बुतोंग 25

राजपाल फेस्तुसना मुने पोलुसना चवकसि किन्तोर

1फेस्तुस यहुदि प्रदेशतोर राजपाल आतुर मून्ड दियाना पजा कयसरिया सहेरताल येरुसलेमतिगा हतुर। 2असके मुक्याल याजकलोरक अनि यहुदितोर मुक्याल लोकुरक ओना मुने वास पोलुसना विरोद केस कितुर। 3हरितिगा मकस मन्जुन पोलुसिन हव्काना साटि ओरक डाव किस मतोरक इन्जोर दया किस ओन येरुसलेमतिगा ततिला पहाजे इदाम ओनाके विनन्ति कितुर। 4फेस्तुस उत्तर हितुर: “पोलुसिन कयसरियातिगा केपसोर मन्तोर, अनि नना अगा सान्डेय दाका। 5मियागा अदिकारि लोकुरक नावासंग वायिर अनि येर मानेय बोदे खराब बुतो कितोर ते ओनागा दोष लावे केविर” इन्जोर उत्तर हितुर।

6फेस्तुस आठ-दहा दियांग येरुसलेमतिगा ओरासंग मन्ज ओर कयसरियातिगा मलस हतुर, अनि दुसरो दिया न्याय सिंहासनतिगा उदस पोलुसतुन तताना आग्या हितुर। 7पोलुस वातुर असके येरुसलेमताल वास मतोर ओरक यहुदिलोरक ओना हेरे-गुरे नितस ओना विरुद पकाय दोष लावे कितुरक। 8मति पोलुस ते उत्तर हितुर: “नना यहुदिलोरा नियमता अनि मन्दिरता अनि हजोर राजाना विरोदते बोदे गुन्हा केवोन” इन्जोर उत्तर हितुर ते अदेना सबुतता यहुदि अदिकारि लोकुरक हियाला परोर आन्दुरक। 9असके फेस्तुस यहुदिलोरकुन गिरदा कियाना इच्चाते पोलुसतुन पुच्चेमातुर: “येरुसलेमतिगा हन्जुन अगा नावा मुने इद पोल्लोता बारेते निया न्याय आयि इदाम निया इच्चा मन्ता बहे?” 10अदेन पोलुस उत्तर हितुर: “नना हजोर राजाना न्याय सिंहासन मुने नितितोना, अगाय नावा न्याय आयिला पहाजे। नना यहुदिलोरा बोदे गुन्हा केवोन, इद निमा वने बेस पुन्तोन। 11नना गुन्हेगार अनि हव्कस वाटाना योग्य बोदे बुतो कितोना ते नना हायान साटि तयार मन्तोना, मति येरक नावागा दोष लावे किन्तोरक ओद पोल्लो खरोय मन्ता इदाम ठहरे मायो आयार ते बोरे नाकुन ओरा कयदे सोपेकिया परोर। 12नना हजोर राजाना हेरे असा न्याय कियाना सन्दि तलकान्तोना” इन्जोर पोलुस इतुर। असके फेस्तुस सभाता विचार येतस उत्तर हितुर: “निमा हजोर राजान हेरे न्याय तलकतोन ते हजोर राजाना मुने दाकि।”

राजाल अग्रिपाना मुने पोलुस

13हुचुक दियांग आतपा अग्रिपा राजाल अनि ओना हेलाळ बिरनिके कयसरियातिगा वास फेस्तुसतुन मिलेमातुर। 14ओरक पकाय दियांग अगा मतपा पजा फेस्तुस पोलुसना बारेते राजान वेहतुर, “फेलिक्स जेहलतिगा बन्दि इरस तासिस हतोर वरोर मानेय इगा मन्तोर। 15नना येरुसलेमतिगा मन्दान असके मुक्याल याजक अनि यहुदि अदिकारि लोकुरक नावा हेरे वास ओना विरोद दोष लावेकिस ओन दन्डता आग्या हेविर इन्जोर इच्चा कितुर। 16मति केस केवालना मुने वास गुन्हा केवाल आपुना पोरो किता गुन्हाता बारेते उत्तर हियाना सन्दि गुन्हा केवालतुन पुटाना मुने बोनाय दन्ड साटि सोपेह कियाना रोमि लोकुरा रिति हिले इन्जोर नना यहुदि अदिकारिलोकुरकुन उत्तर हितान। 17इन्जोर ओरक इगा जमा आतुरक असके नना बाताले बेरा केवोन आस दुसरोय दिया न्याय सिंहासन पोरो उदस ओर मानेयतुन तताना आग्या हितान। 18ओनागा दोष लावे केवालोर वळकान साटि नितितुर असके ओरक नना विचार किन्दान बोदे दोष ओनागा लावे केवाय, 19केवल ओरा दरमता बारेते अनि बोर जितो मन्तोर इदाम पोलुस इन्तोर बोरे हातोर मानेय येसुना बारेते ओरा अनि येरा विवाद आतु। 20असके येना चवकसि बदाम कियाना इद नना सोबाय पुनोन इन्जोर नना ओन पुच्चेमातान येरुसलेमतिगा हन्जुन अगा इद पोल्लोता बारेते निया न्याय आयि इदाम निया इच्चा मन्ता बहे? 21मति पोलुस ओना न्याय हजोर राजाना हेरे आयि इदाम विनन्ति कितुर असके ओन हजोर राजाना हेरे लोहोन अचोनवनाह जेहलतिगा इराट इन्जोर नना आग्या हितान।” 22असके अग्रिपा राजाल फेस्तुसतुन इतुर, “नना वने ओर मानेयना केन्जाना इच्चा किन्तोना।” अनि ओर इतुर, “निकुन ओन नाळ केन्जिला पुटार।”

23दुसरो दिया अग्रिपा अनि ओना हेलाळ बिरनिके सयनिक दलतोर मुक्य अदिकारिलोरक अनि सहेरतोर मुक्याल लोकुरासंग न्याय कियाना सभा भवनतिगा पकाय सोबाय तयारि किस अवतुरक। असके ओरक पोलुसतुन तरीर इन्जोर फेस्तुस आग्या हितुर। 24फेस्तुस इतुर: “हे अग्रिपा राजा अनि मावासंग इगा वातोरक हे सबोय मानेयक! येर मानेयतुन निमाट हुळान्तोरिट बहे। सबोय यहुदिलोरा दल, येरुसलेमतिगा अनि इगा वने केयस-केयस ओर जितो मन्दाना उचित हिले इन्जोर नाकुन विनन्ति कितुरक ओद येर मानेयना विरोदते मता। 25ओर हव्काना योग्य इदाम बाताले केवोर इदाम नना पुतान; अनि ओर आपुनास हजोर राजाना हेरे न्याय तलकतुर ते नना ओन हजोर राजान हेरे लोहाना निर्णय कितान। 26ओना बारेते हजोर राजान बाताल कोटका इन्जोर नना पुनोन; इन्जोर नना ओन मिया मुने, विशेषाल हे अग्रिपा राजा निया मुने ततोना। अनि चवकसि कितपा पजा ओना बारेते बाताले कोटिला नाकुन पुटार। 27बाक्याकि कयदितुन हजोर राजान मुने लोहानपा ओनागा बोव दोष लावेकितुर अदेना बारेते वेहाना सोबाय मन्ता इन्जोर नाकुन लागता।”

Currently Selected:

बुतोंग 25: fmu

Highlight

Copy