അപ്പോസുത്തലാര് 15
15
എര്‌സലേമ്‌ല് കൂട്ട കൂഡുനാര്
1എഗുദ നാഡ്‌ലിന്ത് ലേസ ഗണ്ടാള്‌ഗാള് അന്തോക്ക്യ പട്ടണാക്ക് ബന്ത് ഏസ്സ്‌ഗാറാര്‌ന ഇത്തെ പഡിസ്യ പ്‌ഡിത്താര്. <<നിമ്മ മോസെ ബെത്ത സാമി സട്ടപഡി പരിസേദനെ സാത്ത്‌റ ഗേഗാദെ പോന സാമിക്ക് നിമാന കാപാറ്റ്യ മുഡ്യാമാട്ട.>> 2പവുലോസുമു, ബറ്‌ണവാസ്‌മ് ബണങ്കാദെ അവാരോഡ സെരിക്ക്‌മ് തറ്‌ക്ക്‌നാര്. അദ്‌നാലെ ഈ തറ്‌ക്ക്‌ന കാര്യന പറ്റി എര്‌സലേമ്‌ല അപ്പോസുത്തലാരോഡാമ് മൂപ്പനാമോഡാമ് കേ്ള്‌ക്കുഡൊ എന്റ് അവാര് നെനേത്താര്. അദ്‌ക്ക് ബേ്ണ്ടി പവുലോസുനാമ്, ബറ്‌ണവാസ്‌നാമ്, അന്തോക്ക്യാല് ഇര്‌ക്കുവ ലേസ ആള്‌ഗാള്‌നാമ് എര്‌സലേമ്‌ക്ക് ബ്‌ഡ്യ മുഡിവെ്ഡ്‌ത്താര്. 3പ്‌റ ഏസ്സ്‌ഗാറാര് കൂട്ട അവാര്‌ന എര്‌സലേമ് പട്ടണാക്ക് സൊല്ലി ബ്‌ട്ടാര്. അത്തെ അവാര് പൊയിനിക്ക്യ, സമര്യ ദേസമേലെ പോനാര്. അത്തെ പോഗാട്ടി അവാര് എഗുദാര് അല്ലാത്ത ജാദിഗാള് സാമിസാരി ബന്താദ്‌നെല്ല അയി ദേസാല ഏസ്സ്‌ഗാറാര്‌ക്ക് സൊന്നാര്. അയി സേദിന കേ്ട്ട് അവാര് ഒട്ടുക്കു എത്ത്‌റാഗോ പിര്യപട്ടാര്. 4പവുലോസുമു, ബറ്‌ണവാസ്‌മ്, അവാരോഡ ഇന്തവാര്‌മ് എര്‌സലേമ്‌ക്ക് എജ്ജ്‌നാര്. അദുക്കുള അപ്പോസുത്തലാര്‌മ്, മൂപ്പനാമ്‌ഗാള്‌മ്, ഏസ്സ്‌ഗാറാര് കൂട്ടാമ് അവാര്‌ന ബാന് ബാന് എന്റ് ബ്‌ളിത്താര്. സാമി തമ്മോഡ ഇന്ത് ഗേന്ത കാര്യഗാള്‌ന ഒട്ടുക്കു അവാര് അവാര്‌ക്ക് സൊന്നാര്.
