Lo kila gəl ne 22
22
1Cibi anji le tɔji-m man baa gə kar kaw kəm baa gə ndogo to gə kɔr ər gə ꞌɓar-ɛ kirisətal be, uba ɓula ngəndəng mbay gə lə Luba je gə ngon badəm. 2Ɗaa dan ɗəw gə boy gə mə ɓebo gə ngaɓa dɔ kungu baa gə ɓe joo pɛdə le, kagə təbə kara gə andə gɔl dɔg gə gir-e gə joo ga̰ kəne. Nay kara nama d-unja kand-e taar-taar. Kam kagə le to gə kuma kaji gəl kuji dəwje tɔ. 3Nekugu tɔ̰y a godo saar gə no. Ngəndəng mbay le Luba je gə ngon badəm a ga̰ mə ɓebo gə le. Ɗaa, ngan njekulaje lə Luba d-a pol-e; 4d-a ko kəm-e ngaɓa ri-a a to ngo noje gə tɔ. 5Londul a godo saar gə no, d-a kaw ndoo ndogo le lambe ang nəm, gə ndoo ndogo le kar ang nəm tɔ. Mba Mbayɓe Luba ja a ndogo dɔ-je gə. Ngaɓa d-a ko̰ ɓe gə ɓal gə ɓal.
Ɗudu tar ndəjije
6Anji n-pa n-ar-m na: Tarje gə nee le to gə tarje gə gadə ngaɓa tɔgərɔ nəm tɔ; Mbayɓe, Luba gə ar njil lə-a pajambərəje le, ula anji lə-a mba kar tɔji ngan njekulaje lə-a ne gə a ɗe ɓisine baa. 7A o, m-aw m-ɗe ɓisine baa. Nokarə to kar dəw gə ngom tarje lə Luba gə pajambərə ɗa mə mbede gə nee le.
8ꞌMa Ja̰ ja ɓa m-o neje gə nee le gə mbi-m nəm, gə kəm-m nəm tɔ. Ngaɓa logə kəm-m o gə mbi-m o ɗaa, m-um məkəji nangə no anji gə njetɔji-m neje le gə mba pol-e. 9Ngaa n-pa n-ar-m na: Əw rɔ-i polo-m! M-to gə njeba kula lə-i gə njeba-ɛ lə ngan ko̰-i pajambərəje, gə nje gə ꞌngom tarje gə to mə mbede gə nee. Luba ɓa ꞌpolo-e.
10Cibi n-pa n-ar-m na: Iya dɔ tarje lə pajambərə gə to mbede gə nee ang, mba dɔ kar nay dəb baa ngaa. 11Dəw gə to nje ɗa ne gadə-gadə nama may kar-ɛ uwa ne gadə-gadə le gaa, dəw gə nje ɗa ne gə mina nama may kar-ɛ uwa gaa tɔ, ngaa dəw gə nje ɗa ne gə dɔ naj-ɛ nama may kar uwa neɗa lə-a gə gə dɔ naj-ɛ kɛgə ngaɓa may kar njerɔsangə uwa rɔsangə lə-a kɛgə tɔ.
12A o, m-aw m-ɗe ɓisine baa, ngaɓa m-ɗe gə nekuga dɔ ji lə-m kara dɔ-m gə, mba kar na-na kara m-uga-a ne ɔji dɔ kula ɗ-ɛ ɗ-ɛ. 13M-to Aləpa gə Omega, Dəw gə dɔngɔr gə Dəw gə ɗudu, lo kuma kudu ne gə lo tɔl ngangə ne.
14Nje gə ꞌtogo kubu lə-je le, ꞌto gə njenokarəje mba d-asə kusa kandə kagə təbə, ngaɓa mba kar d-andə mə ɓebo gə ta ɗəw kəyje tɔ. 15Bisije, njembɛ̰je, njekayaje, nje tɔl dəwje, nje polo magəje ngaɓa na-na ɓa gə njigi tar gə ɗəgərə ngaɓa to gə nje p-ɛ le, d-a tɔbə-je kum-je ɗaga.
16ꞌMa, Jeju, m-ula anji lə-m mba kar-ɛ pa tar naji gə ɔji dɔ mbo̰ naaje lə njetakagəje ar-sisəy. ꞌMa le ɓa ngira-m ḭ gəl Dabidi gə, gə gəl kuji lə-a tɔ, duji lo kar gə ndogo.
17Njil je gə jene nje ngaw ꞌpa na: ꞌƊe! May kar dəw gə o tar gə nee nama pa na: ꞌƊe! Dəw gə kunda man tɔl-ɛ nama may kar-ɛ ɗe, dəw gə njigi nama m-a kar-ɛ man təbə baa ja.
18ꞌMa, m-pa tar naji le m-ar dəw gə njigi mba ko tarje gə pajambərə pa mə mbede gə nee: To gə ɓo dəw ila mar-ɛ kəne nama Luba a kum tujije gə ꞌpa tar-ɛ mə mbede gə nee le gə dɔ mar-ɛ gə dɔ mar-ɛ gə kar-ɛ. 19To gə ɓo dəw ɔr ne mə tarje gə pajambərə pa mə mbede gə nee nama, Luba a kɔr ta ne lə-a kagə təbə, gə ɓebo gə to gə losang-ɛ, gə ꞌpa tar-ɛ mə mbede gə nee.
20Nje pa tar naji gə ɔji dɔ neje gə nee le pa na: Oyo, m-aw m-ɗe ɓisine. Oyo! ꞌƊe, Mbayɓe Jeju!
21May kar mənuji lə Mbayɓe Jeju nay gə dəwje tɔ̰y!
Currently Selected:
Lo kila gəl ne 22: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
