റോമഗാറാര് 10
10
1ഏസ്സ്‌ഗാറാരെ, ഇസ്‌റവേല്‌ഗാറാര് തപ്പിസി കഡാക്ക്യ ബേ്ണ്ടിത്തെ നാന് എന്ന് നെഞ്ച്‌ല് ആസെപഡുവാദ്‌മ് സാമിന ബേ്ണ്ടി കൊണ്ട്‌റ്ക്കുവാദ്‌മ്. 2സാമിന പറ്റ്യുള്ള കാര്യഗാള്‌ല് അവാര് സുറുസുറുപ്പുള്ളവാര്‌ത്തെ എന്റ് എനാക്ക് ഒറേപ്പായി സൊല്ല്യ മുഡിമ്. ആന നേര്‌മാന അറുവുന ബെത്തല്ല അവാര് അയി സുറുസുറുപ്പു കാട്ടുവാദ്. 3സാമി നേര്‌മെഗാറാര് മാഡുവാദ്‌ന പറ്റി അവാര് തെര്യാത്തവാര് ആനാദ്‌നാലെ തമ്മ ഗേവ കാര്യന ബെത്ത് നേര്‌മെഗാറാര് ആയ അവാര് ഓരാഡ്‌നാര്. അത്തെ സാമി നേര്‌മെഗാറാര് മാഡുവാദ്‌ക്ക് അവാര് കെ്ട്ട്‌പഡാലെ. 4എന്ത്‌ക്കെന്റ് സൊന്ന, ക്‌റ്‌സ്‌ത്ത് ബന്താദ്‌നാലെ മോസെ ബെത്ത സാമി സട്ടപഡിക്കല്ല സാമി ഒന്റു മന്‌സാന്‌ന നേര്‌മെഗാറാര് മാഡുവാദ്. ക്‌റ്‌സ്‌ത്ത്‌ന നമ്പുവ ഏവാന്‌നാമ് സാമി നേര്‌മെഗാറാര് മാഡുവാന്.
നല്ല സേദിന നമ്പി തപ്പിസി കഡാക്കുഡൊ
5മോസെ ബെത്ത സാമി സട്ടപഡി നേര്‌മെഗാറാര് ആവാദ്‌ന പറ്റി സൊല്ല്യ പോന: <<അദ്‌ല് സൊല്ലിര്‌ക്കുവ കാര്യഗാള്‌നൊട്ടുക്കു ഗേന്റവാന് അത്തെ ഗേവാദ്‌നാലെ പെ്ളേക്കുവാന്>>#ലേവ്യാര് 18:5 എന്റ്‌ത്തെ മോസെ എ്ള്‌ദിര്‌ക്ക്‌ന്റാന്. 6ആന നമ്പിക്കെനാലെ നേര്‌മെഗാറാര് ആവാദ്‌ന പറ്റി സാമി സൊല്ലുസുലാക്കാത്ത്‌ല്: <<ക്‌റ്‌സ്‌ത്ത്‌ന കൂട്ടി ബര്യ എന്റ് നെനേത്ത് <ആര് മേലോഗാക്ക് പോവാര്>#മറിസി സൊല്ലുവ സട്ട 30:13 >> എന്റ് നീ നിന്ന് നെഞ്ച്‌ല് സൊല്ലാദെ. 7<<ക്‌റ്‌സ്‌ത്ത്‌ന സത്തവാര് പട്ട്‌ലിന്ത് കൂട്ടി ബര്യ എന്റ് നെനേത്ത് <ആര് ബൂമിക്കഡി പോവാര്>#മറിസി സൊല്ലുവ സട്ട 30:13 >> എന്റ്‌മ് നിന്ന് നെഞ്ച്‌ല് സൊല്ലാദെ എന്റ്‌ത്തെ സൊല്ലിര്‌ക്കുവാദ്. 8ആന സാമി നേര്‌മെഗാറാര് മാഡുവാദ്‌ന പറ്റി സാമി സൊല്ലുസുലാക്കാത്ത്‌ല് സൊല്ലിര്‌ക്കുവാദ് എന്തെന്റ് സൊന്ന, <<സാമി സേദി നിനാക്കര്‌ഗെ ഇര്‌ക്ക്‌ന്റ്, നിന്ന് ബായില്‌മ് നിന്ന് നെഞ്ചുകുളാക്ക്‌മ്‌ത്തെ#മറിസി സൊല്ലുവ സട്ട 30:14 ഇര്‌ക്ക്‌ന്റ്>> എന്റ്‌ത്തെ. അദ് എമ്മ സൊല്ലുവ നമ്പിക്കേന പറ്റ്യുള്ള സേദിത്തെ. 9ഏസ്സ്‌നത്തെ ആണ്ടവാന് എന്റ് ബായാറ സൊല്ലിമ് സാമി അയാള്‌ന സത്തവാര് പട്ട്‌ലിന്ത് ഉജുര്‌ളാക്ക്‌നാന് എന്റ് നെഞ്ച്‌ല്‌മ് നമ്പ്‌ന നീ തപ്പിസി കഡാക്കുവായി. 10നെഞ്ച്‌ല് നമ്പുവാദ്‌നാലെത്തെ സാമി നമാന നേര്‌മെഗാറാര് മാഡ്‌ന്റാന്, ബായില് സൊല്ലുവാദ്‌നാലെത്തെ സാമി നമാന കാപാറ്റ്‌ന്റാന്.
