2 ታሳ 3
3
ጳውሎ̈ሲ ፌ̈ብ ዎ̈ሶ ጌይዴ
1ዪዚ ዉርሲ ጋልዳ ኑ ኢሺንታ̈ንሶ! ጎ̈ዳ ቃ̈ሊን ዪንታ̇ክ ዬላ̇ ሻኪ̇ኖንዲፌ̈ኒ ዎይ ቤስ̇ ዬላንፔ̈ንኬ ቦንቺንታምፔ̈ን ኑ̈ቦ ዎ̈ሲ̇ብቴ። 2ማ ቃ̈ሊን ሲስኪዛን ዎይ ኣማ̇ኒባሴ፤ ዪ̈ኮታ̇ቦ ዉጫ ኣሳን ጋልዳፔኬ ኢ̈ት ኣሳን ጋልዳፖ ኑ̈ኒ ቡ̈ታ̇ምፔን ኑ̈ቦ ዎ̈ሲ̇ብቴ።
3ዎቲናካር ጎዳ̈ዲ ኣማ̇ኒንቲ̇ኖ̈ዳ፤ ኢ ዪንታ̇ ሚ̈ንሬ፤ ማ ሴ̈ጣና ጋልዳፓር ዪንታ̇ ቡ̈ቲሲ̈ሬ፤ 4ኑ ዪንታ̇ ኪ̈ታ̇ዚንዶ ዓታ̇ር ማ̈ቂ̇ን ዎሃር ማ̈ቂ̇ን ዪንቲ ፎታዚን ኑ̈ኒ ጎዳ̈ባር ኣማ̇ኒንቲ̈ሬ። 5ጎዳ ዪንታ̇ ቡ̈ዲን ፌ ካንንኮኬ ክርስቶ̈ሳ ዳንዳኢንኮ ማሆጋ̈ቤ።
ኦ̈ሳብ ቦ̈ሳካ̇ይፌ̈ኒ ኢሚ̇ኖ ዞራ
6ቴ ኢሺንታ̇ን! ኦ̈ሳ ኦ̈ንዳቦ ቦ̈ሲዝ ኣስ ጋልዳፔኬ ዪንቲ̇ ኑ ጋልዳፖ ኤኪ̇ኖ ቲሚርቲ̇ንቦ ኪ̈ቲንቲ̇ባ̈ሶ ኣማ̇ኒኖ ኣሳን ጋልዳፖ ጎታ̇ምፔ̈ኒ ኑ ዪንታ̇ ጎዳ ዬሱ̈ስ ክርስቶ̈ሳ ሱምባራ ኪ̈ቲ̇̈ሬ። 7ዪንቲ̇ ኑ ዎታዚንዲፌ̈ን ዎታንዳብ ኮሻ̇ዚንዶ ዪንቲ̇ ዪንታ̇ ቆሚ̇ንቦ ኤሪ̈ሬ፤ ኑ̈ኒ ዪንታ̇ባር ዎ ኬሊ̇ንባራ ኦ̈ሳብ ቦ̈ሲኖ ኣስ ጊዳካ̇ዬ። 8ኑ̈ኒ ዪንታ̇ ዋ̈ዪባ̈ዳ ጋ̈ሪ ጋላስ ቃም ዎይ ኦ̈ ዋ̈ዪሙታ̇ ዶኢዶ̇ኬ ኦ ጋልዳፓካር ማ̈ቂ̇ን ፊ̈ሺ ሜላ̇ ሞ̈ካ̇ዬ። 9ኑ̈ኒ ዪኖ̇ ዎቲኖንዳ ዪንቲ̇ ኑ̈ና ማ̈ይጻምፔ̈ንዶኬ ኑ̈ኒ ዪንታ̇ ጋልዳፖ ማ̈ዲ ኦይጪ̇ዝ ሲልጣ̈ና ዪን ጊዳካ̇ዬ። 10ኑ ዪንታ̇ባር ዎምባራ “ኦ̈ንዳቦ ኮዪባ̈ሶ̈ዲ ሞ̈ፖ” ጌይዝ ሂጋ̇ ዪንታ̇ብ ኢሚ̇ኔ።
11ኑ ዪኖ̇ ጌይኖንዳ ዪንታ̇ ጊዳ ኦ̈ሳ ዶሲባ̈ሶ ፔቲ̇ ፔቲ̇ ኣሳን ዎን ኑ ሲስኪ̇ኖኮታ̇። ዪን ኣሳን ኦ̈ሳ ቤዪስ ዬሙታ̇ ኢንታ ጌልሲባ̈ሶ ባዝ ጋርታ ጌሊ̈ሬ። 12ዪንፌ̈ኖ ኣሳን ጌዳክ ዓኒክ ሜላ̇ ዬ̈ካ̇ይዶር ኦ̈ር ፌ̈ና ኣቂ̈ሳምፔ̈ኒ ጎዳ ዬሱ̈ስ ክርስቶ̈ሳ ሱምባር ኑ ኢንታ ኪ̈ቲ̇̈ሬ ማ ዞሪ̈ሬ።
13ዎቲናካሬ ኑ ኢሺንታ̇ን! ኑ̈ና ዳ̈ቡርሲ̇ኔ ጋ̈ሪ ኮሽ ኦ̈ሳ ኦ̈ንዳብ ቦ̈ሳፒ̇ቴ። 14ዓና̇ ኑ ዪንታ̇ብ ጻ̈ፋር ሚሺኖ ኪ̈ቲን ኤኪ̇ባ̈ሶ ኣሲ ዎኮ ዪ ና̈ሳ ኮሺ̇ንቺ̇ ቤቃ̇ሪ ኢ ዬ̈ልቃምፔ̈ኒ ኢባር ዬፒ̇ቴ። 15ዎቲናካር ዪንቲ̇ ኢያ ኢሺፌ̈ን ቤቂ̇ብትዶኬ ጻላ̈ታፌ̈ን ፋይዳፒ̇ቴ።
ዉርሲ ሳሪቲ
16ሳሪቲ ኢሚ̇ዝ ጎዳ ዎይ ጋላስ ባዝ ዎይባራ ሳሪቲ ዪንታ̇ብ ኢሞ̇ጋ̈ቤ። ጎዳ ዪንቲ̇ ዎይንባር ማ̈ቆ̇።
17ዓኒ ሳሪቲንዶ ታ ኩሽ ጌ̈ቲምባር ጻ̈ፊኖ ታ ጳውሎ̈ሳ፤ ቴ ጻ̈ፋዝ ኪ̈ታን ኤሪንታ̇ዚንዳ ዓኒ̇ባራ፤ ቴ ጻ̈ፋዚንዳ ዓንዲዜ።
18ኑ ጎዳ ዬሱ̈ስ ክርስቶ̈ሳ ካንን ዪንቲ̇ ዎይንባር ማ̈ቆ̇።
Currently Selected:
2 ታሳ 3: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
