ኤፍ 4
4
ኣማ̇ኒዝ ኣሲ ክርስቶ̈ሳ ጎይባራ ዎልኣ ፔታ̇ኔ
1ዪዚ ጎዳ̈ብ ኦ̈ኖኮታ̇ቦ ቃሺ ኣ̈ል ጌሊኖ ታ ጳውሎ̈ሲ፥ ጾ̈ሲ ዪንታ̇ ጼይጊኖ ጼይሲ̇ንቦ ማ̈ቂ̇ዝ ኮሻ̇ ዶኢ ዶኣምፔ̈ን ቴ ዪንታ̇ ጌሻ̈ሬ። 2ካንባር ዪንቲ ዎል ዎልኣ ዳንዳኢሙታ̇ ዎይ ጋላስ ዪንታ̇ ዪርክ ዎቲሙታ̇ኬ ኮሺ̇ቲባርኬ ጋርዣባር ዶኢብቴ። 3ሳሪቲባር ዎል ፔታ̇ን ማ̈ቃሪ ጌ̈ሻ̇ ኣያ̇ና ጋልዳፖ̇ ቤንታ̇ዝ ፔቲቲን̇ ዪንታ̇ ጋልዳፖ ያካ̇ይፌ̈ኒ ሚ̈ጛር ና̈ጊብቴ። 4ዪንቲ̇ ጼይጊንቲ̇ኖንዳ ፔቲ̇ ታስፋቦ ማ̈ቂ̇ኖንዲፌ̈ኒ ፔቲ̇ ጋል̇ኬ ፔቲ̇ ኣያ̇ና ዎ። 5ዪና ኢዝፌኒ ፔቲ̇ ጎድ፥ ፔቲ̇ ኣማ̇ናኬ ፔቲ̇ ጺንቃታ ዎ። 6ማ ዎይፖ̇ ሾ̈ክ ጌይኖ፤ ዎይ ጎይባራ ኦ̈ዛ̈፥ ዎይንባር ዎዲ ማ ዎይንቦ ባ̈ባ ማ̈ቂ̇ኖ ፔቲ̇ ጾ̈ሲ̇ ዎ።
7ዎቲናካሬ ክርስቶ̈ሲ ኢማ̇ንዳብ ፌ ኮዪኖንዲፌ̈ኒ ኢ̈ ኦ̈ሲን ኦ̈ንዳቦ ዳንዳኢሲዝ ኪልስ ኑ̈ ዎይንቦ ኢሚ̇ኔ። 8ዪ̈ዳሬ
“ፉዳ ሾ̈ክ ጌዪኖ ቤስ̇ ኬሲኪኖ ኬ̈ልባራ
ካ̈ቲንቲ̇ኖ ኣስ ዎይሊን ኤካ̇ር ሉኪ̇ዴ
ማ ኣሳንቦ ኪልስ ኢሚ̇ዴ” ጌዪኖንዲፌ̈ኔ።
9ዪ̈ዶኮ ዪ̈ “ፉዳ ኬስኪ̇ዴ” ጌይዝ ቃ̈ላዲ ኣብዝ ጌንታ̇? ፉዳ ኬስኪ̇ዴ ጌንቲ̇ንዳ ኢ ቲ̈ን ቶ̈ራ ሳ̈ዝ ጻና ሶ̈ቢኖን ቤይሳ̈ሬ። 10ዪ̈ ቶ̈ራ ሶ̈ቢኖ̈ዲ ሳ̈ዝ ኤ̈ሻ̇ ዎይ ጋልዳ ኩማር ቤንታ̇ንዳቦ ኣፋ ሳ̈ዝ ዎይ̈ፖ̇ ፉዳ ሾ̈ክ ጌይኖ ቤሳ̇ ጋልዳ ኬስኪ̇ኖ ኢያ። 11ኣሳንቦ “ኪልስ ኢሚ̇ኖ ኢያ”፤ ኢያሬ ፔታ̇ን ፔታ̇ናን ሃዋ̈ራታ፤ ፔታ̇ን ፔታ̇ናን ና̈ቢ፤ ፔታ̇ን ፔታ̇ናን ዎጛላ ሳባ̇ኪዝ ኣሲ፤ ፔታ̇ን ፔታ̇ናን ኣማ̇ኒዝ ኣሳን ዬ̈ጚዝ ኣስኬ ታማርሲዝ ኣስ ማ̈ቃምፔን ዎቲዴ። 