അപ്പോച്ചോലെര ചെയിദ കാരിയ 15

അപ്പോച്ചോലെര മാടിന നേമ

1ഏച്ചുനെ നമ്പിന്റ ജൂദെരളാന കുറെ മയിച്ചെര ജൂദിയെനാടിലിന്തു അന്തിയോക്കിയെ പട്ടണത്തെക്കു ബന്തരു. അയിര ബന്തിച്ചു അന്തിയോക്കിയെ പട്ടണത്തി ഏച്ചുനെ നമ്പിന്റ ജാദിയളാന നെരേയളെ ഇങ്ങാണെ പടേപ്പിച്ചരു: “നീങ്ക മോച്ചെന്റ നേമത്തി പറേഞ്ചുകീന്റപല്ലെ ചുന്നത്തു ചെയ്യക്കി നിങ്കക്കു രെച്ചപടുവപറ്റയ്.” 2എന്റെങ്കി പവുലോച്ചുക്കുമു ബറുന്നബാച്ചുക്കുമു അയിര പറേഞ്ച ബാക്കു ഒപ്പുവകാണി. അയിനെകോണ്ടു അയിര അയിരണ്ടൊന്റ അദിഗമെ തറുക്കിപ്പ തൊടാങ്കിനരു. അങ്ങാണെ അന്തോക്കിയെലി ഏച്ചുനെ നമ്പിന്റെര ഈ കാരിയത്തിനെപറ്റി എരുച്ചലേമിലികീന്റ അപ്പോച്ചോലെരണ്ടൊന്റമു അച്ചായിമാരുന്റൊന്റമു കേളുക്കൊണു എന്റു മനാമാടിനരു. അയിനെകോണ്ടു അയിര പവുലോച്ചുനെമു ബറുന്നബാച്ചുനെമു ഏച്ചുനെ നമ്പിന്റ ബേറെ കുറെ മയിച്ചെരളെമു എരുച്ചലേമുക്കു ചൊല്ലിബുടോണു എന്റു നിനേച്ചരു. 3അങ്ങാണെ അയിര പവുലോച്ചുനെയൊക്ക എരുച്ചലേമു പട്ടണത്തെക്കു ചൊല്ലിബുട്ടരു. അയിര പൊയിനിക്കിയെ നാടുകായെമു ചമെരിയെ നാടുകായെമൊക്ക കടാന്തൊണ്ടു പോനപ്പൊ ആ നാടിലൊക്ക ഏച്ചുനെ നമ്പികോണ്ടു ബദുക്കിന്റെരണ്ടൊന്റ ജാദിയളാന നെരേയമു ഏച്ചുനെ നമ്പിന കാരിയ പറേഞ്ചരു. അയിര പറേഞ്ചെനെ കേട്ടിന്തിച്ചു അയിരക്കു ഒക്കായിക്കുമു അയിച്ചിരിയാനയ്.

4അങ്ങാണെ പവുലോച്ചുമു ബറുന്നബാച്ചുമു തങ്കടൊന്റ ഇന്ത മയിച്ചെരമു എരുച്ചലേമു പട്ടണത്തെക്കു എത്തിനരു. അവുടെ ഏച്ചുനെ നമ്പിന്റെരമു അപ്പോച്ചോലെരമു അച്ചായിമാരുമു അയിരളെ തങ്കടൊന്റ കൂട്ടിനരു. പവുലോച്ചുമു ബറുന്നബാച്ചുമു തങ്കളെകോണ്ടു ജാദിയളാന നെരേയണ്ട ഇണ്ടിലി ഈച്ചിര ചെയിപ്പിച്ച ഒക്കാ കാരിയമു അയിരണ്ടൊന്റ പറേഞ്ചരു. 5ആ ചമേയത്തി പരീച്ചെമാരുവണ്ട ഇണ്ടിലിന്തു ഏച്ചുനെ നമ്പിന കുറെ മയിച്ചെര ഏന്തെച്ചു നിന്റൊണ്ടു ഇങ്ങാണെ പറേഞ്ചരു: “ഏച്ചുനെ നമ്പിന ജൂദെരളല്ലത്ത നെരേയളെമു ചുന്നത്തു ചെയിപ്പിക്കൊണു. അയിര മോച്ചെ പറേഞ്ചുകീന്റ നേമപല്ലെ നടാക്കൊണെന്റു അയിരണ്ടൊന്റ പറേവൊണു.”

