Rom 15

Sukuꞌ si Isa sinohoꞌ magdambuwaꞌ atay mari sila kaboo kabantugan pa Tuhan

1Na kitabi itu ma basag pangando tabi, sapatut na, subay takissa tabi parasahan siga danganakan tabi ma kulang pangahati, ma yaꞌ gi basag pangando da. Maka subay sila pinasensiya meꞌ tabi ni kasaan pamiki da. Daa subay na pin kahandak tabi jaꞌ duwan tabi. 2Arapun subay tabi ngagak dī tabi mari yaꞌ lingog kōk siga pagkahi tabi sabapan tabi. Meꞌ naa ina, katabang kitabi ninsila supaya pabasag pangando da. 3Minsan Almasi mismu, yaꞌ du bay magpasannang nganduwan dī na, gam pin kalnaꞌ kitabi, lay gi ya bay natasan jinisan kabinsanaan. Boꞌ sikatuwaꞌ du ka suwat njawom kitab, ilooy ma yuk Almasi,

“Ū Tuhan, bitsala pangka man jama madiyoꞌ kau, lay na labuꞌ pa jataꞌ ku.”#(15.3) Kitab Jabul 69.9.

4Na mimon ina ma bay sinuwatan njawom kitab man noan kitabi kabanahan. Man sabapan tōꞌ njawom kitab, pataggu na pin iman tabi. Maka ilooy na muwansangan kitabi natas njawom katiksaan. Maka sabapan kitab, yaꞌ maglumba holat tabi ni tabang Tuhan.

5Tuhan ina yana poonan gaos tabi maka tukang mataggu iman tabi supaya kitabi natas njawom kasusahan. Kamura-murahan tinabangan du kam meꞌ na supaya kam dambuwaꞌ pamiki njawom kasalassayan sasang bi ngikut siga tōꞌ si Isa Almasi. 6Meꞌ looy ilay, yaꞌ na kam magsulemaꞌ pamiki. Gam pin dambuwaꞌ na kam atay moo sanglit ka kabantugan pa Tuhan, yana Mmaꞌ Papuꞌ tabi si Isa Almasi.

7Sangkon sihasi-hasi kam. Yana meꞌ Almasi bay ngahasi kaam, subay du kam ngahasi mbuwaꞌ danganakan bi sukuꞌ si Isa, pamaehe bantug pa Tuhan. 8Na Almasi ilay bay pinapitu pa junyaꞌ nabang bangsa Yahudi sampay makitahan sila mattan du Tuhan mmeꞌ ni lapa na. Batan njataꞌ Almasi na silay man Tuhan bay numan siga janjiꞌ na ni kabboꞌ-bboan kami. 9Sugaꞌ saꞌ silay sat kalnaꞌ siga Yahudi kon Almasi bay pitu, arapun sampay kalnaꞌ kabangsa-bangsahan ma saꞌ Yahudi. Sila pun lay na du pinanimbangan mari sila mudji Tuhan na du. Boꞌ ndang meka silay tunaꞌ njawom kitab pasal siga bangsa ma saꞌ Yahudi mudji Tuhan. Yuk disu nabi,

“Ū Tuhan, luu du sina masa ni sinōng haboy-haboy na ku ka siga kabangsa-bangsahan ma saꞌ Yahudi mudji kau. Maka ngalang ku kalangan pudji ningkau.”#(15.9) Kitab Jabul 18.49.

10Maka luu gi bay sinuwatan njawom kitab, ilooy ma yuk na,

“Kaam ma saꞌ bangsa Yahudi, mmeꞌ na kam gāk ni sagannap ma ndang bay peneꞌ Tuhan sukuꞌ na.”#(15.10) Kitab Tawrat, Duteronomi 32.43.

11Maka luu gi halling njawom kitab,

“Kaam ma saꞌ bangsa Yahudi, pudjihun bi na Papuꞌ. Mimon manusiyaꞌ subay mudji iya.”#(15.11) Kitab Jabul 117.1.

12Maka luu gi tunaꞌ bay sinuwatan meꞌ Nabi Isaya, yuk na,

“Bbos-bbos luu du sina pōꞌ panubuꞌ si Jesse.#(15.12a) Si Jesse ilay yana mmaꞌ Nabi Daud. Boꞌ si Isa Almasi disu panubuꞌ Nabi Daud. Sangkon si Isa na silay inawnan panubuꞌ si Jesse ni ayat tuu. Inuwakilan ya nohoꞌ magbayaꞌ ni mimon kabangsa-bangsahan. Sampay iya na sina mintu asahan da man da koleꞌ mimon ma bay janjiꞌ Tuhan ni sukuꞌ na.”#(15.12b) Kitab Nabi Isaya 11.10.

13Na meꞌ Tuhan ina pag-asa tabi, kamura-murahan buwanan na du kam kagakan mehe maka kasannangan njawom atay bi sabap meꞌ bi pitsayaꞌ ni Papuꞌ Isa. Kamura-murahan sabap meꞌ bi pitsayaꞌ, ginaosan du kam meꞌ kawasa Rū Sutsiꞌ supaya pabasag na pin holat bi pa Tuhan.

