ጋላ̈ 2
2
ጳውሎ̈ሲ ሃዋ̈ራ ማ̈ቂ̇ኖን ሜላን ሃዋ̈ራታን ኤሪዴ
1ታ̈ጶ ኦይዲ̇ ላይፖ̇ ዎሃ ባርናባ̈ሳባር ዎልኣ ዬሩሳ̈ላማ ማ̈ቃ̇ ሉካ̇ዴ፤ ቲ̈ታ̇ር ታባር ኤካ̇ር ሉካ̇ዴ። 2ቴ ዬሩሳ̈ላም ሉኪ̇ኖንዳ ጾ̈ሳ̇̇̈ዲ ቴ ኢና ሉካ̇ምፔ̈ኒ ሳጻባር ታ̈ና ቤይሲኖኮታ̇ቦ። ኣይሁድ ባዮ̇ ኣሳንብ ሳባ̇ካዝ ዎጛሊን ዎዛርፌንኮ ዎ̈ሳ ኬ̈ን ቲ̈ኒዝ ኣሳን ጋርታ̇ፖ̇ ኤሪንቲ̇ኖ ኣሳን ሺ̇̈ሻ̇ራ ኢንታ̇ብ ዱማ ሶ̈ላዴ። ዪና̇ሬ ዓኒ̇ፖ̇ ቲ̈ን ቴ ኦ̈ኖ ኦ̈ሳንር ማ̈ቂ̇ን ዓት ኦ̈ዝ ኦ̈ሳን ሜላ̇ ኣታካ̇ይፌ̈ኔ። 3ታባር ዎ ቲ̈ቶ̇ ጊሪ̈ክ ጋዶ̇ ኣስ ማ̈ቂ̇ናካሬ “ኢ ጋራ̇ዚንቶ̇” ጋ̈ሪ ኢያ ዋ̈ዪኖ ኣሲ ባዬ̇። 4ዎቲናካሬ ኪን ኣማ̇ኒዝ ኣስ ማይጻር ፌ̈ና ኤሪሳካይዶር ኣ̈ቺንታ̇ር ኑ ጊዳ̇ ጌሊኖ ኣስ ባሊዝ ፔቲ̇ ፔቲ̇ ኣሳን ኢ ጋራ̇ዚንታምፔ̈ን ኮዪንዶን። ዪን ኣሳን ኑ ጊዳ̇ ጌሊኖንዳ ዬሱ̈ስ ክርስቶ̈ሳባር ኑ̈ኒ ናጻ ኬስኪ̇ኖን ጋርታ̇ፖ̇ ማሃር ኑ̈ና ኣይላ ማሃንዳ̇ብ ቆፓ̇ር ዎቲኔ። 5ኑ ዪንታ̇ብ ሶ̈ሊኖ ኪን ዎጛሊን ዪንታ̇ባር ሚ̈ጛር ዶኣምፔ̈ኒ ሜል ኣቲ̇ን ጊላ̇ ሳኣ̈ታብ ዪና̇ ኢንታ̇ ቆፊን ኤኤ ጌዪ ኤካካ̇ዬ።
6ዓን ዎ̈ሳ ኬ̈ን ቲ̈ኒዝ ኣሳን ቴ ሶ̈ላዝ ዎጛሊን ጋልዳ ኣባካር ኦራ ባዝ ጉጃካ̇ዬ። ጾ̈ሲ ኣሳ ኣ̈ፋብ ዬ̈ልቃ̇ር ኦ̈ባ̈ሶኮታ̇ቦ፤ ኢንቲ ኦ̈ናካር ማ̈ቂናካሬ ኢንታ ባዚ ታ̈ና ሜቲባ̈ሴ። 7ዎቲናካር ጾ̈ሳ̇̇̈ዲ ጴ̈ጥሮ̈ሳ ኣይሁዳንቦ ጾ̈ሳ̇ ቃሊን ሶ̈ላምፔን ዓዳራ ኢሚ̇ኖንዲፌ̈ኒ ታ̈ናር ማ ኣይሁድ ባዮ̇ ኣሳንቦ ጾ̈ሳ̇ ቃ̈ሊን ሶ̈ላምፔ̈ን ዓዳራ ኢሚ̇ኖን ኢንቲ ኤሪዴ። 