11<<അയാള്‌ന നമ്പ്‌ന്റവാന് ആര്‌മ് നാണഗെ്ട്ട് പോഗമാട്ടാര്>>#ഏസ്സയ്യാവു 28:16 എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല. 12ഈ കാര്യാത്ത്‌ല് എഗുദാരെന്റൊ എഗുദാര് അല്ലാത്ത ജാദിഗാളെന്റൊ ബിത്ത്യാസില്ലെ, എല്ലാവാര്‌ക്ക്‌മ് ആണ്ടവാന് ഒരുത്താന്‌ത്തെ. തനാന ബേ്ണ്ട്‌വ ഏവാന്‌ക്ക്‌മ് കൊഡുക്ക്യ ആണ്ടവാനായിര്‌ക്കുവ സാമി സമ്പോത്ത ബെത്ത്‌റ്‌ന്റവാന്‌ത്തെ. 13<<ആണ്ടവാനെ, എമാന കാപാറ്റുഡോമെ എന്റ് ബ്‌ളിക്ക്‌ന്റവാര്‌നെല്ല ആണ്ടവാന് കാപാറ്റുവാന്>>#ജോവേല് 2:32 എന്റ് സാമി സൊല്ലുസുലക്കാത്ത്‌ല് എ്ള്‌ദിര്‌ക്ക്‌ന്റല്ല.
14ആന അവാര് നമ്പാത്തവാന്‌ന എത്തെ ബേ്ണ്ടി കൊള്ളുവാര്? അവാര് കേ്ള്‌ക്കത്തവാന്‌ന എത്തെ നമ്പുവാര്? നായ സൊല്ലുന്റവാന് ഇല്ലാദെ എത്തെ കേ്ള്‌ക്കുവാര്? 15ആര്‌മ് സൊല്ലി ബ്‌ഡാദെ എത്തെ നായ സൊല്ല്യാമ്? <<നല്ല സേദി സൊല്ല്യ ബന്റവാര് ബരാവു എത്ത്‌റ നല്ല കാര്യ>>#ഏസ്സയ്യാവു 52:7 എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല.
16എന്റാല്‌മ് എല്ലാവാര്‌മ് നല്ല സേദിക്ക് തഗ്‌ന്ത പഡി പെ്ളേക്കാലെ: <<ആണ്ടവാനെ, എമ്മ സൊന്ന സേദിന ആര് നമ്പ്‌നാര്?>>#ഏസ്സയ്യാവു 53:1 എന്റ് ഏസ്സയ്യാവു താനെ സൊല്ലിര്‌ന്റാനല്ല. 17അദ്‌നാലെ നമ്പിക്കെ ബരുവാദ് സേദിന കേ്ള്‌ക്കുവാദ്‌നാലെത്തെ, അയി സേദി ക്‌റ്‌സ്‌ത്ത്‌ന പറ്റി സൊല്ലുവാദ്‌ലിന്ത്‌ത്തെ ബരുവാദ്.
18ആന അയി സേദിന നേര്‌മായിമ് അവാര് കേ്ള്‌ക്കാലേഗ എന്റ് നാന് കേ്ള്‌ക്ക്‌ന്റെ, കണ്ടിപ്പായിമ് അവാര് കേ്ട്ട്‌റ്‌ക്ക്‌ന്റാര്. സാമി സൊല്ലുസുലാക്കാത്ത്‌ല് ഏസ്സയ്യാവു സൊല്ലിര്‌ക്കുവ പാസെ:
<<അവാര് മാഡുവ ജദ്ദ ബൂമിലൊട്ടുക്കുമു
അവാര് സൊന്ന നായ ഉലഗാത്ത്‌ല് എല്ലാ സാരിമ് എജ്ജിര്‌ക്ക്‌ന്റ്>>#സാമി പാട്ട് ബൊക്കു 19:4 എന്റ്‌ത്തെ.
19ആന ഇസ്‌റവേല്‌ഗാറാര്‌ക്ക് ഇദ് നെപ്പ്കെ്ഡേക്കാലെഗ എന്റ് നാന് ഒന്റു ഗുഡി കേ്ള്‌ക്ക്‌ന്റെ:
<<ഒന്റു ജാദി എന്റ്‌ഗുഡി സൊല്ല്യ മുഡ്യാത്ത ആള്‌ഗാള്‌ന ബെത്ത്
നാന് നിമാക്ക് കണ്ണ്‌കഡി ബരുസ്സുവെ,
അറുവില്ലാത്ത ജാദിഗാള്‌ന ബെത്ത്
നാന് നിമാക്ക് മൊനെ ബരുസ്സുവെ>>#മറിസി സൊല്ലുവ സട്ട 32:21 എന്റ് ഇദ്‌ന പറ്റി മോസെ മുദാല് താനെ സൊന്റാനല്ല.
20ആന ഏസ്സയ്യാവുമു:
<<എനാന പരാക്കാത്തവാര് എനാന കണ്ട് പ്‌ഡിത്താര്.
എനാന കേ്ള്‌ക്കത്തവാര്‌ക്ക് നാന് ബെ്ളിപട്ടെ>>#ഏസ്സയ്യാവു 65:1
എന്റ് ദയിരത്തോഡ സൊല്ലിര്‌ക്ക്‌ന്റാനല്ല. 21ആന ഇസ്‌റവേല്‌ഗാറാര്‌ന പറ്റി അയാള് സൊല്ലുവാദ് എന്തെന്റ് സൊന്ന:
<<എന്ന് സൊല്ലുപേസ് കേ്ള്‌ക്കത്തവാര്‌മ് ഏ്റേ്റ സൊല്ലുന്റവാര്‌മ് ആയിര്‌ക്കുവ ജനഗാള്‌ന
സേത്തി ബെക്ക്യ നാള്‌ക്ക്‌മ് നാന് കയിരാന്തെ>>#ഏസ്സയ്യാവു 65:2 എന്റ്‌ത്തെ.
Currently Selected:
റോമഗാറാര് 10: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
