1 കൊരിന്ത്യഗാറാര് 14
14
ബേ്റെബേ്റെ നായ നൊഡിവാദുക്കുള്ള ബരഗാള്‌മ് സാമി നായന നേരെ കേ്ട്ട് സൊല്ലുവ ബരഗാള്‌മ്
1അദ്‌നാലെ സീവാന്‌ഗാറാര് ആയിര്‌ക്ക്യ മനേസ്സ് ബെത്ത് നഡാന്. സാമിനിഗാല് ബരഗാള്‌ക്ക് ബേ്ണ്ടിമ് മുക്ക്യമായിമ് സാമി നായന നേരെ കേ്ട്ട് സൊല്ലുവ ബരാക്ക് ബേ്ണ്ടിമ് നിമ്മ മ്‌ഗ്‌ന്ത ദിന്‌സ്‌ല് ആസെപഡ്‌ന്. 2നെപ്പ്കെ്ഡേക്കാത്ത നായഗാള്‌ല് നായ നൊഡിന്റവാന് മന്‌സാരോഡല്ല സാമ്യോഡത്തെ നായനൊഡിന്റാന്. ആര്‌ക്ക്‌മ് അദ് നെപ്പ്‌കെ്ഡേക്കുവാദില്ലെ, എന്റാല്‌മ് അയാള് സാമിനിഗാല് സക്‌തില് മറേന്ത്‌റ്‌ക്കുവ സത്ത്യഗാള്‌ന സൊന്റാന്. 3സാമി നായന നേരെ കേ്ട്ട് സൊന്റവാന് മന്‌സാനോഡത്തെ നായനൊഡിന്റാന്. ഏസ്സ്‌ഗാറാര്‌ക്ക് സാമ്യോഡ ഇര്‌ക്കുവ ഉറാവുന ഒറേപ്പ് മാഡ്യ ബേ്ണ്ടിമ് ദയിരപഡിസ്യ ബേ്ണ്ടിമ് പിരാക്ക്യ ബേ്ണ്ടിമ് അവാര് നായനൊഡിന്റാര്. 4നെപ്പ് കെ്ഡേക്കാത്ത നായാത്ത്‌ല് നായ നൊഡിന്റവാന് തനാക്ക് സാമ്യോഡ ഇര്‌ക്കുവ ബക്‌തിന സേത്തി സേത്തി മാഡ്‌ന്റാന്. ആന സാമി നായന നേരെ കേ്ട്ട് സൊന്റവാന് ഏസ്സ്‌ഗാറാര് കൂട്ടാക്ക് ഒട്ടുക്കുമു സാമ്യോഡ ഇര്‌ക്കുവ ഉറാവുന സേത്തി മാഡ്‌ന്റാന്. 5നിമ്മ എല്ലാവാര്‌മ് നെപ്പ്കെ്ഡേക്കാത്ത നായഗാള്‌ല് നായ നൊഡിഡൊ എന്റ്‌മ് മുക്ക്യമായിമ് സാമി നായന നേരെ കേ്ട്ട് സൊല്ലുഡൊ എന്റ്‌മ് നാന് ആസെപഡ്‌ന്റെ. നെപ്പ് കെ്ഡേക്കാത്ത നായഗാള്‌ല് നായ നൊഡിന്റവാന് ഏ്സ്സ്‌ഗാറാര് കൂട്ടാക്ക് സാമ്യോഡ ഇര്‌ക്കുവ ബക്‌തിന സേത്തി മാഡ്യ താന് സൊല്ലുവ നായാക്ക് അര്‌ത്ത സൊല്ലുഡൊ. സൊല്ലാദെ പോന സാമി നായന നേരെ കേ്ട്ട് സൊല്ലുവാദ്‌ത്തെ ഏസ്സ്‌ഗാറാര് കൂട്ടന ബിലപഡിസ്യ ഉവഗരാമ്.