6അയിര പറേഞ്ചെനെ കേട്ടിന്തിച്ചു ഈ കാരിയത്തിനെപറ്റി പറേഞ്ചുകിടാപ്പബേണ്ടിച്ചു അപ്പോച്ചോലെരമു അച്ചായിമാരുമു ഒന്റകൂടിനരു. 7ബലാബരി ഗളിഗെ അയിര അങ്കെക്കിങ്കെക്കു തറുക്കപൊരിഞ്ചുകവുഞ്ചപ്പൊ പത്തുറോച്ചു ഏന്തെച്ചു നിന്റൊണ്ടു പറേഞ്ചു: “എന്റ അണ്ണെരളേയെരളേ, ജാദിയളാന നെരേയമു ഏച്ചുനെപറ്റികീന്റ നല്ലബാക്കു കേട്ടിന്തിച്ചു ഏച്ചുനെ നമ്പുവബേണ്ടിച്ചു കുറെ ജിനാത്തെക്കു മുല്ലെ ഈച്ചിര എന്നെ നിങ്കട ഇടേലിന്തു തടാക്കിയെടുത്ത കാരിയമൊക്ക നിങ്കക്കു ഗൊത്തില്ല. 8ഒക്കാ നെരേയണ്ടമു മനാത്തിനെ ഗൊത്തുമാടിന്റ ഈച്ചിര തന്റ നുവേലുനെ നമാക്കു തന്തപല്ലെതന്നെ ജാദിയളാന നെരേയക്കുമു കൊടുത്തുകീന്റു. അങ്ങാണെ ഈച്ചിര നമിനെപല്ലെതന്നെ അയിരളെമു തന്റൊന്റ കൂട്ടിന്റു എന്റു നമാക്കു ഉറേപ്പുമാടിതന്തുകീന്റു. 9കറുത്താവാന ഏച്ചുനെ നമ്പിച്ചു തങ്കട ആഗത്തമനാത്തിനെ ചുദ്ദമാടുവ ഈച്ചിര അയിരളെ ചഗായിച്ചെനെകോണ്ടു ഈച്ചിരന്റ മിരാട്ടിലി നാമുമു അയിരളുമു ഒരേപല്ലെയാന്റു. 10അയിനെകോണ്ടു നമാക്കോ നമിന്റ അച്ചെരക്കോ കേട്ടിന്തുനടാപ്പ തീരത്ത നേമമൊക്ക ഏച്ചുനെ നമ്പിന്റ ബൊവുകെട്ടിയണ്ട തിലേക്കു കെട്ടിബെപ്പ നീങ്ക എന്നെഗു അലാക്കിന്റെരി? ഇങ്ങാണൊക്ക പേച്ചാടിച്ചു ഈച്ചിരനെ ചോദണെ ചെയിവ നീങ്ക എന്നെഗു പേച്ചാണ്ടെരി? 11കറുത്താവാന ഏച്ചു നമാക്കു ദരുമ ചെയിദെനെകോണ്ടാന്റു നമാക്കു രെച്ചെ കിട്ടിനെയെയ് എന്റു നാമു നമ്പിന്റപല്ലെതന്നെ അയിരളുമു നമ്പിന്റൊരില്ല.”

12പത്തുറോച്ചു പറേഞ്ചെനെ കേട്ടിന്തിച്ചു ഒക്കായിമു ചന്ന ഇന്തരു. പിന്നെ അയിര ഒക്കായിമു പവുലോച്ചുമു ബറുന്നബാച്ചുമു ജാദിയളാന നെരേയണ്ട ഇടേലി ഈച്ചിര അയിരളെകോണ്ടു ചെയിപ്പിച്ച അദിച്ചെയത്തിനെപറ്റിമു അടിയളത്തിനെപറ്റിമു പറേഞ്ചെനെ കേട്ടിന്തൊണ്ടിന്തരു.

13അയിര പറേഞ്ചുകവുഞ്ചപ്പൊ ഏച്ചുനെ നമ്പിന്റെരളെ നടാത്തിന്റ ആക്കോബു ഏന്തെച്ചു നിന്റൊണ്ടു പറേഞ്ചു: “എന്റ അണ്ണെരളേയെരളേ, നാനു പറേന്റെനെ കേട്ടിരുമി. 14ജൂദെരളല്ലത്ത നെരേയണ്ട ഇണ്ടിലിന്തു കുറെ മയിച്ചെരളെ ഈച്ചിര തനാക്കുബേണ്ടി മുല്ലെലായി തടാക്കിയെടുത്ത കാരിയ ചീമോനുപത്തുറോച്ചു നല്ലൊരുചന്ത പറേഞ്ചനില്ല. 15ഈ നടാന്ത കാരിയമൊക്ക തമ്മടികാറെര പറേഞ്ചുകീന്റ കാരിയത്തെക്കു ഒത്തുബന്റൊയ്. 16‘കറുത്താവു ഇങ്ങാണെ പറേന്റു:

നാനു പിന്നെമു മടാങ്കിബരുവെയ്.

