Rom 3

Tuhan kanaalla

1Na adakala yuk kasohean na baw mintu, “Bong meꞌ looy, san kita turunan bangsa Yahudi, yaꞌ du luu hagaꞌ na maka san kita bay inislam, yaꞌ na du luu pūs na.” 2Sugaꞌ daa kitabi mamiki meꞌ looy. Basta mehe baw sina kaayaran ningkitabi bong kitabi turunan bangsa Yahudi. Numbul satu, kitabi bangsa bay tahalapan leꞌ Tuhan ngantanan palman na njawom kitab. 3Bana na, luu siga Yahudi yaꞌ kanaalla mmeꞌ ni Tuhan, sugaꞌ bong Tuhan, mastiꞌ kanaalla jaꞌ ya numan ilooy ma bay janjiꞌ na ni kabboꞌ-bboan tabi. 4Minsan mimon manusiyaꞌ ngandustaꞌ, bong Tuhan, mastiꞌ bonto jaꞌ. Meꞌ bay sinuwatan njawom kitab, yuk Nabi Daud,

“Tuhan, bila kau magpalman, song hallom, tumatandaꞌ du bana sadjaꞌ bay palman nu. Bong sinahawi hukuman nu, song hallom, tumatandaꞌ du katuwaꞌ jaꞌ ko.”#(3.4) Kitab Jabul 51.4.

5Na adakala yuk kasohean na baw mintu, “Mangkin kita buwat kalaatan, mangkin tumampak na kaintongan Tuhan sampay man na na sinanglitan. Dari bong kalaatan ta poonan man Tuhan sinanglitan, ongoy taggahaꞌ subay na pin kita minulkaan?” Sugaꞌ baan ta kam banahan, bitsala meꞌ looy ilay, karupangan jaꞌ lakka man akka manusiyaꞌ. 6Yaꞌ silay dari binean pamiki meꞌ looy, batan bong niyaꞌ katuwaꞌ Tuhan ngamulkaan jama ma buwat kalaatan, pooy meꞌ na taasahan huwis intong taabut na ngahukum mimon manusiyaꞌ? 7Boꞌ ilooy gi laat na, luu gi habal kasohean ngaminan karupangan da sampay yuk da, “Bana du baw kung bilay. Subay silay kita yaꞌ kalabuan hukuman Tuhan bong kita ngandustaꞌ. Ndang-ndang, sabapan siga dustaꞌ ta, tarang-tarang na bana jaꞌ palman Tuhan sampay man na na pinudji.”

8Na bong ilay akka da binean, sat da saꞌ māꞌ subay kita buwat kalaatan supaya paantup kaayaran. Ilooy gi laat na, luu gi kasohean nawakka mitnahan kami, bahasa tud ilooy na du tōꞌ kami. Sugaꞌ daa kam hidjab. Jama ma halling meꞌ looy ilay pataꞌ kalabuan hukuman Tuhan.

Dusahan mimon manusiyaꞌ

9Na pasal bangsa kami Yahudi, adakala pangahati kasohean ni bay bitsala ku nsiniꞌ, patingkat kami man siga bangsa kasohean ni pangandaan Tuhan. Sugaꞌ saꞌ silay meꞌ looy. Saꞌ ba, ndang bay na kam pahatiyan ku, mimon manusiyaꞌ baldusa san gi oy bangsa da? 10Boꞌ sikatuwaꞌ du ka halling njawom kitab, ilooy ma yuk na,

“Yaꞌ luu san disu manusiyaꞌ intong pa Tuhan.

11Yaꞌ luu ngantanan pangahati tuwaꞌ pasal Tuhan. Damikiyan, yaꞌ du luu miha bong pooy meꞌ da tapit ka Tuhan.

12Sikamimon manusiyaꞌ bay nikutan Tuhan sampay lay na lungay kapansahaliyan da. Yaꞌ luu buwat kaintongan, san disu.#(3.10-12) Kitab Jabul 14.1-3; 53.1-3.

13Behe da wā mōꞌ bitsala lakaꞌ-lakaꞌ, subay ga kubu yaꞌ bay llambunan man bawu sumpatoy pōꞌ. Dallaꞌ da pannoꞌ leꞌ dustaꞌ. Bitsala da subay ga latsun sō ma makaat jama.#(3.13) Kitab Jabul 5.9.

14Sigi-sigi pōꞌ sumpaꞌ ka bitsala gigit man jawom behe da.#(3.14) Kitab Jabul 10.7.

15Dangkitiꞌ-dangkitiꞌ du sāꞌ pagkahi da, yaꞌ luu og-og da numpahan lahaꞌ na.

16Maka paninggai-paninggai jaꞌ sila, buwatan da makaat ka muwan kamalasahiyan ni jama.

17Yaꞌ sila pandoy miha kasalassayan.#(3.15-17) Kitab Nabi Isaya 59.7-8.

18Maka yaꞌ luu tawu da pa Tuhan.”#(3.18) Kitab Jabul 36.1.