6ഏസ്സ്‌ഗാറാരെ, സാമി കാട്ടി തന്ത കാര്യഗാള്‌നഗൊ അറുവുമു ബുദ്ദിമ് ഉള്ള കാര്യഗാള്‌നാഗൊ സാമി നേരെ സൊന്ന കാര്യഗാള്‌നാഗൊ പഡുസുവ കാര്യഗാള്‌നാഗൊ സൊല്ലാദെ നെപ്പ്കെ്ഡേക്കാത്ത നായഗാള്‌ല് നായനൊഡിന്ത് കൊണ്ടു നാന് നിമ്മ് പട്ട്‌ക്ക് ബന്തദാന നിമാക്ക് എന്ത് ഉവഗരാമ്? 7ഉജുരില്ലാത്ത ജാദിഗാളാന ത്‌റ്‌ളിമ് ബീ്ണേമ് പ്‌ഡിക്കാട്ടി പ്‌ഡിക്കുവ ജദ്ദ ഇന്നാദെന്റ് ബിത്ത്യാസ കാട്ടാദെ പോന ജദ്ദ മാഡുവാദ് എന്ത് എന്റ് എത്തെ നെപ്പ്‌കെ്ഡേക്ക്‌മ്? 8ജുദ്ദാക്ക് ഒരുങ്കുവ കൊമ്പൂദുഗാട്ടി നെപ്പ് കെ്ഡേക്കാത്ത ദിന്‌സ്‌ല് ഊദുന പട്ടളഗാറാര് എത്തെ ഒരുങ്കുവാര്? 9അദേപാസെ നിമ്മാമ് നാവുലു നെപ്പ്കെ്ഡേക്കാത്ത നായഗാള് നൊഡിന്തദാന സൊല്ലുവ കാര്യ എന്തെന്റ് എത്തെ തെരിമ്? അദ് നിമ്മ കാറ്റോഡ നായനൊഡിവ പാസെ ആയിര്‌ക്ക്‌മ്. 10ഉലഗാത്ത്‌ല് പല നായഗാള് ഇര്‌ക്ക്‌ന്റ്, അയി നായഗാള് ഒന്റുമു നെപ്പ്കെ്ഡേക്കത്താദല്ല. 11എനാക്ക് തെര്യാത്ത നായാത്ത്‌ല് ഒരുത്താന് നായനൊഡിവാദ് എനാക്ക് നെപ്പ് കെ്ഡേക്കാദെ പോന അയാള് എനാക്ക് ബെ്ളുജുരുഗാറാന് ആയിര്‌ക്കുവാന്. നാന്‌മ് അയാള്‌ക്ക് ബെ്ളുജുരുഗാറാന് ആയിര്‌ക്കുവേന്. 12അത്തെ സാമി ബരഗാള്‌ക്ക് ബേ്ണ്ടി മ്‌ഗ്‌ന്ത ആസെപഡുവ നിമ്മ അദ്‌ന ബെത്ത് ഏസ്സ്‌ഗാറാര് കൂട്ടാക്ക് സാമ്യോഡ ഇര്‌ക്കുവ ബക്‌തിന സേത്തി സേത്തി മാഡ്യ ബേ്ണ്ടി ഓരാഡ്‌ന്.
13അദ്‌നാലെ നെപ്പ് കെ്ഡേക്കാത്ത നായ നൊഡിന്റവാന് അദ്‌ക്ക് അര്‌ത്ത സൊല്ലുവ ബരാക്ക് ബേ്ണ്ടി പരേസുഡൊ. 14നാന് നെപ്പ് കെ്ഡേക്കാത്ത നായാത്ത്‌ല് പരേസുവദാന എന്ന് നിഗാല്‌ത്തെ പരേസ്‌ന്റ്, എന്ന് ബുദ്ദിക്ക് അദ്‌ല് പങ്കില്ലെ. 15അദ്‌നാലെ നാന് എന്തെന്റ് സൊല്ല്യ? നാന് എന്ന് നിഗാല്‌ല്‌മ് പരേസുവെ, എന്ന് ബുദ്ദില്‌മ് പരേസുവെ. നാന് എന്ന് നിഗാല്‌ല്‌മ് പാഡുവെ, എന്ന് ബുദ്ദില്‌മ് പാഡുവെ. 16നീ നിന്ന് നിഗാല്‌ല് ഒഗെ ഇക്ക്‌ഗാട്ടി സാമിനിഗാല് ബര ഇല്ലത്തവാന് നിന്ന് ഒഗേക്ക് എത്തെ ആമേന് സൊല്ലുവാന്? 17നീ സാമിക്ക് ഒന്റു സമ്യ നലമായി ഒഗെ ഇക്കി പരേസുവായി. ആന അദ് എന്തെന്റ് ഇന്ന്യൊന്റൊരുത്താന്‌ക്ക് നെപ്പ് കെ്ഡേക്കാത്തനാലെ അയാള് ബക്‌തിക്ക് ഉവഗരപഡുവാദില്ലെ.
