बुतोंग 11

यहुदि आयोर लोकुरा नडुम परमेस्वर किता बुतोता बारेते पतरस येरुसलेमतिगा स्पष्ट वळकान्तोर

1पजा यहुदि आयोर लोकुरक वने परमेस्वरना पोल्लो मानेमातोर इन्जोर येसुना खास चेलाल लोकुरक अनि यहुदि प्रदेशतिगा मनवालोर तमोलोरक केन्जतुरक। 2इन्जोर पतरस येरुसलेमतिगा वातुर असके कतना कितोर यहुदिलोकुरक ओनासंग वाद-विवाद कियाला लागतुरक। 3“निमा कतना आयोर लोकुरकनिगा हन्जुन ओरासंग बाक्या तिति” इदाम इतुर। 4असके पतरस ओरकुन सुरुवाताल ओळीय-ओळीय समजेह किस वेहतुर, 5“नना याफा सहेरतिगा प्रार्थना किन्दान असके उन्दि दरशन हुळतान, आबारताल हजोर चादर लेहका नालुंगास कोन्टांग पयताप लेहका उन्दि चिज आबारताल रयस नावा हेरे वातु। 6नना अदेन बेस हुळतान असके अगा दरतितांग नालुंग काल्कवाले जानवरक अनि केळाता जानवरक अनि पोटाते दान्तांग अव जन्तुंग अनि आबारतांग पिटेंग हुळतान। 7अनि ‘हे पतरस तेदा, हव्कस तिन’ इदाम नावासंग वळकता उन्दि लेंग वने केन्जतान। 8ओद लेंग केन्जुन नना इतान: ‘आयो प्रबु, आयो! विटाळ या अशुद्ध चिज नना बसकेय तिनोन।’ 9आबारताल असा ओद लेंग ‘परमेस्वर बोदायि शुद्ध कितोर अदेन निमा विटाळ इनमा’ इन्जोर इतुर। 10मून्ड बेरा इदामे आतु असके सबोय चिज असा आबार पोरो ताहतुर। 11अनि सान्डेय कयसरियाताल कुरनेलियुस पोरोयतोर वरोर मानेय नावा हेरे लोहच मतोर ओर मुवुर मानेयक माक मतोरोम ओद लोन मुने वातुरक। 12ओरा बारेते बोदे शंका केवाय ओरासंग हन्दिला इन्जोर पवित्र आत्मा नाकुन वेहतुर। अनि येरक सारुंग तमोलोरक वने नावासंग वातुरक; अदाम माक कयसरिया सहेरतिगा कुरनेलियुस पोरोयतोर मानेयना लोन हतोम। 13कुरनेलियुस आपुना लोतिगा वरोर स्वरगदूत नितितोर हुळतुर अनि ओर स्वरगदूत ओन ‘याफा सहेरतिगा मानेयकुन लोहच पतरस पोरोयतोर शिमोनिन केया, 14निमा अनि निया सबोय परिवारतुन पिसहाना पुटान साटि मन्ता परमेस्वरना पोल्लो ओर निकुन इन्दानुर’ इदाम स्वरगदूत ओरकुन वेहतुर इन्जोर ओर माकुन इतुरक। 15नना ओरकुन वळकसोर मन्दाना असके पवित्र आत्मा सुरुते मावागा रयस मता अदामे ओरागा वने रयतु। 16असके नना: ‘युहन्नाल ते एते बपतिस्मा हितुर, मति निमाट पवित्र आत्माते बपतिस्मा येतकिट#बुतोंग १:५ ’ इदाम प्रबु इन्ज मतोर ओद पोल्लो आल्हितान। 17इन्जोर प्रबु येसु मसिनिगा विस्वास कियानाते पुटस मन्ता ओदे दान ओरकुन वने परमेस्वर हितुर ते परमेस्वरतुन रोके कियान साटि नना बोर मन्तोना?” 18ओरक इद केन्जचुन पतरसना विरोद वाद कियाना बन्द किस कमेक मतोरक: “असके ते परमेस्वर यहुदि आयोर लोकुरकुन वने अनन्त जिवन साटि पस्तेमायाना दान हितोर” इदाम इन्जुन परमेस्वरना महिमा कियाला लागतुर।

