2 Nje gə Kɔrɛnt 10
10
PƆL PA TAR DƆ KULA LƏ-A
Kun dɔ kula lə Pɔl
1Kɔ 2.1-5; Rɔm 15.17-21; 2Kɔ 6.4-7; 13.2-4
1ꞌMa Pɔl gə dɔ-m ja, gə dəwje pa tar ɔji dɔ-m na lo gə m-ga̰ gə si naa gə ɗaa, m-ula dɔ-m ngulum, a ɓo m-isi əw nama m-ɗa singa dɔ-si gə le, m-ndəji-si ɗəw kaw yururu gə gə ɗəw məmay gə lə Kirisi, 2m-ɗa-si kɔgərɔ, mba kar logə m-ce ɓə lə-si nama, ar-mje m-pa tar gə si gə singa ang, mba m-njigi pa tar gə kədərə gə ɓəəl ang gə nje gə d-əji na tar ne gə darɔ gə ɓa j-aw nja ne.
3Tɔgərɔ, ja to dəwje gə ꞌnja ɗəw gə ja ngaa ja ɗɔ ɗəw darɔ gə ang baa. 4Mba ne ɗɔje gə j-aw ɗɔ ne le, ngira-a ḭ darɔ gə ang, ngaa to neɗɔje gə singamong-e ḭ rɔ Luba gə mba tuji ne tɔ̰y gə ila sə-a karəw, sijee ja tuji kəji tarje gə baa pugudu. 5Ngaɓa kəji tarje gə baa gə d-unda ne karje dɔ gərə Luba gə le, ja tuji pugudu, ngaɓa ja dum dɔ kəji lə-je mba kar d-ila ne kɔji dɔ Kirisi gə. 6Be ɓa logə sisəy a kila-je kuji kɔr jorong ɗaa, kal tar gə ɗa-ɗa kara sijee j-ar pɛrɛrɛ mba dal ba̰a̰-ɛ tɔ.
7May kar-si ɔr-je kəm neje gə maj-ɛ! To gə ɓo dəw ja gərə gə darɔ-ɛ to gə ꞌne n-to kar Kirisi nama, may kar gərə ne gə to nee: To gə ɓo n-to nje kar Kirisi nama sijee kara ja to nje kar Kirisije ja tɔ. 8Ngaɓa, le m-unda kar-m ya̰ ɓəəl ɔji dɔ singa gə Mbayɓe ar-sijee kar j-ula ne jingaw mə-sisəy kara rɔ kul uwa-m ang, singa gə n-ar-sijee mba kar mbo̰ naa lə-sisəy aw ne gə kede ɓo mba tuji ne sisəy ang. 9M-njigi mba kunda rɔ dəw gə ɗa mbedeje gə mba kula ne ɓəəl mə-sisəy gə ang, 10mba ꞌpa na: mbedeje lə Pɔl to ɓəəl ngaɓa uba singa, ngaa logə n-ga̰ horo-si gə ɗaa, n-unda ndɔlɛ ngaɓa tar pa lə-a to ne ang. 11May kar dəw gə nje pa tar gə to gə be le gərə ne gə to nee gə maj-ɛ: Tarje gə j-isi əw ɓa ja pa mə mbede gə le, ɓo ja ga̰ horo-si gə nama j-a ɗa kul-ɛ ja tɔ.
12Tɔgərɔ ja, dəwje gə d-o rɔ-je to ɓəəl ta kəm darɔ-je gə le, sijee j-a kḭ mba kasə gə je naa ose gə mba kun rɔ-sijee kɔji ne mar-ɛ lə-je ang. Ngaa logə d-un darɔ-jeje ja gə ngo kɔji ne ɓa d-ɔji ne darɔ-je ngaɓa d-uwa darɔ-jeje ja gə ne kɔji mar-ɛ le ɗaa tɔji to gə dɔ-je godo. 13Kar-sijee le ɗaa, ja njigi ɗa rɔ-sijee kar al dɔ lo ang, ja ɗa kar ne dɔ ɗəw nim-e gə Luba tɔji sijee ɓa ɔr ne ta ɗəw ar j-aw ne saar ɓə lə-sisəy. 14To gə ɓo j-ɔsə rɔ-sijee mba kaw gə j-aw ɓə lə-si nama j-ɔsə rɔ-si j-al ne dɔ ɗəw nimje ang, mba sijee ja to dəwje gə dɔngɔr gə j-aw saar ja ce gə Tar gə May lə Kirisi ɓə lə-sisəy. 15Be ɓa, sijee j-uwa kulaje gə dəw gə ɗangə ɗa j-ɔsə ne rɔ-si j-ar al dɔ lo ang. Ngaa ne kunda mə lə-sijee le, to gə ɓo takagə lə-sisəy ɓar mii nama, sijee ja ɗa kula karə təl to ɓəəl ya̰ horo-sisəy gə ja ɓi, lal kal ne dɔ ɗəw nim lə-sijee. 16Ɗəw to kar j-ila mbərə Tar gə May loje gə to no ɓe gə lə-sisəy, lal gə mba kɔsə gaji rɔ-si ɔji dɔ nduji kula gə nje gə kɛm ɗa d-ar nee dɔ ɗəw nim gə lə-je. 17May kar dəw gə ɔsə rɔ-ɛ nama, ɔsə rɔ-ɛ ɗəw gə lə Mbayɓe. 18Mba dəw gə nje kɔsə gaji darɔ-ɛ ye ja ɓa to gə ne ang ngaa dəw gə Mbayɓe ja ɔsə gaji-ɛ ɓa to gə ne.
Currently Selected:
2 Nje gə Kɔrɛnt 10: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
