Rɔm 15

1Ngaa sijee gə j-uba singa le, to tar lə-si kar j-a la gə njembɔrɛje, ngaɓa j-a sangə ne gə ləl-si ang. 2May kar na-na kara horo-si gə ləl njemar-ɛ mba ne gə may mba kar singa ɔsə ne dɔ mar-ɛ. 3Mba Kirisi sangə ne gə ləl-e ang baa, ngaa to gə ꞌɗa ne mə mbede gə na: Taji kil lə nje taji-i je le oso dɔ-m gə.#15.3 Paj 69.10. 4Be ɓa neje gə ꞌɗa mbede gə kede ləw le, ꞌɗa mba tɔji-si ne ne, mba kar ɗəw gə lə kuwa gədərə gə kul-mə gə mbede lə Luba a tɔji-si le, j-a kisi nee gə məkunda.

5May kar Luba gə nje gəl kuwa gədərə gə njekul mə dəwje le, ar kəji lə-si to kara baa dɔ naa gə gə yo gə nee to to gə kar Kirisi Jeju be, 6mba kar gə go mə kasə naa, gə ndu gɔsə gə kara baa ja, ulaje rɔnduba dɔ Luba gə Bɔ Mbayɓe lə-si Jeju Kirisi. 7Uwaje naa gə rɔ naa gə gə maj-ɛ gə yo gə nee, to to gə Kirisi uwa ne si gə rɔ-ɛ gə, mba rɔnduba lə Luba.

Kirisi to kar dəwje tɔ̰y

Epɛ 2.11-19

8Mba m-pa na Kirisi təl njekula lə njekunja bərəje mba tɔji ne to gə Luba pa tar gə tɔgərɔ, ngaɓa mba tɔji ne to gə n-ar njang dɔ neje gə n-uwa dɔ gɔl-ɛ n-ar ka-sijee, 9ngaa dəwje gə ꞌto Jiibije ang ɗaa ꞌpidi Luba mba məmay lə-a, to gə ꞌɗa ne mə mbede gə na:

Gəl-e gə nee ɓa m-a pa tar lə-i ɓolong horo gəl kuji dəwje gə,

Ngaɓa m-a kɔsə pa ɗɔy ne ri.

10Təl ꞌpa ja cibi na:

Gəl kuji dəwje, ꞌɗaje rɔləl gə dəw mə ɓeje lə-a!

11Cibi na:

Sisəy gəl kuji dəwje tɔ̰y, ꞌpidije Mbayɓe

Ngaɓa kar dəw mə ɓeje tɔ̰y ꞌpid-e!

12Ejay kara pa tɔ, na:

Ngira Jese le, a kuba,

ꞌNe gə n-a kuba nangə kḭ mba kɔr no gəl kuji dəwje;

Gəl kuji dəwje d-a kunda mə-je dɔ-ɛ gə. #15.12 Paj 18.50; 2Sa 22.50. Oje Ttt 32.43. – Oje Paj 117.1; Eja 11.10.

13May kar Luba gə to gəl məkunda, ar rɔləl gə ɔr njal ɗusu mə-si ngaɓa ar-si ɗɛgɛgɛ gə uy bɛm ɗəw takagə gə, mba kar məkunda lə-si ɓar ne mii, ɗəw singamongə gə lə Njil Njerɔsangə!

Kulaje lə Pɔl gə kaw mba lə-a

2Kɔ 10.13-18

14Ngan ko̰-mje, tar gə ɔji dɔ sisəy le ɗaa, ꞌma ja kara m-gərə gə maj-ɛ to gə məmay ɗusu mə-si, negərə ɗusu mə-si ngaɓa asəje mba ndəji-je naa gə yo gə nee. 15Be ja kara m-ɗa mbede m-pa ne gə si mə loje gə kɛm gə ndum gə mongə ɓəəl, ɗəw kara baa to gə m-ole ne mə-si, mba nuji gə Luba uwa sə-m, 16ar m-to njekula lə Kirisi Jeju horo dəwje gə ꞌgərə Luba ang gə; kula gə to gə losang-ɛ gə to kila mbərə Tar gə May lə Luba le m-ɗa, mba kar dəwje gə ꞌgərə Luba ang le ꞌto ne nenuji gə Njil Njerɔsangə unda gə losang-ɛ gə may ta kəm Luba gə.