5ആന പരിസാര് കച്ചിഗാറാര്‌ല് ലേസ ഏസ്സ്‌ഗാറാര് ഇ്ളാഗി ഇത്തെ സൊന്നാര്: <<ഇസ്‌റവേല്‌ഗാറാരെ, എഗുദാര് അല്ലാത്ത ജാദിഗാള്‌ന പരിസേദനെ സാത്ത്‌റ ഗേയാമ് മോസെ സട്ടപഡി നഡാക്ക്യാമ് സൊല്ലുഡൊ.>>
6ഈ കാര്യന പറ്റി നായനൊഡ്യ അപ്പോസുത്തലാര്‌മ്, മൂപ്പനാമ്‌ഗാള്‌മ് ഒന്റുക്കു കൂഡുനാര്. 7എഞ്ചോ ഗളിഗെ തറ്‌ക്ക്‌ന പ്‌റ പത്ത്‌റോസു ഇ്ളാഗി ഇത്തെ സൊന്നാന്. <<ഏസ്സ്‌ഗാറാരെ, എഗുദാര് അല്ലാത്ത ജാദിഗാള് നല്ല സേദിന കേ്ട്ട് നമ്പ്യ ബേ്ണ്ടി, അവാര്‌ക്ക് നല്ല സേദിന സൊല്ല്യ എന്നലോ താനെ സാമി എനാന നിമ്മ് പട്ട്‌ലിന്ത് തെരിന്തെ്ഡ്‌ത്താന്. അദ് നിമാക്കെല്ല തെരിമല്ല. 8എല്ലാ ആള്‌ഗാള് നെനേവുന തെരിവ സാമി, നമാക്ക് തന്ത പാസെ എഗുദാര് അല്ലാത്ത ജാദിഗാള്‌ക്ക്‌മ് സാമിനിഗാല്‌ന കൊഡുത്താന്. അദ്‌നാലെ എഗുദാര് അല്ലാത്ത ജാദിഗാള് ഏസ്സ്‌ന നമ്പുവാദ് സെരിത്തെ എന്റ് സാമി എമാക്ക് കാട്ടി തന്താന്. 9അത്തെ നമ്മാമ്, അവാര്‌മ് സാമിക്ക് ഒന്റേ പാസെത്തെ. അവാര് നമ്പ്‌നാദ്‌നാലെ സാമി അവാര് പാവഗാള്‌നെല്ല പൊറുത്താന്. 10അദ്‌നാലെ നമ്മ് പാട്ടനാമ്‌ക്കൊ, നമാക്കൊ ഗേയ മുഡ്യാത്ത കാര്യന ഏസ്സ്‌ഗാറാര് ഗേഡൊ എന്റ് നിമ്മ ആസെപഡ്‌ന്റ്‌റ്. ഇത്തെ ആസെപട്ട് സാമിന സോദണെ ഗേവാദ് എന്ത്‌ക്ക്? 11അത്തെല്ല ആണ്ടവാന് ഏസ്സ്‌ക്ക് നമ്മോഡ ബേ്റ്‌വെന്താദ്‌നാലെത്തെ സാമി നമാന കാപാറ്റ്‌നാന്. അദ്‌ന നമ്മ നമ്പ്‌ന്റാമ്. അദ്‌ന പാസെത്തെ അവാര്‌മ് നമ്പ്‌ന്റാര്.>>
12അദ്‌ക്ക് പ്‌റ സാമി തമ്മോഡിന്ത് എഗുദാര് അല്ലാത്ത ജാദിഗാള് പട്ട്‌ല് ഗേന്ത അദിസ്യഗാള്നാമ്, അഡ്യാളഗാള്‌നാമ് ബറ്‌ണവാസ്‌മ് പവുലോസുമു സൊന്നാര്. അദുക്കുള ജന കൂട്ടഗാള് ഒട്ടുക്കു സപ്പാന കേ്ട്ടിന്താര്. 13അവാര് നായനൊഡിന്ത് തീന്ത പ്‌റ, ആക്കോവു ഇത്തെ സൊന്നാന്: <<ഏസ്സ്‌ഗാറാരെ, നാന് സൊല്ലുവാദ്‌ന കേ്ള്‌ന്, 14എഗുദാര് അല്ലാത്ത ജാദിഗാള്‌ലിന്ത് ഒന്റു കൂട്ട ആള്‌ഗാള്‌ന തനാക്കുള്ളവാര് മാഡ്യ സാമി തെരിന്തെ്ഡ്‌ത്ത്‌റ്‌ന്റാന്. അത്തെ സാമി അവാരോഡ മുദാല് കാട്ട്‌ന സീവാന്‌ന പറ്റി സീമോനു സൊക്കാന സൊന്നാനല്ല. 15സാമിദാസ്‌ഗാള് സൊല്ലിര്‌ക്കുവാദ് സെരിക്ക്‌മ് ഈ കാര്യനത്തെ. അദ് ഇത്തേത്തെ സൊല്ലിര്‌ക്കുവാദ്.
16<ആണ്ടവാന് ഇത്തെ സൊന്റാന്, ഇദ്‌ക്ക് പ്‌റ നാന് തിരിഗി ബരുവെ.
ജില്ലമ്പുല്ലാത്ത് ആയിര്‌ക്കുവ ദാവീദ് ബമ്മേസന നാന് ഒന്റുക്കു സേത്തുവെ.
അവാര്‌ക്ക് ഇല്ലാദെ ആനാദ്‌ഗാള്‌നെല്ല നാന് തിരിക്കി കൊഡുത്തു
അവാര്‌ന പിന്നേമ് ഒറേപ്പ് മാഡുവെ.
17മിഞ്ച്‌ന ആള്‌ഗാള്,
എന്ന് സൊന്തഗാറാര് ആയിര്‌ക്ക്യ നാന് തെരിന്തെ്ഡ്‌ത്ത എഗുദാര് അല്ലാത്ത ജാദിഗാള്‌ത്തെ ഒട്ടുക്കുമു എന്ന് പട്ട്‌ക്ക് ബരുവാര്.
