2 ቆሮ 10
10
ጳውሎ̈ሲ ኢ ኦ̈ሲን ኢጺ̇ዝ ኣሳንቦ ማሂኖ ማልሳ
1ዪንታ̇̇ባር ዎዶራ “ዬ̈ልቂዝ ኣስ” ማ ዪንታ̇ ጋልዳፖ̇ ጎታ̇ራ “ኢ̈ጪባ̈ሶ ኣስ” ጌይንቲ̇ኖ ታ ጳውሎ̈ሲ ክርስቶ̈ሳ ኣሽኪቲንባርኬ ኮሺ̈̇ቲንባራ ዪንታ̇ ጌሻ̈ሬ። 2ቴ ዪንታ̇̇ክ ዬ̈ራ ኑ̈ና “ዓኒ̇ ኣላሚን ጋልዶ ኣሳንፌ̈ን ዶኢሬ” ጌዪ ፋይዲዝ ኣሳን ቲ̈ን ኢ̈ችባይ ሶ̈ላንዳብ ኮያ̈ሬ፤ ዎቲናካር ቴ ዪንታ̇ ዪና̇ ኢዝፌ̈ን ኢ̈ችባይ ሶ̈ላምፔን ዎታካ̇ይፌ̈ኒ ቴ ዪንታ̇ ጌሻ̈ሬ። 3ኑ ዶኣዚንዳ ዓኒ̇ ኣላሚን ጋልዳ ማ̈ቂ̇ኔካሬ ኑ ኦሊ̇ንታዚንዳ ዓኒ̇ ኣላሚን ጋልዶ ኦሊንዲፌ̈ን ጊዳካዬ። 4ማ ኑ ኦሊ̇ንታዝ ኦላ ማሳ̇̈ሪንዳሬ ጻላ̈ታ ዎልቃ ይሳ̇ንዳቦ ዳንዳኢዝ ዎልቃ ዎ ጾ̈ሳ̇ ማሳ̈̇ራዶኬ ዓኒ̇ ኣላሚን ጋልዶ ማሳ̇̈ራፌ̈ን ጊዳካ̇ዬ። 5ኣሲ ጾ̈ሳ̇ ኤራካ̇ይፌ̈ኒ ዎቲዝ ኦቲራባር ዲንዲዝ ዋች̇ኬ ፋባ̈ሶ ላ̈ፋ ቆፊ ዎይ ኑ̈ኒ ላ̇̈ሊ̇̈ሬ፤ ኣሳ ቆፊ ዎይ ካ̈ታ̇ር ክርስቶ̈ሳብ ኪቲ̇ንታምፔን ዎቲ̈ሬ። 6ዪንቲ̇ ኪቲ̇ንታዚን ፎቲ̇ንታ ዉሬጌይን ኪቲ̇ንቲባሶን ዎይ ቃጣኣንዳቦ ኑ̈ኒ ጊጊ̇ንቲኔ።
7ዪንቲ̇ ቤቃ̇ዚንዳ ዛ̈ና ኣሳብ ቤንታ̇ዝ ባዚን ሙታ̇፤ ኣሲ ኦ̈ናካር ቴ ክርስቶ̈ሴዬ ጋ̈ሪ ኣማ̇ኒንቴጌዪን ኑ̈ናር ማ̈ቂ̇ን ኢ̈ኮንዲፌ̈ኒ ክርስቶ̈ሴይ ማ̈ቂ̇ኖን ኤራጋ̈ቤ። 8ጎዳ ኑ̈ብ ኢሚ̇ኖ ሲልጣ̈ኒምቦ ዎይሊን ኬርፌጌይናሬ ታ̈ና ዬ̈ሊ̇ባሴ፤ ዪና̇ ሲልጣ̈ኒንዳ ኑ̈ብ ኢሚ̇ንቲ̇ኖንዳ ዪንታ̇ ሚ̈ንንዳብዶኬ ዪንታ̇ ላ̈ላ̇ንዳብ ጊዳካ̇ዬ። 9ታ̈ኒ ቴ ጻ̈ፊኖ ኪ̈ታንንባራ ዪንታ̇ ኢ̈ሺቻ̇ንዳ ዎቲዛ ዪንታ̇̇ብ ማይጻፖ̇ጋ̈ቤ። 