12ዪኖ̇ ኢ ኦ̈ኖንዳ ክርስቶ̈ሳይ ማ̈ቂ̇ኖ ኣሳን ሚ̈ጛምፔ̈ንኬ ኢንቲ ጾ̈ሳ̇ ኦ̈ሳ ኦ̈ምፔ̈ኒ ጊ̈ጊንቲ̇ኖ ኣስ ማ̈ሳንዳቦ። 13ዪና̇ሬ ኑ ዎይን ጾ̈ሳ̇ ና̈ኣ ኤራሪ ኣማ̇ናባር ቤንቲ̇ኖ ፔቲ̇ቲንኮ ዬላ̇ሪ፥ ኑ ኣማ̇ኒንባር ሚ̈ጛሪ ክርስቶ̈ሳ ማ̈ይጻምፔ̈ኒዬ። 14ዪዚ ኑ ዓኒ̇ፖ̇ ጌዳ ኣሲ ኑ̈ና ዉጫባራ ባሊሙታ̇ኬ ቃልቂንቺ̇ሙታ ዱማ ዱማ ማቃ ቲሚርታ̇ባራ ኣይጊኬ ዋ̈ሳ ጋልዶ ዉርጊንዲፌ̈ኒ ጌዳክ ዓኒክ ኤንኢሙታ̇ ኣቂሊ̇ ናኢ ማ̈ቂ̇ባ̈ዳ። 15ዪኖ̇ ኣሻ̇ሪ ኑ̈ኒ ኪን ማ̈ቂ̇ኖባዚን ካንባር ሶ̈ሊሙታ̇ ባዝ ዎይ̈ባራ ዎይ̈ፖ̇ ሾ̈ክ ጋር ቆ̈ም ማ̈ቂ̇ኖ ክርስቶ̈ሳክ ዲጪ̇ስቶ። 16ኣሳቦ ዎ ዱማ ዱማ ጋ̈ላ̇ን ሻሽ̇ባር ዎልኣ ፔታ̇ን ኤ̈ንቲ̇ኖ̈ዲፌ̈ኒ ኣማ̇ኒዝ ኣሳን ዎልዎልኣ ኤ̈ንቲ̇ኖ̈ዲ ክርስቶ̈ሳባራ፤ ዪ̈ኮታ̇ቦ ዪን ዱማ ዱማ ጋላ̇ን ፌ̈ብ ኢሚ̇ኖ ኦ̈ሲን ኮሺንቺ̇ ፎቴጌይንዶ ጋሊ̇ ዎይ ዲጪ̇̈ሬ፥ ማ ካንባራ ሚ̈ጚ̈ሬ።
ክርስቶ̈ሳባር ቤንቲ̇ዝ ኦራ ሼ̈ምፓ̇
17ዪዚ ዓኒፖ̇ ጌዳ ፋባ̈ሶ ቆፊባር ዎ ጾ̈ሳ̇ ኤሪባ̈ሶ ኣሳንፌ̈ኒ ማ̈ቃር ዶኣፒ̇ቴ ጋ̈ር ጎዳ ሱ̈ምባር ቴ ዪንታ̇ብ ሶ̈ላ̈ሬ። 18ኢንታ̇ ቡ̈ዳ ሚ̇ኔ ማ ኢንቲ̇ ኣባካር ኤራካዮ̇ ጊሻ̇ብኬ ሶ̈ሊን ሲስኪ̇ባ̈ሶኮታ̇ቦ ጾ̈ሲ ኢንታ̇ብ ኢሚ̇ዝ ሼምፓ ጋልዳፖ̇ ጎ̈ቲ̇ ኣቲ̇ኔ። 19ዬ̈ላ̇ ጌይዝ ባዚ ኢንታ̇ ጋልዳፖ̇ ዪኖኮታ̇ቦ ቄ̈ ባዝ ዎይ ኦንዳቦ ፌ̈ና ኢ̈ታ ኢና̇ቦ ኣ ኢሚ̇ኔ።