18അത്തെ ഇദ്‌നെല്ല മുന്നുക്കെ തെരിവ ആണ്ടവാന് സൊല്ലിര്‌ക്ക്‌ന്റാന്.>#ആമോസു 9:11,12
19അദ്‌നാലെ സാമിസാരി ബരുവ എഗുദാര് അല്ലാത്ത ജാദിഗാള്‌ന തൊന്തറെ ഗേഗബേ്ഡ എന്റ്‌ത്തെ എനാക്ക് നിമ്മോഡ സൊല്ല്യ ഇര്‌ക്കുവാദ്. 20ആന അവാര്‌ക്ക് ഇത്തെ ഒന്റു എ്ള്‌ത്ത് എ്ള്‌ദി ബ്‌ഡ്‌ഡൊ. സെലെഗാള്‌ക്ക് മേല്‌സ ബെത്താദ്‌നാലെ അയിത്ത്യ ആന തീനിഗാള്‌ന തിന്ന ബേ്ഡ, ബേസ്യാഡ ബേ്ഡ, മുട്ടുമുട്ടുത്തു സത്ത ബേ്ണ്ട്‌ഗാള്ത്ത് സോരെ സൂസി തള്ളാത്താദ്‌നാലെ അയി ബേ്ണ്ട്‌ഗാള് കറിന തിന്ന ബേ്ഡ, ഏദ് ബേ്ണ്ട് സോരെനാമ് കുഡിക്ക ബേ്ഡ എന്റ് എ്ള്‌ദ്‌ന മദി. 21എന്ത്‌ക്കെന്റ് സൊന്ന മുന്തെല കാലാത്ത്‌ലിന്തേ എല്ലാ ഒയിവു നാള്‌ല്‌മ് എഗുദാര് പരേസുവ ബീ്ഡ്‌ല് മോസെ സട്ടഗാള്‌ന പഡിത്ത് കാട്ടിന്താര്. അദ്‌താനെ അല്ല എല്ലാ പട്ടണഗാള്‌ക്ക്‌റാഗാമ് ഇദ്‌ന പഡിസിന്താര്.>>
എഗുദാര് അല്ലാത്ത ജാദിലിന്ത് ഏസ്സ്‌ന നമ്പ്‌നവാര്‌ക്കുള്ള എ്ള്‌ത്ത്
22അപ്പോസുത്തലാര്‌മ്, മൂപ്പനാമ്‌ഗാള്‌മ്, ഏസ്സ്‌ഗാറാര് കൂട്ടാത്ത്‌ല എല്ലാ ആള്‌ഗാളോഡ ഒന്റായി എ്ണേന്ത് ഇത്തെ മുഡിവെ്ഡ്‌ത്താര്. അയി കൂട്ടാത്ത്‌ലിന്ത് ലേസ ഗണ്ടാള്‌ഗാള്‌ന തെരിന്തെ്ഡ്‌ക്കുഡൊ. തെരിന്തെ്ഡ്‌ക്ക്‌ന്റാവാര്‌ന പവുലോസോഡാമ്, ബറ്‌ണവാസോഡാമ് അന്തോക്ക്യാക്ക് സൊല്ലി ബ്‌ഡ്‌ഡൊ. അത്തെ ഏസ്സ്‌ഗാറാര്‌ല് മുഗാനിഗാള് ആയിന്ത ബറ്‌സവാസ് എന്നുവ ജൂദാന്‌നാമ്, സീലാസ്‌നാമ് തെരിന്തെ്ഡ്‌ത്താര്. 23അവാര് കയിക്ക് ഒന്റു എ്ള്‌ത്ത്‌നാമ് കൊഡുത്തു സൊല്ലി ബ്‌ട്ടാര്. അയി എ്ള്‌ത്ത്‌ല് ഇത്തെ എ്ള്‌ദിന്ത്‌ദ്:
<<നിമാന പാസെ ഏസ്സ്‌ഗാറാര് ആന അപ്പോസുത്തലാര്‌മ്, മൂപ്പനാമ്‌ഗാള്‌മ് എ്ണേന്ത്
അന്തോക്ക്യ, സ്‌റിയ, കിലിക്ക്യ എന്നുവ എ്ഡെഗാള്‌ല എഗുദാര് അല്ലാത്ത ജാദിഗാള്‌ല ഏസ്സ്‌ഗാറാര്‌ക്ക് എ്ള്‌ദുവ എ്ള്‌ത്ത്.