ദാവീദു ബരിച്ച നാടുനെ അദുക്കു പിന്നെമു മാടികൊടുപ്പെയ്, താറുമാറായി പോന ആ നാടുനെ നാനു പിന്നെമു ബെടുപ്പായി മാടികൊടുപ്പെയ്.

അയിരക്കു ബന്തുകീന്റ ഒക്കാ നട്ടത്തിനെമു നാനു തീരുത്തുകൊടുത്തിച്ചു

അയിരളെ പിന്നെമു ബലാപടുത്തുവെയ്.

17അങ്ങാണെ ബൂമിലി ബാക്കികീന്റ ഒക്കാ നെരേയളുമു എന്നെ തടാക്കികോണ്ടു എന്നാത്തെക്കു ബരുവൊരു,

എന്റ നെരേയളാവ നാനു ബുളിച്ചുകൂട്ടിന ജാദിയളാന ഒക്കാ നെരേയളുമു എന്റവുടെക്കു ബരുവൊരു.

കറുത്താവു ഈ കാരിയ പറേഞ്ചുകീന്റു.

18ഈ കാരിയ പണ്ടുപണ്ടുതന്നെ നാനു എന്റ നെരേയക്കു ഗൊത്തുമാടി കൊടുത്തുകീന്റെയ്.’”

19ഈ കാരിയമൊക്ക പറേഞ്ചുകാന്റു ആക്കോബു പറേഞ്ച ബാക്കു: “അയിനെകോണ്ടു ഈച്ചിരന്റവുടെക്കു ബന്റ ജാദിയളാന നെരേയളെ ബുദ്ദിമുട്ടിക്കൊണ്ടമി എന്റാന്റു എനാക്കു നിങ്കടൊന്റ പറേവകീന്റെയെയ്. 20എന്റെങ്കി നാമു അയിരക്കു ഒരു കത്തു എവുദിബുടോണു. അയിലി അയിര കൂടത്തെക്കു നേരിച്ചെ കവുച്ച ഒരു ചാദണമു തിമ്മനാഗയ് എന്റുമു ചുള്ളത്തുവനാഗയ് എന്റുമു ഉച്ചിലുമുട്ടിച്ചു ചത്ത ജാത്തിയണ്ട റേച്ചി തിമ്മനാഗയ് എന്റുമു ഒരു ജാത്തിയണ്ടമു ചോരെ കുടിപ്പനാഗയ് എന്റുമു എവുദൊണു. 21മോച്ചെന്റ നേമ പണ്ടുതൊട്ടെ ഒക്കാ പട്ടണത്തിമുകീന്റ ജൂദപള്ളിലൊക്ക ഉളേപ്പുജിനാത്തി ബായിച്ചിച്ചു പറേഞ്ചുകാട്ടികൊടുക്കിന്റൊരില്ല. ഈ കാരിയത്തിനെപറ്റി അദിഗമായി ഗൊത്തുമാടുവ അലാക്കിന്റെരക്കു അയിനൊക്ക അവുടെ പോച്ചു ഗൊത്തുമാടുവനാവൊയ്.”

ജാദിയളാന നെരേയക്കു അപ്പോച്ചോലെര എവുദിന്റ കത്തു

22ആക്കോബു പറേഞ്ച ഈ കാരിയ ഒക്കായിക്കുമു ഒപ്പിനയ്. അയിനെകോണ്ടു അപ്പോച്ചോലെരമു അച്ചായിമാരുമു ഏച്ചുനെ നമ്പിന്റ ഒക്കായിമു ഒന്റകൂടിച്ചു തങ്കട ഇടേലിന്തു കുറെ മയിച്ചെരളെ തടാക്കിയെടുത്തിച്ചു അയിരളെ പവുലോച്ചുന്റൊന്റമു ബറുന്നബാച്ചുന്റൊന്റമു അന്തിയോക്കിയെ പട്ടണത്തെക്കു ചൊല്ലിബുടുവ മനാമാടിനരു. അയിങ്കുബേണ്ടിച്ചു ഏച്ചുനെ നമ്പിന്റെര ബലിയെരളെന്റു കണാക്കാക്കിന്റ ബറുച്ചബാച്ചു എന്റു പേരുകീന്റ ഊദെനെമു ചീലാച്ചുനെമു തടാക്കിയെടുത്തരു. 23അയിര കൊടുത്ത ആ കത്തിലി ഇങ്ങാണെയാന്റു എവുദിന്തെയെയ്:

