1 कुरिन्थियन 5

मसीही मन्डली माहीं अनुचित काम

1हम पंचे इहाँ तक सुने हएन, कि तोंहरे बीच माहीं ब्यभिचार होत हय, अउर अइसन ब्यभिचार होत हय, कि उआमेर से अबिसुआसी लोगन के बीच माहीं घलाय नहीं होय, काहेकि कोऊ-कोऊ अइसन हें, कि ऊँ अपने मइभा महतारी के साथ ब्यभिचार करत हें, 2बाह भाई बाह, एखे बादव तूँ पंचे घमन्ड से फूले हया, पय का एखे बारे माहीं तोहईं पंचन काहीं पचिताँय क न चाही? अउर जे कोऊ अइसन अनुचित काम करत हय, त ओही अपने बीच से बहिरे न निकार देंइ चाही? 3जबकि हम सारीरिक रूप से त तोंहरे साथ नहिं आहेन, तऊ आत्मिक रूप से तोंहरे लघे हाजिर हएन, अउर मानि ल्या, कि हम उहाँ हाजिर रहिके, जे कोऊ अइसन काम किहिन हीं, उनखे बारे माहीं आपन निरनय सुनाय चुकेन हय। 4जब तूँ पंचे, अउर आत्मिक रूप से हमहूँ घलाय, प्रभू यीसु के सक्ती के साथ एकट्ठा होब, त अइसन मनई काहीं प्रभू यीसु के नाम से 5ओखे पापी सुभाव काहीं नास करँइ के खातिर #5:5 अरथात ओही मसीही मन्डली से बहिरे निकार दीन जायसइतान काहीं सउँप दीन जाय, कि जउने प्रभू यीसु मसीह के दुसराय आमँय के दिन ओखर आत्मा नास होंइ से बँचि जाय।

6अउर तूँ पंचे, जउन घमन्ड से फूले हया, त इआ उचित न होय; का तूँ पंचे इआ नहीं जनते आह्या, कि पिसान माहीं थोरी क खमीर मिलाए से, सगला माड़ा पिसान खमीर कि नाईं आमिल होइ जात हय। 7त तूँ पंचे पुरान खमीर, अरथात उआ बुरे मनई काहीं निकारिके खुद काहीं पबित्र करा, कि जउने माड़े नबा पिसान कि नाईं बन जा; अउर तूँ पंचे फसह नाम के तेउहार माहीं खाई जाँय बाली, बिना खमीर मिलाई रोटी कि नाईं हया। काहेकि हमहीं पंचन काहीं पबित्र करँइ के खातिर मसीह, फसह के मेम्ना के रूप माहीं बलिदान होइगे हँय। 8एसे आबा, हम पंचे आपन फसह के तेउहार, बुराई अउर दुस्टता से भरे पुरान खमीर के रोटी से न मनाई, बलकिन सिधाई अउर सच्चाई से भरी, बिना खमीर के रोटी से मनाई।

9हम अपने चिट्ठी माहीं, तोहईं पंचन काहीं लिखेन हँय, कि ब्यभिचार करँइ बालेन के संगति न किहा। 10अउर हम इआ न होय लिखेन हँय, कि तूँ पंचे इआ संसार के ब्यभिचार करँइ बालेन, इआ कि लालच करँइ बालेन, इआ कि दुसरेन के साथ अत्याचार करँइ बालेन, इआ कि मूरतिन के पूजा करँइ बालेन, के बेलकुल संगति न किहा; काहेकि इआ हालत माहीं त तोहईं पंचन काहीं इआ संसार से निकर जाँइ क परी। 11पय हमरे कहँय के मतलब इआ आय, कि अगर कोऊ खुद काहीं बिसुआसी भाई कहिके, ब्यभिचार करँइ बाला, इआ कि लालच करँइ बाला, इआ कि मूरतिन के पूजा करँइ बाला, इआ कि गारी देंइ बाला, इआ कि दारू पिअँइ बाला, इआ कि दुसरे के साथ अत्याचार करँइ बाला होय, त ओखर संगति न किहा; बलकिन अइसन मनई के साथ माहीं बइठिके खानव तक न खया। 12अउर जे कोऊ मसीही मन्डली के बहिरे के आहीं, अरथात अबिसुआसी आहीं, त उनखर न्याय करँइ के हमार कउनव मतलब नहिं आय, पय तोहईं पंचन काहीं उनखर न्याय करँइ क चाही, जउन मसीही मन्डली के भीतर के अरथात बिसुआसी आहीं 13पय मसीही मन्डली के बहिरे बाले मनइन के न्याय परमातिमा करिहँय, एसे तूँ पंचे उआ कुकर्मी काहीं अपने बीच म से निकारि द्या#ब्यब 13:5; 17:7।

Currently Selected:

1 कुरिन्थियन 5: bag

Highlight

Copy

Compare