Maksud si Pol bay nuwat pa mman sukuꞌ si Isa ndooy ni Rom

14Na siga danganakan, manganna situ ku kaam tud jama mahap maka lawom pangahati bi ni kabanahan pasal Tuhan. Sangkon, bistahan ku pandoy du sina kam sipaintom-paintom. 15Sugaꞌ lay na pin siꞌ ku nawakka maintoman kaam njawom suwat tuu batan ndang inaa pabuwatan bay hinalap meꞌ Tuhan niyaku. 16Aku itu bay pineneꞌ binuwat sosohoan si Isa Almasi kalnaꞌ siga bangsa ma saꞌ Yahudi. Pabuwatan ku tu meꞌ karuha imam batan masaplag ku umanat mahap man Tuhan ninsila. Kuwan sagannap ma pitsayaꞌ, sila meꞌ sapantun jakat sinongan meꞌ ku pa Tuhan. Boꞌ tinimaꞌ jaꞌ sina sila meꞌ Tuhan sabap lay na sinutsiꞌ pangatayan da meꞌ Rū Sutsiꞌ.

17Sangkon mehe meꞌ ku gāk ni mimon tabang si Isa Almasi niyaku sasang ku maghulas-sangsāꞌ kalnaꞌ Tuhan. 18Sugaꞌ yaꞌ baw tu ku nawakka mag-abbu ni oy maka oy na sarī man Almasi. Isu-isu iya du bay nampulnaꞌ pabuwatan ku sampay bitsala ku supaya pitsayaꞌ na siga bangsa ma saꞌ Yahudi ni umanat mahap pasal iya. 19Man kawasa Rū Tuhan njataꞌ ku, lay na ku kapōꞌ siga pabuwatan kahaylan-haylan. Maka man gaos Rū Tuhan, lay na du ku ngalataan lahat masaplag umanat mahap pasal Almasi labba man Jerusalem ngabut sampay pa Ilirikum. 20Man maruhuꞌ lagi ndang lay na situ ku paruhuꞌ masaplag pasal Almasi ni kalahat-lahatan ma yaꞌ gi bay pingkaꞌ kale awon na. Bong siꞌ ibaratan matangge lumaꞌ, ndang yaꞌ ku bay doman matangge lumaꞌ ni tanaꞌ ma ndang luu na tehang bay pinatangge meꞌ jama sarī. 21Boꞌ magbēꞌ du bana ka tunaꞌ njawom kitab, ilooy ma yuk na,

“Sagannap ma yaꞌ gi bay pingkaꞌ kabaan atawa yaꞌ bay kale pasal iya, bbos-bbos kahati na du.”#(15.21) Kitab Nabi Isaya 52.15.

22Na sabapan pabuwatan ku masaplag, inaa sina kon ku yaꞌ gi bay kapilu ngandaꞌ-ngandaꞌ kaam. 23Sugaꞌ batnaa, pagka ku lay na lupus masaplag ni kalahat-lahatan ntuu, maru na du situ ku pilu. Boꞌ ndang taunan na situ ku bay doman sitammu ka kaam. 24Balangkali ni lān ku mintu pilay pa lahat Kastilaꞌ, kapahās doꞌ ku duhuꞌ ni lahat bi. Kamura-murahan sikagāk-kagāk du kitabi pag takka ku pilu, boꞌ ku tatabangan bi ni palanan ku.

25Sugaꞌ batnaa, pilay doꞌ baw ku duhuꞌ pa Jerusalem moo patulungan ni siga danganakan tabi sukuꞌ si Isa ndooy. 26Batan ni gasad bayaꞌ sukuꞌ si Isa man Masidunya ka Akaya, lay sila ngumpo sīn man nulung siga pagkahi da sukuꞌ si Isa ma miskin ndooy ni Jerusalem. 27Boꞌ tud basag kainagon da nulung. Pangissahan da, subay ga sila jama utangan ni siga Yahudi ndooy ma pitsayaꞌ ni si Isa. Batan bong saꞌ bay sabapan siga Yahudi ndooy, yaꞌ sila bay kale umanat kasalamatan. Dari pagka siga bangsa saꞌ Yahudi bay koleꞌ balanjaꞌ nyawa man siga Yahudi, pataꞌ du baw sila nungbas san lasa ka balanjaꞌ baran. 28Dari pag mintu lay na tapasampay ku tulung ninsila ndooy ni Jerusalem, boꞌ ku sa pahās man lahat bi san lasa sakāng, boꞌ ku pawus pa lahat Kastilaꞌ. 29Bong ina ku mintu takka na pilu, basta saliꞌ-saliꞌ na sina kitabi koleꞌ kaayaran man sabapan pagkatibuuk tabi ka Almasi.

30Siga danganakan, pagka kitabi njawman sakup Papuꞌ tabi si Isa Almasi, maka pagka kitabi sikaaseꞌ-kaaseꞌ sabapan pabuwatan Rū Sutsiꞌ njawom atay tabi, junjung ku na ningkaam, limbangan bi sa ku maku duwaa pa Tuhan. 31Paku tabi na pin pa Tuhan, kamura-murahan yaꞌ du ku kongoy-kongoy meꞌ jama ma yaꞌ pitsayaꞌ ni si Isa ndooy ni Yahudiya. Maka kamura-murahan kasulutan du siga sukuꞌ Tuhan ni Jerusalem nambut patulungan ma song boo ku pa mman da. 32Na lakka mandooy, bong itu ku mintu tinugutan du meꞌ Tuhan pilu pa mman bi, tud gāk sina ku mintu batan tatantu ku pag taabut tabi sitammu-tammu, sannang na pamiki tabi saliꞌ-saliꞌ. 33Kamura-murahan inunungan na pin kam meꞌ Tuhan, yana poonan kasannangan. Amin.

Currently Selected:

Rom 15: sjm

Highlight

Copy

Compare