Lukas 1

LUKAS

1-3Tuwan Tiyopilus, bagay ku ma tawop pinagmaltabatan, itu suwat ku pa mman nu. Kon ku nuwat mari katoonan nu salsila pasal si Isa Almasi.

Meka na sina jama bay kasakup kadarihan si Isa labba man jaman na bay nagnaꞌ nōꞌ ngabut sampay na lakka man junyaꞌ. Boꞌ lay gi sila masaplag umanat mahap pasal iya ningkami. Maka meka na jama ma bay kale umanat da, bay na du nuwat pasal iya. Dari pagka bay pinaliksaꞌ meꞌ ku paayad salsila pasal si Isa labba man panagnaan, meꞌ ku mista mahap bong tinalitib na baw meꞌ ku mimon njawom suwat tuu ningkau. 4Meꞌ looy ilay, tatantu nu na bong mattan du ilooy ma bay tinōꞌ ningkau.

Si Yahiya ma Tukang Mandi song pinamaddihan

5Dari meꞌ tuu silay: Jaman si Herod magsultan ntuu ni Yahudiya, luu disu imam Yahudi inawnan si Jakariya. Iya ilay bay tabeꞌ ni baanan imam inawnan Baanan Imam Abidja. Nda si Jakariya yana si Elisabet. Sikaduwa sila panubuꞌ Imam Harun.#(1.5) Imam Harun ilay yana imam bay duhuꞌ-duhuꞌ ni bangsa Israil. Siyali na yana Nabi Musa. 6Ga si Jakariya siꞌ tu ka nda na intong ni mata Tuhan. Mmeꞌ jaꞌ sila ni siga saraꞌ ka panohoan Tuhan labbasakayi maka yaꞌ luu sutsutan njataꞌ da. 7Sila siꞌ tu yaꞌ anakan batan man si Elisabet yaꞌ hanak. Boꞌ toa na sila sikaduwa.

8Na disu llaw, taabut na baw liu ga si Jakariya ka baanan pagkahi na imam magtaat pa Tuhan ni langga mehe. 9Ni arat kaimaman, subay luu dangan pineneꞌ paasok pa jawom Bilik Pinakasutsiꞌ ni langga mehe nunu bbūg. Dari awon si Jakariya lay takoot.

10Na sasang na siꞌ masi gi njawom langga nunu bbūg, meka du jamaa ni haman langga looy maku duwaa. 11Mindangoy ko, luu na tulun malaikat man Tuhan pa mman si Jakariya nangge huwin pa kawnan man lamisahan panunuhan bbūg. 12Dari si Jakariya siꞌ tu, magkabba-kabba na atay na pag takita na malaikat looy sampay sinawan na ga ya.

13Sugaꞌ yuk malaikat looy niiya, “Daa ko ba tawu Jakariya. Aku itu bay sinohoꞌ mahati kau kinabbul na meꞌ Tuhan bay duwaa nu maku anak. Battong na sina mintu nda nu. Pag maddi na, lalla anak na. Awnan bi sa ya si Yahiya. 14Gāk na sina kam mintu sabapan na. Jama pun, meka na du sina mintu gāk man sabapan na bay pinamaddihan. 15Iya ina mintu mehe hagaꞌ na ni bandingan Tuhan. Ndang ssob na ya meꞌ Rū Sutsiꞌ labba man kūn induꞌ na lagi. Subay ya yaꞌ nginum tubaꞌ anggul atawa oy-oy na pin inuman makalango. 16Pag mehe na ina, bbuwatan na mitsalahan siga pagkahi na bangsa Israil supaya tawbatan da na dusa da boꞌ da pabeleng na pa Tuhan ngisbat iya. 17Luu na pin sina mintu kawasa Rū Sutsiꞌ njataꞌ na meꞌ bay karuha kawasa njataꞌ Nabi Eliyas. Maka anak nu ina mintu paruhuꞌ man Papuꞌ manyap ni katakka na. Man sabapan tōꞌ anak nu, pinagsidambuwaꞌ atay na sina mintu siga mmaꞌ ka ga anak da. Maka sabapan tōꞌ anak nu ina mintu, meka na jama ma yaꞌ kuhi ngasip ni kahandak Tuhan, taboo na na ngikut pamiki jama intong tawhid da. Dari meka na jama saddiya ni katakka Papuꞌ.”

