रोमियन 9
9
परमातिमा अउर उनखर चुने मनई
1हम मसीह के ऊपर बिसुआस करित हएन, एसे हम झूँठ नहीं बोली, पय हम सही कहित हएन, कि हमरे मन के सोच-बिचार पबित्र आत्मा के अँगुआई से इआ गबाही देत हय, 2कि हमहीं बड़ा दुख लागत हय, अउर हमार मन हमेसा दुखी रहत हय। 3काहेकि हम इहाँ तक चाहित हएन, कि हमरे यहूदी जाति के भाई-बहिनी, जउन परमातिमा से दूरी होइगे हँय, अगर हम उनखे खातिर मसीह के सराप काहीं अपने ऊपर लइके मसीह से भले दूरी होइ जइत, पय ऊँ पंचे बच जातें। 4एसे कि ऊँ पंचे इजराइल के बंस के आहीं; अउर परमातिमा के गोद लीन सन्तान होंइ के हक्क उनहिन काहीं मिला हय। अउर ऊँ पंचे परमातिमा के सामर्थ के कामन काहीं देखि चुके हँय, अउर उनहिन के साथ परमातिमा करार घलाय किहिन तय, अउर मूसा नबी के द्वारा अपने बिधान काहीं दिहिन रहा हय, अउर उनहिन काहीं मन्दिर माहीं अराधना करँइ के खातिर कहिन तय। अउर उनहिन से वादा घलाय किहिन तय, 5अउर पुरखव#9:5 पुरखव अरथात अब्राहम, इसहाक अउर याकूब उनहिन के बंस के आहीं उनहिन के बंस के आहीं, अउर मसीह घलाय मनई के रूप लइके उनहिन के कुल माहीं पइदा भें, जउन सगले मनइन के परमातिमा आहीं, अउर उँइन मसीह जुग-जुग तक धन्य कहइहँय। आमीन! 6पय अइसा नहिं आय कि परमातिमा आपन बचन पूर नहीं किहिन, काहेकि जेतने इजराइल के बंस के हें, उनमा से सगले जने परमातिमा के चुने न होंहीं। 7अउर जेतने अब्राहम के बंस माही पइदा भें हँय, उनमा से सगले अब्राहम के सच्चे सन्तान न कहइहँय, काहेकि पबित्र सास्त्र माहीं लिखा हय, कि “इसहाक#उत्प 21:12 से जेतने पइदा होइहँय, उँइन तोंहार सच्ची सन्तान कहइहँय।” 8अरथात इआ कि संसारिक रूप से पइदा होंइ बाले लड़िका- बच्चा परमातिमा के सन्तान न कहइहँय, बलकिन परमातिमा के वादा के मुताबिक पइदा भें सन्तानय अब्राहम के बंस माने जइहँय। 9काहेकि अब्राहम से परमातिमा अइसन वादा किहिन रहा हय, कि “अँगले साल#उत्प 18:10,14 हम इहय समय माहीं जब दुसराय अउब, तब तोंहरे मेहेरिआ सारा के एकठे लड़िका पइदा होइ चुका होई।” 10अउर ऊँ लड़िका हमार पंचन के पुरखा इसहाक आहीं, अउर जब ऊँ रिबका से काज किहिन, अउर रिबका उनसे लड़कहाई भईं, अउर उनखे पेटे माहीं जोड़ीमा लड़िका रहे हँय। 11अउर ऊँ लड़िकन के पइदा होंइ से पहिलेन, अउर उनखे कुछू नीक-नागा करँइ से पहिलेन, परमातिमा कहिन, कि “बड़कबा#उत्प 25:23 लड़िका छोटकबा लड़िका के दास होई।” 12अउर परमातिमा इआ बतामँइ के खातिर रिबका से कहिन कि, ऊँ कोहू काहीं ओखे निकहे कामन के कारन नहीं चुनँय, बलकिन अपने मरजी के मुताबिक ओही चुनत हें। 13जइसन पबित्र सास्त्र माहीं घलाय लिखा हय, कि “परमातिमा कहिन, हम एसाव से जादा याकूब से प्रेम#मला 1:2,3 किहेन हय।” 14एसे हम पंचे का कही? का परमातिमा अन्याय करत हें? नहीं, बेलकुल नहीं! 15काहेकि परमातिमा मूसा नबी से कहिन हीं, कि