8ጴጥሮ̈ሳ ኣይሁዳንቦ ሃዋ̈ራ ማ̈ቃ̇ምፔ̈ን ዎቲኖ ጾ̈ሳ̇̇̈ዲ ታ̈ናሬ ኣይሁድ ባዮ̇ ኣሳንቦ ሃዋ̈ራ ማ̈ቃ̇ር ኦ̈ሳ̇ምፔ̈ን ዎቲኔ። 9ዎ̈ ኬ̈ን ቲ̈ኒዛን ቱ̈ሳፌ̈ን ማ̈ቃ̇ር ዎን ዓይቆ̈ባ፣ ጴ̈ጥሮ̈ሳኬ ዋ̈ኒ̇ሳሬ ጾ̈ሲ ኑ ኦ̈ሲን ዎዛርፌ̈ን ኣንጂኖኮ ቤቃ̇ሪ ታባርኬ ባርናባ̈ሳባራ ኦ̈ንዳብ ዶሲኖን ቤይሲዝ ማላ̇ ፌ ኡሻ̇ቻ ኩሺን ኑ̈ብ ኢሚ̇ዴ። ኢናፖ̇ ኑ̈ኒ ኣይሁድ ባዮ̇ ኣሳን ጋርታ̇ ሉካ̇ምፔ̈ኒ ኢንቲ ማ ኣይሁዳን ጋርታ ሉካ̇ንዳቦ ዎልኣ ሶ̈ሊንቲ̇ዴ። 10ኢንቲ ኑ̈ና ሚ̈ን ጌሺኖንዳ ኑ̈ኒ ኢና ዎ ዎርባያን ቦቲጛካይፌ̈ን ሙታ̇። ዪኖ̇ ታ̈ናር ኢዞ ኦ̈ንዳብ ዎይሊን ኢና̇ ታ̈ብ ዎ።
ጳውሎ̈ሲ ኣንጾ̈ካ ካታማ ጋርታ ጴ̈ጥሮ̈ሳ ጎይሊዴ
11ፔቲ̇ ጋላስ ጴ̈ጥሮ̈ሲ ኣንጾ̈ካ ካታማ ዬይን ኢ ባሊቲ̇ኖኮታ̇ቦ ፋል̇ ኢያ ጎይላዴ። 12ዓይቆ̈ቢ ኪ̈ታ̇ር ሚሺኖ ፔቲ̇ ፔቲ̇ ኣሳን ኣንጾ̈ካ ዬ̈ዚምፖ̇ ቲ̈ን ጴ̈ጥሮ̈ሲ ኣይሁድ ባዮ̇ ኣሳንባር ዎልኣ ሙይርዶን፤ ኢንቲ ዬዪኖፖ̇ ዓኒ “ኣይሁድ ባዮ̇ ኣሳን ጋራ̇ዚንታ̇ንዳብ ኮሺ̇̈ሬ” ዪዝ ጌይዝ ኣይሁዳንቦ ኢ̈ጫ̇ር ጋስ ዴጫሪ ኣይሁድ ባዮ̇ ኣሳን ጋልዳፖ̇ ፋጊንቲ̇ዴ። 13ፔቲ̇ ፔቲ̇ ኣማ̇ኒዝ ኣይሁድ ኣሳን ጴ̈ጥሮ̈ሲ ዎቲኖንዲፌ̈ኒ ኢንታ̇ር ማይጺሲ ኤ̈̇ዴ። ሜል ኣቲ̇ን ባርናባ̈ሳር ኣታካ̇ይዶር ዪኒ̇ፌ̈ኖ ማይጺስ ኦ̈ሲን ጋርታ ቡሺንቲ̇ዴ። 14ኢንታ ኦ̈ሲንዳ ኪን ዎጛሊምባር ሉካ̇ባሶን ቤቃ̇ራ ጴ̈ጥሮሳኮ “ኔ̈ኒ ኣይሁድ ኣስዶራ ኣይሁዳን ዎጊን ኣሻ̇ራ ኣይሁድ ባዮ̇ ኣሳንፌ̈ን ዶኣርዶራ፥ ኣይሁድ ባዮ̇ ኣሳን ኣይሁዳን ዎጊንባራ ዶኣምፔ̈ን ኣባብ ዋዪ̈ራ?” ጋ̈ራ ኢንታ ዎይን ቲ̈ን ኢያ ጎይላዴ።