നിമ്മ ഒട്ടുക്കു നലമായി ഇര്‌ക്ക്‌ന്റ്‌റ് എന്റ് നെനേക്ക്‌ന്റേമ്.
24എമ്മ് കൂട്ടാത്ത്‌ല് ഇര്‌ക്കുവ ലേസ ആള്‌ഗാള് നിമ്മ് പട്ട്‌ക്ക് ബന്ത് തൊന്തറെപഡിസി അവാര് സൊന്ന കാര്യഗാള് നിമാന അപ്പാര അര്‌ക്കപഡ്‌സ്‌റ്റ് എന്റ്‌മ് എമ്മ കേ്ട്ടേമ്. അവാര് അത്തെ സൊന്നാദ് എമ്മ സൊല്ലി ബ്‌ട്ട് ബന്ത് സൊന്നാദല്ല. 25അദ്‌നാലെ എമ്മ ഒന്റായി കൂട്ട കൂഡി ലേസ ഗണ്ടാള്‌ഗാള്‌ന തെരിന്തെ്ഡ്‌ത്ത് നിമ്മ് പട്ട്‌ക്ക് സൊല്ലി ബ്‌ഡ്യ ഒന്റു മുഡിവെ്ഡ്‌ത്ത് ഇര്‌ക്ക്‌ന്റേമ്. അവാര്‌ന നമ്മ് സൊന്ത ബറ്‌ണവാസോഡാമ്, പവുലോസോഡാമ് ബ്‌ഡ്‌വേമ്. 26പവുലോസുമു, ബറ്‌ണവാസ്‌മ് നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌ക്ക് ബേ്ണ്ടി ഗിലാസ ഗേഗാട്ടി ആള്‌ഗാള് എഞ്ചോ ജമ്പ് അവാര്‌ന കൊല്ല്യ പട്ടാര്. 27അത്തെ എമ്മ ജൂദാന്‌നാമ്, സീലാസ്‌നാമ് നിമ്മ് പട്ട്‌ക്ക് സൊല്ലി ബ്‌ഡ്‌ന്റേമ്, അവാര് ബന്ത് എമ്മ എ്ള്‌ദിര്‌ക്കുവ ഈ കാര്യഗാള്‌ന നിമാക്ക് നേരെ സൊല്ലുവാര്. 28നിമാക്ക് അപ്പാര ബാര ആഗ ബേ്ഡ എന്റ് സാമിനിഗാല്‌മ് എമ്മാമ് ഒന്റേ പാസെ നേര്‌ത്തെന്റ് കണാക്കാക്ക്‌ന്റേമ്. അദ്‌നാലെ നിമ്മ ഈ സട്ടഗാള്‌ന താനെ ഗേന്ത മദി: 29സെലെഗാള്‌ക്ക് മേല്‌സ ബെത്താദ്‌ന തിന്ന ബേ്ഡ, ബേസ്യാഡ ബേ്ഡ, മുട്ടുമുട്ടുത്തു സത്ത ബേ്ണ്ട്‌ഗാള്ത്ത് സോരെ സൂസി തള്ളാത്താദ്‌നാലെ അയി ബേ്ണ്ട്‌ഗാള് കറിന തിന്ന ബേ്ഡ, ഏദ് ബേ്ണ്ട് സോരെനാമ് കുഡിക്ക ബേ്ഡ. ഈ കാര്യഗാള്‌നെല്ല ഗേഗാദിന്ത
നിമാക്ക് നല്ലാദ്. നിമ്മ നലമായി ഇര്‌ക്കുഡൊ!>>
30അത്തെ അവാര്‌ന എര്‌സലേമ്‌ലിന്ത് അന്തോക്ക്യാക്ക് സൊല്ലി ബ്‌ട്ടാര്. അവാര് അന്തോക്ക്യാക്ക് എജ്ജ്‌ന പ്‌റ അദ്‌ല ഏസ്സ്‌ഗാറാര് കൂട്ടാത്ത്‌ല ജനഗാള്‌ന ബ്‌ളിത്ത് ബരിസ്സി എ്ള്‌ത്ത്‌ന കൊഡുത്താര്. 31ഏസ്സ്‌ഗാറാര് അയി എ്ള്‌ത്ത്‌ന പഡിത്ത് നോഡുഗാട്ടി അദ്‌ല് എ്ള്‌ദിര്‌ക്കുവ ദയിരപഡുസുവ സേദിന കേ്ട്ട് അവാര്‌ക്ക് ദ്‌ഡ്‌ക്കനാറ്റ്. 