“അന്തിയോക്കിയെ പട്ടണത്തിമു ചിറിയെ നാടില ബാക്കികീന്റ ജാഗത്തിമു കിലിക്കിയെ നാടിലിമു ഏച്ചുനെ നമ്പിന്റ ജാദിയളാന നെരേയ അറിവബേണ്ടി നിങ്കട അണ്ണെരളേയെരളാന അപ്പോച്ചോലെരമു അച്ചായിമാരുമു എവുദിന്റ കത്തു. നിങ്കക്കു നല്ലെയെയ് ബരോട്ടു. 24എങ്കളെ അറിപ്പിയദെ ഊടിന്തു കുറെ മയിച്ചെര നിങ്കളാത്തെക്കു ബന്തിച്ചു കണ്ടകിടേച്ച ചാദിയൊക്ക പറേഞ്ചിച്ചു നിങ്കട മനാത്തിനെ നൊപ്പിച്ചുകാന്റരു എന്റു എങ്കക്കു ഗൊത്താനയ്. 25അയിനെകോണ്ടു നാങ്ക ഒക്കായിമു ഒന്റകൂടികോണ്ടു എങ്കട ഇടേലിന്തു കുറെ മയിച്ചെരളെ തടാക്കിയെടുത്തിച്ചു നിങ്കളാത്തെക്കു ചൊല്ലിബുടുവ മനാമാടികീന്റ. അയിരളെ നാങ്ക നമാക്കു ഒക്കായിക്കുമു ബേണ്ടപട്ടെരളാന പവുലോച്ചുന്റൊന്റമു ബറുന്നബാച്ചുന്റൊന്റമു ചൊല്ലിബുണ്ട. 26പവുലോച്ചുമു ബറുന്നബാച്ചുമു നമിന്റ കറുത്താവാന ഏച്ചുകിറുത്തുക്കുബേണ്ടി തങ്കട ഉഗിരുനെബരെ ബിലേബെയ്യദെ പണി ചെയിദെരളാന്റു. 27ഊദെനെമു ചീലാച്ചുനെമു നാങ്ക ഏരണ്ടൊന്റ നിങ്കളാത്തെക്കു ചൊല്ലിബുണ്ട. നാങ്ക ഈ കത്തിലി എവുദികീന്റ കാരിയ അയിര തങ്കട ബായികോണ്ടുതന്നെ നിങ്കക്കു പറേഞ്ചുതരുവൊരു.

28നിങ്കളെ അദിഗ ബുദ്ദിമുട്ടിപ്പിപ്പ പാടുകാണി എന്റു ഈച്ചിരനുവേലുമു നാങ്കമു ഒരേപല്ലെ മനാത്തി നിനേച്ചുകീന്റ. എന്റെങ്കി ഈ പറേന്റ കാരിയ മാത്തിര നീങ്ക കേട്ടിന്തുനടാന്തെങ്കി മദി: 29നീങ്ക കൂടത്തെക്കു നേരിച്ചെ കവുച്ച ഒരു ചാദണമു തിമ്മനാഗയ്, ചുള്ളത്തുവനാഗയ്, ഉച്ചിലുമുട്ടിച്ചു ചത്ത ജാത്തിയണ്ട റേച്ചി തിമ്മനാഗയ്, ഒരു ജാത്തിയണ്ടമു ചോരെ കുടിപ്പനാഗയ്. നീങ്ക ഈ കാരിയത്തിന്തൊക്ക ബുട്ടുനിന്റെങ്കി നിങ്കക്കു നല്ലെയെയ് ബരുവൊയ്. ഒക്കായിക്കുമു നല്ലെയെയ് ബരോട്ടു.”

30അങ്ങാണെ പവുലോച്ചൊക്ക ആ കത്തുമു കേട്ടൊണ്ടു അന്തിയോക്കിയെ പട്ടണത്തെക്കു മടാങ്കിപോനരു. അയിര അവുടെക്കു എത്തിച്ചു ഏച്ചുനെ നമ്പിന്റ ഒക്കായിനെമു ബുളിച്ചുകൂട്ടിച്ചു ആ കത്തു അയിരണ്ട കയിക്കു കൊടുത്തരു. 31അയിരളെ ദയിരിയപടുത്തിന്റ ആ കത്തു ബായിച്ചെനെ കേട്ടിന്തിച്ചു അയിരക്കു ചാലദിഗ അയിച്ചിരിയാനയ്.

