Nje gə Pilipi 3

1Tar gə ɗangə gə m-a pa ɓa nee: Ngan ko̰-mje, ꞌɗaje rɔləl ɗəw gə lə Mbayɓe.

Njenetɔjije gə gə mbɔr-ɛ baa

Gal 5.1-6; Rɔm 6.3-13; 1Kɔ 9.24-27; 2Pi 1.5-11

Kar m-ɗa mbede m-pa ne tar gə njekara baa ja m-ar-si ɓi le, jɔgə-m ang, mba to may lə-sisəy.

2 # 3.2 Bisi le to da gə mina kəm Ijirayɛlje gə go kula ɗ-ɛ, be ɓa mə mbede gə ɗaa Pɔl un ri bisi pa ne tar ɔji dɔ dəwje gə ꞌgərə Luba ang. Aje rɔ-si rɔ bisije gə, aje rɔ-si dɔ njekulaje gə kṵra̰y gə, aje rɔ-si dɔ njekunja bərəje gə gə mbɔr-ɛ baa gə. 3Mba njekunja bərəje gə tɔgərɔ le to sijee, gə j-aw polo Luba ɗəw Njil Luba gə, gə j-ila ne riɓar dɔ Kirisi Jeju gə, ngaɓa j-unda kar-si gə ne gə darɔ gə ang.

4Ɓo to gə be nama, ꞌma ja kara m-a kunda kar-m gə ne gə darɔ gə tɔ. To gə ɓo nje gə kɛm d-o to gə d-asə kunda kar-je gə ne gə darɔ gə nama ꞌma m-a nday-je, 5d-uji-m ɗa ndɔ ji nay joo ja tɔ a d-unja bərə-m, m-to gə gəl ka Ijirayɛl gə, m-to gə gəl kuji gə lə Bɛnjamɛ̰, m-to Ebərə gə kuji Ebərə; ye gə ɔji dɔ torondu nama m-to Parijiyɛ̰, 6ye gə ɔji dɔ kula kəm mbo̰ naa lə njetakagəje ndoo kara tar-ɛ o̰-m ya̰ nəm, gə ye gə ɔji dɔ nja dana gadə-gadə gə go torondu le dəw asə kila tar-ɛ dɔ-m gə ang. 7Ngaa neje nee gə to gə may lə-m le, m-o gə ne gə baa mba Kirisi. 8Ngaɓa m-o ne tɔ̰y gə ne gə baa mba m-gərə Kirisi Jeju gə Mbayɓe lə-m m-ar al dɔ lo. Mb-ɛ ꞌne ja m-mbadə ne neje tɔ̰y ngaɓa m-o ne tɔ̰y gə dɔ yibi mba kinga ne Kirisi. 9Be ɓa mba kar Luba o-m ne gə dəw gə gadə-gadə, gə go kula ɗa-m ꞌma ang nəm ngaɓa go kila kuji dɔ torondu gə ang nəm ngaa gə go takagə Kirisi, ɗaa Luba ja ɓa gɔl ɗəw kar dəw to ne gadə-gadə gə ɗəw takagə. 10M-njigi gər-e, ꞌne gə singamongə ce buwa yo gə lə-a ngaɓa ɗa ne sə-a mə kara dɔ ko ꞌməsərəje gə lə-a, ɓa gə mba təl ta ne sə-a naa ɗəw kuy gə lə-a, 11ɓo kar ɗəw to nama ce ne mə buwa yo gə gə nje gə d-uy.

Ndole go karə ngadə

12Ə̰ə̰ə̰, m-pa na m-ce kəne nam ose m-arə ngadə nam ngaa ang, ngaa m-aw ndole go-e gə ndole ja ɓi ɗaa, m-unda mə-m mba kuwa gə ji-m ja, mba ꞌma kara Kirisi Jeju ula ji-a uwa-m ne tɔ. 13Ngan ko̰-mje, ꞌma ja kara m-o rɔ-m gə dəw gə uwa ne gə ji-a nam ngaa ang, ngaa ne kara gə uwa mə-m ɓa nee: m-uba ne tɔ̰y m-ḭya̰ gə gugu ɗaa m-aw dɔ-m gə kede, 14m-a̰y ngɔdə dɔ-m gə ne gə m-kuji gə, mba kinga nekuga dɔ ji ɓar gə Luba ɓar-m ɗəw gə lə Kirisi Jeju.

15Sijee tɔ̰y gə ja to dəwje gə may pɛdə le may kar kəji gə to gə be ɓa to mə-si gə, ngaa ɓo kəji lə-sisəy to dangə dɔ neje gə kɛm gə kara Luba a kila gəl-e gə ɗaga kar-si ɓi. 16Ne kara baa le ɗaa may kar ne gə j-um mə-si naa gə kəne le, ye ja j-ar-je ndu-si asə naa kəne gə no kara ngaa.

17May kar ꞌtoje nje ndaji kəm-mje, ngan ko̰-mje, may kar oreje kəm-si ndəng go nje gə d-un pa nja sijee gə ne kɔji mar-ɛ. 18M-pa tar pa nja lə dəwje bula m-ar-si ngaɓa ɓisine kara m-pa gə man no to gə ꞌnja gə njeba̰a̰je lə kagə dəsə lə Kirisi 19d-a kɔsə bo̰-ɛ̰ dɔ tuji gə, magə lə-je to mə-je ngaɓa ne riɓar lə-je təl to nerɔkul ar-je; d-um mə-je dɔ neje gə nangə nee ja baa. 20Kar-sijee ɗaa, ɓe lə-si to dara; lo gə j-a ngina Mbayɓe Jeju Kirisi ɓa gə Njekaji-si kəne, 21gə a mbəl darɔ gə a kuy nee le kar ta naa gə darɔ-ɛ gə a kuy ang gə go singamongə lə-a gə dum ne dɔ neje tɔ̰y.

Currently Selected:

Nje gə Pilipi 3: lap

Highlight

Copy

Compare