10ፔቲ̇ ፔቲ̇ ኣሳን “ጳውሎ̈ሲ ጻ̈ፊኖ ኪታ̇ን ዴ̈ጺ ዋ̈ይሬ፤ ኢ ፌ ቆሚ̇ን ኑባር ዎዶሪ ሊ̈ቄ፤ ኢ ሶ̈ላዳሬ ፋባሴ” ጌይሬ። 11ዪና̇ ጌይዝ ኣሳን ኑ ጎት̇ዶር ጻ̈ፋዝ ኪ̈ቲንባራር ማ̈ቂ̇ን ኡክ ዪንታ̇ባርዶራር ኦ̈ዝ ኦ̈ሲንባራ ፔ̈ታን ማ̈ቂ̇ኖን ኤራጋ̈ቤ።
12ማ̈ቂኔካሬ ፌ̈ብ ፌ̈ና ቤርኢሲዝ ፔቲ̇ ፔቲ̇ ኣሳንባር ኑ ኑ̈ና ካሚሲባ̈ሴ ዎይ ኑ ኑ̈ና ኢንታ̇ባር ዎልፌን ማሂባ̈ሴ። ዎቲናካሬ ኢንቲ̇ ፌ̈ና ፌባር ካሚሲ̈ሬ፤ ፌ̈ና ፌባር ዎልፌ̈ን ማሃር ቤቂ̈ሬ፤ ዪ̈ዲ ቦ̈ዚቲ። 13ኑ̈ኒ ዎቲናካሬ ጾ̈ሲ ኑ̈ብ ኢሚ̇ኖ ዪንታ̇ክ ዬሊ̇ኖ ኑ ኦ̈ሲምባር ኦቲርቂ̈ርዶኬ ኦቲርቃ̇ንዳብ ኮሻ̇ዚምፖ ኣ̈ር ኦቲርቂ̇ባ̈ሴ። 14ዪንታ̇̇ር ዎንዳ ኑ ኦ̈ሳ ቤሳ̇ ጋርታ ማ̈ቂ̇ኖኮታ̇ቦ ክርስቶ̈ሳ ዎጛሊን ታማ̈ርሳ̇ንዳቦ ኑ ዪንታ̇̇ክ ዬይኖ ኬ̈ልባራ ዪኒ̇ ቤሲምፖ̇ ኑ ኣ̈ካዬ። 15ዪ̈ኮታ̇ቦ ጾ̈ሲ ኑ̈ቦ ጌይኖ ኦ̈ሳ ቤሲ̇ምፖ̇ ኣ̈ሪ ሜላ ኣሳ ኦ̈ሳባራ ኑ ዎይሊን ኦቲርቂባ̈ሴ። ዪንታ̇ ኣማ̇ኒን ዲጫ̇ሙታ̇ ሉካ̇ምባራ ዪንታ̇ ጊዳ̇ ዎ ኑ ኦ̈ሳ ቤሲ̇ንዳ ሺ ሻካ̇ሙታ̇ ሉካ̇̈ሬ ጌዪ ኑ ታስፋ ጋዲ̇̈ሬ። 16ኢናፖ̇ ዪንታ̇̇ፖ̇ ኣ̈ር ጌዳ ዎ ጋዳን ጋርታ ሉካ̇ሪ ጾ̈ሳ̇ ዎጛሊን ሶ̈ላንዳብ ዳንዳኢ̈ሬ፤ ኑ̈ኒ ሜላ ኣሳ ኦ̈ሳ ቤስ̇ ጋርታ ጌላሪ ቲ̈ን ኦ̈ሲንቲ̇ኖ ኦ̈ሳባር ኬርፋንዳ̇ብ ኮዪባ̈ሴ።
17“ኬርፋንዳብ ኮዪዝ ኣሲ ጎዳባር ኬርፋጋቤ።” 18ኣሲ ኣንጂንቲ̇ዛ̈ዲ ጎዳ̈ዲ “ኔ ኮሽ ኦ̈ኔ” ጋ̈ሪ ኣንጄጌይንዶዶኬ ፌ̈ብ ፌ̈ና ኣንጄጌይንዶ ጊዳካ̇ዬ።
Currently Selected:
2 ቆሮ 10: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