“हम जेखे#निरग 33:19 ऊपर दया करँइ चाहब, त ओखे ऊपर दया करब, अउर जेखे ऊपर किरपा करँइ चाहब, त ओहिन के ऊपर किरपा करब।”
16एसे कोहू के इच्छा के मुताबिक नहीं, अउर न कोहू के जादा कोसिस किहे के कारन, परमातिमा ओही चुनँय, बलकिन ऊँ केही चुनत हें, इआ दया करँइ बाले परमातिमा के हाँथे माहीं हय। 17काहेकि जइसन पबित्र सास्त्र माहीं लिखा हय, “परमातिमा#निरग 3:16 मिस्र देस के राजा फिरौन से कहिन रहा हय, कि ‘हम तोहईं एसे राजा बनायन हय, कि तोंहरे ऊपर हम अपने सामर्थ के कामन काहीं देखाई, जउने ऊँ कामन के द्वारा हमरे महिमा के प्रचार धरती माहीं रहँइ बाले सगले मनइन के बीच माहीं होय। 18एसे परमातिमा जउने मनई के ऊपर दया करँइ चाहत हें, त ओखे ऊपर दया करते हें; अउर जेखे मन काहीं कठोर करँइ चाहत हें, त ओखे मन काहीं कठोर कइ देत हें।
परमातिमा के क्रोध अउर उनखर दया
19एसे तोंहरे पंचन म से कोऊ हमसे इआ कहि सकत हय, कि अगर परमातिमा सब कुछ अपने मरजी से करत हें, त पुनि ऊँ काहे हमरे पंचन के ऊपर दोस लगाबत हें? काहेकि परमातिमा के मरजी के कोऊ बिरोध नहीं कइ सकय। 20अउर हे भाई, तूँ को आह्या? तूँ त केबल मनई आह्या, जउन परमातिमा काहीं उल्टहाव देते हया? त इआ बताबा, कि का कउनव बनी चीज अपने बनामँइ बाले से कहि सकत ही, कि तूँ हमही अइसा काहे बनए हया? 21का कुम्हार काहीं इआ हक्क नहीं रहय, कि उआ माटी के लोंदन से कुछ बरतन खास कामन के खातिर बनबय, जिनखर मनई आदर करत हें, अउर कुछ बरतनन काहीं साधारन कामन के खातिर बनबय जिनखर मनई आदर नहीं करँय। 22त एमा कउन अचरज के बात ही, अगर परमातिमा आपन सक्ती देखामँय के खातिर कुछ मनइन काहीं बनाइन, कि जउने उनखे ऊपर आपन क्रोध देखामँइ, जउन नास होइन के खातिर तइआर कीन गे रहे हँय, तऊ उनखर बड़े धीरज से सहत रहिगें। 23अउर जउने मनइन के ऊपर परमातिमा दया करत हें, उनहीं इआ देखामँइ के खातिर, कि ऊँ केतना महान हें, उनखर सहत रहिगें, अउर ऊँ मनइन काहीं अपने बड़े सम्मान माहीं भागीदार बनामँइ के खातिर पहिलेन से तइआर किहिन हीं। 24अरथात हमरे पंचन के ऊपर, जिनहीं परमातिमा केबल यहूदी लोगन भर से नहीं, बलकिन गैरयहूदी लोगन म से घलाय चुनिन हीं। 25अउर जइसन कि होसे नबी के लिखी किताब माहीं लिखा हय#होसे 2:3, कि
“जउन मनई पहिले हमार प्रजा नहीं रहे आहीं, उनहीं हम आपन प्रजा बनाउब, अउर जउन मनई पहिले हमहीं पियार नहीं रहे आहीं, ऊँ अब हमहीं पियार होइगें हँय।”
26अउर ओमाहीं इहव घलाय लिखा हय#होसे 1:10,
“अउर अइसन होई, कि जउने जघा माहीं हम उनसे कहेन तय, कि तूँ पंचे हमार प्रजा न होह्या, उहय जघा माहीं ऊँ पंचे जिन्दा परमातिमा के सन्तान कहइहँय।”
27अउर यसायाह नबी अपने लिखी किताब माहीं इजराइल के सन्तानन के बारे माहीं चिल्लाइके कहत हें, कि “चाह इजराइल#यसा 10:22,23 के सन्तानन के गिनती समुद्र के बारू के बराबर होय, तऊ उनमा से थोरिन काहीं मनई बचे पइहँय।
