അപ്പോസുത്തലാര് 6
6
ഏ്ള് ആള്‌ന തെരിന്തെ്ഡ്‌ക്ക്‌ന്റാര്
1അയി കാലാത്ത്‌ല് ഏസ്സ് സൊല്ലുപഡി നഡാക്ക്‌ന്റവാര് മൊത്തനാക്ക് ആനാര്. അദുക്കുള എവനനായ നൊഡിവ ഏസ്സ്‌ഗാറാര്‌ക്ക്‌മ് എവുറായ നായനൊഡിവ ഏസ്സ്‌ഗാറാര്‌ക്ക്‌മ് തറ്‌ക്ക ബന്ത്‌ദ്. നാള്‌ക്ക്‌മ് സാമനസട്ടെഗാള്‌ന പങ്കി കൊഡുക്കാട്ടി തമ്മ് മ്‌ണ്ടേസ്യാര്‌ന സൊക്കാന നോഡാലെ എന്റ് എവനനായ നൊഡിവ ഏസ്സ്‌ഗാറാര് സൊന്നാര്. 2അദ്‌നാലെ പന്നന്റ് അപ്പോസുത്തലനാമ് ഏസ്സ്‌ഗാറാര്‌ന ഒട്ടുക്കു ബ്‌ളിത്ത് ബരിസ്സി ഇത്തെ സൊന്നാര്. <<എമ്മ സാമി സൊല്ലുന സൊല്ല്യ നില്ലാദെ സാമനസട്ടെഗാള്‌ന പങ്കി കൊഡുക്ക്യ നില്ലുവാദ് സെര്യല്ല. 3അദ്‌നാലെ ഏസ്സ്‌ഗാറാരെ, നിമ്മ് കൂട്ടാത്ത്‌ലിന്ത് ഏ്ള് ആള്‌ന തെരിന്തെ്ഡ്‌ക്കുഡൊ. അവാര് നല്ലവാര് എന്റ് ആള്‌ഗാള്‌ക്ക് ഒട്ടുക്കു തെരിന്ത്‌റ്‌ക്ക്‌ന്റവാര്‌മ് എല്ലാദ്‌മ് ഗേയ നല്ല ബുദ്ദി ഇര്‌ക്ക്‌ന്റവാര്‌മ്, സാമിനിഗാല് തുമ്പി ഇര്‌ന്റവാര്‌മ് ആയിര്‌ക്കുഡൊ. എമ്മ ഈ ഗിലാസാന അവാര്‌ക്ക് കൊഡുക്കുന്റേമ്. 4അത്ത്യാന എമാക്ക് ഇര്‌ക്കുവ സമ്യന ഒട്ടുക്കു പരേസികൊണ്ടുമു സാമി സൊല്ലുസുലാക്കാന സൊല്ലികൊണ്ടുമു ഇര്‌ക്കുവേമ്.>>
5അപ്പോസുത്തലാര് സൊന്നാദ്‌ന ആള്‌ഗാള് ഒട്ടുക്കു സെരി എന്റാര്. നല്ല നമ്പിക്കേമ്, സാമിനിഗാല്‌മ് ഇര്‌ക്കുവ തെപാനോസുനാമ്, പീലിപോസു, പ്‌റ്‌ഗറോസു, നിക്കാനോറു, തീമോനു, പറ്‌മ്മെനാസ്, എഗുദ മദാക്ക് എ്ണേന്തിന്ത അന്തോക്ക്യഗാറാന് നിക്കൊലാവോസു എന്നുവ ആള്‌ഗാള്‌നാമ് അയി ഗിലാസാക്ക് അവാര് തെരിന്തെ്ഡ്‌ത്താര്. 6ആള്‌ഗാള് അവാര്‌ന അപ്പോസുത്തലാര്‌ക്ക് മുന്നുക്കു നില്ല്‌സ്‌നാര്. അപ്പോസുത്തലാര് അവാര് തലേക്ക് കയി ബെത്ത് പരേസി ബ്‌ട്ടാര്.
7അത്തെ സാമി സൊല്ലുസുലാക്ക പജാന്ത്‌കൊണ്ടേ ഇന്ത്‌ദ്. എര്‌സലേമ്‌ല് ഏസ്സ് സൊല്ലുപഡി നഡാക്ക്‌ന്റവാര് എഞ്ച്‌ക്കൊ പെരിഗികൊണ്ടുമു ഇന്താര്. എഞ്ചോ എഗുദാര് പൂസാരിഗാള്‌മ് നമ്പ്‌നാര്.