32ജൂദാന്‌മ്, സീലാസ്‌മ് സാമിദാസ്‌ഗാള് ആയിന്താര്. അദ്‌നാലെ അവാര് ഏസ്സ്‌ഗാറാര്‌ക്ക് ദയിര കെ്ഡേക്ക്യാമ്, ഒറേപ്പ് കെ്ഡേക്ക്യാമ് എഞ്ചോ കാര്യഗാള്‌ന സൊന്നാര്. 33അവാര് റാഡാള് ഒന്റരെ ബാര അദ്‌ല് ഇന്താര്. അദ്‌ക്ക് പ്‌റ അന്തോക്ക്യാല ഏസ്സ്‌ഗാറാര് ജൂദാന്‌നാമ്, സീലാസ്‌നാമ് അവാര്‌ന അനിപ്പി ബ്‌ട്ടവാര് പട്ട്‌ക്ക് നിമ്മ്‌ദ്യോഡ സൊല്ലി ബ്‌ട്ടാര്.#15:33 മുദാല് എ്ള്‌ദ്‌ന കായിദന നോഡി എ്ള്‌ദ്‌ന പാദി കായിദാത്ത്‌ല് ഈ സൊല്ലുസുലാക്ക സേത്തി എ്ള്‌ദിര്‌ന്റാര്. ആന സീലാസ് അദ്‌ല് താനെ ഇര്‌ക്ക്യ മുഡിവാക്ക്‌നാന്.
35പവുലോസുമ്, ബറ്‌ണവാസ്‌മ് ഒന്റരെ മാസ അന്തോക്ക്യാല് താനെ ഇന്താര്. അവാര് അദ്‌ലിര്‌ക്കുവ ബേ്റെ എഞ്ചോ ആള്‌ഗാളോഡൊപ്പ ആണ്ടവാന് സൊല്ലുസുലാക്കാന സൊല്ലികൊണ്ട്‌മ്, പഡിസികൊണ്ടുമു ഇന്താര്.
പവുലോസുമ് ബറ്‌ണവാസ്‌മ് പ്‌റ്‌ന്റാര്.
36ഒന്റുറാഡ് മാസ കളിന്ത പ്‌റ പവുലോസു ബറ്‌ണവാസ്‌ക്ക്: <<നമ്മ ആണ്ടവാന് സൊല്ലുസുലാക്കഗാള്‌ന സൊന്ന പട്ടണഗാള്‌ക്ക്‌റാഗ പിന്നേമ് പോഗ, അദ്‌ല ഏസ്സ്‌ഗാറാര് എത്തെ ഇര്‌ന്റാര് എന്റ് നോഡുഗ>> എന്റ് സൊന്നാന്. 37ഓഗന്നാന് എന്നുവ മര്‌ക്കോസുനാമ് തമ്മോഡ കൂട്ടി പോയ ബറ്‌ണവാസ് ആസെപട്ടാന്. 38ആന അയാള് പമ്പുല്ല്യാല് ബെത്ത് പ്‌റ്‌ന്ത് പോയിന്താന്. പിന്നെ അയാള് അവാരോഡ ഗിലാസ ഗേയ പോഗാലെ. അദ്‌നാലെ അയാള്‌നാമ് കൂട്ടി പോവാദ് സെര്യല്ല എന്റ് പവുലോസു നെനേത്താന്. 39ഇദ്‌ന സൊല്ലി സെരിക്ക്‌മ് തറ്‌ക്ക്‌ന പ്‌റ അവാര് റാഡാള്‌മ് പ്‌റ്‌ന്താര്: ബറ്‌ണവാസ് മര്‌ക്കോസുന കൂട്ടി എ്ഡ്‌ത്ത് കുപ്പുറോസു എന്നുവ എ്ഡേക്ക് പോയ കപ്പാല് ഏ്റ്‌നാര്. 40പവുലോസു സീലാസ്‌ന തെരിന്തെ്ഡ്‌ത്ത് പോഗാട്ടി അയി ഏസ്സ്‌ഗാറാര് അവാര്‌ക്ക് ആണ്ടവാന് പാദ്‌ഗാപ്പ്‌മ് ഉദാവിമ് കെ്ഡേക്ക്യ ബേ്ണ്ടി സാമി കയിക്ക് അവാര്‌ന ഒപ്പുസുനാര്. 41അവാര് സ്‌റിയ, കിലിക്ക്യ നാഡ്‌ഗാള് മേലെ പോയി ഏസ്സ്‌ഗാറാര് കൂട്ടഗാള്‌ന ഒറേപ്പിസിന്താര്.
Currently Selected:
അപ്പോസുത്തലാര് 15: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
