അപ്പോസുത്തലാര് 12
12
മൊത്തന കൊഡിമെഗാള്
1അയി കാലാത്ത്‌ല് എരോദ രാജാവു ഏസ്സ്‌ഗാറാര് കൂട്ടാത്ത്‌ല ലേസ ആള്‌ഗാള്‌ന കൊഡിമെപഡിസ്യ പ്‌ഡിത്താന്. 2അയാള് ഓഗന്നാന് അണ്ണാന് ആക്കോവുന ആള്‌ബെത്ത് ബാള്‌ല് ബെ്ട്ടി കൊന്റാന്. 3അദ്‌ന എഗുദാര് പിര്യപട്ടാര് എന്റ് എരോദ കണ്ടാന്. അദ്‌നാലെ അയാള് പത്ത്‌റോസുനാമ് പ്‌ഡിത്ത് ജെയില്‌ക്ക് ഇക്കുഡൊ എന്റ് മുഡിവു എ്ഡ്‌ത്താന് (പുളി ഇല്ലാത്ത അഡെ നോമ്പിഗളിഗേല്‌ത്തെ അദ് ഗേന്താദ്.) 4എരോദ പത്ത്‌റോസുന പ്‌ഡിത്ത് ജെയില്‌ക്ക് ഇക്ക്‌നാന്. പദ്‌നാറ് പട്ടളഗാറാര് പത്ത്‌റോസുക്കു കാവ നിന്റാര്. പെസഗെ നോമ്പിക്ക് പ്‌റ എഗുദ കോഡിദിക്ക് കൊഡുക്ക്യാത്തെ എരോദ അത്തെ ഗേന്താദ്.
5അത്തെ പത്ത്‌റോസു ജെയില്‌ല് ഇന്താന്. ആന ഏസ്സ്‌ഗാറാര് കൂട്ട പത്ത്‌റോസുക്കു ബേ്ണ്ടി സാമിക്ക് നലമായി പരേസി ഇന്താര്.
സാമിദൂദാര് പത്ത്‌റോസുന ജെയില്‌ലിന്ത് കഡാത്ത്‌ന്റാന്
6പത്ത്‌റോസുന റാഡ് സങ്കിലിക്കി കെ്ട്ടി ബെത്തിന്താര്. അയാള് റാഡ് പട്ടളഗാറാര്‌ക്ക് നഡ്‌ക്കെ ജാമാത്ത്‌ല് ഉറാങ്കികൊണ്ടിന്താന്. ജെയില് ബാസാത്ത്‌ല് കാവഗാറാര്‌നാമ് ബെത്തിന്താര്. എരോദാവു പത്ത്‌റോസുന മറ്‌നാള് എഗുദാര് കോഡിദിക്ക് എ്ഡ്‌ത്ത് പോഡൊ എന്റ് ഇന്താന്. 7ദ്‌ഡീരന ആണ്ടവാന് ദൂദാന് അദ്‌ക്ക് ബന്ത് നിന്റാന്. അവാര് ഇന്ത പട്ട്‌ക്ക് ബെ്ള്‌സ അഡിത്ത്‌ദ്. ദൂദാന് പത്ത്‌റോസു സിവാല്‌ന ഉന്തി ഇ്ളാക്കിന്ത്, <<സട്ടന ഇ്ളാഗ്>> എന്റ് സൊന്നാന്. അന്നാല് താനെ അയാള് കയിലിന്ത് സങ്കിലി ഊരി അലേന്ത്‌ദ്.
8അദുക്കുള ദൂദാന് പത്ത്‌റോസുക്കു: <<ഒഡെന മുറിക്കി കെ്ട്ടി, സെര്‌പ്പ്‌ന ഇക്ക്>> എന്റ് സൊന്നാന്. പത്ത്‌റോസു അത്തെ ഗേന്താന്. <<നിന്ന് സീലെന എ്ഡ്‌ത്ത് പൊദേത്ത് എന്ന് പിന്ന്‌മേലെ ബാ>> എന്റ് ദൂദാന് സൊന്നാന്. 9പത്ത്‌റോസു ജെയില്‌ലിന്ത് ദൂദാനോഡ ബെ്ളിഗെ ബന്താന്. സാമിദൂദാന് തനാക്ക് ഗേന്താദ് നേര്‌ത്തെ എന്റ് പത്ത്‌റോസുക്കു തെര്യാലെ, ഇദ് ഒന്റു തോറ്റ എന്റ് അയാള് നെനേത്തിന്താന്. 10അവാര് കാവഗാറാര് ഇര്‌ക്കുവ മുന്നുക്കുല ബാസനാമ്, അദ്‌ക്ക് അച്ചാരില ബാസനാമ് ദാണ്ടി പട്ടണാക്ക് കഡാക്കുവ ഇര്‌മ്പ് ബാസ പട്ട്‌ക്ക് എജ്ജ്‌നാര്. അദുക്കുള അയി ബാസ അവാര്‌ക്കായി തന്ന്‌പാഡ്‌ക്ക് താനെ ത്‌റാന്ത്‌ദ്. അദ്‌നാലെ അവാര് ബെ്ളിഗെ കഡാന്ത് പട്ടണ തെരുവുമേലെ നഡാന്ത് ലേസ അത്തഗ പോനാര്. അന്നാല് താനെ ദൂദാന് പത്ത്‌റോസുന ബ്‌ട്ട് മായിന്താന്.
