Англунимо 48

Иаково бахталисарэл Манассиё тай Ефремо

1Проджиля савись вряма, тай Иосифости пхэндэ:

— Тиро дад насвало.

Иосифо лиля пэґа дуен чявэн Манассиё тай Ефремо. 2Иаковости пхэндэ:

— Тутэ авиля тиро чяво, Иосифо.

Израилё стидэняпэ зораґа, привщиля тай бэшля пэ пато. 3Иаково пхэнда Иосифости:

— Дэвэл Всазорако сикавдапэ манди дэ Лузо, дэ пхув Ханаано, тай бахталисарда ман. 4Вов пхэнда: «Мэ терава, со тутэ авэла бут чяворэн, со тутар джяна бут народуря, ай кадэя пхув Мэ дава пэ всавори вряма тирэнди чяворэнди».

5Кана дуй тирэ чяворэ, савэ бэяндэпэ дэ Египто, дыкалэ сар авилём мэ катэ, вонэ авэна мурэнца. Ефремо тай Манассиё авэна мурэнца, сар Рувимо тай Симеоно. 6Ай чяворэ, савэ бэяндэпэ тутэ инте, авэна тирэ. Вонэ акхарэнапэ пхралэндирэнца лавэнца и лэна пэхкирэ котора лэндирятар пхуятар. 7Кала мэ рисявавас Падданостар, Рахиль муля дэ пхув Ханаано, кала амэ инте сле дэ дром, надур Эфрататар. Мэ гаравдом ла котэ, пашэ дром дэ Эфрата (када исин Вифлеемо).

8Кала Израилё удыкхля Иосифохкирэн чявэн, вов пхучля:

— Ко када?

9Иосифо пхэнда дадэсти:

— Када чявэ, савэн Дэвэл дэня манди катэ.

Тай кодэва пхэнда:

— Подлиджя лэн мандэ, соб мэ тэ бахталисарав лэн.

10Пхуриматар Израилё врыто дыкхэлас, вов сля, сар коро. Иосифо подлиджялда чявэн пашэдэр пэхкирэстэ дадэстэ, тай кодэва чюминда тай облиля лэн.

11Израилё пхэнда Иосифости:

— Мэ на думасаравас упалэ тэ удыкхэ тут, ай Дэвэл дэня тэ удыкхэ манди и тирэн чяворэн.

12Иосифо отлиджялда лэн Израилёхкирэндар чянгэндар тай тэлиля лэсти ды пхув. 13Иосифо тховда Ефремо дэ чячюни риг пэстар тай дэ зэрво риг Израилёстар, ай Манассиё дэ зэрво риг пэстар тай дэ чячюни риг Израилёстар, тай подлиджялда лэн пашэдэр дадэстэ. 14Нэ Израилё процырда чячё васт тай тховда ла пэ Ефремохкиро шэро, ай вов сля цыкнэдэр, тай зэрво васт вов тховда пэ Манассиёхкиро шэро, ай Манассиё сля пхурэдэр чяво. 15Тунчи вов бахталисарда Иосифо тай пхэнда:

— Дэвэл, англа Кастэ пхирэнас мурэ дада Авраамо тай Исаако,

Дэвэл, Саво сля чябано важ манди всаворо муро джювимо,

16Ангело, Саво фирисарэлас ман всаворятар врытиматар, —

тэ бахталисарэл кадэлэн чяворэн.

Мэк вонэ пхирявэн муро лав

тай лава мурэн дадэн Авраамохкиро тай Исаакохкиро,

тай мэк лэндирэн чяворэн авэла будэр пэ пхув.

17Кала Иосифо удыкхля, со дад тховда чячё васт пэ Ефремохкиро шэро, када на чялиля лэсти. Вов лиля дадэ пала васт, соб пэрэтховэ ла Ефремохкирэстар шэрэстар пэ Манассиёхкиро шэро. 18Иосифо пхэнда лэсти:

— Нат, дадэ, акэ кадэва — пхурэдэр, тхов чячё васт пэ лэхкиро шэро.

19Ай дад на закамля тай пхэнда:

— Мэ джянав, муро чяво, джянав. Лэстар кадиж джяла народо, тай и вов авэла баро мануш. Нэ лэхкиро цыкнэдэр пхрал авэла барэдэр лэстар, тай лэхкирэндар чяворэндар джяна бут народуря.

20Тай вов бахталисарда лэн дэ кодэва диво тай пхэнда:

— Израилё авэна тэ пропхэнэ тумарэ лава,

сар бахталисаримо, пхэнэна:

«Дэвэл тэ стерэла тут, сар Ефремо тай Манассиё».

Кади вов тховда Ефремо англэ Манассиё. 21Израилё пхэнда Иосифости:

— Мэ мэрав, нэ Дэвэл авэла тумэнца тай рисарэла тумэн дэ дадэндири пхув. 22Мэ дав тути барэдэр котор пхув, сар тирэнди пхралэнди, додав тути котор пхув плаенца, саво мэ чюряґа тай лукоґа отмардом амореендэ.

Currently Selected:

Англунимо 48: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пы сэрвицко ромско чиб