ኣይሁዳንር ማ̈ቆ̇ ኣይሁድ ባዮ̇ንር ፋጻዚንዳ ኣማ̇ናባራ
15“ኑ ዜርንዳ̇ ኣይሁዴ፤ ኑ̈ኒ ናጋራንቻ ጌዪ ኢንታ̇ ጼይጊዝ ኣይሁድ ባዮ̇ ኣሳንፌ̈ን ጊዳካ̇ዬ። 16ዎቲናካር ኣሲ ጺላ̇ዚንዳ ዬሱ̈ስ ክርስቶ̈ሳ ኣማ̇ናርዶኬ ሙ̈ሳ ሂጊ̇ን ኦ̈ ፎታር ጊዳካ̇ዮን ኑ ኤሪ̈ሬ። ኑ̈ናር ሂጊ̇ን ኦ̈ ፎታር ጊዳካይዶን ክርስቶ̈ሳ ኣማ̇ናር ጺላ̇ንዳቦ ኢያ ኣማ̇ኒኔ። ኣባጌዪን ኣሲ ኦ̈ናካር ሙ̈ሳ ሂጊ̇ን ኦ̈ ፎታር ጺሊ̇ባ̈ሴ።
17“ዪዚ ኑ̈ኒ ክርስቶ̈ሳ ኣማ̇ናር ጺላ̇ንዳብ ኮዪዛኮታ̇ቦ ኑ ኣይሁዳንር ማ̈ቂ̇ን ናጋራንቻ̇ ማ̈ቂ̇ኖን ቤይሳ̈ሬ፥ ዪዚ ዪ̈ዶኮ ኑ̈ና ናጋራ ኦ̈ሲዛ̈ዲ ክሪስቶ̈ሲያ? ዋኣኬ ዉርሲ ኢያ ጊዳካ̇ዬ! 18ቲ̈ን ታ ኣሺ̇ኖ ሂጋ̇ ዎጊን ማሃር ኦ̈ዛ ማ̈ቄ̇ጌዪን ቴ ቴ ቆሚ̇ን ሂጊ̇ን ላ̈ሊ̇ኖ ኣስ ማ̈ቂ̇ኖን ቴ ቴ ጋልዳ ማርኪታ̈ሬ። 19ኣባጌዪን ታ̈ኒ ጾ̈ሳ̇̈ብ ዶኣንዳ ጋ̈ራ ሂጊ̇ን ጎይባራ ኣሲ ዓይቃባር ፋጊንታ̇ዚንዲፌ̈ን ቴ ሂጊ̇ን ጋልዳፖ̇ ፋጊንቲ̇ኔ። 20ቴ ታ̈ና ክርስቶ̈ሳባር ሶቲንቲ̇ኖ̈ዲፌ̈ን ማሃ ፋይዳ̈ሬ። ዓኒፖ̇ ጌዳ ክርስቶ̈ሲ ታባር ዶኢ̈ርዶኬ ዓት ሼምፓ̇ባራ ዎ̈ዲ ታ̈ና ጊዳካ̇ዬ። ታ ዓት ሼምፓ̇ባር ሳ̈ዝ ጋልዳ̇ ዶኣዝ ዶኢንዳ ታ̈ና ካሪ ቴኮታ̇ቦ ፌ̈ና ኣ̈ር ኢሚ̇ኖ ጾ̈ሳ̇ ና̈ኣ ኣማ̇ናር ዲጚኖ ሼምፓባር ዎ ዶኢ። 21ታ̈ኒ ጾ̈ሳ̇ ኮሺ̇ቲንዶ ሜላ ዓሪ ቡጊዴ ኣሻ̇ባሴ፤ ኣሲ ሙ̈ሳ ሂጊ̇ን ኦ̈ ፎታር ጺሊ̇̈ርፌ̈ንኮ ክሪስቶሲ ዓይቂ̇ኖ̈ዲ ሜላ̇ ዓሪዬ።
Currently Selected:
ጋላ̈ 2: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