18നിമ്മ എല്ലാവാര്‌ന ബ്‌ഡ നെപ്പ് കെ്ഡേക്കാത്ത നായഗാള് നാന് അദിഗ സൊന്റെ. അദ്‌നാലെ നാന് സാമിക്ക് ഒഗെ ഇക്ക്‌ന്റെ. 19ആന ഏസ്സ്‌ഗാറാര് കൂട്ടാത്ത്‌ല് നെപ്പ് കെ്ഡേക്കാത്ത നായാത്ത്‌ല് പത്തായിര കണാക്ക് നായനൊഡിവാദ്‌ന ബ്‌ഡ അവാര്‌ന പഡിസ്യ ബേ്ണ്ടി ബുദ്ദില് അയിദ് നായ സൊല്ല്യ നാന് ആസെപഡ്‌ന്റെ.
20ഏസ്സ്‌ഗാറാരെ, മക്കാള് നെനേക്കുവ പാസെ ഈ കാര്യഗാള്‌ന പറ്റി നെനേക്കുവാദ്‌ന തള്ള്‌ന്, തപ്പ് ഗേവ കാര്യാത്ത്‌ല് നിമ്മ അറ്യാത്ത പ്‌ള്ളെന പാസെ ആന്. ദൊഡ്ഡവാര് നെനേക്കുവ പാസെ നിമ്മ ഈ കാര്യന പറ്റി നെനേത്ത് നഡാന്.
21<<നെപ്പ് കെ്ഡേക്കാത്ത നായഗാള്‌ല്‌മ്
ബെ്ളുജുരുഗാറാര് ബായില്‌മ്
നാന് എന്ന് ആള്‌ഗാളോഡ നായനൊഡിവെ.
എന്റാല്‌മ് അവാര് എന്ന് നായന കാദ്‌ക്കിക്കമാട്ടാര് എന്റ് ആണ്ടവാന് സൊല്ലുന്റാന്>>#ഏസ്സയ്യാവു 28:11,12
എന്റ് മോസെ ബെത്ത സാമി സട്ടാത്ത്‌ല് സൊല്ലിര്‌ക്ക്‌ന്റാനല്ല.
22അദ്‌നാലെ നെപ്പ്കെ്ഡേക്കാത്ത നായഗാള് അഡ്യാള ആയിര്‌ക്കുവാദ് ഏസ്സ്‌ഗാറാര്‌ക്കല്ല, ഏസ്സ്‌ഗാറാര് അല്ലാത്തവാര്‌ക്ക്‌ത്തെ. ആന സാമി നായന നേരെ കേ്ട്ട് സൊല്ലുവാദ് അഡ്യാള ആയിര്‌ക്കുവാദ് ഏസ്സ്‌ഗാറാര് കൂട്ടാക്ക്‌ത്തെ. 23ഏസ്സ്‌ഗാറാര് കൂട്ട ഒട്ടുക്കുമു ഒന്റായി കൂഡി എല്ലാര്‌മ് നെപ്പ് കെ്ഡേക്കാത്ത നായഗാള്‌ല് നായനൊഡിവദാന സാമിനിഗാല് ബര കെ്ഡേക്കത്തവാരൊ ഏസ്സ്‌ഗാറാര് അല്ലത്തവാരൊ ഉളാക്ക് ബന്ത നിമാക്ക് പിരാന്ത് പ്‌ഡിത്ത്‌റ്‌ന്റ് എന്റ് സൊല്ലമാട്ടാര? 24എല്ലാവാര്‌മ് സാമി നായന നേരെ കേ്ട്ട് സൊല്ലുവദാന ഏസ്സ്‌ഗാറാര് അല്ലാത്തവാനൊ സാമിനിഗാല് ബര കെ്ഡേക്കത്തവാനൊ ഉളാക്ക് ബന്ത നിമ്മ എല്ലാവാര്‌മ് സൊല്ലുവ നായഗാള്‌ന കേ്ട്ട് താന് ഗേന്ത പാവാന പറ്റി അയാള്‌ക്ക് നെനേവു ബര്‌മ്. എല്ലാ ആള്‌ഗാള് സൊല്ലുവ നായഗാള്‌നാലെ അയാള് കുറ്റഗാറാന് എന്റ് കാണ്യ മുഡിമ്. 25അയാള് മനേസ്സ്‌ല് മറേസി ബെത്ത്‌റ്‌ക്കുവ കാര്യഗാള് എല്ലാര്‌ക്ക്‌മ് നെപ്പ്‌കെ്ഡേക്ക്‌മ്. അത്തെ അയാള് സത്ത്യമായിമ് സാമി നിമ്മ് പട്ട്‌ല് ഇര്‌ക്ക്‌ന്റാന് എന്റ് സൊല്ലി സഡങ്ക ബ്‌ന്ത് സാമിന കുമ്മുഡുവാന്.
