Apostolkuéra 15
15
Hesu Crísto iglesiaygua aty guasu oiko Jerusalénpe
1Upérõ og̃uahẽ umi hermáno Juda pegua, Jerusaléngui Antioquíape, ha ombo’e hermáno Antioquíayguápe oñekytĩ’ova’erãha avei ipire’i Israelguakuéra ojepokuaa háicha ha Moises ombo’e haguéicha, ojesalva hag̃ua.
2Páblo ha Bernabe katu oñemoĩ hesekuéra, ha upévare oiko pe ñe’ẽjoapi hatãva oñondive. Upémaramo umi hermáno Antioquía pegua omondo Páblo, Bernabe ha ambue hermanokuéra ijapytégui oho hag̃ua hendivekuéra oporandu apostolkuéra ha iglésia ancianokuérape ko ñe’ẽjoapi kóva rehe.
3Umi iglésia Antioquía pegua rembijokuái ohasa Fenícia retã ha Samária departaménto rupi, ha ohasakuévo omombe’u ambue iglesiakuérape, heta tetã ambueyguakuéra ojeroviámagui avei Hesu Crísto rehe. Ha ohendúva guive ovy’aite ko marandu kóva rehe.
4Ha og̃uahẽvo hikuái Jerusalénpe, apostolkuéra ha umi iglésia ancianokuéra omog̃uahẽ porã ichupekuéra Jerusalen iglésiape. Upérõ, Páblo ha Bernabe omombe’u porã opaite mba’e Ñanderuete ojapova’ekue ha’ekuérarupi.
5Ha Jerusalengua hermanokuéra apytépe oĩ avei fariseokuéra ojeroviáva Hesu Crísto rehe. Ko’ã fariseokuéra ojeroviáva apytégui oĩ umi opu’ãva ha ñembo’yhápe he’i: Tetã ambueyguakuéra, ojerovia ramo jepe Hesu Crísto rehe, oñekytĩ’ova’erã avei ipire’i ha ojapova’erã hekópe Moises rembiapoukapykuéra.
6Upérõ oñembyaty apostolkuéra ha umi iglésia ancianokuéra oikuaa hag̃ua Ñanderuete rembipota ko mba’e kóvare.
7Ha heta oñoñe’ẽjoapi rire hikuái, Pédro opu’ã ha he’i ichupekuéra, che hermanokuéra, peẽ ningo peikuaa voi Ñanderuete cheporavo hague che amombe’u hag̃ua Hesu Crísto evangélio tetã ambueyguakuérape, ha’ekuéra ojerovia hag̃ua avei.
8Ha Ñanderuete oikuaa porãmba ñande py’apýpe oĩva guive, ha Ha’e ohayhúgui tetãyguakuérape ome’ẽ avei ichupekuéra pe Pytu Porãmbáva ome’ẽ haguéicha ñandéve, ha upéicha Ñanderuete voi opytáma hechahare ramo ko mba’e kóvape.
9Ñanderuete nombojuavýi Israelguakuéra tetã ambueyguakuéra apytégui; pe jerovia rupi Hesu Crísto rehe Ha’e omopotĩ avei ipy’apykuéra.
10Ág̃a mba’érehe piko peipy’ara’ã Ñanderuetépe pemoĩ hag̃ua tetã ambueygua ajúra ári peteĩ cangálla ipohyietéva ñande voi ni ñande rukuéra ndogueropu’akaiva’ekue.
11Ñandejára Hesu Crísto mborayhu rupi ha jajeroviágui hese jahupitýta ñane salvacion, ha ha’ekuéra peichaite avei ñanendive.
12Upéicha opaite oñembyatýva okirirĩmba, ha ojapysaka Bernabe ha Páblo ñe’ẽ rehe, omombe’úvo ichupekuéra umi mba’e techaukaha ha milagrokuéra Ñanderuete ojapova’ekue ha’ekuéra rupi tetã ambueyguakuéra apytépe.
13Okirirĩ rire hikuái, Jacóbo ombohovái ha he’i: Che hermanokuéra, cherendumi:
14Simon Pédro ningo omombe’úma mba’éichapa Ñanderuete oñandu avei tetã ambueyguakuérape, ohupity hag̃ua avei ijapyteguikuéra hetãrã.
15Ha profetakuéra ningo ojoja voi ko mba’e kóvape:
16Ko’ã mba’e rire aju jevýta amopu’ã pyahu hag̃ua David rogakue ho’ava’ekue, che amyatyrõ hag̃ua pe oñembyaíva, amopu’ã porãmba jevy hag̃ua,
17ha umi tetãygua hembýva ha opaite tetãnguéra oheka hag̃ua avei Ituvateépe, ha Ñanderuete réra oñembotuichave ohóvo ko yvy apére, Ha’e ojapopáta opaite ko’ã mba’e he’íva guive,
18Héra oñemyasãihína pe ára atyguasu ymaguare guive, (Amos 9,11-12).