തെപാനോസുന പ്‌ഡിക്ക്‌ന്റാര്
8സാമിലിന്ത് തെപാനോസുക്കു മൊത്തന ബാക്ക്‌വരഗാള്‌മ് സക്‌തിമ് കെ്ഡേത്ത്‌ദ്. അയാള് ആള്‌ഗാള് പട്ട്‌ല് ദൊഡ്ഡുദൊഡ്ഡ അഡ്യാളഗാള്‌മ്, അദിസ്യഗാള്‌മ് ഗേന്താന്. 9അഡിമേലിന്ത് ബെ്ളിഗെ ബന്തവാര് എന്റ് സൊല്ലുവ ഒന്റു എഗുദാര് പരേസുവ ബീ്ഡ് അദ്‌ലിന്ത്‌ദ്. കൊറേന, അലസാണ്ടറിയ, കിലിക്ക്യ, ആസ്യ എന്നുവ നാഡ്‌ഗാള്‌ല ആള്‌ഗാള് അയി എഗുദാര് പരേസുവ ബീ്ഡ്‌ക്ക് കുമ്മുഡ്യ ബന്തിന്താര്. അവാരൊട്ടുക്കു തെപാനോസോഡ തറ്‌ക്ക്യ പ്‌ഡിത്താര്. 10ആന സാമിനിഗാല് തെപാനോസുക്കു നലമായി നായനൊഡ്യ ബുദ്ദി കൊഡുത്താന്. അദ്‌നാലെ അവാര്‌ക്ക് അദ്‌ന തപ്പ് എന്റ് കാട്ടി കൊഡുക്ക്യ മുഡ്യാലെ.
11<<തെപാനോസു സാമിനാമ് മോസെനാമ് പറ്റി കെ്ട്ട നായ സൊല്ലുവാദ്‌ന എമ്മ കേ്ട്ടേമ്>> എന്റ് സൊല്ല്യ അവാര് ലേസ ആള്‌ഗാള്‌ക്ക് പണ കൊഡുത്തു തമ്മ് സാരി സേത്ത്‌നാര്.
12അത്തെ ഗേന്ത് അവാര് ആള്‌ഗാള്‌നാമ്, മൂപ്പനാമ്‌ഗാള്‌നാമ്, ബേദബാത്ത്യനാമ്‌ഗാള്‌നാമ് തെപാനോസുക്കു നേരെ മൂട്ടി ബ്‌ട്ടാര്. അവാര് തെപാനോസുന പ്‌ഡിത്ത് എ്ഡ്‌ത്ത് ബന്ത് എഗുദ കോഡിദിക്ക് മുന്നുക്കു നില്ല്‌സ്‌നാര്. 13അയാള്‌ന പറ്റി പൊയി സൊല്ല്യ ലേസ ആള്‌ഗാള്‌നാമ് അവാര് കൂട്ടി ബന്താര്. അവാര്: <<ഇയാള് എന്നാല്‌ക്ക്‌മ് നമ്മ് സാമി ബീ്ഡോഡാമ് മോസെ ബെത്ത് തന്ത സാമിസട്ടോഡാമ് ജൂദുപ്‌ഡിത്ത് കെ്ട്ട നായ സൊല്ലികൊണ്ടു ഇര്‌ന്റാന്. 14നസറേത്ത്‌ഗാറാന് ആന ഈ ഏസ്സ് സാമിബീ്ഡ്‌ന ഇ്ഡിത്ത് തള്ളുവാന് എന്റ്‌മ്, മോസെ നമാക്ക് തന്ത്‌റ്‌ക്കുവ സട്ട്‌മെ്ട്ട്‌ഗാള്‌ന മാറ്റുവാന് എന്റ്‌മ് ഇയാള് സൊല്ലുവാദ്‌ന എമ്മ കേ്ട്ടേമ്>> എന്റ് സൊന്നാര്.
15കോഡിദിക്ക് കൂഡിന്തവാര് ഒട്ടുക്കു തെപാനോസുന സൊക്കാന നോഡുനാര്. അദുക്കുള അയാള് മൂഞ്ചി ഒന്റു ദൂദാന് മൂഞ്ചിന പാസെ ആയിര്‌ക്കുവാദ്‌ന അവാര് കണ്ടാര്.
Currently Selected:
അപ്പോസുത്തലാര് 6: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