ഏസ്സ്‌ഗാറാര് കൂട്ടാത്ത്‌ല കാര്യഗാള് എത്തെ ഗേഡൊ?
26അദ്‌നാലെ ഏസ്സ്‌ഗാറാരെ, നാന് നിമാക്ക് സൊന്ന കാര്യാക്ക് ഇര്‌ക്കുവ അര്‌ത്ത ഇദ്‌ത്തെ. നിമ്മ ഒന്റായി കൂഡി സാമിന കുമ്മുഡുഗാട്ടി നിമ്മ് പട്ട്‌ല് പാഡ്‌ന്റവാര് ഇര്‌ക്കുവാര്, പഡ്‌സ്‌ന്റവാര് ഇര്‌ക്കുവാര്, സാമി കാട്ടി കൊഡുക്കുവ കാര്യഗാള്‌ന സൊല്ലുന്റവാര് ഇര്‌ക്കുവാര്, നെപ്പ് കെ്ഡേക്കാത്ത നായഗാള് സൊന്റവാര് ഇര്‌ക്കുവാര്, നെപ്പ് കെ്ഡേക്കാത്ത നായഗാള്‌ക്ക് അര്‌ത്ത സൊല്ലുന്റവാര് ഇര്‌ക്കുവാര്. ഇദെല്ല ഏസ്സ്‌ഗാറാര് കൂട്ടാക്ക് സാമ്യോഡ ഇര്‌ക്കുവ ബക്‌തിന സേത്തി സേത്തി മാഡ്യ ഉവഗരപഡുസുഡൊ. 27നെപ്പ് കെ്ഡേക്കാത്ത നായഗാള് സൊല്ലുവദാന റാഡാളൊ കൂഡി ബന്ത മൂറാളൊ സൊന്നദാന മദി. അദ്‌മ് സൊല്ലുഗാട്ടി ഒന്റാള് സൊല്ലി തീന്ത പ്‌റ ഇന്ന്യൊന്റാള് സൊല്ലുവ ദിന്‌സ്‌ല് സൊല്ലുഡൊ. ആന ഒന്റാള് അദ്‌ക്ക് അര്‌ത്ത സൊല്ലി കൊഡുക്കുഡൊ. 28അര്‌ത്ത സൊല്ലി കൊഡുക്കുവ ആളില്ലാദിന്ത നെപ്പ് കെ്ഡേക്കാത്ത നായ നൊഡിന്റവാന് ഏസ്സ്‌ഗാറാര് കൂട്ടാത്ത്‌ല് സപ്പെന്റിന്ത് തന്നോഡ താനേമ് സാമ്യോഡ താനേമ് നായനൊഡിന്ത് കൊണ്ട്‌റ്‌ക്കുഡൊ.