18Yuk si Jakariya ni malaikat looy, “Pooy tu la meꞌ ku katantu mawjud bitsala nu siꞌ? Aku bitu toa na. Nda ku pun, iya du.”

19Tampung malaikat looy, “Aku itu Jibrail. Wā ku ni awpan Tuhan ngagad-ngagad sohoꞌ na. Iya silay siꞌ bay nohoꞌ aku pitu masampay umanat mahap tuu siꞌ pa mman nu. 20Mimon ilay siꞌ ma bay bāꞌ ku ningkau, yaꞌ luu saꞌ yaꞌ binakbul. Sugaꞌ pagka ko yaꞌ pitsayaꞌ, ndaun sa. Niyaꞌ na sina ko kabitsala ngkod-ngkoran yaꞌ gi bay binakbul bay bitsala ku siꞌ.”

21Na siga jamaa ni poan langga mehe baw siꞌ tu, tud gampang sila ni si Jakariya sabap kalanduꞌ na hallom na njawom. 22Pag pōꞌ na, yaꞌ na ya kabitsala. Ngisalat na jaꞌ ya ka tangan na. Dari ilooy ma tabista da na luu bay takita na tulun ndooy ni jawom.

23Na pag paddus siga llaw man si Jakariya buwat taat ni langga mehe, lay na ya moleꞌ. 24Dari yaꞌ gi siꞌ hallom, lay na battong nda na si Elisabet. Njawom limam buwan yaꞌ na san ya bay usik man lumaꞌ da. 25Yuk na, “Tud mehe la timbang Papuꞌ niyaku batan lay na tambunan na kaiyaan ku pa manusiyaꞌ yaꞌ hanak.”

Si Mariyam tinammuhan meꞌ malaikat

26Na pag taabut nnom buwan battong si Elisabet, lay na baw sohoꞌ Tuhan malaikat looy siꞌ, yana Jibrail, pilay pa disu kawum inawnan Nasaret ndooy ni Jalil. 27Ndooy siꞌ, lay ya nammuhan disu budjang inawnan si Mariyam. Iya ilay magtunang ka disu lalla inawnan si Yusup, disu panubuꞌ Sultan Daud. 28Yuk Jibrail ni si Mariyam, “Ū Nang, sinupaatan sina ko meꞌ Tuhan. Maka luu na pin ya ngunungan kau.”

29Si Mariyam baw siꞌ tu, yaꞌ na katoon-toonan na pamiki na sampay papiha-piha na ga ya bong ongoy ya bay binaan meꞌ looy.

30Pag-anu yuk Jibrail, “Daa ko ba tawu Mariyam. Kau ina lay pineneꞌ meꞌ Tuhan sinupaatan. 31Pakale ko. Song battong na sina ko. Pag maddi nu ina mintu, lalla anak nu. Awnan nu sa ya si Isa. 32Anak nu ina mintu jama langkaw banahan ntan na sampay ginalla lagi Anak Tuhan Mahatinggi. Maka ndean iya na sina mintu meꞌ Tuhan pagkasultan bboꞌ na mattoꞌ yana Sultan Daud. 33Maka anak nu ina mintu magbayaꞌ ni siga pagkahi nu panubuꞌ si Yaꞌkub saumu. Boꞌ na, pamarinta na ina yaꞌ na luu katapusan na.”

34Pag halling si Mariyam niiya, “Pooy doꞌ lay la meꞌ looy? Aku bitu budjang gi. Yaꞌ san ku bay pingkaꞌ sitapit ka lalla!”

35Pag tampung malaikat looy, “Luu du sina mintu Rū Sutsiꞌ takka pitu pa mman nu. Maka liput du sina ko meꞌ kawasa Tuhan Mahatinggi nganggaosan kau mari ko battong na. Sangkon anak nu ina mintu sutsiꞌ maka ginalla Anak Tuhan. 36Maka luu gi situ bāꞌ ku ningkau ni kapasal kampung nu si Elisabet. Minsan ya toa na, batnaa nnom buwan na battong na. Maka anak na ilay mintu, meꞌ ningkau du lalla. Bong ni bay bistahan jama, yaꞌ na konoꞌ luu masa na hanak, 37sugaꞌ bong Tuhan, yaꞌ luu tunmanūn niiya.”

38Pag tampung si Mariyam, “Aku itu ata Tuhan sadjaꞌ. Kamura-murahan binakbul du bay bitsala nu siꞌ.”

