Nje gə Galat 1
1
Pɔl ɗa o-je
Rɔm 1.1-7
1ꞌMa, Pɔl, m-ɗa mbede nee, m-ar-sisəy njetakagəje gə mə Mbo̰ naaje lə njetakagə gə dɔ nangə gə Galat. M-to njeka̰ykula lə Jeju Kirisi gə dəwje ɓa ula-m ang nəm ngaɓa dəw ɓa ɔr-m ang nəm tɔ. Ngaa Jeju Kirisi je gə Luba gə Bɔ gə to nje ndol Kirisi horo nje gə d-uy ɓa d-ula-m. 2Ngaɓa ngan ko̰-mje tɔ̰y gə ꞌga̰ sə-m naa gə Mbo̰ naa lə njetakagəje gə dɔ nangə gə Galasi 3j-a dəji Bɔ-sijee Luba gə Mbayɓe lə-si Jeju Kirisi kar d-ar-si mənuji gə ɗɛgɛgɛ. 4Mbayɓe Jeju Kirisi gə un rɔ-ɛ uga ne neɗa gə kṵra̰y lə-si, mba kɔr-si ne dɔ ndɔje gə ɓogəne gə may ang gə go mənjigi lə Bɔ-sijee Luba. 5May kar riɓar to dɔ Luba gə gə ndɔ gə ndɔ! Oyo!
Tar gə May kara baa ɗəgədə
Gal 3.1-5; 4.9-20; 5.1-12
6M-a pḭḭ, m-gərə ang, se ban cibi ɓa ꞌturuje rɔ-si pagəsa mba kḭya̰ go ye gə nje ɓar-si ɗəw mənuji gə lə Kirisi mba ta ne Tar gə May gə ɗangə wa? 7M-pa ɔji ne dɔ Tar gə May gə ɗangə ang ngaa m-pa ɔji dɔ dəwje gə ꞌɗe ꞌjɔgə-si ngaɓa njigi turu dɔ Tar gə May lə Kirisi le gə nangə. 8Ngaa to gə ɓo, to gə sijee ja ose anji gə dara ɓa pa Tar gə May gə ɗangə or-e ne mbo kar ye gə j-a pa j-ar-si nama, may kar ndɔɔl uwa dɔ dəbe nee le! 9M-təl m-pa m-ar-si to gə j-a pa ne tar-ɛ kede le ɓi: to gə ɓo dəw ila mbərə Tar gə May gə ɗangə or-e go ꞌye gə sisəy ingaje rɔ-sijee gə nama, may kar ndɔɔl uwa dɔ dəbe nee le! 10Ɗaa ɓisine, se əjije to gə m-aw sangə kar dəwje ɓa d-ila tar kudu-m gə ose Luba wa? Se dəwje ɓa m-sangə mba may ta kəm-je gə wa? Kara be ang! To gə ɓo m-sangə mba may ta kəm dəwje gə nama m-a to ɓərə lə Kirisi ang.
Pɔl ɔr gəl ɗəw gə to ne njekula
Kɗn 22.3-16; 26.9-20; 9.1-20,23,30
11Ngan ko̰-mje, m-pa kar-si ꞌgərəje gə maj-ɛ, Tar gə May gə m-ila mbər-e le ngira-a ḭ mə ji dəw gə ang. 12ꞌMa ja kara, dəw ɓa ar-m ang nəm ngaɓa dəw ɓa tɔji-m ang nəm tɔ, ngaa Jeju Kirisi ɓa kila gəl-e ar-m.
13Be ɓa, sisəy oje tar pa nja-m gə ɔji dɔ nejiɓe lə Jiibije: m-ula kəm Mbo̰ naa lə njetakagəje lə Luba ndoo ya̰ ngaɓa m-njigi tuji-je ne pugudu. 14M-ɗa singa m-nday dəwje bula gə to njeba kujije lə-m, gə nje gə gəl kuji-m gə, ɔji dɔ nejiɓe lə Jiibije, m-un rɔ-m ja tɔ̰y mba nejiɓe lə ka-sijee. 15Ngaa, logə Luba mbərə-m mə ko̰-mje gə, gə go ɗəw mənuji lə-a ɗaa ɓar-m. 16ꞌNe ja n-tɔji-m ngon-e mba kar-m m-ila mbərə lə-a m-ar dəwje gə ꞌgərə Luba ang, be ɓa, m-dəji tar ndəji dəw ang; 17m-aw m-inga njeka̰ykulaje gə kede gə isi mə ɓe gə Jerujalɛm ang baa ja, ngaa m-ɔdə m-aw dɔ nangə gə Arabi. Cibi, ɓa m-təl ɗe to gə ɗangə mə ɓe gə Damasə.
18Ɗa ɓal munda go-e gə ɓa, m-aw mə ɓe gə Jerujalɛm mba kinga Piyɛr, ngaɓa m-ɗa ndɔ dɔg gə gir-e gə mi ɓə lə-a. 19Ngaa m-o njeka̰ykulaje gə kɛm ang, ɗaa Jagə gə ngon ko̰ Mbayɓe ja gə kar-e baa ɓa m-o-e. 20Tar gə m-aw pa m-ar-si nee le, no Luba gə ja, to tar gə ɗəgərə ang.
21Cibi, m-aw dɔ nangə gə Siiri, gə dɔ nangə gə Silisi. 22Dəw kara kara gərə-m Mbo̰ naaje lə njetakagəje gə mə Kirisi gə, dɔ nangə gə Jude gə ang. 23ꞌPa tar lə-m gə pa baa d-ar-je na: ꞌNe gə nje kula kəm-si ndoo dɔ ndɔ gə kede le, ɓisine n-ila mbərə tar gə takagə gə n-njigi tuji kede le. 24Ɗaa ꞌpidije nee Luba mba tar lə-m.
Currently Selected:
Nje gə Galat 1: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