17Kum naa gə lə-m gə Kirisi Jeju le to ne rɔləl lə-m ɔji dɔ kula lə Luba. 18Mba ne gə Kirisi un-m ɗa ne ja ɓa m-a pa tar-ɛ mba kar dəwje gə ꞌgərə Luba ang d-ila ne kɔji ɗəw tar pa gə gə ɗəw kula ɗa gə, 19ɗəw singamongə netɔjije gə neje dang-dang gə kəm dəw o ndɔ kara ang, ɗəw singamongə Njil, un kud-e Jerujalɛm saar ce ne Iliri ja m-ila mbərə Tar gə May lə Kirisi m-ar ta lo ya̰-ya̰. 20Ngaa lo gə d-ila mbərə Tar gə May kəne ang ja m-un rɔ-m mba kila mbərə lə Kirisi kəne, be ɓa gə mba kar-m m-unda kəy dɔ gɔl kəy gə nje gə kɛm d-ɔsə nangə kede ang, to gə ꞌɗa ne mə mbede gə na:

21 Nje gə d-ila mbərə lə-a d-ar-je ang ja d-a ko-e,

Ngaɓa nje gə d-o tar lə-a gə mbi-je ang ja d-a ko gərə. #15.21 Eja 52.15.

22Ye ja ɓa to ne gə ɔgə-m gɔl bula kar m-aw ɓə lə-si. 23Ngaa ɓisine ɗaa, logə m-a ɗa kula kəne gə go lo gə nee le godo ngaa, ngaɓa ləw baa asə ɓal bula ja m-njigi kaw ɓə lə-si, 24logə kaw lə-m gə Ɛsəpa̰y ɗaa m-unda mə-m mba ko-si taar baa ngaa ɓo m-isi ɓə lə-si asə-m mbagə ɗaa m-a kar-si a ꞌla-je sə-m kar m-aw.

25Ɓisine m-aw gə Jerujalɛm mba ɗa kula mba njerɔsangəje. 26Mba nje gə Masedowan gə Akayi ꞌnjigi gə maj-ɛ ja mba mbo̰ ne la ne gə njendooje gə horo njerɔsangəje gə d-isi Jerujalɛm. 27Nje gə Masedowan gə Akayi nee le ꞌnjigi gə maj-ɛ ja, mba d-o kula gə nee le to to gə ɓangə ɓa to dɔ-je gə be, mba to gə ɓo mbɔr dɔ sijee ɓa dəwje gə ꞌgərə Luba ang d-uba ne may ɗəw njil gə nama, may kar dəwje gə ꞌgərə Luba ang le ꞌla gə sijee nee le gə nemayje gə dɔ nangə nee tɔ. 28Be ɓa ɓo ꞌɗa tɔ̰y, ngaɓa ɓo m-aw gə nembo̰je nee m-ar-je kəm naa gə tɔ̰y ɗaa ye ɓa m-a nday gə ɗəw gə ɓe lə-si kaw ɛsəpa̰y. 29M-gərə to gə Kirisi a tɔr ndu dɔ-m gə gə maj-ɛ mba kar m-aw ɓə lə-si.

30Ngan ko̰-m, m-ndəji-si gə ri Mbayɓe lə-si Jeju Kirisi ngaɓa gə go njigi lə Njil, kar ilaje dər mar-ɛ gə ar-mje, ɗəw dəji gə a dəjije Luba gə mba-m, 31mba kar-m m-ce ne ta nje məkədərəje gə Jude, ngaɓa kar nekarə baaje gə m-aw Jerujalɛm nee le, njerɔsangəje ꞌta ji-m gə gə maj-ɛ, 32be ɓa m-a kaw ɓə lə-si gə rɔləl, to gə Luba njigi, ngaɓa m-a kuwa ne kɔrə-m ɓəəl ɓə lə-si. 33May kar Luba gə nje gəl ɗɛgɛgɛ nay gə si tɔ̰y! Oyo!

Currently Selected:

Rɔm 15: lap

Highlight

Copy