Nje gə Epɛs 5

1Sisəy le, ꞌtoje gə ngan njigije lə Luba, be ɗaa ꞌndəjije kəm-e, 2ngaɓa ꞌnja-je dan njigi gə ɗəw kara baa to gə Kirisi kara njigi sijee ɗaa ye ja un rɔ-ɛ ila mə ji Luba gə uga ne dɔ sijee gə nenuji, gə nekunja məsə, asə naa gə ba̰y kəndə mambo̰ gə ba̰y-e əndə ləl tɔ.

Cil ciməri gə lokarə

1Te 4.1-8; 1Kɔ 6.9-11

3May kar kaya, gə wə̰rə̰ kaya gə neje tɔ̰y gə ɔji dɔ-ɛ, ose ɓo lar ɓar ri-si kara be ang; neje ne le uwa ba-ɛ gə njerɔsangəje ang baa; 4ngaɓa tar mbəje, gə tarje gə baa gə nangə əng, ose tar rɔ kulje le, ar-je ce ta-si gə ang; ngaa tarje tɔ̰y gə ce ta-si gə le, ꞌɗaje ne Luba oyo. 5Mba, may kar ꞌgərəje gə maj-ɛ, njekaya gə ɗa-ɗa ose njewə̰rə̰ kaya ose ɓərə lə ɓo neje, gə to gə nje polo magə le, nenduba lə-a godo mə ɓeko̰ gə lə Kirisi je gə Luba. 6May kar dəw kara kara ərə si gə tar paje gə baa gə nangə əng ang; mba neje gə to gə be le ja ɓa wungu lə Luba ɗe ne dɔ nganje lə njekal tarje gə. 7Be ɓa, uwaje gə je ba-ɛ kara be ang.

8Sisəy le ɗaa, kede ləw ꞌtoje gə cil ciməri, ngaa ɓisine ɗaa ꞌtoje gə lokarə gə mə Mbayɓe gə ngaa. ꞌNjaje to gə ngan lokarəje be; 9Mba kandə lokarə le, ɔji dɔ ne ja tɔ̰y gə to gə məmay, neɗa gə gadə-gadə, gə tar gə tɔgərɔ. 10ꞌSangəje ɗəw mba gərə ne gə mə Mbayɓe njigi; 11ɓo undaje rɔ-si naa gə kara baa dɔ kula ɗaje gə lə cil ciməri gə aw kadə baa nee ang, ngaa ꞌceje gə gəl-je gə ɗaga. 12Mba neje tɔ̰y gə dəwje ꞌɗa lokiya gə le, pa tar-ɛ kara to gə ne rɔ kul baa. 13Ngaa, neje gə nee tɔ̰y le, ɓo ꞌkila gəl-e gə ɗaga kɔdɛ-kɔdɛ ɗaa, to ɗaga arə ngadə tɔ. 14Mba ne tɔ̰y gə to gadəmagay gə le to lokarə. Gəl-e gə nee ɓa Mbede pa na:

ꞌI gə ꞌcibi le, ꞌndol dɔ ɓi gə,

Uba nangə ḭ horo nje gə d-uy gə,

Ɗaa Kirisi a ndogo dɔ-i gə.

15Be ɓa, undaje kəm karə dɔ pa nja-si gə gə maj-ɛ: ꞌnjaje ji mbəje ang, ngaa ji njekəmkarəje. 16Ḭya̰je dɔ kar ar-ɛje nday baa ang, mba j-isi dɔ ndoje gə kṵra̰y gə. 17Be ɓa, ꞌnjaje dɔ mbə gə baa ang, ngaa ꞌgərəje se ɗi ɓa to gə mə njigi lə Mbayɓe wa? 18Ayje kodo mbə ang, na a kila-si dan kaya gə. Ngaa ar-je Njil ɓa ta lo mə-si gə ladə-ladə; 19Ulaje jingaw mə naa gə pa kɔsə, gə paje ɓədə-ɓədə, gə paje gə ɗəw njil gə, ɔsəje pa ꞌpoloje ne Mbayɓe gə dɔ ɓəngərə si tɔ̰y. 20Ɔji dɔ ne gə ɗa-ɗa kara, ꞌɗaje oyo Luba gə Bɔ dəwje gə dɔ kar tɔ̰y, gə ri Mbayɓe lə-sijee Jeju Kirisi. 21ꞌƁəəlje Kirisi, osoje kul no naa gə yo gə nee mba ɓəəl gə ꞌɓəəlje Kirisi.

Njenujije gə gəl Kirisi gə

Kɔl 3.18; 4.1; 1Pi 2.18-25; 3.1-7

22Jeneje, na-na kara, oso kul no ngab-ɛje gə ngab-ɛje gə, to gə ꞌɗaje ne gə Mbayɓe be. 23Mba jingaw to gə dəw dɔ jene, to gə Kirisi to ne dəw dɔ Mbo̰ naa lə njetakagəje, gə to gə darɔ-ɛ, gə ꞌne ja ɓa n-to gə njekaji-e tɔ. 24Ngaa, to gə Mbo̰ naa lə njetakagəje oso ne kul no Kirisi gə le, jeneje kara, may kar d-oso kul no ngaw-jeje gə ɔji dɔ ne tɔ̰y tɔ.

25Jingawje, na-na kara njigi jene lə-a to gə Kirisi njigi ne mbo̰ naa lə njetakagəje ɓa, ye ja gə dɔ-ɛ, un rɔ-ɛ ar mba tar lə-a, 26n-tog-e ne gə man gə to gə tar, mba kunda-a gə losang-ɛ 27mba tɔji ne mbo̰ naa lə njetakagəje gə ɗaga kar-ɛ ndole yondə-yondə ta kəm-e ꞌne gə ja, kar-ɛ n-mina ose n-ndole njɔl-njɔl ang nəm, ose mba kar ne gə to gə mar-ɛ bənəng ɓar ri-a ang nəm tɔ. Ngaa mba kar-ɛ n-to gə losang-ɛ ngaɓa kar tar uwa dɔ-ɛ ang nəm tɔ. 28Be ɓa, jingawje kara, may kar ꞌnjigi jeneje lə-je to gə darɔ-je be ja tɔ. Dəw gə njigi jene lə-a nama, darɔ-ɛ ye ja njigi kən. 29Mba dəw gə nje njigi darɔ-ɛ ang ja gə kɔrɔ kara be le godo; ngaa ye uul-e ngaɓa unda-a dan kəm-e to gə Kirisi ɗa ne gə Mbo̰ naa lə njetakagəje be tɔ; 30mba sijee ja to gə bar kəm rɔ-ɛje. 31To gə be ɓa, jingaw a kuba bɔ-ɛje je gə ko̰-eje kḭya̰-je gə mba nam rɔ-ɛ kar jene gə lə-a ɗaa joo kɛm d-a təl to gə darɔ gə kara baa. 32Ne gə to lo kiya-a gə nee le to ɓəəl; ɗaa ꞌma, m-pa ɔji dɔ Kirisi ngaɓa ɔji dɔ Mbo̰ naa lə njetakagəje tɔ. 33Ban-ban ja kara, kara kara lə-si tɔ̰y le, na-na ja kara ye gə ɔji dɔ-ɛ le, may kar njigi jene lə-a to gə darɔ-ɛ ye ja be, ngaɓa kar jene kara ila kuji dɔ ngab-ɛje gə tɔ.

Currently Selected:

Nje gə Epɛs 5: lap

Highlight

Copy

Compare