20ዎቲናካሬ ዪንቲ̇ ክርስቶ̈ሳ ጎይ ታማ̈ሪኖንዳ ዪንዲዝ ጊዳካ̇ዬ። 21ዪንቲ̇ ኪን ኢ ባዚን ሲስኪ̇ኔ፤ ዪንቲ̇ ኢባር ፔታ̇ን ማ̈ቂ̇ኖንባራ፥ ኪን ማ̈ቂ̇ኖን ዬሱ̈ሳ ቲሚርቲ̇ን ዪንቲ̇ ታማ̈ሪኔ። 22ዪንቲ̇ ሚን ዶኢኖ ዶኢን ጎይ ዓት ታማ̈ሪኔ፤ ዪንታ̇ ባሊር ናጋራ ኦ̈ምፔን ቲ̈ናዝ ኢታ̇ ኢኒ̇ንባር ኢ̈ቲኖ ሚኖ ዪንታ̇ ኣሲቲንዶ ዪንታ̇ ጋልዳፖ̇ ጋ̈ራር ቶጚብቴ። 23ዪንታ̇ ቡ̈ዳ ጋርታ̇ ዎ ቆፋ̈ዲ ጌ̈ሻ̇ ኣያ̇ናባር ኦራ ማ̈ቆጋ̈ቤ። 24ኪን ጺሊ̇ቲባርኬ ጌ̈ሺ̇ቲባራ ጾ̈ሳ̇ ማይጻንፔ̈ኒ ኮቺ̇ንቲ̇ኖ ኦራ ኣሲቲን ማኢብቴ።
25ዪ̈ኮታ̇ቦ ማ̈ቃ ሶ̈ላዚን ኣሻ̇ሪ ኑ ዎይን ክርስቶ̈ሳባራ ፔቲ̇ ጋል̇ ማ̈ቂኖኮታ̇ቦ ኣሲ ዎል ዎልኣ ኪን ሶ̈ላ ሶ̈ላጋቤ። 26ዪንቲ̇ ጎይል ጎይሊ̈ርዶሪ ናጋራ ማ̈ቂዝ ባዝ ኦ̈ፒ̇ቴ፤ ዪንታ̇ ጎይሊምቦ ማ̈ሪቲ ጌላካ̇ይዶር ኣቃ̇ፒ̇ቴ። 27ማ ሴ̈ጣናቦ ጎይ ፊርቃ̇ፒ̇ቴ። 28ሚን ዉ̈ቂ̇ዝ ኣሲ ዓኒፖ̇ ጌዳ ዉስ ዉቃ̇ፖ̇፤ ዪ̈ፖ̇ ሜቲንቲ̇ኖንቦ ኢሚ̇ዝ ባዚ ኢ̈ብ ዶኣምፔ̈ኒ ፌ ኩሽ ጌ̈ቲምባር ኮሽ̇ ማ̈ቂ̇ኖ ባዝ ኦ̈ሙታ ዲጛንዳብ ሚ̈ጛር ዋ̈ዮጋ̈ቤ።
29ዪንታ̇ ኖ̈ና ጋርታፖ ኢታ̇ ሶ̈ሎ ኬስካፖ̇ጋ̈ቤ ዎቲናካሬ ኮሺ̇ኖንዲፌ̈ኒ ሲስኪ̇ዝ ኣሳንቦ ኡፋይሲዝ ባዝኬ ሚ̈ንንዳብ ማ̈ቂ̇ዝ ባዝ ሶ̈ሊብቴ። 30ጾ̈ሳ̇̇ ዪንታ̇ ፎቲ ፋዝ ቃ̈ሚንቦ ጋ̈ሪ ዪንታ̇ ጋልዳ ማይታማፌ̈ኒ ቡኪ̇ንቲ̇ኖ ጌ̈ሻ ኣያ̇ና ሺ̈ን ዎታፒቴ̇። 31ኢታ ቆፊ፣ ዛላ̇፣ ጎይል፣ ዉይሳ፣ ቆ̈ሳኬ ኢ̈ት ማ̈ቂ̇ኖ ባዝ ዎይ ዪንታ̇ ጋ̈ልዳፖ̇ ፋ̈ይብቴ። 32ዪንቲ̇ ኮሽ̇ኬ ዎል ዎልኣ ሚጪ̇ንቲዝ ኣስ ማ̈ቂ̇ብቴ፤ ጾ̈ሳ̇̇̈ዲ ክርስቶ̈ሳ ጎይባር ዪንታ̇ ናጋሪን ዪንታ̇ብ ኣቶ̇ ጌይኖንዲፌ̈ን ዪንታ̇ር ዎል ዎልኣ ኣቶ̇ ጌብቴ̇።
Currently Selected:
ኤፍ 4: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