32ഊദെമു ചീലാച്ചുമു തമ്മടിയളായിന്തരു. അയിനെകോണ്ടു അയിര ബലാബരി കാരിയ അയിരണ്ടൊന്റ പറേഞ്ചുകിടാന്തൊണ്ടു അയിരളെ ബലാപടുത്തുവനുമു ഉറേപ്പുകീന്റെരളാക്കുവനുമു ചെയിദരു. 33കുറെ ജിനാബരെ ഊദെമു ചീലാച്ചുമു അവുടെ ഇന്തരു. പിന്നെ അവുടിലെര ഒക്കായിമു അയിരളെ അയിച്ചിരിലി എരുച്ചലേമു പട്ടണത്തെക്കു ചൊല്ലിബുട്ടരു. [34എന്റെങ്കി ചീലാച്ചു കുറെ ജിന അവുടെതന്നെ ഇപ്പ മനാമാടിത്തു.]#15.34 ഈ ബരി കുറെ എവുത്തിലി കാണി. 35പവുലോച്ചുമു ബറുന്നബാച്ചുമു അന്തിയോക്കിയെ പട്ടണത്തിതന്നെ ഇന്തരു. അയിര ബേറെകീന്റ ബലാബരി നെരേയണ്ടൊന്റ കൂടികോണ്ടു കറുത്താവാന ഏച്ചുന്റ നല്ലബാക്കു പറേവനുമു പടേപ്പിപ്പനുമു ചെയിദൊണ്ടിന്തരു.

പവുലോച്ചുമു ബറുന്നബാച്ചുമു ബേറെബേറെ ജാഗത്തെക്കു പോന്റൊരു

36ചുമാറുജിന കവുഞ്ചപ്പൊ പവുലോച്ചു ബറുന്നബാച്ചുന്റൊന്റ പറേഞ്ചു: “മുല്ലെ നാമു കറുത്താവുന്റ ബാക്കു പറേഞ്ചുകാട്ടികൊടുത്ത ഒക്കാ പട്ടണത്തെക്കുമു പോവൊവു. അവുടെ ഏച്ചുനെ നമ്പിന്റെര ഒക്കായിമു എങ്ങാണെകീന്റൊരു എന്റു നമാക്കു മെലേവനാവൊയ്.” 37മറുക്കോച്ചു എന്റു പേരുകീന്റ ഓഗെന്നാനുനെമു തങ്കടൊന്റ കൂട്ടികോണ്ടുപോവ ബറുന്നബാച്ചു അലാന്തു. 38എന്റെങ്കി പവുലോച്ചുക്കു ആ കാരിയ ഒപ്പുവകാണി. എന്നെഗെന്റെങ്കി മറുക്കോച്ചു മുല്ലെ പമ്പുലിയെ നാടിലി ഇപ്പടെക്കു അയിരണ്ടൊന്റ കൂടികോണ്ടു പണി ചെയ്യദെ അയിരളെ ബുട്ടുകാന്റു പോയിന്തു. അയിനെകോണ്ടു അദുനെ കൂട്ടികോണ്ടുപോവ പാടുകാണി എന്റു പവുലോച്ചു നിനേച്ചു. 39ഈ കാരിയത്തിനെപറ്റി പവുലോച്ചുക്കുമു ബറുന്നബാച്ചുക്കുമു തറുക്ക ബന്തിച്ചു അയിര രാണ്ടാളുമു ബേറെബേറെ ആനരു. അങ്ങാണെ ബറുന്നബാച്ചു മറുക്കോച്ചുനെമു കൂട്ടികോണ്ടു കപ്പെലുക്കു അത്തികോണ്ടു കുപ്പുറോച്ചു തുരുത്തുക്കു പോയിത്തു. 40എന്റെങ്കി പവുലോച്ചു ചീലാച്ചുനെ തന്റൊന്റ കൂട്ടികോണ്ടുപോവ മനാമാടിത്തു. എമ്മടെക്കു കറുത്താവു അയിരക്കു ദരുമ ചെയിവ ഏച്ചുനെ നമ്പിന്റെര പുറാത്തിച്ചൊണ്ടു അയിരളെ കറുത്താവുന്റ കയിക്കു ബുട്ടുകൊടുത്തരു. 41അങ്ങാണെ അയിര ചിറിയെ, കിലിക്കിയെ എന്റ നാടുകായൊക്ക പോച്ചു ആ ജാഗത്തി ഏച്ചുനെ നമ്പിന്റെരളെ അയിരണ്ട നമ്പെലിലി ഉറേപ്പിച്ചൊണ്ടു നടാന്തരു.

Currently Selected:

അപ്പോച്ചോലെര ചെയിദ കാരിയ 15: റാവുള

Highlight

Copy