Pus meꞌ looy, lay na lakka malaikat looy.

Si Mariyam ngandaꞌ-ngandaꞌ si Elisabet

39Na luu jaꞌ siꞌ daka dangoy ngallaw, lay na baw sakap si Mariyam, boꞌ na pilay deꞌ-dēꞌ pa lumaꞌ ga si Jakariya ndooy ni kabuntuꞌ-buntuan Yahudiya. 40Takka jaꞌ siꞌ ni lumaꞌ da, lay na ya nginganan si Elisabet sambayan na muwan salam duwaa.

41Na pag takale si Elisabet halling si Mariyam, magti usik pabasag anak-anak njawom battong na. Maka inassob na ga si Elisabet meꞌ Rū Sutsiꞌ. 42Sangkon, lay na ya mitsala pahaddo, yuk na, “Uy Mariyam, lay na bitu ko sinupaatan meꞌ Tuhan labi man mimon karandahan! Damikiyan, anak-anak naa pun njawom battong nu sinupaatan du. 43Jama oy doꞌ tu meꞌ aku taggahaꞌ luu na ga nneꞌ Papuꞌ ku takka pitu pa mman ku? 44Kon ku tau kau nneꞌ na batan pag bay jaꞌ siꞌ takē ku halling nu nsiniꞌ, sarunduun du usik pabasag anak njawom battong ku ni kagāk na. 45Sarī gi,” yuk si Elisabet, “inaa ina man nu njawom supaat mehe sabap meꞌ nu pitsayaꞌ mastiꞌ binakbul jaꞌ umanat man Tuhan ma bay pinasampay ningkau.”

Si Mariyam mudji Tuhan

46Yuk si Mariyam baw siꞌ tu, “Pupus hilas njawom atay ku muwan pudji pa Tuhan. 47Tud gāk ku ni Tuhan, yana tukang nalamat aku. 48Meꞌ aku disu ata na, san ku jama pilay-pitu jaꞌ, lay gi du ku paruli na. Labba man batnaa, pangkat-mamangkat na jama ngawnan aku na situ danda sinupaatan. 49Batan kahaylan-haylan baw bitu ituu ma bay tinakdil meꞌ Tuhan Sangat Kawasa niyaku. Bana-bana du iya Mahasutsiꞌ. 50Manimbang ya ni sagannap ma ngisbat iya pangkat-mamangkat. 51Wā ya makitahan manusiyaꞌ ehe kawasa na ni jinisan pabuwatan na kahaylan-haylan. Pinalahi meꞌ na man bihing na sagannap ma abbuhan, ma mista dī da pandoy. 52Maka llabbos meꞌ na sagannap sultan ma karomanan na llabbos. Sugaꞌ soysoy diyoꞌ pangatayan na, mastiꞌ inangkat jaꞌ meꞌ na. 53Sagannap ma lingantu, pinaasso leꞌ na ka jinisan kaayaran. Boꞌ jama dayahan ina, palakka na na limboy-limboy tangan sadjaꞌ. 54-55Batnaa, luu na takka tabang Tuhan ningkitabi siga ata na bangsa Israil. Tud yaꞌ du bay takupan Tuhan janjiꞌ na ni kabboꞌ-bboan tabi Nabi Ibrahim ka ga panubuꞌ na manimbang ningkitabi saumu.”

56Na si Mariyam siꞌ tu, lay na doꞌ ndooy man si Elisabet ga tallum buwan boꞌ na bay moleꞌ.

Si Yahiya ma Tukang Mandi pinamaddihan

57Na pag taabut waktu man si Elisabet maddi, pag pōꞌ anak na, lalla du bana. 58Pag taaka meꞌ siga jama ni bihing lumaꞌ da ka siga lūng-kampung da pasal ehe timbang Tuhan njataꞌ si Elisabet, tabeꞌ na du sila gāk niiya.

59Pag taabut wawuꞌ ngallaw umu anak-anak looy, lay na baw sila kumpo-kumpo ballang ngislam iya man da mean saraꞌ agama Yahudi. Na ga jama ndooy baw siꞌ tu doman na ngawnan anak-anak looy meꞌ awon mmaꞌ na du, si Jakariya. 60Sugaꞌ yuk nneꞌ na, “Daa ba. Si Yahiya sina awon na.”