11അന്നാപ്പ്‌ത്തെ തനാക്ക് എന്താറ്റ് എന്റ് പത്ത്‌റോസുക്കു തെരിന്ത്‌ദ്. പ്‌റ അയാള്: <<ആണ്ടവാന് തന്ന് ദൂദാന്‌ന ബ്‌ട്ട് എരോദ കയില് ഇന്ത്‌മ് എഗുദാര് എനാക്ക് ഗേയ ആസെപട്ടാദ്‌ല് ഒട്ടുക്കുമു ഇന്ത് എനാന കാപാറ്റി ഇര്‌ന്റാന്. ഇദ് ഇന്നാല്‌ത്തെ എനാക്ക് സെരിക്ക്‌മ് തെരിന്റ്>> എന്റ് സൊന്നാന്.
12പത്ത്‌റോസുക്കു ഇദ് തെരിന്ത പ്‌റ അയാള് മര്‌ക്കോസു എന്റ് സൊല്ലുവ ഓഗന്നാന് അവ്വേസി മറിയ ബീ്ഡ്‌ക്ക് പോനാന്. അദ്‌ല് മൊത്തന ആള്‌ഗാള് ഒന്റായിന്ത് പരേസി കൊണ്ടിന്താര്. 13പത്ത്‌റോസു പോയി ദെ്ണെ ബാസന കൊട്ടുനാന്. അദുക്കുള രോദ എന്നുവ ഗിലാസഗാറിസി ആര് എന്റ് നോഡ്യ പോനാള്. 14പത്ത്‌റോസു നായത്തെ എന്റ് തെരിഗാട്ടി അവാള് ബാസ ഗുഡി ത്‌റാക്കാദെ ദൊഡ്ഡ പിര്യത്തോഡ ഉളാക്ക് ഓഡി പോന. <<പത്ത്‌റോസു ബെ്ളിഗെ നിന്റ് ഇര്‌ന്റാന്>> എന്റ് അവാള് അദ്‌ല് ഇന്തവാര്‌ക്ക് സൊന്ന.
15<<നിനാക്ക് പിരാന്ത്>> എന്റ് അവാര് അവാള്‌ക്ക് സൊല്ലുഗാട്ടി <<അല്ല, നാന് സൊന്നാദ് നേര്‌ത്തെ>> എന്റ് അവാള് ഒറേപ്പായി സൊന്നാള്. <<അദ് പത്ത്‌റോസുന കാക്കുവ ദൂദാന് ഇര്‌ക്ക്‌മ്>> എന്റ് അവാര് സൊന്നാര്.
16ആന പത്ത്‌റോസു പിന്നേമ് ബാസന കൊട്ടികൊണ്ടേ ഇന്താന്. കഡേഗല അവാര് ബാസന ത്‌റാന്ത് പത്ത്‌റോസുന കാണ്‌ഗാട്ടി അദിസ്യപട്ടാര്. 17സപ്പാന ഇര്‌ക്ക്യ പത്ത്‌റോസു കയില് താനെ ജാഡെ കാട്ട്‌നാന്. അദ്‌ക്ക് പ്‌റ ആണ്ടവാന് തനാന എത്തെ ജെയില്‌ലിന്ത് ബെ്ളിഗെ കഡാത്തി ബ്‌ട്ടാന് എന്റ് അയാള് അവാര്‌ക്ക് സൊക്കാന സൊന്നാന്. <<ഇദ്‌ന ആക്കോവുക്കുമു ഇദ്‌ന തെര്യാത്ത ഏസ്സ്‌ഗാറാര്‌ക്ക്‌മ് സൊല്ലുനു>> എന്റ് അയാള് സൊന്നാന്. അദ്‌ക്ക് പ്‌റ അയാള് ബേ്റെ ഒന്റു എ്ഡേക്ക് പോനാന്.
