̈ሺን ታ̈ብ ሳሮ ጌብቴ፥ ማ ኦሉምፓ̇ኬ ኢንታ̇ባር ዎ ኣማ̇ኒዝ ኣሳን ዎይ ሳሮ ጌብቴ̇።
16ኮሽ ቡ̈ዳባር ዎል ዎልኣ ዬርቃ̇ር ሳሪብቴ̇።
ዎይ ቤስ̇ ጋርታ̇ ዎ ዬሱስ ክርስቶ̈ሳ ኣማ̇ኒዝ ኣሳን ዎይ ዪንታ̇ ሳሮ ጌይኔ።
17ቴ ኢሺንታ̇ን! ዪንቲ̇ ታማ̈ሪኖ ቲሚርቲ̇ን ኢጺ̇ሙታ̇ ዪንታ̇ ጊዳ̇ ፋጊቲ ኤሄዪሙታ̇ ዪንታ̇ ኣማ̇ኒን ጋልዳፖ ዪንታ̇ ቶጛንዳቦ ኮዪዝ ኣሳን ጋልዳፖ ዪንታ̇ ና̈ጊብቴ፤ ኢንታ ጋልዳፖ̇ ጎቲ̇ብቴ̇። 18ዪንፌ̈ኖ ኣሳን ፌ̈ብ ማ̈ቂ̇ዝ ባዛብ ኦ̈ርዶኬ ኑ ጎዳ ዬሱ̈ስ ክርስቶ̈ሳብ ኦ̈ባ̈ሴ። ኖ̈ናባር ማጺና ማ̈ቃ̇ር ኣባክ ኤሪባ̈ሶ ኣሳን ቡ̈ዲን ባሊ̈ሬ።
19ዪንቲ̇ ዎጛላቦ ኪቲንታ̈ዚን ኣስ ዎይቦ ኤሪንቲ̇ኖኮታ̇ቦ ታ̈ኒ ኡፋይቲ̇ኔ፥ ዎቲናካር ዪንቲ ኮሽ̇ ባዛብ ኤጫ ማ̈ቃ̇ምፔ̈ኒ ኢ̈ት ባዛቦ ኣሽካ ማ̈ቃ̇ኒፔ̈ን ቴ ኮያ̈ሬ። 20ዪንቲ ዪኖ ዎቴጌይንዶ ሳሪቲ ኢሚ̇ዝ ጾ̈ሳ̇̇̈ዲ ኤሊ̇ሪ ሴ̈ጣ̈ና ዪንታ̇ ቶ̈ሂን ጻ̈ና ቶጛሪ ቡኪ̇ ዲልኢ̈ሬ።
ጎዳ ዬሱ̈ስ ክርስቶ̈ሳ ኮሺቲ ዪንታ̇ባር ማ̈ቆ̇።
21ጾ̈ሳ̇ ኦ̈ሳ ታባር ዎልኣ ኦ̈ዛ ጢማ̈ቶ̈ሲ ዪንታ̇ ሳሮ ጌይኔ፤ ማ ቴ ዳባ̇ን ሉቆ̈ሳ፣ ሉ̈ሶ̈ናኬ ሶ̈ሲጴ̈ጥሮ̈ሳ ዪን ዎይ ዪንታ̇ ሳሮ ጌይኔ።
22ዓና̇ ኪ̈ቲን ጻ̈ፊኖ ታ ጣርጦ̈ሲ ዪንታ̇ ሳሮ ጋ̈ሬ።
23ታ̈ናኬ ዓንዳ ዎ ዎ̈ሳብ ሺ̈ቂዝ ኣሳን ዎይ ሞኪ̇ዛ ጋ̈ዮ̈ሲ ዪንታ̇ ሳሮ ጌይኔ። ካታሚንቦ ሹ̈ማ ማ̈ቂ̇ኖ ኤራስጦ̈ሳ፤ ማ ኑ ኢሻ ቆርጦ̈ሳር ዪንታ̇ ሳሮ ጌይኔ። 24[ኑ̈ ጎዳ ዬሱ̈ስ ክርስቶ̈ሳ ኮሺቲን ዪንታ̇ ዎይንባራ ማ̈ቆ̇! ኣሚንኤ።]
25ታ̈ኒ ዬሱስ ክርስቶ̈ሳባዝ ሳባ̇ኪኖ ቃ̈ሊንባርኬ ሚናፖ̇ ኣ̈ቺንታ̇ር ጋምኢኖ ዎቲናካር ዓት ፋላ̇ጋልዳ ኬስኪ̇ኖ ኪን ሚስጢሪን ጎይባራ ዪንቲ̇ ዪንታ̇ ኣማ̇ኒንባራ ሚ̈ጚ ዶኣምፔ̈ኒ ዎታንዳብ ዳንዳኢ̈ዛ ጾ̈ሳ̇̇̈ቦ ቦንች ማ̈ቆ̇። 26ዎቲናካር ዓት̇ ዓና̇ ኪን ባዚንዳ ፋላ̇ ጋል ኬስኪ̇ኔ፤ ሜናብ ዶኢዝ ጾ̈ሳ̇̇ ኪ̈ትባራ ዎርዣን ዎይ ኣማ̇ናር ኪ̈ቲንታ̇ምፔ̈ኒ ናባን ጻ̈ፊኖ ማጻ̈ፋ ጎይባራ ጾ̈ሲ̇ ኢንቲ̇ ዎይ ኢያ ኤራምፔ̈ኒ ዎቲኔ። 27ኢ ሙታ̇ ኤራ ማ̈ቂ̇ኖ ፔቲ̇ ጾ̈ቦ፥ ዬሱስ ክርስቶ̈ሳ ጎይባራ ሜናብ ጋላታ ኢ̈ብ ማ̈ቆ̇! ኣሚንኤ።
Currently Selected:
ሮሜ 16: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