29സാമി നായന നേരെ കേ്ട്ട് സൊല്ലുന്റവാര് റാഡാളൊ മൂറാളൊ സൊല്ലുഡൊ. അദ്‌ന കേ്ട്ടവാര് അദ് എന്തെന്റ് സോദണെ ഗേഡൊ. 30ഏസ്സ്‌ഗാറാര് കൂട്ടാത്ത്‌ല് കുക്കാന്ത്‌റ്‌ക്കുവ ഒന്റാള്‌ക്ക് അയി ഗളിഗേല് ആണ്ടവാന് എന്തൊന്റു കാട്ടി കൊഡുത്തിന്തദാന മുദാല് സാമി നായന നേരെ കേ്ട്ട് സൊല്ലികൊണ്ടു ഇര്‌ക്ക്‌ന്റവാന് നായന ന്‌റ്‌ത്തുഡൊ. 31നിമ്മ എല്ലാവാര്‌മ് പഡിക്കുവ ദിന്‌സ്‌ല്‌മ് ദയിരപഡുവ ദിന്‌സ്‌ല്‌മ് നിമാക്ക് ഒന്റൊന്റാളായി സാമി നായന നേരെ കേ്ട്ട് സൊല്ല്യാമല്ല. 32സാമി നായന നേരെ കേ്ട്ട് സൊല്ലുവ സാമിദാസ് നിഗാല്‌ഗാള് അവാര് കയിക്കഡിത്തെ ഇര്‌ക്ക്‌ന്റ്. 33സാമി ഒത്തിമെന ആസെപഡുവ സാമിത്തെ. അല്ലാദെ കക്കറെമൊക്കറെ ആവാദ്‌ന ആസെപഡുവ സാമ്യല്ല.
34ഏസ്സ്‌ഗാറാര് കൂട്ടാത്ത്‌ല് പെ്ണ്ണ്‌മക്കാള് സപ്പാന ഇര്‌ക്കുഡൊ. അദ്‌ത്തെ എല്ലാ ഏസ്സ്‌ഗാറാര് കൂട്ടാത്ത്‌ല്‌മ് ബെത്ത്‌റ്‌ക്കുവ കാര്യ. സാമി സട്ടാത്ത്‌ല് സൊല്ലിര്‌ക്കുവ പാസെ അവാര് ആളാന് കയിക്കഡിത്തെ ഇര്‌ക്കുഡൊ. അല്ലാദെ അവാര്‌ക്ക് നായ സൊല്ല്യ അദിഗര ഇല്ലെ. 35അവാര്‌ക്ക് എന്തൊന്റു കാര്യഗാള്‌ന പറ്റി തെരിഡൊ എന്റിന്തദാന ബീ്ഡ്‌ല് ബെത്ത് ആളനച്ചനാമോഡ കേ്ട്ട് നെപ്പ്‌കെ്ഡേസുഡൊ. ഏസ്സ്‌ഗാറാര് കൂട്ടാത്ത്‌ല് പെ്ണ്ണ്‌പ്‌ളെ നായനൊഡിവാദ് സെര്യല്ല.
36സാമി സൊല്ലുസുലാക്ക നിമ്മ് പട്ട്‌ലിന്ത്‌ത്തെ ബന്താദ? ഇല്ലെ! നിമാക്ക് താനെത്തെ കെ്ഡേത്താദ? 37സാമിദാസ് എന്റൊ സാമിനിഗാല് തരുവ ബര കെ്ഡേത്തവാന് എന്റൊ ഒരുത്താന് നെനേക്കുവദാന അയാള് ഈ എ്ള്‌ദുവ കാര്യഗാള് ആണ്ടവാന് കല്‌പനെ എന്റ് തെരിന്ത്‌റ്‌ക്കുഡൊ. 38അയാള് ഇദ് ആണ്ടവാന് കല്‌പനെ എന്റ് തെര്യാദിന്തദാന അയാള്‌നാമ് ആണ്ടവാന് തെര്യാദെ ഇര്‌ക്കുഡൊ.
39അദ്‌നാലെ ഏസ്സ്‌ഗാറാരെ, സാമി നായന നേരെ കേ്ട്ട് സൊല്ലുവ ബര കെ്ഡേസ്യ ബേ്ണ്ടി നിമ്മ മ്‌ഗ്‌ന്ത ആസെപഡ്‌ന്. നെപ്പ്കെ്ഡേക്കാത്ത നായഗാള് സൊല്ലുവാദ്‌ന തഡ്‌ക്കാമ് ബേ്ഡ. 40നിമ്മ സാമി കുമ്മുഡ്യ കൂഡി ബര്‌ഗാട്ടി എല്ലാ കാര്യഗാള്‌മ് പഡിപഡ്യായിമ് നല്ല ദിന്‌സ്‌ല്‌മ് ഗേഡൊ.
Currently Selected:
1 കൊരിന്ത്യഗാറാര് 14: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