28काहेकि प्रभू अपने न्याय काहीं धरती के ऊपर पूरी तरह से अउर हरबिन पूर करिहँय।”
29अउर जइसन यसायाह नबी भबिस्यबानी किहिन तय, कि “अगर सर्बसक्तिमान प्रभू, हमरे पंचन के खातिर बंस न छोंड़ते, त हम पंचे सदोम#यसा 1:9 अउर अमोरा कि नाईं पूरी तरह से नास होइ जइत।”
इजराइली लोगन के अबिसुआस
30हमरे पंचन के कहँइ क मतलब इआ आय, कि गैरयहूदी लोग परमातिमा के नजर माहीं निरदोस बनँइ के खोज माहीं नहीं रहे आहीं, तऊ परमातिमा के नजर माहीं निरदोस बनिगें, काहेकि प्रभू यीसु मसीह के ऊपर किहे बिसुआसय के कारन ऊँ पंचे परमातिमा के नजर माहीं निरदोस बनिगें हँय। 31पय इजराइल देस के मनई, खुद काहीं परमातिमा के नजर माहीं निरदोस बनामँइ के खातिर, मूसा नबी के बिधान के पालन करत रहे हँय, तऊ ऊँ पंचे निरदोस नहीं बन पाएँ। 32काहे नहीं बन पाएँ? एसे कि ऊँ पंचे मसीह के ऊपर बिसुआस नहीं किहिन, बलकिन मूसा के बिधान के पालन कइके धरमी बनँइ के कोसिस करत रहे हँय, अउर मसीह जउन चट्टान कि नाईं हें, ऊँ पंचे उनखे ऊपर बिसुआस न कइके ठोकर खाइन। 33जइसन पबित्र सास्त्र माहीं लिखा हय; “परमातिमा कहिन हीं, कि
‘देखा हम सिय्योन माहीं ठेस लागँइ के एकठे पथरा, अउर ठोकर खाँय के चट्टान धरित हएन; अउर जे कोऊ ओखे ऊपर बिसुआस करी, उआ कबहूँ लज्जित न होई’।”
Currently Selected:
रोमियन 9: bag
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
रोमियन 9
9
परमातिमा अउर उनखर चुने मनई
1हम मसीह के ऊपर बिसुआस करित हएन, एसे हम झूँठ नहीं बोली, पय हम सही कहित हएन, कि हमरे मन के सोच-बिचार पबित्र आत्मा के अँगुआई से इआ गबाही देत हय, 2कि हमहीं बड़ा दुख लागत हय, अउर हमार मन हमेसा दुखी रहत हय। 3काहेकि हम इहाँ तक चाहित हएन, कि हमरे यहूदी जाति के भाई-बहिनी, जउन परमातिमा से दूरी होइगे हँय, अगर हम उनखे खातिर मसीह के सराप काहीं अपने ऊपर लइके मसीह से भले दूरी होइ जइत, पय ऊँ पंचे बच जातें। 4एसे कि ऊँ पंचे इजराइल के बंस के आहीं; अउर परमातिमा के गोद लीन सन्तान होंइ के हक्क उनहिन काहीं मिला हय। अउर ऊँ पंचे परमातिमा के सामर्थ के कामन काहीं देखि चुके हँय, अउर उनहिन के साथ परमातिमा करार घलाय किहिन तय, अउर मूसा नबी के द्वारा अपने बिधान काहीं दिहिन रहा हय, अउर उनहिन काहीं मन्दिर माहीं अराधना करँइ के खातिर कहिन तय। अउर उनहिन से वादा घलाय किहिन तय, 5अउर पुरखव#9:5 पुरखव अरथात अब्राहम, इसहाक अउर याकूब उनहिन के बंस के आहीं उनहिन के बंस के आहीं, अउर मसीह घलाय मनई के रूप लइके उनहिन के कुल माहीं पइदा भें, जउन सगले मनइन के परमातिमा आहीं, अउर उँइन मसीह जुग-जुग तक धन्य कहइहँय। आमीन! 6पय अइसा नहिं आय कि परमातिमा आपन बचन पूर नहीं किहिन, काहेकि जेतने इजराइल के बंस के हें, उनमा से सगले जने परमातिमा के चुने न होंहीं। 