खास चेलन 24

हाकिम फेलिक्स के आँगे पवलुस

1पाँच दिना बाद, महायाजक हनन्याह, यहूदी समाज के कुछ धारमिक अँगुअन काहीं, अउर तिरतुल्लुस नाम के वकील काहीं साथ माहीं लइके, कैसरिया सहर माहीं आएँ, कि ऊँ पंचे हाकिम के आँगे पवलुस के ऊपर दोस सिद्ध करँय। 2जब हाकिम फेलिक्स के आँगे पवलुस काहीं बोलबाबा ग, त तिरतुल्लुस उनखे ऊपर दोस लगाइके कहँइ लागें, “हे महामहिम हाकिम फेलिक्स, अपना के द्वारा हमहीं पंचन काहीं बड़ी कुसलता मिलत ही; अउर अपना के प्रबन्ध से, इआ जाति के मनइन से खुब बुराई सुधरत जाती हईं। 3ईं बातन काहीं हम पंचे हरेक जघा, अउर हरेकमेर से धन्यबाद के साथ मानित हएन। 4पय एसे कि हम पंचे अपना काहीं अउर कस्ट नहीं देंइ चाहित आहेन, हम अपना से बिनती करित हएन कि, किरपा कइके हमरे कुछ बातन काहीं सुन लेई। 5काहेकि हम पंचे इआ मनई काहीं उपद्दरव मचामँइ बाला, अउर अपना के राज के सगले यहूदी लोगन माहीं बलबा करँइ बाला, अउर इनहीं नासरत प्रदेस माहीं रहँइ बालेन के पंथ के मुखिया पाएन हय। 6ईं मन्दिर काहीं असुद्ध करँइ चाहिन, तबहिनय हम पंचे इनहीं पकड़ लिहेन, (अउर हम पंचे अपने बिधान के मुताबिक इनहीं सजा देंइ चाहत रहे हएन; 7पय सिपाहिन के मुखिया लूसियास इनहीं हमरे हाँथन से जबरई छोड़ाय लिहिन, 8अउर मुद्दई काहीं अपना के आँगे आमँइ के हुकुम दिहिन।) ईं सगली बातन काहीं जउनेन के बारे माहीं हम पंचे इनखे ऊपर दोस लगाइत हएन, अपना खुदय इनखर जाँच कइके जान लेब।” 9अउर यहूदी लोग घलाय, उनखर साथ दइके कहिन, ईं जउने बातन काहीं बताइन हीं बेलकुल इहइमेर आहीं।

पवलुस के जबाब

10जब हाकिम पवलुस काहीं बोलँइ के इसारा किहिन, तब ऊँ जबाब दिहिन, “हम इआ जानिके, कि अपना खुब बरिसन से इआ जाति के मनइन के न्याय करत आहेन, हम आनन्द से अपना काहीं जबाब देइत हएन। 11अपना खुदय जानित हएन, कि जब से हम यरूसलेम सहर माहीं अराधना करँइ काहीं आएन हय, हमहीं आए बारा दिन से ऊपर नहीं भें। 12ईं पंचे न हमहीं मन्दिर माहीं, न यहूदी सभाघरन माहीं, अउर न सहर माहीं, कोहू से बिबादय करत, न भीड़य लगाबत पाइन। 13अउर न त ईं पंचे, ईं बातन काहीं, जिनखर ईं पंचे हमरे ऊपर दोस लगाबत हें, उनखर अपना के आँगे सही सबूत दइ सकँय। 14पय हम अपना के आँगे इआ माने लेइत हएन, कि जउने पंथ काहीं ईं पंचे कुपन्थ कहत हें, ओहिन के रीत से हम अपने बाप-दादन के परमातिमा के अराधना करित हएन; अउर जउन बातँय मूसा के बिधान, अउर परमातिमा के सँदेस बतामँइ बालेन के किताबन माहीं लिखी हईं, उन सगलेन के हम बिसुआस करित हएन। 15अउर परमातिमा से आसा रक्खित हएन, जउने माहीं ईं पंचे घलाय खुदय आसा रक्खत हें, कि धरमी अउर अधरमी दोनव जनेन के जिन्दा होब, होई। 16एसे हम खुदय इआ कोसिस करित हएन, कि परमातिमा के तरफ से, अउर मनइन के तरफ से, हमार बिबेक हमेसा निरदोस रहय। 17खुब बरिसन के बाद हम अपने समाज के मनइन काहीं दान पहुँचामँइ, अउर भेंट चढ़ामँइ आए रहेन हँय। 18त ईं पंचे हमहीं मन्दिर माहीं, सुद्ध अबस्था माहीं, बिना भीड़ के साथ अउर बिना दंगा किहे, भेंट चढ़ाबत पाइन, हाँ, उहाँ आसिया सहर के रहँइ बाले कुछ यहूदी लोग रहे हँय, उनहीं इआ उचित रहा हय; 19कि अगर हमरे बिरोध माहीं उनखे लघे कउनव बात होत, त आसिया म अपना के आँगे आइके हमरे ऊपर दोस जरूर लगउतें। 20इआ, कि ईं पंचे खुदय बतामँइ, कि जब हम महासभा के आँगे ठाढ़ रहेन हय, तब ईं पंचे हमरे ऊपर कउन अपराध पाइन रहा हय? 21केबल एकठे इआ बात काहीं छोंड़िके, कि जउन हम इनखे बीच माहीं ठाढ़ होइके गोहराइके कहेन रहा हय, कि मरेन म से जिन्दा होंइ के बारे माहीं, आज अपना के आँगे हमार मुकदमा चल रहा हय।” 22अउर हाकिम फेलिक्स जउन इआ पंथ के बारे माहीं ठीक-ठीक जानत रहे हँय, उनहीं इआ कहिके टार दिहिन, कि जब सिपाहिन के मुखिया लूसियास अइहँय, तब तोंहरे बात के निरनय करब। 23अउर सुबेदार काहीं हुकुम दिहिन, कि “पवलुस काहीं कुछ छूट दइके रखबारी किहा, अउर उनखे साथिन म से कोहू काहीं उनखर सेबा करँइ से मना न किहा।”

हाकिम फेलिक्स अउर द्रुसिल्ला के आँगे पवलुस

24कुछ दिना के बाद हाकिम फेलिक्स अपने मेहेरिआ द्रुसिल्ला काहीं, जउन यहूदी जाति के रही हँय, अपने साथ माहीं लइके आएँ; अउर पवलुस काहीं बोलबाइके उआ बिसुआस के बारे माहीं, जउन मसीह यीसु के ऊपर हय, उनसे सुनिन। 25अउर जब ऊँ धरम अउर संयम अउर आमँइ बाले न्याय के चरचा करत रहे हँय, तब हाकिम फेलिक्स भयभीत होइके जबाब दिहिन, कि “अबे त जा, पय मोका पाइके हम तोंहईं पुनि बोलाउब।” 26उनहीं पवलुस से कुछ घूँस घलाय मिलँइ के आसा रही हय; एसे अउरव ऊँ पवलुस काहीं बोलबाय-बोलबाइके उनसे बात करा-करत रहे हँय। 27पय जब दुइ बरिस बीतिगें, तब पुरकियुस फेस्तुस हाकिम फेलिक्स के जघा माहीं हाकिम बनिके आइगें, अउर हाकिम फेलिक्स यहूदी लोगन काहीं खुसी करँइ के मनसा से, पवलुस काहीं जेल माहीं छोंड़ि गे रहे हँय।

Currently Selected:

खास चेलन 24: bag

Highlight

Compare

Copy