1 Nje gə Kɔrɛnt 8

Da gə ꞌpolo ne magəje

Rɔm 14.13-23

1Ne gə ɔji dɔ da gə ꞌpolo ne magəje le, gərəje to gə tɔ̰y ja negərə lə-si ga̰. Negərə ɗa dəw gə nje kɔsə rɔ-ɛ ngaa njigi ula jingaw mə dəw gə.#8.1 Kɗn 15.20,29. 2To gə ɓo dəw əji na n-gərə ne kara nama kəm kar n-gərə to gə n-gərə ne ang ɓi. 3Ngaa to gə ɓo dəw njigi Luba nama Luba gərə nj-ɛ nee le tɔ. 4Be ɓa, ne gə ɔji dɔ ko̰ da gə ꞌpolo ne magəje le ɗaa, j-a gərə to gə magə godo dɔ nangə nee, magə gə ɗangə godo, ɗaa ɓɛl Luba ja gə kar-e ɗəgədə. 5Mba, nekundaje gə dara ose dɔ nangə nee gə dəwje na to magəje le ꞌga̰ ja, tɔgərɔ ja magəje bula nəm ngaɓa mbayɓeje kara ꞌbula tɔ,#8.5 Pɔl pa tar ɔji nee dɔ magəje lə Gərɛkje. Oje 10.20-21. 6be ja kara kar-sijee le, Luba kara baa ɗəgədə, Bɔ dəwje, gə neje tɔ̰y ḭ rɔ-ɛ gə ngaɓa j-a to njeka-ɛje, ngaɓa Mbayɓe kara baa, Jeju Kirisi gə ne tɔ̰y ɗe ɗəw gə lə-a ngaɓa mbɔr dɔ-ɛ ɓa j-aw ne kəm baa.

7Ngaa dəwje tɔ̰y d-inga negərə gə nee le ang. Mba nje gə kɛm gə pa polo magəje uwa mə-je ja ɓi le, d-usa daje gə nee le gə nepolo, ngaɓa kəji lə-je gə mbɔr-ɛ le mina ne. 8To nekusa ɓa a ɗəm gə sijee gə rɔ Luba gə ang. To gə ɓo j-usa ang kara ne kara lal-si ang nəm, to gə ɓo j-usa kara ne kara gə j-inga j-ila dɔ mar-ɛ gə godo nəm tɔ.#8.8 Rɔm 14.17. 9Be ja kara, oje gə maj-ɛ ɓa, may kar dɔ to doy lə-sisəy təl to jigi tuga lə nje tɔgə godoje ang. 10Mba to gə ɓo dəw o-i, ꞌi gə ꞌgərə ne nee le, lo kusa ne kəy polo magə gə le, kəji lə-a, ꞌne gə nje tɔgə godo le a kɔs-ɛ kar n-usa ne daje gə polo ne magəje ang wa? 11Be ɓa nje tɔgə godo uba tuji gə go negərə lə-i, ngon ko̰-si gə Kirisi uy mba tar lə-a le! 12Logə ꞌɗa neɗa gə kṵra̰y gə ngan ko̰-si to gə be ngaɓa ꞌtuji-je ne kəji lə-je gə tɔgə ang le ɗaa, to gə Kirisi ja ɓa ꞌɗa sə-a neɗa gə kṵra̰y. 13Gəl-e gə nee ɓa, to gə ɓo nekusa a təl to jigi tuga gɔl ngon ko̰-m nama, m-a kusa da ang gə dɔbo̰ ja, mba kar m-ɗa ne ngon ko̰-m m-ar-ɛ oso ang.

Currently Selected:

1 Nje gə Kɔrɛnt 8: lap

Highlight

Copy

Compare