Rom 1

ROM

Si Pol magpakila iya disu rasul si Isa Almasi

1Suwat tuu itu lakka man aku, yana si Pol, disu ata si Isa Almasi. Aku itu bay lliyun meꞌ Tuhan binuwat rasul nohoꞌ masaplag umanat mahap pasal kasalamatan. 2Kasalamatan ina, ndang bay njanjiꞌ meꞌ Tuhan man maruhuꞌ-ruhuꞌ lagi. Boꞌ lay sohoꞌ Tuhan sinuwatan ni siga kanabi-nabihan njawom kitab. 3-4Umanat mahap ina yana pasal Anak Tuhan, Papuꞌ tabi si Isa Almasi. Ni kapasal pagkamanusiyaꞌ na, panubuꞌ Sultan Daud ya. Ni kapasal pagkaTuhan na, sutsiꞌ gi ya man sutsiꞌ, boꞌ tumatandaꞌ na Anak Tuhan ya Sangat Kawasa sabap meꞌ na bay llum pabalik. 5Boꞌ iya na silay bay nguwakilan kami binuwat siga rasul na. Lay kami buwanan na kapatut masaplagan kabangsa-bangsahan nohoꞌ pitsayaꞌ sampay ngasip niiya, pamaehe bantug ni awon na. 6Na kaam nnaa ni Rom, tabeꞌ na du sina ni siga jama ma bay lliyun meꞌ Tuhan tinibuuk ka si Isa Almasi.

7Meꞌ kaam siga kakasi Tuhan nnaa ni Rom ma bay lliyun binuwat sukuꞌ na, kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

Doman si Pol ngandaꞌ-ngandaꞌ sukuꞌ si Isa ndooy ni Rom

8Duhuꞌ-duhuꞌ bitsala ku, ni awon si Isa Almasi, magsuku ku pa Tuhan sabapan bi sikamimon. Magsuku ku sabap aka pasal pangando bi ni si Isa tanyag na ni sikaliput junyaꞌ. 9Wā situ kam pakuhan ku duwaa, ilu na Tuhan pakale-kale, yana Tuhan ma inisbat meꞌ ku ni kahilas atay ku jawom ku masaplag umanat mahap pasal Anak na. 10Maka tuktuk ku maku duwaa, wā patabeꞌ ku hāl kainagon ku pilu pa lahat bi. Kamura-murahan tinugutan du ku meꞌ Tuhan. 11Kainagon ku sitammu na kitabi supaya kam tahampitan ku tōꞌ man Rū Sutsiꞌ mari magsasōng gi basag pangando bi ni si Isa. 12Maka kainagon ku sikagāk-kagāk kitabi pag ndaꞌ tabi saliꞌ-saliꞌ takkoꞌ pangando tabi.

13Siga danganakan, daa kam mista siga noy batnaa na bohoꞌ ku bay kapiki pilu pa mman bi. Min meka na ku situ bay maru pilu. Sugaꞌ ngabut sampay batnaa, yaꞌ gi ku bay tabawus batan luu na pin jinisan kasanggalang niyaku. Kainagon ku bong ku mintu takka pilu, luu gi nnaa jama taboo ku mmeꞌ ni si Isa meꞌ karuha ni kalahat-lahatan kasohean. 14Aku itu, pangissahan ku talpaksaꞌ ku ngalataan lahat masaplag umanat mahap pasal si Isa ni sikamimon. Yaꞌ ku minig jama, san gi oy bangsa da, ma iskulan atawa niyaꞌ, ma halul-akka atawa niyaꞌ. 15Sangkon na, bong mintu luu dapat ku, tud doman ku pilu masaplag umanat mahap ni siga jama nnaa ni Rom. 16Tud manganna situ ku ni kawasa Tuhan njawom umanat mahap tuktuk na pinasaplag. Sangkon yaꞌ ku loman masaplag. Batan katoonan ku mimon jama ma pitsayaꞌ ni umanat mahap tattap jaꞌ nammu kasalamatan, nagnaꞌ man bangsa Yahudi sampay pa kabangsa-bangsahan ma saꞌ Yahudi. 17Ni umanat mahap ina, tatammu jama jalan man da taitung meꞌ Tuhan intong. Jalan ma awnan ku ilay siꞌ yana pangando tabi ni si Isa. Boꞌ sikatuwaꞌ du ka suwat njawom kitab, ilooy ma yuk na,

“Sagannap ma initung meꞌ Tuhan intong sabapan pangando da niiya, mastiꞌ koleꞌ kasampulnaan nyawa saumu-umu.”#(1.17) Kitab Nabi Habakuk 2.4; Galatiya 3.11.

