1 तीमुथियुस 5

बिसुआसी बिधबन के खातिर निरदेस

1हे तीमुथियुस, मसीही मन्डली माहीं जउन तोंहसे उमिर माहीं बड़े हँय उनहीं न डाँट्या; बलकिन उनहीं बाप कि नाईं जानिके समझाय दिहा, अउर जमानन काहीं भाई जानिके; 2अउर अपने से उमिर माहीं बड़ी मेहेरिअन काहीं, महतारी कि नाईं समझिके, अउर जमान मेहेरिअन काहीं अपने मन माहीं बिना बुरे बिचार किहे, पूरी पबित्रता के साथ बहिनी जानिके समझाय दिहा।

3ऊँ बिधबन के जउन सही माहीं मदत के काबिल हईं, उनखर मदत करँइ के ध्यान द्या। 4पय अगर कउनव बिधबा के लड़िका-बच्चा अउर नाती-पंती होंय, त ऊँ पहिले अपने धरम के पालन करत अपने घर-परिबार के देखभाल करँय, अउर ऊँ अपने महतारी-बाप अउर दाई-बाबा के सेबा-सहाई कइके उनखर हक्क पूर करँय, इआ उचितव हय, काहेकि एसे परमातिमा घलाय प्रसन्न होत हें। 5जउन बिधबा सही माहीं मदत के काबिल ही, अउर ओखर कोऊ मदत करँइ बाला नहिं आय; उआ परमातिमा से मदत पामँइ के खातिर दिन-रात प्राथना करँइ माहीं लगी रहत ही, 6पय जउन बिधबा भोग-बिलास के खातिर जिअत ही, उआ सारीरिक रूप से त जिअत ही, पय आत्मिक रूप से मरी हय। 7ईं बातन के घलाय हुकुम देत रहा, जउने उँइ पंचे निरदोस रहँय। 8पय अगर कोऊ अपने नात-रिस्तेदारन, अउर खासकर अपने घर-परिबार के मनइन के मदत नहीं करय, त उआ प्रभू के बिसुआस से भटकिगा हय, अउर उआ, जउन मनई प्रभू के ऊपर बिसुआस नहीं करँय उनहूँ से अधिक बुरा बनिगा हय।

9उहय बिधबा के नाम मसीही मन्डली के मदत सूची माहीं लिखा जाय, जउने के उमिर साठ बरिस से कम न होय, अउर एकयठे मंसेरुआ के मेहेरिआ रही होय, 10अउर भलाई के कामन काहीं करँइ माहीं ओखर नाम आँगे रहा होय, अपने लड़िकन-बच्चन काहीं निकहा से पालिस-पोसिस होय; अउर महिमानन के सेबा किहिस होय, अउर उआ बिसुआसिअन के गोड़ धोइस होय, अउर दीन-दुखिअन के मदत किहिस होय, अउर भलाई के कामन काहीं मन लगाइके किहिस होय। 11पय जमान बिधबन के नाम मसीही मन्डली के मदत सूची माहीं न लिख्या, काहेकि जब ऊँ मसीह के बचन काहीं मानब छोंड़िके, भोग-बिलास माहीं परि जाती हँय, त ऊँ बिआह करँय चहती हईं। 12ऊँ परमातिमा के नजर माहीं दोसी ठहरती हईं, काहेकि ऊँ मसीह के साथ कीन अपने वादा काहीं छोंड़ि दिहिन हीं। 13एखे साथय-साथ ऊँ घरन-घरन बागत फिरती हईं, अउर काम धंधा करब छोंड़िके आलसी बन जाती हईं, अउर केबल आलसी भर नहीं, बलकिन बेफालतू के बात करत रहती हईं, अउर दुसरे के कामन माहीं टाँग अँड़उती हईं, अउर अनुचित बातँय बोलती हईं। 14एसे हम पवलुस इआ चाहित हएन, कि जमान बिधबा काज-बिआह कइलेंय, अउर लड़िका-बच्चा पइदा करँय, अउर आपन घर-गिरिस्ती सम्हारँय, अउर मसीह बिरोधी मनइन काहीं बदनाम करँइ के मोका न देंय। 15हम एसे बताइत हएन, काहेकि कइयकठे बिधबा परमातिमा के हुकुम काहीं मानब छोंड़िके, सइतान के इच्छा के मुताबिक जीबन बितामँइ लागी हईं। 16अगर कउनव बिसुआसिअन के घर माहीं बिधबा होंय, त उँइन पंचे ओखर मदत करँय, जउने उआ बिधबा के मसीही मन्डली के ऊपर बोझ न परय, जउने मसीही मन्डली ऊँ बिधबन के मदत कइ सकय, जउन वास्तव माहीं मदत के काबिल हईं।

17जउन पुरान बिसुआसी मसीही मन्डली के सगला प्रबन्ध निकहा से करत हें, खास करके उँइ जउन बचन सुनामँइ अउर सिखामँइ माहीं मेहनत करत हें, उँइ दुगुने मान-सम्मान के काबिल समझे जाँय। 18काहेकि पबित्र सास्त्र माहीं इआ लिखा हय, कि “फसल के गहाई करत माहीं बरधा के मुसका न लगाया”, काहेकि “काम करँइ बाले मजूर काहीं मजूरी जरूर मिलँइ चाही।” 19अगर कउनव पुरान बिसुआसी के ऊपर दोस लगाबा जाय, त ओही न मान्या, जब तक दुइ, इआ कि तीनठे गबाही न होंय। 20पाप करँइ बाले पुरान बिसुआसिअन काहीं सगले बिसुआसिअन के आँगे डाँट-समझाय द्या, जउने बाँकी सगले जन के खातिर चेतउनी होइ जाय। 21परमातिमा, अउर मसीह यीसु अउर जउने स्वरगदूतन काहीं परमातिमा चुनिन हीं, उनहीं गबाह मानिके, हम तोहईं चेतउनी देइत हएन, कि तूँ पूरे मन से ईं लिखी बातन काहीं माना किहा, अउर कउनव काम पच्छपात के साथ न किहा। 22बिना जाँचे-परखे कोहू काहीं मसीही मन्डली के अँगुआ बनामँइ के खातिर, जल्दबाजी माहीं हाँथ न रख्या, दुसरेन के पापन माहीं भागीदार न होया, बलकिन खुद काहीं पबित्र बनाए रह्या।

23भबिस्य माहीं केबल पानिन भर पिअँइ बाले न रहा, बलकिन अपने पेटे के रोग से बेर-बेर बिमार होंइ के कारन, थोरी-थोरी अंगूर के रस पिआ करा।

24कुछ मनइन के पाप परमातिमा के न्याय करँइ से पहिलेन कुछ लोगन काहीं मालुम होइ जात हें, कि ऊँ पापी हें, पय कुछ मनई आपन पाप छिपाइके रक्खत हें, अउर न्याय के दिन तक कोहू काहीं मालुम परे नहीं पाबय। 25उहयमेर भलाई के काम घलाय, सब मनइन काहीं मालुम परि जात हें, पय जउन मालुम नहीं होए पामँय, ऊँ घलाय छुप नहीं सकँय।

Currently Selected:

1 तीमुथियुस 5: bag

Highlight

Copy

Compare