अन्ताकिया सहेरतिगा मसिलोकुरा सभाता सुरुवात

19स्तिफानुसना घटनाते आता पकाय तकलिपते हिके होके आस मतोरक सबोय विस्वासि लोकुरक केवल यहुदिलोकुरकुन येसु मसिना सोबाता पोल्लो वेहचोर फिनिके प्रदेश अनि सायिप्रस पोरोयता समुद्र नडुमता टापु अनि अन्ताकिया सहेरतिगा वने वलियसोर वलियसोर हतुरक#बुतोंग ८:१-४। 20मति ओरागाडाल हुचुक सायिप्रसलोरक अनि कुरेनिलोरक मतोरक; ओरक अन्ताकियातिगा हन्जुन युनानि लोरकुन वने प्रबु येसुना सुसमाचारता पोल्लोंग केन्जहिला लागतुरक। 21प्रबुना लाव ओरागा मता अनि पकाय लोकुरक विस्वास किस प्रबुनिके मलतुरक। 22अन्ताकिया सहेरता मसिलोकुरा सभाता बारेता इद चर्चा येरुसलेम सहेरता मसिलोकुरा सभातिगा केन्जतुरक असके ओरक बरनाबासतुन अन्ताकिया लोहतुरक। 23-24ओर बरनबास वरोर सोबाय मानेय मतोर; अनि ओर पवित्र आत्मातुन मानेमास परमेस्वरनिगा सोबाय विस्वास केवालोर मतोर, ओर अगा अवस परमेस्वर लोकुरा पोरो हिन्तोर आशिष हुळस गिरदा आतुर अनि जिवालावे किस प्रबुनिगा विस्वास किम्ट इन्जोर सबोयलोरकुन उपदेश हितुर। अनि दुसरो पकाय लोकुरक प्रबुनिगा विस्वास कितुरक। 25असके ओर शावुलिन पळकान साटि तरसुसतिगा हतुर। ओर शावुलिन मिलेमातुर असके ओन अन्ताकियातिगा ततुर। 26अनि ओरक उन्दि वरसाहवनाह अन्ताकिया सहेरता मसिलोकुरा सभातासंग मिलेमासोर पकाय लोकुरकुन उपदेश हिसोर मतोर। अनि मसिना चेलाह लोकुरकुन सबोयता पहले अन्ताकियातिगाय “मसिलोकुरक” इदाम पोरोय केयतुरक।

27अवे दियांगते हुचुलोर परमेस्वरना पोल्लो वेहवालोरक येरुसलेमताल अन्ताकिया वातुरक। 28ओरागाडाल वरोर परमेस्वरना पोल्लो वेहवालना पोरोय अगबुस मता। ओर नितस सबोय दुनियातिगा पकाय दुष्काळ अरार इन्जोर पवित्र आत्माता द्वारा भविष्यवाणि कितुर। अनि ओद दुष्काळ रोमि देशता क्लवुदियुस पोरोयता हजोर राजाना काळते अरतु#बुतोंग २१:१०#११:२८ क्लवुदियुस पोरोयतोर हजोर राजा ए. डि: ४१-५४ वनाह रोमि देशता हजोर राजाल मतोर ओना काळते ए. डि: ४६ तिगा यहुदा प्रदेशतिगा पकायि हजोर दुष्काळ अरतु। । 29असके चेलालोरक सबोयजन आपुना धनता अनुसार यहुदियातिगा मन्वालोर विस्वासि लोकुरा मदत साटि हुचुक मदत लोहिर इन्जोर चेलालोरक निर्णय कितुरक। 30ओरक डबुंग जमा किस बरनबास अनि शावुलना कयदे हितुरक। ओरक ओव डबुंग यहुदा प्रेदेशता मसिलोकुरा सभाता मुक्या लोकुरकनिके लोहतुरक।

Currently Selected:

बुतोंग 11: fmu

Highlight

Copy