18Sugaꞌ njawom umanat mahap, luu du sina tabeꞌ hāl mulkaꞌ Tuhan llabuꞌ man sulgaꞌ pa jataꞌ sagannap ma buwat kalaatan, yana sagannap ma yaꞌ tawu pa Tuhan. Batan sabapan kalaatan da, tumallob na kabanahan pasal Tuhan. 19Sila ina, yaꞌ tahasi daawa da san sila māꞌ yaꞌ tasayu da ga luu Tuhan. Batan Tuhan mismu bay makitahan sipat pagkaTuhan na ni mimon manusiyaꞌ. 20Bana na, Tuhan yaꞌ takita, sugaꞌ lay baw ya mōꞌ buktiꞌ ni pagkaTuhan na ka ehe kawasa na ma yaꞌ luu katapusan na. Buktiꞌ na ilay, yana mimon-mimon ma bay papayak na. Sangkon yaꞌ luu daawa man manusiyaꞌ yaꞌ ngisbat iya. 21Sila ina, tahadjaꞌ da yaꞌ ngisbat Tuhan. Ndang katoonan da du luu Tuhan, sugaꞌ tud ndang yaꞌ sila doman maehe iya atawa muwan pagsukuhan niiya. Pamiki da ina yaꞌ luu pūs na. Subay ga sila jama bagagap njawom lindom sabap yaꞌ tahati da kabanahan. 22Ni bistahan da, lawom akka da, boꞌ ko, akka da ilay ilooy na man da magkadupang. 23Batan subay siꞌ Tuhan Sangat Kawasa ma llum saumu-umu sumba da. Boꞌ sila, ilooy ya sumba da siga tuhan-tuhan ma bay jaꞌ pinabuwat meꞌ dagbos manusiyaꞌ, atawa meꞌ dagbos ga manuk-manuk ka ga hayop sampay ga mananap.

24Dari sabapan karupangan da, lay na sila pinabiya meꞌ Tuhan binoo-boo meꞌ napsu da. Pag toklas na, buwat jaꞌ sila jinisan kasabuhan ma kadiyoꞌ ninsila. 25Kon ilay meꞌ looy sabap yaꞌ sila kuhi pitsayaꞌ ni kabanahan pasal Tuhan. Iya kapitsayaan da yana dustaꞌ. Batan tatammu da ga ngisbat sampay numba kajinisan ma bay jaꞌ pinapayak. Boꞌ Tuhan ma bay mapayak mimon-mimon, niyaꞌ san isbat da. Mingkan, isu-isu iya pataꞌ pinudji meꞌ mimon manusiyaꞌ saumu-umu. Amin.

26Dari sabapan kadarihan da, pinabiya na sila meꞌ Tuhan nganduwan napsu da buwat jinisan kalaatan ma kadiyoꞌ ninsila. Sangkon meka na karandahan yaꞌ na mogbogan pagkadanda da. Yaꞌ na ga sila doman sitampu ka lalla. Gam pin iya pinaabak meꞌ da sikameek-kameek ka pagkahi da danda. 27Damikiyan, meka na du kalallahan lay na du ngalabbahan tabiat ma bay sinukuꞌ ni kalallahan domanan danda. Sampay yaꞌ na du ga tasaggaꞌ da napsu da sikameek-kameek ka pagkahi da lalla. Sugaꞌ luu du sina mintu hisab takissa da magtūk ka kalaatan da.

28Pagka bistahan da yaꞌ luu pūs na bong kita ngisbat Tuhan, pinabiya na sina sila meꞌ Tuhan pinagmundaan meꞌ pamiki bingkok buwat kajinisan ma yaꞌ pataꞌ pinabuwat. 29Pannoꞌ atay da leꞌ jinisan kalaatan ka kabingkokan ka napsu mulakab. Dahulakaꞌ sila maka dangkiꞌ sila. Inaa jaꞌ jawom atay da, doman sila mapatoy jama, sasaꞌ, ngalilu, ka makaat jama. Pangalimut sila maka 30pamitna sila. Yaꞌ luu guna Tuhan ninsila maka yaꞌ sila magmaltabat ni jama. Langkaw atay da maka pangabbu sila. Tigiꞌ sila nulun-nulun kalaatan maka yaꞌ ngasip ni induꞌ-mmaꞌ da. 31Pamiki da tud yaꞌ luu pūs na. Yaꞌ sila mmeꞌ ni lapa da, yaꞌ sila maaseꞌ, maka yaꞌ sila manimbang. 32San katoonan da na njawom siga panohoan Tuhan ga jama ma buwat meꞌ looy tawop pinapatoy, amu-amu gi du sila maabak kalaatan. Boꞌ ilooy gi kagakan da bong sila ngita siga pagkahi da ngakig sila.

Currently Selected:

Rom 1: sjm

Highlight

Copy

Compare