19Upévare che ha’e ani hag̃ua oñemyangekõi tetã ambueyguakuérape ojeroviáva Ñanderuete rehe.
20Ñamondónte ichupekuéra peteĩ kuatiañe’ẽ ojehaihápe ani hag̃ua ho’u so’o oñekuave’ẽva tetã tupãnguérape (jarakuérape), ani hag̃ua oiko oñondive omenda’ỹre, ani ho’u tymba ojejajuravokava’ekue ro’o ni huguy.
21Opaite tavakuérape oñemoñe’ẽ voi yma guive Moises kuatiañe’ẽ meme sábado Ñanderuete rogakuérape.
22Upérõ peteĩ py’ápe apostolkuéra, iglésia ancianokuéra ha opaite hermanokuéra ndive oiporavo ijapytégui Júdas, oñembohérova avei Bársabas, ha Sílaspe omondo hag̃ua Páblo ha Bernabe ndive Antioquíape; Júdas ha Sílas ojeguereko mba’eguasu ramo Jerusalen iglesiayguakuéra apytépe.
23Ha hendivekuéra omondo ko kuatiañe’ẽ kóva: Ore apostolkuéra, iglésia ancianokuéra ha hermanokuéra romomaitei opaite tetã ambueyguakuérape ojeroviáva guive Hesu Crísto rehe ha oikóva Antioquía, Síria peguápe, ha Cilíciape.
24Ore rohendúma, ore apytégui oho hague umi hermáno penemyangekõiva’ekue iñe’ẽnguéra rupi, ore katu noromondói umívape, ijehegui rei uvei oho peneandúvo.
25Upévare hi’ã oréve, ha peteĩ py’ápe romondo pene rendápe Júdas ha Sílaspe, ore hermanokuéra rohayhúva, Bernabe ha Páblo ndive.
26Ko’ãva omoĩ kyhyje’ỹre hekove Hesu Crísto pópe.
27Ha hendivekuéra ore romondo ore apytégui Júdas ha Sílaspe, ha’ekuéra oikuaaukáta peẽme iñe’ẽnguéra rupi opaite mba’e ore ro’emava’ekue guive.
28Hi’ã porãite ningo Pytu Porãmbávape ha oréve ani hag̃ua ore romoĩve pende’ári mba’e ipohyietereíva tekotevẽvante,
29ha ko’ãva ha’e: Ani pe’u so’o oñekuave’ẽva ambue jarakuérape, tuguy ni tymba ro’o ojejajuravokáva, ha aníke peiko oñondive pemenda’ỹre. Peñemboyke ramo ko’ã mba’égui pejapo porãta, tapehasa porãite.
30Ha’ekuéra oñemondo rire oho hikuái Antioquíape, ha upépe ombyaty upepegua iglesiayguakuérape ome’ẽ hag̃ua ichupekuéra ko kuatiañe’ẽ.
31Omoñe’ẽ rire hikuái pe kuatiañe’ẽ ovy’a joa hikuái, pe ñemoangapyhy reheve.
32Júdas ha Sílas ningo profetakuéra avei, upévare ha’ekuéra omokyre’ỹ Antioquía pegua hermanokuérape heta ñe’ẽ porã rupi.
33Hi’are rire Júdas iñirũ ndive pe iglésia Antioquía peguápe omondo jevy ichupekuéra torypápe imbouhare rendápe.
34Sílas katu opytase.
35Páblo ha Bernabe opyta Antioquía pegua hermanokuéra ndive omboheko ha omombe’u hag̃ua Hesu Crísto evangélio pe táva pévape.
Páblo osẽ jevy Antioquíagui omoherakuã hag̃ua ambue tetãme Hesu Crísto evangélio
36Ko’ã mba’e rire Páblo he’i Bernabépe: Jaha jevy ñañandu ñane hermanokuérape umi távape ñande ñamombe’u haguérupi Hesu Crísto evangélio ha jahechami mba’éichapa oikohína hikuái.
37Ha Bernabe oguerahase Juánpe, hérava avei Márcos.
38Páblo katu ndoguerahaséi ichupe, Márcos ojei haguére ijapyteguikuéra Panfília guive, pe ambue viájepe, nomba’aposevéigui pe tembiapo oñepyrũva’ekuépe.
39Ha oñoñe’ẽjoapi hikuái péva rehe ha ojopoi hikuái ojuehegui. Bernabe ogueraha hendive Márcospe, ha oho jevy Chíprepe.
40Ha Páblo ogueraha hendive Sílaspe, Antioquía pegua hermanokuéra omoĩmba rire hekovekuéra ha hembiaporã Ñanderuete pópe, oje’ói hikuái.
41Páblo ha Sílas ohasa Síria ha Cilícia rupi ha omokyre’ỹ hikuái umi iglesiakuérape ohasaha rupi.
Currently Selected:
Apostolkuéra 15: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