18ബെ്ഡിന്ത പ്‌റ പത്ത്‌റോസുക്കു എന്ത് ആറ്റ് എന്റ് പട്ടളഗാറാര്‌ക്ക് ദൊഡ്ഡ അര്‌ക്ക പ്‌ഡിത്ത്‌ദ്. 19എരോദ പത്ത്‌റോസുന പരാന്ത് കണ്ട്‌പ്‌ഡിക്ക്യ സൊന്നാന്. ആന അവാര്‌ക്ക് മുഡ്യാലെ. അദ്‌നാലെ പത്ത്‌റോസുക്കു കാവ നിന്റ പട്ടളഗാറാര്‌ന സൊക്കാന കേ്ട്ട പ്‌റ അവാര്‌ന കൊല്ല്യ എരോദ സൊന്നാന്.
അദ്‌ക്ക് പ്‌റ എരോദ എഗുദ നാഡ്‌ലിന്ത് കയിസര്യ നാഡ്‌ക്ക് പോയി അദ്‌ല് ലേസ നാള് ഇന്താന്.
എരോദ രാജാവു സാന്റാന്
20അയി കാലാത്ത്‌ല് എരോദ സോരു നാഡ്‌ലവാരോഡാമ് സീദോനു നാഡ്‌ലവാരോഡാമ് സെരിക്ക്‌മ് മൊനേക്ക് തെ്ട്ടിന്താന്. അദ്‌നാലെ അവാര്‌ത്ത്‌ല് ഒന്റു കൂട്ട ആള്‌ഗാള് ഏരോദാന കാണ്യ പോനാര്. അദ്‌ക്ക് അവാര് മുദാല് താനെ രാജാവു കോട്ടെല കാര്യഗാള് നോഡുവ ബ്‌ളാത്തോസുന തമാക്ക് ബേ്ണ്ടി നായ കേ്ള്‌ക്ക്യ തമ്മ് സാരി സേത്ത്‌നാര്. അത്തെ അവാര് രാജാവു പട്ട്‌ക്ക് പോയി രാജി കൂഡുഡൊ എന്റ് കേ്ട്ടാര്. ഇത്തെ ഗേന്താദ് എന്ത്‌ക്ക് എന്റദാന അവാര് നാഡ്‌ക്കുള്ള അന്നഗാള് ഏരോദാത്ത് നാഡ്‌ല് ഇന്ത്‌ത്തെ കൊഡുത്തിന്താദ്.
21ഇദ്‌ക്ക് ബേ്ണ്ടി തെരിന്തെ്ഡ്‌ത്ത ഒന്റു നാള്‌ല് എരോദ തന്ന് രാജ ബേസന ഇക്കി താന് കുക്കാക്കുവ പട്ട്‌ക്ക് ബന്ത് കുക്കാന്താന്. അദ്‌ക്ക് പ്‌റ അയാള് ആള്‌ഗാള്‌ക്ക് നായ സൊന്നാന്. 22അദുക്കുള, <<ഇദ് മന്‌സാന് അല്ല, സാമിത്തെ ഈ നായ സൊല്ലുവാദ്>> എന്റ് ആള്‌ഗാള് ആലാത്ത് സൊന്നാര്. 23എരോദ ഇദ്‌ന സെരി എന്റ് സൊല്ലി സാമിന ബ്‌ഡ തനാന ദൊഡ്ഡവാന് മാഡ്‌നാന്. അദ്‌നാലെ ആണ്ടവാന് ദൂദാന് അയാള്‌ന അഡിത്ത് ബീ്ക്ക്‌നാന്. അയാള് പൂവുക്കി സത്ത് തള്ള്‌നാന്.
24ആന സാമി സൊല്ലുസുലാക്ക മുന്നുക്കുലാദ്‌ന ബ്‌ഡ സേത്തി സേത്തി പജാന്ത്‌കൊണ്ടിന്ത്‌ദ്.
25ബറ്‌ണവാസ്‌മ് സവുലുമു തമാക്ക് ഗേയ ഇന്ത ഗിലാസാന ഗേന്ത് തീത്ത പ്‌റ മര്‌ക്കോസു എന്റ് സൊല്ലുവ ഓഗന്നാന്‌ന കൂട്ടി എ്ഡ്‌ത്ത് എര്‌സലേമ്‌ല് ഇന്ത് തിരിഗി പോനാര്.
Currently Selected:
അപ്പോസുത്തലാര് 12: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
