2 ታሳ 1
1
1ጾ̈ሳ̇ ኑ ባ̈ባዴይኬ ጎዳ ዬሱ̈ስ ክርስቶ̈ሳይ ማ̈ቂ̇ኖ ታሳሎንቃ ካታሚን ጋርታ ዎ ኣማ̇ኒዝ ኣሳንቦ ታ ጳውሎ̈ሳ ጋልዳፖ፣ ሲላ̇̈ሳ ጋልዳፔኬ ጢማ̈ቶ̈ሳ ጋልዳፖ ሚሺኖ ኪ̈ታ፦ 2ጾ̈ሳ̇ ባ̈ባ̈ ጋልዳፔኬ ጎዳ̈ ዬሱ̈ስ ክርስቶ̈ሳ ጋልዳፖ ኢ ኮሺቲንዲኬ ሳሪቲ̇ን ዪንታ̇̇ቦ ማ̈ቆ̇ጋ̈ቤ።
ጋላታኬ ዎ̈ሳኬ
3ኑ ኢሽንታን! ዪንታ̇ ኣማ̇ኒንዳ ዎይ ጋላስ ዲጫ̇ሙታ ሉካ̇ዚንኮታ̇ብኬ ዪንታ̇ብ ዎልዎልኣ ዎ ካንንዳ ዲጫ̇ሙታ̇ ሉኪ̇ኖምቦ ኑ̈ኒ ዪንታ̇ጊሻ̇ቦ ዎይ ጋላስ ጾ̈ሳ̇ ጋላታንዳብ ኮሺ̇̈ሬ። 4ዪ̈ኮታ̇ቦ ዎይሊን ሜታ ዪንታ̇ ዬሊ̇ናካሬ ዪንቲ̇ ኢዝ ጊዳ̇ ጋርታ ዎዛርፌ̈ን ጋርዢ ዪንታ̇ ኣማ̇ኒንባር ሚ̈ጚኖንዶ ዎ̈ሳ ኬ̈ንቦ ኑ ዪንታ̇ባዝ ሶ̈ሊሙታ ዪንታ̇ባር ኬርፊ̈ሬ።
5ዪን ዎይ ጾ̈ሳ̇ ፊርዲንዳ ጺ̇ላ ማ̈ቂ̇ኖን ቤይሳ̈ሬ። ዪኒ̇ኮታ̇ቦ ዪንቲ̇ ኢዝቦ ጋ̈ሪ ሜታ ኤኪ̇ኖ ጾ̈ሳ̇ ካ̈ቲቲን ኤካ̇ንዳብ ቤይሲኖ ኣስ ማ̈ቃ̇ር ፋይዲንቲ̇̈ሬ። 6ጾ̈ሲ ጺላ̇ ፊርዲዛ ማ̈ቂ̇ኖኮታ̇ቦ ዪንታ̇ ጋልዳ ሜታ ዬልኖ ኣሳን ጋልዳ ሜታ ዬልሬ። 7ዓት ሜታ ኤኪ̇ዛን ዪንታ̇ኬ ኑ̈ናኬ ኢ ሼምፒቺ̈ሬ። ዪና̇ ማ̈ቃ̇ዚንዳ ጎዳ ዬሱ̈ሲ ዎልቃባሮ ኢ ኪ̈ታንቻንባራ ኣፋ̈ፖ ዬይዝ ጋላ̇ሴ። 8ኢ ዬይዛ̈ዲ ታማ ላባራ፤ ዪኒ ጋላ̇ስ ጾ̈ሲ ኢያ ኤሪባ̈ሶ ኣሳንኬ ጎዳ ዬሱ̈ሳ ዎጛሊምቦ ኪ̈ቲንቲ̇ባ̈ ኣሳን ኢንታ ጋልዳ ፊርዲ̈ሬ። 9ኢንቲ ጾ̈ሳ̇ ቲ̈ናፕኬ ዎልቃባሮ ኢ ቦ̈ንቺን ጋልዳፖ ፋጊንታ̇ሪ ሜ̈ናብ ዪባራ ፊርዲንቲ̇̈ሬ። 10ኢንቲ̇ ፊርዲንታ̇ዚንዳ ኢ ፌ ጌ̈ሻ ኣሳንባር ቦንቺንታ̇ንዳብኬ ኢያ ኣማ̇ኒኖ ኣሳን ኢያ ሾክ ሾክ ዎታምፔ̈ን ዬይዝ ጋላሴ። ዪንታ̇ር ኑ ማርኪቲን ሲስካ̇ሪ ኢያ ኣማ̇ኒኖኮታ̇ቦ ዪንታ̇ሬ ዪን ኣማ̇ኒኖ ኣሳንባራ ዎልኣ ኢና ቤንቲ̇̈ሬ።
11ኑ ዪኖ̇ ቆፒ̇ሙታ̇ ዎይ ጋላስ ዪንታ̇ ጊሻ̇ብ ጾ̈ሳ̇ ዎሳ̇ዚንዳ፥ ጾ̈ሳ̇ ዪንታ̇ ጼይጊኖ ጼይሲ̇ምቦ ኢ ዪንታ̇ ማ̈ቂ̇ዝ ኣስ ማሃንፔ̈ንኬ ዪንቲ̇ ኮሽ̇ ባዝ ኦ̈ንዳብ ዶሳዚንዲኬ ዪንታ ኣማ̇ኒኖኮታ̇ቦ ኦ̈ዝ ኦ̈ሲን ዎይ ኢ ፌ ዎልቂንባር ዪንታ̇ ፎቲሳምፔ̈ኒዬ። 12ዪና̇ ኢዝፌ̈ኒ ኑ ጎዳ ዬሱ̈ሳ ሱሚን ዪንታ̇ ጋልዳ ቦንቺንታ̇ምፔ̈ንኬ ዪንታ̇ሬ ኑ ጾ̈ሳ̇̇ዴኬ ጎዳ ዬሱ̈ስ ክርስቶ̈ሳ ኮሺ̇ቲንባራ ኢባር ቦንቺንታምፔ̈ን ኑ ዎ̈ሲ̇̈ሬ።
Currently Selected:
2 ታሳ 1: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in