Nje gə Pilipi 1

Tɔji rɔ gə ko gə Pɔl o-je

1ꞌMa Pɔl, je gə Timoce, njekulaje lə Kirisi Jeju, j-a ɗa mbede nee j-ar njerɔsangəje gə mə Kirisi Jeju gə, gə d-isi Pilipi, gə nje ka dɔ njetakagəje ngaɓa gə diyakərəje tɔ. 2May kar Luba gə Bɔ-sijee, gə Mbayɓe Jeju Kirisi d-ar-si mənuji gə ɗɛgɛgɛ.

Ɗa oyo gə dəji Luba

Kɔl 1.3-11

3Logə mə-m ole dɔ-si taar ja nama m-ɗa Luba lə-m oyo; 4Taar-taar ja ɓo m-aw m-dəji Luba mba-si tɔ̰y nama, m-dəji gə rɔləl, 5mba kum gə um-je mə-si naa gə gə sijee dɔ Tar gə May gə, un kud-e dɔngɔr ndɔ gə ja saar ɓisine. 6M-gərə gə maj-ɛ to gə ꞌye gə un kudu kula gə may mə-si gə le, a kaw ne saar mba tɔl t-ɛ ndɔ təl gə lə Kirisi Jeju. 7To gə dɔ gɔl-ɛ ja mba kar ꞌma m-əji tar gə to gə be dɔ-si gə tɔ̰y, mba mə-m uy dɔ-si ang, mba m-ar njang ngaɓa m-ɗa ɗɔ mba Tar gə May gə m-ila mbər-e le ɗaa ɓogəne gə m-to kəy kula gə kara sisəy ingaje sə-m mənuji lə Luba naa gə kara baa. 8Be ɓa no gɔl Luba gə ja, m-njigi-si gə njigi gə ḭ rɔ Kirisi Jeju gə, to gə ngon kəm-m be. 9Ngaɓa m-dəji Luba mba kar njigi lə-si ɔsə dɔ mar-ɛ gə kede-kede, kar kəm-si unja ar ꞌgərəje ne ne gə may ngaɓa kar ɔrəje ne kəm ne gə may gə ne gə kṵra̰y. 10To gə be ɓa mba kar ꞌgərəje ne ɗəw kɔr kəm ne gə may, gə ar-je ne ngadə ngaɓa kar tar uwa ne dɔ-si ndɔ təl gə lə Kirisi ang. 11May kar pa nja gə may gə ingaje ɗəw gə lə Jeju Kirisi le, ila riɓar gə dɔ Luba gə, gə ɔsə gaji-ɛ.

Kuwa gə d-uwa Njeka̰y kula

12Ngan ko̰-mje, m-njigi mba kar ꞌgərəje to gə ne gə ce dɔ-m gə le, ɔsə kudu Tar gə May ar-ɛ aw gə kede. 13Be ɓa, dəwje tɔ̰y gə d-aw ɗa kula kəy mbay gə, gə nje gə ɗangə tɔ̰y ja kara ꞌgərə to gə ꞌma le d-uwa-m d-ila-m kəy kula gə mba tar lə Kirisi. 14Ngaɓa, kuwa gə d-uwa-m d-ila-m kəy kula gə nee le, ɗa ar ngan ko̰-mje bula d-inga ne singa dɔ mar-ɛ gə ɗəw gə lə Mbayɓe, mba kila ne mbərə gə ɓəəl ang. 15Nje gə kɛm ɗaa, tɔgərɔ ja, d-ila mbərə lə Kirisi gə ne nər mə gə ne tɔsə tar, ngaa nje gə naaje d-ila mbərə nee le gə kəji gə arə ngadə. 16Nje gə ꞌɗa gə go njigi ɗaa, ꞌgərə to gə m-isi nee gə nje ɗa ɗɔ mba Tar gə May, 17ngaa nje gə kɛm d-ila mbərə lə Kirisi le gə kəji tɔsə tar; neje gə uwa mə-je kar ꞌɗa le, kud-e arə ang ngaɓa d-əji to gə d-ila neməko̰ dɔ kuwa gə d-uwa-m d-ila-m kəy kula gə nəm. 18D-unda gusu ɓa d-ila ne mbərə lə Kirisi ose gə kəji gə tɔgərɔ kara, Kirisi le ja d-ila mbərə lə-a əng, ɗaa m-ɗa ne rɔləl ngaɓa m-a təl ɗa ne ja cibi, 19mba m-gərə to gə mbɔr dɔ dəji Luba lə-sisəy ɗaa m-aji ne ngaɓa Njil Jeju Kirisi kara a la sə-m tɔ; 20gə go ne gə m-aw ngina ngaɓa gə go kunda mə lə-m ɗaa rɔ kul kara kara a kuwa-m ang. Ngaa ɓisine saar gə kede le d-a pidi Kirisi ɗəw gə lə-m gə ɓəəl ang, uji ne kuy lə-m ose kisi gə təbə lə-m; 21mba ꞌma le, Kirisi ɓa to təbə lə-m ɗaa yo to gə may lə-m.

22Ngaa ye gə uji dɔ kula lə-m le se may kar m-aw gə dɔ-m taar ɓa may ose ɗi wa? Ye gə ɗa ɓa m-a mbərə kara m-gərə ang ngaa. 23M-ndəbə ɓe joo kɛm: m-njigi ya̰ mba kɔdə kaw kisi gə Kirisi, mba ye ja ɓa may unda neje tɔ̰y; 24ngaa kaw kəm baa lə-m le to may lə-sisəy. 25Mə-m to kəne ja ngaɓa m-gərə to gə ga̰ gə m-a ga̰ gə si le, a kɔsə kudu-si kar takagə lə-si aw ne gə kede gə rɔləl. 26Təl gə m-a təl kaw ɓə lə-si a təl to ne riɓar lə-si gə boy ɔji dɔ-m ɗəw gə lə Kirisi Jeju.

Pɔl ndəji-je kar d-uwa takagə gədərə

1Te 2.12-16; Ebə 10.32-36

27Ne kara baa le ɗaa, ar-je pa nja-si uwa buwa Tar gə May lə Kirisi, gə mba kar le m-aw m-o-si ose m-godo kara kar m-o tar-ɛ to gə ar-je njang mə kəji gə kara baa, umje mə-si naa gə kara, ꞌɗɔje mba takagə gə ɔji dɔ Tar gə May, 28ngaɓa njil-si ce njɛ̰ ja kara ɔji dɔ nje kəm tarje lə-si ang. Ye ɓa tɔji tuji lə-je ngaa sisəy ɗaa tɔji kaji gə ingaje, ye gə nee le ḭ rɔ Luba gə, 29mba d-ar-si ɗəw gə go mənuji lə Kirisi, kar ꞌtaje kag-ɛ ja kara baa ang ngaa kar oje məsərə mba tar lə-a tɔ, 30kar ɔsə gəl ɗɔ gə kara gə o-mje lo ɗɔ-ɛ gə le, oje tar-ɛ to gə m-aw m-ɗɔ ɓisine ja ɓi.

Currently Selected:

Nje gə Pilipi 1: lap

Highlight

Copy

Compare