7अउर जेतने अब्राहम के बंस माही पइदा भें हँय, उनमा से सगले अब्राहम के सच्चे सन्तान न कहइहँय, काहेकि पबित्र सास्त्र माहीं लिखा हय, कि “इसहाक#उत्प 21:12 से जेतने पइदा होइहँय, उँइन तोंहार सच्ची सन्तान कहइहँय।” 8अरथात इआ कि संसारिक रूप से पइदा होंइ बाले लड़िका- बच्चा परमातिमा के सन्तान न कहइहँय, बलकिन परमातिमा के वादा के मुताबिक पइदा भें सन्तानय अब्राहम के बंस माने जइहँय। 9काहेकि अब्राहम से परमातिमा अइसन वादा किहिन रहा हय, कि “अँगले साल#उत्प 18:10,14 हम इहय समय माहीं जब दुसराय अउब, तब तोंहरे मेहेरिआ सारा के एकठे लड़िका पइदा होइ चुका होई।” 10अउर ऊँ लड़िका हमार पंचन के पुरखा इसहाक आहीं, अउर जब ऊँ रिबका से काज किहिन, अउर रिबका उनसे लड़कहाई भईं, अउर उनखे पेटे माहीं जोड़ीमा लड़िका रहे हँय। 11अउर ऊँ लड़िकन के पइदा होंइ से पहिलेन, अउर उनखे कुछू नीक-नागा करँइ से पहिलेन, परमातिमा कहिन, कि “बड़कबा#उत्प 25:23 लड़िका छोटकबा लड़िका के दास होई।” 12अउर परमातिमा इआ बतामँइ के खातिर रिबका से कहिन कि, ऊँ कोहू काहीं ओखे निकहे कामन के कारन नहीं चुनँय, बलकिन अपने मरजी के मुताबिक ओही चुनत हें। 13जइसन पबित्र सास्त्र माहीं घलाय लिखा हय, कि “परमातिमा कहिन, हम एसाव से जादा याकूब से प्रेम#मला 1:2,3 किहेन हय।” 14एसे हम पंचे का कही? का परमातिमा अन्याय करत हें? नहीं, बेलकुल नहीं! 15काहेकि परमातिमा मूसा नबी से कहिन हीं, कि
“हम जेखे#निरग 33:19 ऊपर दया करँइ चाहब, त ओखे ऊपर दया करब, अउर जेखे ऊपर किरपा करँइ चाहब, त ओहिन के ऊपर किरपा करब।”
16एसे कोहू के इच्छा के मुताबिक नहीं, अउर न कोहू के जादा कोसिस किहे के कारन, परमातिमा ओही चुनँय, बलकिन ऊँ केही चुनत हें, इआ दया करँइ बाले परमातिमा के हाँथे माहीं हय। 17काहेकि जइसन पबित्र सास्त्र माहीं लिखा हय, “परमातिमा#निरग 3:16 मिस्र देस के राजा फिरौन से कहिन रहा हय, कि ‘हम तोहईं एसे राजा बनायन हय, कि तोंहरे ऊपर हम अपने सामर्थ के कामन काहीं देखाई, जउने ऊँ कामन के द्वारा हमरे महिमा के प्रचार धरती माहीं रहँइ बाले सगले मनइन के बीच माहीं होय। 18एसे परमातिमा जउने मनई के ऊपर दया करँइ चाहत हें, त ओखे ऊपर दया करते हें; अउर जेखे मन काहीं कठोर करँइ चाहत हें, त ओखे मन काहीं कठोर कइ देत हें।
परमातिमा के क्रोध अउर उनखर दया
19एसे तोंहरे पंचन म से कोऊ हमसे इआ कहि सकत हय, कि अगर परमातिमा सब कुछ अपने मरजी से करत हें, त पुनि ऊँ काहे हमरे पंचन के ऊपर दोस लगाबत हें? काहेकि परमातिमा के मरजी के कोऊ बिरोध नहीं कइ सकय। 20अउर हे भाई, तूँ को आह्या? तूँ त केबल मनई आह्या, जउन परमातिमा काहीं उल्टहाव देते हया? त इआ बताबा, कि का कउनव बनी चीज अपने बनामँइ बाले से कहि सकत ही, कि तूँ हमही अइसा काहे बनए हया? 