कुलुस्सियन 3

मसीह माही नबा जीबन

1काहेकि तोंहईं पंचन काहीं मसीह के साथ जिआबा ग हय, एसे तूँ पंचे उन चीजन काहीं ढूँढ़ँइ माहीं लगे रहा, जउन स्वरग माहीं हईं, जहाँ बर्तमान समय माहीं यीसु मसीह घलाय हें, जउन परमातिमा के दहिने कइती बइठ हें। 2एसे तूँ पंचे स्वरग के चीजन के बारे माहीं सोचत रहा, अउर धरती के चीजन माहीं मन न लगाबा। 3काहेकि तूँ पंचे पुरान पापी सुभाव के खातिर मर गया हय, अउर तोंहार पंचन के नबा जीबन मसीह के साथ परमातिमा के लघे सुरच्छित हय। 4अउर मसीह जउन हमार पंचन के जीबनदाता आहीं, जब ऊँ दुसराय प्रगट होइहँय, तब तुहूँ पंचे उनखे साथ महिमा समेत प्रगट कीन जइहा।

पुरान जीबन अउर नबा जीबन

5एसे तोंहरे पंचन माहीं जउन संसारिक बातँय हईं, उनहीं छोंड़ि द्या, अरथात ब्यभिचार, असुद्धता, कामवासना, बुरी इच्छा, अउर लोभ जउन मूरत पूजँय के बराबर हय। 6ईंन कामन के कारन परमातिमा के क्रोध उनखे ऊपर रहत हय, जउन मनई उनखे हुकुमन के पालन नहीं करँय। 7अउर तुहूँ पंचे प्रभू यीसु मसीह के ऊपर बिसुआस करँइ से पहिले, ईंन बुराइन काहीं करत जीबन बिताबत रहे हया। 8पय अब तोंहऊँ पंचन काहीं ईं सगली बातन काहीं छोंड़ि देंइ चाही, जइसन क्रोध करब, गुस्सा करब, बैर-भाव, दुसरे के बुराई करब, अउर मुँहे से गारी देब। 9एखे अलाबव एक दुसरे से लबरी न बोला, बेलकुल सही-सही बोला, काहेकि तूँ पंचे अपने पुरान सुभाव काहीं बुरे कामन समेत छोंड़ि दिहे हया। 10अउर नबा सुभाव काहीं अपनाय लिहे हया, जउन अपने बनामँइ बाले के स्वरूप के मुताबिक, परमातिमा के ग्यान काहीं पामँइ के खातिर नबा बनत जात हय। 11नबा सुभाव पाए के बाद, यहूदी लोगन अउर गैरयहूदी लोगन माहीं कउनव अन्तर नहीं रहिगा, अउर इहइमेर न खतना कराए मनइन माहीं अउर न बिना खतना कराए मनइन माहीं कउनव अन्तर रहिगा आय, अउर न असभ्य मनइन माहीं, अउर न सभ्य मनइन माहीं, कउनव अन्तर रहिगा आय, अउर न दासन अउर न मालिकन माहीं, कउनव अन्तर रहिगा आय, काहेकि मसीह माहीं सब कुछ एक समान होइ जात हय, अउर उँइन सगलेन के भीतर निबास करत हें।

12काहेकि तूँ पंचे परमातिमा के चुने पबित्र अउर पियार आह्या, एसे करुना, भलाई, दीनता, कोमलता अउर सहनसीलता काहीं अपनाबा। 13अउर अगर तोंहरे बीच म से कोऊ गलती किहिस होय, त एक दुसरे के गलतिन काहीं सहि ल्या, अउर एक दुसरे के अपराधन काहीं माफ कइ द्या, जइसन परमातिमा तोंहरे अपराधन काहीं माफ किहिन हीं, उहयमेर तुहूँ पंचे घलाय करा। 14ईं सगली बातन से बढ़िके प्रेम काहीं अपनाय ल्या, जउन एक दुसरे काहीं आपस माहीं जोड़िके, प्रेम माहीं भरपूर करत हय। 15अउर यीसु मसीह के दीन सान्ति काहीं अपने जीबन माहीं अपनाय ल्या, जउने तोंहरे हिरदँय माहीं राज करय, एहिन के खातिर परमातिमा तोंहईं एकठे देंह कि नाईं, एक होंइ के खातिर चुनिन हीं, एसे परमातिमा काहीं हमेसा धन्यबाद देत रहा। 16अउर मसीह के बचन काहीं जादा से जादा अपने हिरदँय माहीं बसाबा, जउने परमातिमा के ग्यान से भरपूर होइके एक दुसरे काहीं सिखाबा, अउर गलती करँइ त चेताबा, अउर परमातिमा के इआ किरपा के कारन उनखे खातिर अपने-अपने मनन माहीं भजन, स्तुति के गाना, अउर आत्मिक गाना गाबत रहा। 17अउर तूँ पंचे जउन कुछू काम करा, इआ कि बचन सुनाबा, सगले काम प्रभू यीसु मसीह के नाम से करा, अउर उनहिन के व्दारा पिता परमातिमा के धन्यबाद करत रहा।

घर-परिबार सम्बन्धित नयतिक सिच्छा

18हे मेहेरिअव, अपने-अपने मंसेरुअन के उआ मेर से अधीन रहा, जइसन मसीह के ऊपर बिसुआस करँइ बाली मेहेरिअन काहीं उचित हय। 19हे मंसेरुअव, अपने-अपने मेहेरिअन से प्रेम करा, अउर उनसे कठोरता के बरताव न करा। 20हे लड़िकव, सगली बातन माहीं अपने-अपने महतारी-बाप के हुकुमन काहीं माना, काहेकि प्रभू एसे प्रसन्न होत हें। 21हे बाप-महतारिव, अपने-अपने लड़िकन काहीं तंग न करा, अइसन न होय, कि उनखर साहस टूट जाय, अउर ऊँ पंचे उल्टहाव देंइ लागँय। 22हे सेबकव, अपने संसारिक मालिकन के सगली बातन माहीं, उनखे हुकुमन काहीं माना, अउर ऊँ सेबकन कि नाईं नहीं, जउन मनइन काहीं प्रसन्न करँइ के खातिर देखाला क त सेबा करत हें, पय बाद माहीं नहीं करँय, पय तूँ पंचे, परमातिमा के भय मानत उनखर निकही सेबा करा। 23अउर जउन काम तूँ पंचे करते हया, त ओही पूरे मन से करा, इआ समझिके कि जउन काम करित हएन, उआ मनइन के खातिर नहीं, बलकिन प्रभू के खातिर करित हएन। 24काहेकि तूँ पंचे खुदय जनते हया, कि हम पंचे मसीह के सेबा करित हएन, एसे एखे बदले माहीं तोंहईं प्रभू से बारिसदार होंइ के हक्क मिली। 25काहेकि जे कोऊ बुरे काम करत हय, उआ अपने बुरे कामन के प्रतिफल पाई; काहेकि परमातिमा के आँगे कोहू के साथ पच्छपात नहीं होय।

Currently Selected:

कुलुस्सियन 3: bag

Highlight

Copy

Compare