61Yuk da baw siꞌ tu sikamimon, “Uy, yaꞌ gi baw bina la luu bay pingkaꞌ awon meꞌ naa ni lūng-kampung bi.” 62Dari lay na pin sila ngisalat ni mmaꞌ na nilaw bong soy awon karomanan na.

63Bbuwatan si Jakariya baw siꞌ tu, lay ngisalat maku man na nuwat. Pag suwat na, “Si Yahiya sina awon na.” Pag batsa da, tud bay jayip sila. 64Boꞌ ilooy gi man magdaruhun jayip da batan sarunduun du kabitsala si Jakariya sampay lay na ya mudji Tuhan. 65Dari siꞌ, sampay mimon jama ni kawum da, pag taaka da kahalan anak-anak looy bay inislam, tud bay haylan sila. Boꞌ habal na ilay siꞌ, lay na lataꞌ ni sikaliput kakawum-kawman ndooy ni kabuntuꞌ-buntuan Yahudiya. 66Dari sagannap ma bay kaakahan meꞌ looy siꞌ, papiha-piha na pin bong oy na ilay mintu kadarihan anak-anak looy pag mehe na. Batan tumatandaꞌ na ninsila, mastiꞌ luu jaꞌ Tuhan ngunungan iya.

Si Jakariya nunaꞌ

67Na balik ta pa llaw anak si Jakariya bay inislam, lay inassob si Jakariya meꞌ Rū Sutsiꞌ sampay lay na ya masampay umanat Tuhan, yuk na,

68“Pudji tabi Papuꞌ tabi Tuhan, ilooy ma sinumba meꞌ bangsa tabi Israil. Ituu na situ masa man na pitu maddusan kitabi sukuꞌ na man jawom komkoman siga banta tabi.

69-70Tinuman na situ meꞌ Tuhan bay janjiꞌ na ni awwal jaman, ilooy ma bay sohoꞌ na sinuwatan ni kanabi-nabihan. Batan luu na du sina papitu na pa mman tabi disu tukang nalamat. Iya ilay sukup kawasa maka panubuꞌ Sultan Daud.

71Iya na sina mintu maddusan kitabi man siga banta tabi sampay na mimon ma lammis ningkitabi.

72Batan yaꞌ takupan Tuhan bay pagsulutan na ka kabboꞌ-bboan tabi manimbang ningkitabi siga panubuꞌ da.

73Janjiꞌ ma bay sinapahan meꞌ na ni bboꞌ tabi Nabi Ibrahim, mastiꞌ tinuman na sina meꞌ na.

74Batan pinaddusan na situ kitabi meꞌ na man komkoman siga banta tabi supaya sumunsayaꞌ na kitabi numba iya, yaꞌ na luu kahanggawan tabi,

75maka supaya kitabi sutsiꞌ ka intong ni awpan na halloman tabi llum.”

76Pag-anu siꞌ, yuk si Jakariya ni anak na,

“Kau ina Toꞌ, bbos-bbos inawnan sina ko nabi Tuhan Mahatinggi. Duhuꞌ gi sina ko man Papuꞌ naddiya pangatayan manusiyaꞌ supaya pitsayaꞌ na sila niiya pag takka na.

77Kau na sina mintu mahati jama bong pooy meꞌ da koleꞌ kaampunan man Tuhan ni mimon dusa da supaya sila paddus man hukuman na.

78Kon ina Tuhan bay nganggantaꞌ meꞌ naa sabap mehe timbang na ka aseꞌ na ni manusiyaꞌ. Sangkon luu na sina mintu papitu na Almasi, yana tukang nalamat man sulgaꞌ. Katakka na ina mintu meꞌ karuha mataallaw pakallat muwan dantaꞌ ni manusiyaꞌ.

79Batan iya ina yana sūꞌ para ni manusiyaꞌ ma njawom lindom, yana sagannap ma awam ni kabanahan sampay tawu ni kapatoy. Maka iya na sina magmundaan kitabi supaya mahap na kitabi pa Tuhan maka supaya tatammu tabi na lān kasalassayan ka pagkahi tabi manusiyaꞌ.”

80Na anak si Jakariya siꞌ tu, song paehe song pataggu na pin iman na. Pag mehe na, ndooy na jaꞌ ya maglahat ni lahat lau-lau yaꞌ maglumaꞌ ngkod-ngkoran yaꞌ gi bay taabut masa man na nagnaꞌ masaplag ni bangsa Israil.

Currently Selected:

Lukas 1: sjm

Highlight

Copy