21का कुम्हार काहीं इआ हक्क नहीं रहय, कि उआ माटी के लोंदन से कुछ बरतन खास कामन के खातिर बनबय, जिनखर मनई आदर करत हें, अउर कुछ बरतनन काहीं साधारन कामन के खातिर बनबय जिनखर मनई आदर नहीं करँय। 22त एमा कउन अचरज के बात ही, अगर परमातिमा आपन सक्ती देखामँय के खातिर कुछ मनइन काहीं बनाइन, कि जउने उनखे ऊपर आपन क्रोध देखामँइ, जउन नास होइन के खातिर तइआर कीन गे रहे हँय, तऊ उनखर बड़े धीरज से सहत रहिगें। 23अउर जउने मनइन के ऊपर परमातिमा दया करत हें, उनहीं इआ देखामँइ के खातिर, कि ऊँ केतना महान हें, उनखर सहत रहिगें, अउर ऊँ मनइन काहीं अपने बड़े सम्मान माहीं भागीदार बनामँइ के खातिर पहिलेन से तइआर किहिन हीं। 24अरथात हमरे पंचन के ऊपर, जिनहीं परमातिमा केबल यहूदी लोगन भर से नहीं, बलकिन गैरयहूदी लोगन म से घलाय चुनिन हीं। 25अउर जइसन कि होसे नबी के लिखी किताब माहीं लिखा हय#होसे 2:3, कि
“जउन मनई पहिले हमार प्रजा नहीं रहे आहीं, उनहीं हम आपन प्रजा बनाउब, अउर जउन मनई पहिले हमहीं पियार नहीं रहे आहीं, ऊँ अब हमहीं पियार होइगें हँय।”
26अउर ओमाहीं इहव घलाय लिखा हय#होसे 1:10,
“अउर अइसन होई, कि जउने जघा माहीं हम उनसे कहेन तय, कि तूँ पंचे हमार प्रजा न होह्या, उहय जघा माहीं ऊँ पंचे जिन्दा परमातिमा के सन्तान कहइहँय।”
27अउर यसायाह नबी अपने लिखी किताब माहीं इजराइल के सन्तानन के बारे माहीं चिल्लाइके कहत हें, कि “चाह इजराइल#यसा 10:22,23 के सन्तानन के गिनती समुद्र के बारू के बराबर होय, तऊ उनमा से थोरिन काहीं मनई बचे पइहँय।
28काहेकि प्रभू अपने न्याय काहीं धरती के ऊपर पूरी तरह से अउर हरबिन पूर करिहँय।”
29अउर जइसन यसायाह नबी भबिस्यबानी किहिन तय, कि “अगर सर्बसक्तिमान प्रभू, हमरे पंचन के खातिर बंस न छोंड़ते, त हम पंचे सदोम#यसा 1:9 अउर अमोरा कि नाईं पूरी तरह से नास होइ जइत।”
इजराइली लोगन के अबिसुआस
30हमरे पंचन के कहँइ क मतलब इआ आय, कि गैरयहूदी लोग परमातिमा के नजर माहीं निरदोस बनँइ के खोज माहीं नहीं रहे आहीं, तऊ परमातिमा के नजर माहीं निरदोस बनिगें, काहेकि प्रभू यीसु मसीह के ऊपर किहे बिसुआसय के कारन ऊँ पंचे परमातिमा के नजर माहीं निरदोस बनिगें हँय। 31पय इजराइल देस के मनई, खुद काहीं परमातिमा के नजर माहीं निरदोस बनामँइ के खातिर, मूसा नबी के बिधान के पालन करत रहे हँय, तऊ ऊँ पंचे निरदोस नहीं बन पाएँ। 32काहे नहीं बन पाएँ? एसे कि ऊँ पंचे मसीह के ऊपर बिसुआस नहीं किहिन, बलकिन मूसा के बिधान के पालन कइके धरमी बनँइ के कोसिस करत रहे हँय, अउर मसीह जउन चट्टान कि नाईं हें, ऊँ पंचे उनखे ऊपर बिसुआस न कइके ठोकर खाइन। 33जइसन पबित्र सास्त्र माहीं लिखा हय; “परमातिमा कहिन हीं, कि
‘देखा हम सिय्योन माहीं ठेस लागँइ के एकठे पथरा, अउर ठोकर खाँय के चट्टान धरित हएन; अउर जे कोऊ ओखे ऊपर बिसुआस करी, उआ कबहूँ लज्जित न होई’।”
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.