बुतोंग 23

यहुदि लोकुरा हजोर सभाता मुने पोलुस

1पोलुस यहुदि लोकुरा हजोर सभातुन टकलावेकिस हुळस इतुर: “हे दादालोरक नना नेन्डवनाह केवल परमेस्वरना मुने खरोय मन्दे जिवन जिवेमातोना।” 2असके हजोर याजक हनन्याह ओना हेरे नितस मतोर ओर ओना टोडितिगा थापळिते हियाना आग्या हितुर। 3असके पोलुस ओन इतुर, “हे चुना माचता गुट, परमेस्वर निकुन हियानुर। निमा मूसाना नियमता अनुसार नावा न्याय कियान साटि उदितोन अनि पजा बाताल नियमता विरुद नाकुन हाहाना आग्या हिन्तोन#मत्ति २३:२७,२८?” 4ओना हेरे नितस मतोरक: “बाताल निमा परमेस्वरना हजोर याजकना निन्दा किन्तोन?” इन्जोर पुच्चेमातोरक। 5पोलुस इतुर: “हे दादालोरक येर हजोर याजक आन्दुर इन्जोर नना पुनोन आन्दान, बाक्याकि ‘आपुना लोकुरा मुक्यालतुन बाताले खराब इन्मा’ ” इदाम पवित्र पुस्तकतिगा कोटता मन्ता इन्जोर इतुर#निर २२:२८।

6असके ओरागा उन्दि दल सदुकिलोरा अनि उन्दि दल परीसिलोरा मन्ता इद पुन्ज पोलुस सभातिगा जोरदे इतुर: “हे दादालोरक नना परीसि अनि परीसिलोरा सन्तान आन्दान; हातोरा आशा अनि असा जिवेमायाना कारण नावा चवकसि आयिला आता#बुतोंग २६:५; फिलि ३:५।” 7ओर इद पोल्लो इतुर असके परीसि अनि सदुकिलोर वाद-विवाद कियाला लागतुरक, अनि सभातिगा रन्ड दलक आतुंग। 8बाक्याकि हातपा असा जितो आयाना हिले अनि स्वरगदूत हिलेर अनि आत्मा वने हिले इन्जोर सदुकिलोर इन्तोर मति परीसिलोर इद सबोयतुन मानेमान्तोरक#मत्ति २२:२३; मर १२:१८; लूका २०:२७। 9असके पकाय गळबड आतु अनि परीसि दलतोर मूसाना नियमतुन करिहवालोरक निकेडाल हुचुलोरक निचुन इदाम इन्ज पोलुसिन साटि वळकिला लागतुरक: “माक येर मानेयनिगा बाताले दोष हुळोम, अनि बोदे आत्मा या स्वरगदूत ओनासंग वळक परान्ता” इन्जोर इतुर। 10इदाम पकाय वाहचतुरक असके ओरक पोलुसिन तुकळेंग तुकळेंग कियानुरक इन्जोर सयनिक दलतोर मुक्या अदिकारि वरियस सयनिक लोकुरकुन केयस पोलुसिन ओरा नडुमताल जबरदस्ति पसिहस किल्लातिगा ओयिर इन्जोर आग्या हितुर।

11ओदे नरका प्रबु पोलुसिना हेरे नितस इतुर: “हे पोलुस, हिमत किम, बाक्याकि निमा येरुसलेमतिगा नावा गवाहि हिति अदामे निकुन रोमि सहेरतिगा वने गवाहि हिया लागार” इन्जोर इतुर।

पोलुसतुन हव्काना योजना

12सकार आतपा यहुदिलोर माक पोलुसिन हव्कस वाटानावनाह बाताले तिनोम या उनोम आयकोम इन्जोर मकस योजना कितुरक। 13इदाम मकस योजना कितोरक च्याळिस लोकुरकताल पकाय मतोरक। 14ओरक मुक्याल याजकलोरक अनि यहुदि लोकुरा अदिकारि लोकुरा हेरे हन्जुन इतुरक: “माक पोलुसतुन हव्कस वाटानावनाह बाताले तिनोम इन्जोर माक शपथ येतितोम। 15इन्जोर निमाट ओना बारेते असा वने बेस चवकसि किन्तोर अदाम लेहका ओन मिया हेरे तरीर इन्जोर मिया हजोर सभा इदेक सयनिक दलता मुक्य अदिकारिन विनन्ति किम्ट। मति ओर इगा अवानाता मुनेय माक ओन हव्कान साटि तयार मनकोम इन्जोर इतुरक।”

