Titə 2
2
Tɔji go kula kar dəwje dang-dang
1Tm 2.9-15; 1Pi 3.1-6; Epɛ 6.5-8; 1Pi 2.18-20
1ꞌI le ɗaa, may kar ꞌtɔji njetakagəje tar gə tɔgərɔ.
2ꞌPa ar dəwje gə tɔgə ar-je ꞌɗa mə bo nekusa ang, ɓo d-ila ngon kuji dɔ rɔ-je gə nəm, gə kar ꞌgərə pa tar tɔgə nəm, kar takagə lə-je mbɔr-ɛ ang nəm ngaɓa ꞌtɔji njigi gə tɔgərɔ ngaɓa kar d-uwa gədərə nəm tɔ.
3ꞌPa ar jeneje gə tɔgə ɗəw kara baa mba kar pa nja-je to gə maj-ɛ, kar ꞌtura tar gə kṵra̰y dɔ ngan marəje-je gə baa ang, gə to ɓərəje lə kodo ang nəm, ngaa kar ꞌtɔji neɗa-je gə may ɓa gə ɗaga, 4be ɓa d-a tɔji ne ngan mandə jeneje gə njengaw sigije pa njigi ngaw-jeje gə ngan-jeje, 5kar d-a gərə kila ubu dɔ tar gə, kar d-ar ne ngadə, kar d-a to jeneje gə may gə ɗəw gərə ɗa ne kula mə kəy gə lə-je, ngaɓa kar d-ula ne dɔ-je ngulum no ngaw-jeje gə nəm, be ɓa dəwje d-a ndɔl ne tar lə Luba ang.
6Ngan basa̰je kara ꞌndəji-je ɗəw kara baa mba kar ꞌgərə kila ubu dɔ tar gə, 7dan neje gə tɔ̰y le, ꞌi ja un rɔ-i gə ne kɔji mar-ɛ ɗəw ɗa kulaje gə may gə, ngaɓa ꞌtɔji tar gə tɔgərɔ ja, gə a kasə kəm ta ji joo 8tar gə gadə-gadə ɓa ar-ɛ ce ta-i gə, gə dəw a kasə ma̰y ang mba kar rɔ kul uwa ne nje kəm tarje lə-si ngaɓa kar d-inga ne ɗəw kara gə d-a pa ne tar gə kṵra̰y dɔ-si gə ang.
9N-ndəji ɓərəje mba kar d-ila kuji dɔ ꞌɓəə-jeje gə dan neje gə tɔ̰y, mba kar ꞌɗa kula gə ndu ꞌɓəə-jeje ɓo ꞌma̰y gə je tar ang, 10gə kar ꞌmbɔlɛ ne kara gə ɓogo ang, ngaa d-a tɔji to gə ꞌto dəwje gə may, be ɓa dəwje d-a kula ne rɔnduba dɔ tar gə lə Luba gə njekaji-si.
Mənuji lə Luba kila rɔ-ɛ gə ɗaga
Epɛ 2.1-10; 1Pi 1.10-21; 2.13-16; 1Ja̰ 3.1-3
11Mənuji lə Luba gə to gəl kaji lə dəwje tɔ̰y le kila rɔ-ɛ gə ɗaga. 12Mənuji lə Luba le tɔji-si ɗəw kila kuji dɔ ne gə lə Luba ngaɓa mba kar ɓo neje gə dɔ nangə nee tɔ-si ang, be ɓa kar-si j-a njaje ne gə kəm karə gə neɗa gə gadə-gadə dɔ ndɔje gə ɓogəne, gə kila ne kɔji dɔ ne gə lə Luba nəm tɔ, 13gə mba ngina ne ndɔ gə may gə j-um mə-si kəne. To ndɔ gə Jeju Kirisi gə to Luba gə boy gə njekaji-si a ɗe ne dan rɔnduba gə. 14Kirisi ja un rɔ-ɛ uga ne dɔ-si, ɓa ɔr ne si dan neɗa gə kṵra̰y gə. N-ɗa to gə be mba mbo̰ ne si gə dəwje lə-a gə n-mbərə-je n-togo-je ngaɓa mba kar ɓo ɗa kulaje gə may-may to ne mə-si gə.
15Be ɓa gə go tarje gə m-pa m-ar-i le ɗaa n-ndəji-je ne nəm gə ndangə-je gə singamongə. Ar dəw o-i gə ne gə baa ang.
Currently Selected:
Titə 2: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