19Na hantak bitsala looy ilay siꞌ njawom kitab, tumatandaꞌ na mimon manusiyaꞌ dusahan pa Tuhan. Tud yaꞌ luu san disu nammu daawa man da nangkisan hukuman Tuhan, awla na bangsa Yahudi ma bay pina-ntanan saraꞌ, boꞌ langga da lagi. Sangkon mimon manusiyaꞌ pataꞌ kalabuan hukuman. 20Tud yaꞌ sina luu san disu initung meꞌ Tuhan intong sabap meꞌ na mogbogan saraꞌ.#(3.20) Ngkon jama yaꞌ nammu kaintongan pa Tuhan meꞌ da mogbogan saraꞌ batan yaꞌ luu san disu kabogbog saraꞌ labbasakayi. Gam pin, sabapan saraꞌ, tasayu jama na dusahan sila pa Tuhan.

Jalan man manusiyaꞌ initung meꞌ Tuhan intong

21Lipara, batnaa luu na pinalahil jalan man manusiyaꞌ initung meꞌ Tuhan intong. Sugaꞌ saꞌ baw tu ga hāl meꞌ mogbogan saraꞌ man da initung intong. Kaintongan ma awnan ku ilay siꞌ ndang luu bay tinunaꞌ meꞌ Nabi Musa ka ga pagkahi na kanabi-nabihan njawom kitab. 22Dari man gantaan Tuhan, initung na manusiyaꞌ intong basta sila pitsayaꞌ jaꞌ ka mangando ni si Isa Almasi. Tuhan ina yaꞌ magsibiddaꞌ san gi oy bangsa jama.

23Na mimon ina manusiyaꞌ lay jaꞌ bay buwat dusa. Sangkon saliꞌ-saliꞌ sila yaꞌ luu pangabut-ngabut da ni kaayaran Tuhan. 24Lipara ni kaehe aseꞌ Tuhan, lay na kitabi kaladjikian initung meꞌ na intong man sabapan pabuwatan si Isa Almasi bay muwasan dusa tabi. 25Si Isa ilay bay pinapitu meꞌ Tuhan nongan umu na supaya tatanggung na dusa tabi. Dari sabapan lahaꞌ na bay tinumpahan kalnaꞌ kitabi, inaa na man tabi bay koleꞌ kaampunan basta kitabi pitsayaꞌ sadjaꞌ. Njataꞌ kapatoy si Isa, ndooy na man Tuhan bay makitahan manusiyaꞌ kaintongan hukuman na. Batan bong ilay Tuhan bay mabiya manusiyaꞌ madara dusa da, boꞌ yaꞌ san luu pidjalaꞌ ni bay dusa da, malaingkan yaꞌ intong hukuman na.

Maruhuꞌ, ni katahaꞌ pasensiya Tuhan, bantuk lay jaꞌ ya mabiya manusiyaꞌ sigi-sigi buwat dusa. 26Sugaꞌ batnaa supaya tumatandaꞌ na Tuhan hukum intong, bohoꞌ na bay ngalabuꞌ hisab para ni dusa manusiyaꞌ. Sugaꞌ lay tiniggan meꞌ na njataꞌ si Isa. Sangkon sagannap ma pitsayaꞌ ni si Isa, initung na meꞌ Tuhan intong.

27-28Dari yaꞌ luu tapag-abbu meꞌ tabi saula-ula puwas na dusa tabi sabapan kaayaran bay pabuwat tabi atawa sabapan hulas-sangsāꞌ tabi mogbogan saraꞌ. Batan saꞌ silay poonan pabuwatan tabi man dusa tabi bay pinuwasan. Ilooy ya man dusa tabi bay puwas sabap meꞌ tabi pitsayaꞌ ni si Isa. 29Boꞌ timbang Tuhan ina, saꞌ sat para ni bangsa Yahudi, arapun sampay ni mimon bangsa. Batan bangsa Yahudi atawa ssaꞌ, basta iya du Tuhan tabi saliꞌ-saliꞌ. 30Disu du sina Tuhan, maka disu du jalan man na ngitung manusiyaꞌ intong, yana meꞌ da pitsayaꞌ ni si Isa, bangsa Yahudi atawa ssaꞌ. 31Sugaꞌ minsan itu lay na kitabi initung intong sabap meꞌ tabi pitsayaꞌ ni si Isa, saꞌ baw ina ga subay takupan tabi na saraꞌ Nabi Musa, gam pin tanggehan tabi lagi.#(3.31) Siga saraꞌ Nabi Musa ma tanggehan tabi batnaa lay na tinikmod pa duwa panohoan. Disu, subay kitabi maaseꞌ ni Tuhan. Kaduwa na, subay kitabi maaseꞌ ni pagkahi tabi manusiyaꞌ (ndaun Matiyu 22.36-40 Rom 13.9-10).

Currently Selected:

Rom 3: sjm

Highlight

Copy

Compare