16पोलुसना भाश्याल इद दोखाता बारेते केन्जतुर असके ओर किल्लातिगा हन्जुन पोलुसतुन इदेना बारेते वेहतुर। 17पोलुस सयनिक दलता अदिकारिनिगाडाल वरोन आपुना हेरे केयस: “येर लयोरतुन सयनिक दलता मुक्या अदिकारिना हेरे ओम्ट, येन ओनासंग बाताले वळकाना मन्ता” इन्जोर इतुर। 18सयनिक दलता अदिकारि लोकुरक ओन सयनिक दलता मुक्य अदिकारिना हेरे ओस इतुर: “कयदि पोलुस नाकुन केयस येर लयोन निया हेरे ओम्ट इन्जोर विनन्ति कितुर, ओन नियासंग बाताले पोल्लोंग इन्दाना इच्चा मन्ता” इदाम इतुर। 19दलतोर अदिकारि ओना कय पयस अलग ओस ओन पुच्चेमातुर: “नाकुन बाताल वेहाना निया इच्चा मन्ता?” 20ओर इतुर, “यहुदिलोर पोलुसना बारेते असा बेस बेस चवकसि कियाना साटि इन्जोर लेहका ओरक नाळ वास ओन हजोर सभातिगा तरीर इदाम निकुन विनन्ति कियाना साटि योजना कितोरक। 21मति निमा ओरा पोल्लो केन्जमा बाक्याकि ओरागाडाल च्याळिसताल जास्तो लोकुरक पोलुसतुन हव्कस वाटानावनाह ओरक तिनोर उन्डोर आयनुर इदाम शपथ येच ओना हव्कान साटि मकस उदितोरक। निया आग्या पुटार इदाम विचार किस ओरक इदेक तयारिते मतोरक।” 22असके “निमा नाकुन इव पोल्लोंग वेहतोन इन्जोर बोने वेहमा”, इदाम आग्या हिस सयनिक दलतोर मुक्य अदिकारि लयोरतुन हन्दिला हितुर।

पोलुसतुन फेलिक्सना हेरे लोहान्तोर

23असके सयनिक दलतोर मुक्य अदिकारि रन्ड दुसरो अदिकारिलोकुरकुन केयस, “इद नरकाडा नोव नेकतांग कयसरियातिगा हन्दान साटि रन्ड नुहक सयनिक, सत्तर कोडा पोरो हनवालोरक सयनिक अनि रन्ड नुहक भालांगवालेह सयनिक लोकुरकुन तयार इराट। 24अनि पोलुसिन हन्दाना साटि कोडातुन तयारि किस इराट। ओन सुरक्षित राज्यपाल फेलिक्सना हेरे ओयिला पहाजे।” 25ओर इद रितिते उन्दि चिटि वने ओन कोटतुर: 26“माननिय राजपाल फेलिक्सिन क्लवुदियुस लूसियासना नमस्कार! 27येर मानेयतुन यहुदिलोरक पयस हव्काना इच्चा कितुरक, मति येर रोमि आन्दुर इन्जोर नना पुतान असके सयनिक लोकुरासंग हन्जुन येन ओराताल पिसियस ततान। 28ओनागा बोद कारणते ओरक दोष लावे किन्तोर इन्जोर नना पुन्दाना इच्चा किन्दान, इन्जोर ओन यहुदि लोकुरा हजोर सभातिगा ततान। 29असके ओरक आपुना यहुदि नियमता वादता बारेते ओनागा दोष लावे किन्तोरक इन्जोर नना पुतान मति ओन हव्कस वाटाना या जेहलतिगा वाटाना योग्य बोदे दोष ओनागा हिले इन्जोर हुळतान। 30ओरक येर मानेयतुन हव्कान साटि तयार मन्तोर इन्जोर नाकुन वेहतुर असके नना सान्डेय ओन निया हेरे लोहतान; अनि येना विरोद किता ओरा केसतुन निया मुने इरिर इन्जोर येना विरोद केस केवालोरकुन आदेस हितोना। धन्यवाद!”

31इन्जोर सयनिक दलता मुक्य अदिकारिना आग्याता अनुसार सयनिक लोकुरक पोलुसतुन पयस नरकाय-नरका येरुसलेमताल अन्तिपत्रसतिगा वातुरक। 32दुसरो दिया पोलुसिनासंगे ओयान साटि कोडाते हनवालोर सिपायि लोकुरकुन तासिस पिसतोर सयनिक लोकुरक येरुसलेमतिगा आपुन किल्लातिगा मलस हतुरक। 33अनि कोडाते हनवालोर सयनिक लोकुरक कयसरियातिगा अवस राज्यपालतुन चिटि हितुर अनि पोलुसतुन वने ओना मुने निपिहतुर। 34ओर चिटि वाचेकिस पुच्चेमातुर: “येर बोद प्रदेशतोर आन्दुर?” 35अनि किलिकिया प्रदेशतोर आन्दुर इन्जोर पुतुर असके ओन इतुर: “नियागा केस केवालोर वायनुर असके निया केस सुरु कियाका” इन्जोर इतुर। अनि ओर ओन हेरोदेसना राजवाळातिगा केपसोर इराना आग्या हितुर।

Currently Selected:

बुतोंग 23: fmu

Highlight

Copy